Ashuŋ Shunso 26

Pɔɔl ka ba malga ŋ kuŋ mbe kumu Agripa be anishito be asheŋ

1Nɛ Agripa kaŋɛ Pɔɔl: “N sa fo ekpa nɛ fo malga ŋ kuŋ fo kumu.” Nɛ Pɔɔl teŋi mbe enɔ to nseŋ fara a malga le a kuŋ mbe kumu:

2“Ewura Agripa, k la kumulela nna ga ŋ ka tiŋ n yili fo anishito nfe kabre nɛ m malga ŋ kuŋ ma kumu ashi asheŋ nɛ Juwebi na ku n deŋi ma kikɛ to. 3Kumo alɛ baŋ kukwe nna ŋkpal kananɛ fo nyi Juwebi be edaŋkareana na nɛ asheŋ nɛ b kɔ a ji abar emɔrɔana na kikɛ nɛnɛ na so. Amoso, mee kule fo fanɛ fo ji kanyiti n nu ma demu ere.

4Juwebi na kikɛ nyi ma kebaawɔtɔ nɛ n daa wɔ to saŋɛ nɛ n daa la kebibi na kikɛ. B nyi fanɛ sososo na ma efuli so nɛ Jerusalɛm to nɛ ŋ ki esa. 5Nɛ baa sha keji kashenteŋ, baaŋ kaŋɛ fo fanɛ dra dra na kikɛ nɛ b pin ŋ ka wɔ katuŋ nɛ k bee bɛ anyi be mbraana na so nɛnɛ a chɔ ntuŋ nɛ a ka na kikɛ na, katuŋ nɛ baa tre Efarisiana be katuŋ na. 6Ama ma e yil nfe kabre nɛ baa ji ma demu ŋkpal ŋ ka kɔ kɔnɔ nɛ Ebɔrɛ nase n sa an nanaana na be tama so. 7Kɔnɔ naseso koŋwule nɛ anyi be basa be nnaŋ kuduanyɔ ebi na bee bunyaŋ Ebɔrɛ kapa nɛ kanyɛ nsaa tama kenya na gbagba chap na. Yiramu, le be tama ere malɛ so nɛ Juwebi na bee ku asheŋ a deŋi ma na. 8Manɛ e ba nɛ menyi Juwebi maaŋ tiŋ n yirda fanɛ Ebɔrɛ bee tiŋi basa luwu to?

9Ma alɛ gba daŋ yili kumo nna fanɛ meeŋ wora kusɔ kama n tiŋ n jija Nazarɛt be Yesu be ketre na. 10Loŋ malɛ nɛ n daŋ wora ashi Jerusalɛm. N daa sɔ a chɛ to nna a kaŋɛ fanɛ bumo be luwu na daga bumo. 11N daa wɔtɔ nna a shin nɛ baa gberge bumo kusoe ashi nshɛrbuana na to nseŋ daa kɔ a fin kananɛ meeŋ wora nɛ b kaŋɛ fanɛ b maaŋ naŋ yirda Yesu na. Agbo daŋ pɛ ma ga ŋkpal bumo so nɛ n yɔ hale nde pɔtɛana to gba nɛ n ya tɔrɔ bumo.”

Pɔɔl ka malga kananɛ e ki ebɛsopo be asheŋ

12Le be kesheŋ nɛ n daŋ kule ekpa ashi bɔrɛmatapowuraana na kutɔ a yɔ Damaskɔs nɛ n ya wora. 13Yiramu, kapaso ko e daa la nɛ n wu kefulto ko ka fuli to a chɔ epeŋi n nyaŋɛ ashi ebɔrɛso m ba yuu ma nɛ basa nɛ an daa na na so. 14Ndoŋ nna nɛ anyi kikɛ tɔr kasawule nɛ n nu ebɔl ko ka bee bishi ma Hibruw to: ‘Sɔɔl, Sɔɔl, manɛ e ba nɛ fee tɔrɔ ma? Fo gbagba be kumu nɛ fee doro fanɛ kananɛ kena bee to keya a sela mo nyɛnpe be kekpabi a doro mo gbagba be kumu na.’ 15Nɛ m bishi: ‘Fo wanɛ Enyɛnpe?’ Nɛ Enyɛnpe na kaŋɛ: ‘Ma Yesu nɛ fee tɔrɔ na. 16Ama niŋi to ŋ koso n yili. N lar fo so nna nɛ n shin nɛ fo ki ma eshumpo. A daga fanɛ fo ya kaŋɛ basa ma asheŋ nɛ fo wu kabre ere nɛ amo nɛ meeŋ ŋini fo kachako so ere be asheŋ. 17Meeŋ mɔlga fo ashi Israɛl be basa nɛ nnyamase nɛ meeŋ shin nɛ fo yɔ bumo kutɔ ere kutɔ. 18Ya bugi bumo be anishi n shin nɛ b lar bumo be tentembiri na to m ba kefulto to. Shin nɛ b lar Setani be eleŋ to m ba Ebɔrɛ peya to n shin nɛ b yirda ma nɛ n ta bumo be alubi m paŋ bumo nɛ b nya bumo be kakpa ashi Ebɔrɛ be basa laraso na to.’

Pɔɔl ka malga a bɔ Yesu be kubɔya na be asheŋ

19“Amoso, Ewura Agripa, m maŋ kini kenu n sa bɔrɛdare nɛ k shi ebɔrɛso m ba ma kutɔ na. 20Damaskɔs nɛ n fara m bɔ kubɔya na nseŋ yɔ Jerusalɛm nɛ Juwebi be efuli so kikɛ nɛ nnyamase to n ya kaa bɔ kubɔya na fanɛ b lar bumo be alubi to m ba Ebɔrɛ kutɔ m ba kaa wora asheŋ nɛ a beeŋ ŋini fanɛ b lar bumo be alubi to kashenteŋto. 21Ŋ ka wora le ere so nɛ Juwebi na nyaŋ ma ashi bɔrɛlambu na to n fin kemɔ ma na. 22Ama Ebɔrɛ chɛ ma to hale m ba fo kabre nɛ n yili nfe a ji ma shɛda a sa ekama nyam, begboŋi nɛ bewurbi kikɛ na. Kusɔ nɛ mee malga e la kusɔ koŋwule chap nɛ anebiana nɛ Mosis gba kaŋɛ fanɛ k beeŋ wora na. 23Kumo e la fanɛ, a daga fanɛ Kristo na e ji awurfoŋ nseŋ wu n juŋkpar ekama n tiŋi luwu to ŋ ŋini Juwebi nɛ nnyamase fanɛ baaŋ tiŋ n nya kumɔlga, kumo alɛ e la kefulto bumo kutɔ.”

24Pɔɔl ka yili a malga le a kuŋ mbe kumu na nɛ Fɛstes ponte mo so ŋ kaŋɛ: “Pɔɔl, keyeŋiyeŋi e kɔ fo na. Fo kawɔl be kenyi damta ere e naa shin nɛ keyeŋiyeŋi tɔr fo so na.” 25Nɛ Pɔɔl kaŋɛ: “Yiramu, m maa lɔ nna. Ma nɛ ma nfɛra lela nɛ kashenteŋ be mmalga nɛ mee malga na. 26Ewura Agripa, n tiŋ n ta kenyɛn m malga fo kutɔ nna ŋkpal fo ka nyi asheŋ ere kikɛ so. Ma alɛ bee tama fanɛ fo ta asheŋ na be kekama n wɔtɔ fo kagbene to, ŋkpal manɛ so, asheŋ na daa maŋ wora ŋ ŋana. 27Ewura Agripa, fo yirda anebiana na a? N nyi fo ka yirda bumo.” 28Nɛ Agripa bishi Pɔɔl: “Fo tama fanɛ feeŋ tiŋ n yili epul ere to n shin nɛ ŋ ki Kristo be ebɛsopo a?” 29Nɛ Pɔɔl kaŋɛ: “Nɛ fo ki Kristo be ebɛsopo epul ere to ŋko kachako so gba, kusɔ nɛ mee kule Ebɔrɛ e la fanɛ e shin nɛ fo nɛ bumo nɛ b yil nfe kabre a nu kamalga ere e ba ki kananɛ n du ere. Kusɔ nɛ m maa kule nɛ men nya e la kananɛ n wɔ ŋgbɛlɛbi to ere.”

30Kumo be kaman nɛ ewura na nɛ gomena na nɛ Benis nɛ basa nɛ b ka na kikɛ koso a yɔ nsaa kaŋɛ abar: 31“Kanyɛn ere maŋ wora kusɔ kama nɛ k daga mbe luwu ŋko kabuti.” 32Nɛ Agripa kaŋɛ Fɛstes: “Nɛ kanyɛn ere daa maŋ kule fanɛ Romebi be ewurgboŋ na e keni mbe demu ere to nna, an daa beeŋ shin nɛ e lar kabuti ere to.”

Currently Selected:

Ashuŋ Shunso 26: GJNb

Highlight

Copy

Compare