Ashuŋ Shunso 21

1An ka kela bumo n loge nɛ an luri ekuloŋgboŋ na to m bɔla nchu so n ta tinini loŋ n ya fo Kɔs ŋ klade n yɔ Rodes n ya shi ndoŋ n yɔ Patara. 2Ndoŋ nɛ an ya nya ekuloŋgboŋ ko nɛ k bee shin nɛ k yɔ Fenisha nɛ an luri kumo to n yɔ. 3An ta loŋ m ba kaa wu Saipres nseŋ yige kumo anyi be bena so n lɛ nseŋ ta n yɔ Siriya n naŋ ta n ya yili Tayɛ, kakpa nɛ ekuloŋgboŋ na daa sha keyaa lara kumo be esulɔ. 4Ndoŋ nɛ an ya wu beyirdapoana ko n ji bɔkwe bumo kutɔ nɛ b bɔla Kiyoyu Cheeŋ na be eleŋ to ŋ kaŋɛ Pɔɔl fanɛ e sa maŋ yɔ Jerusalɛm. 5Ama anyi be keyige bumo n yɔ be saŋɛ ka ba fo nɛ an lar bumo kutɔ ndoŋ. Bumo kikɛ nɛ bumo be beche nɛ mbia e daŋ shuŋi anyi n lar kadegboŋ na to nɛ an kikɛ ya gbir shishɛr so ashi teku na ase ŋ kule Ebɔrɛ. 6Kumo be kaman nɛ an kela abar ŋkeŋ shin nɛ an luri ekuloŋgboŋ na to nɛ bumo alɛ bɛta n yɔ epe.

7An ka naŋ fara anyi be enite na nɛ an lar Tayɛ n yɔ Petɔlemeeyis n ya ji kachɛ koŋwule ndoŋ n chɔrɔ bekurgepoana na. 8Kumo be ŋklade nɛ an lar ndoŋ n yɔ Sizariya n ya luri baru lela malgapo Filip pe. E daa la basa ashunu nɛ bebɛsopoana na daŋ lara Jerusalɛm na be eko nna. 9E daa kɔ mo gbagba be mbichebi kurgeso bena. B daa la anebicheana nna a wɔtɔ a maŋ kil. 10An daŋ wora nchɛnnyɔ nɛ anebi ko nɛ baa tre Agabes na ya shi Judiya m ba. 11E ka ba anyi kutɔ nɛ e ba ta Pɔɔl be kreso ŋ kre mo gbagba be aya nɛ enɔana nseŋ kaŋɛ: “Le nɛ Kiyoyu Cheeŋ na kaŋɛ: ‘Le nɛ Jerusalɛm to be Juwebi na beeŋ kre kreso ere wura nseŋ ta mo m bɔɔ nnyamase enɔ.’ ” 12An ka nu loŋ nɛ anyi nɛ basa na kule Pɔɔl fanɛ e sa maŋ naŋ yɔ Jerusalɛm. 13Nɛ e bishi bumo: “Manɛ so nɛ menyee wora le ere nsaa shu le a jija ma kagbene? Ŋkpal Enyɛnpe Yesu so meeŋ shuli fanɛ b mɔ ma ashi Jerusalɛm to gba, a bishi kekre ma ndoŋ.” 14An daa maŋ tiŋ n shin nɛ e chɛrga mbe nfɛra, amoso, an daŋ yige mo nna nseŋ kaŋɛ: “Kusɔ kama nɛ Enyɛnpe yili e wora loŋ.”

15An ka wora nchɛnnyɔ ndoŋ nɛ an bela ase n yɔ Jerusalɛm. 16Anyi nɛ Sizariya be bebɛsopo na be beko e daŋ yɔ nɛ b keta anyi n yɔ anyi be kowurnyɛn Meneesɔn pe. E daŋ shi Saipres nna a la ebɛsopo ashi mbe kebiato kikɛ.

Pɔɔl ka ya chɔrɔ Jeems be asheŋ

17An ka ba Jerusalɛm nɛ bekurgepoana na bugi kagbene n sɔ anyi kagbenefuliso 18Kumo be ŋklade nɛ anyi nɛ Pɔɔl yɔ nɛ an ya chɔrɔ Jeems. Saŋɛ na so nɛ asɔriebi be benimuana na kikɛ wɔ ndoŋ. 19Ndoŋ nna nɛ Pɔɔl chɔrɔ bumo nseŋ kaŋɛ bumo asɔ nɛ Ebɔrɛ bɔla mo so n wora nnyamase to kikɛ nyam. 20B ka nu mbe kamalga na nɛ bumo kikɛ di Ebɔrɛ epaŋ nseŋ kaŋɛ Pɔɔl: “Fo wu ai, ekurgepo, Jerusalɛm ere to be Juwebi damta gba ki beyirdapo naniere, ama bumo alɛ kraa mɔ bumo be amu nna a bɛ Mosis be mbra na so. 21Basa kaŋɛ bumo fanɛ fo wɔtɔ nna a ŋini Juwebi nɛ b wɔ nnyamase be efuliana so nna fanɛ b yige kebaabɛ Mosis be mbra na so. B yɛ fo yɛ, b sa maa ku bumo be mbia atutu, bumo alɛ e sa maa bɛ Juwebi be edaŋkare na so. 22Bumo be kenu fanɛ fo ba malɛ baŋ fuli nna, amoso, nuso nɛ anyeeŋ wora? 23Wora kusɔ nɛ anyeeŋ kaŋɛ fo ere. Benyɛn ana ko nase kɔnɔ n sa Ebɔrɛ a wɔ nfe. 24Ya ti bumo so nɛ b fɔr fo nɛ bumo be eyurpi n lɛ nseŋ shin nɛ fo ka bumo be eyurpi be kefɔr n lɛ be kukɔ n sa bumo nɛ b tiŋ n shin nɛ b she bumo be amu. Loŋ nɛ ekama beeŋ pin fanɛ asɔ nɛ b nu na kikɛ la efɛ nna, ŋkpal fo gbagba ka bee bɛ Mosis be mbra na so so. 25To, nnyamase nɛ b ki bebɛsopo na malɛ, an sibɛ kawɔl n shuŋi bumo fanɛ b sa maŋ naa ji nlɔŋɛjibi ŋko ŋklaŋ ŋko a we kusɔbɔya kama nɛ b maŋ teŋ, nseŋ naŋ kaŋɛ bumo fanɛ b baa gelge kubojuaji gba.” 26Ndoŋ nna nɛ Pɔɔl shin nɛ mo nɛ basa na yɔ ŋ klade n ya wora bumo be kefɔr n lɛ be daŋkaresheŋ na nseŋ shin nɛ e yɔ bɔrɛlambu na to n ya kaŋɛ kachɛ nɛ baa loge eyurpi be kefɔr n lɛ be daŋkare na nseŋ lara basa na be ekama be sarga.

B ka pɛ Pɔɔl ashi bɔrɛlambu na to be asheŋ

27Nchɛnshunu na ka taga to nɛ Eeshia be kasawule so be Juwebi ko wu Pɔɔl bɔrɛlambu na to nseŋ we n wɔtɔ jimaŋ na kikɛ nseŋ nyaŋ Pɔɔl 28m ponte ŋ kaŋɛ: “Israɛlebi, men ba chɛ to. Kanyɛn nɛ e na kaplɛkama a ŋini basa kikɛ asheŋ nɛ a bee da Israɛlebi nɛ Mosis be mbra na nɛ bɔrɛlambu na so e ba nfe hale m bar nnyamase bɔrɛlambu na to nɛ b ba jija kumo kananɛ k du cheembi na.” 29B ka daŋ wu Trɔfimes nɛ e shi Ɛfeses nɛ Pɔɔl kade na to so nɛ b daŋ tama fanɛ Pɔɔl daŋ keta mo nna n luri bɔrɛlambu na to. 30Ndoŋ nna nɛ kadegboŋ na to ebi kikɛ luri kebagato to nɛ basa na kikɛ shile m ba abar so m ba nyaŋ Pɔɔl ŋ gberge mo n lar bɔrɛlambu na to nseŋ ti bɔrɛlambu na be mbuna epul na to. 31Jimaŋ yenso na daa sha kemɔ Pɔɔl nna nɛ esa ko ya kaŋɛ Romebi be benapo be enimu na fanɛ Jerusalɛmebi nyaŋɛ to. 32Epul na to nɛ enimu na lara ekrachi ko nɛ benapo ko nɛ b bɛ mo so n nya manaŋ n yɔ jimaŋ na to. B ka baŋ wu mo nɛ benapo na nɛ b yige Pɔɔl be kebri. 33Nɛ enimu na yɔ Pɔɔl kutɔ n ya shin nɛ b pɛ mo nseŋ shin nɛ b ta ŋgbɛlɛbi anyɔ ŋ kre mo. Kumo be kaman nɛ e bishi: “Nuso be esa e la kanyɛn ere, nɛ manɛ nɛ e wora?” 34Ndoŋ nna nɛ jimaŋ na gbar n juge to. Kebagato na be keshi na so benapo be enimu na daa maŋ tiŋ m pin kusɔ nɛ k baŋ wora, amoso, e daŋ shin nɛ mbe benapo keta Pɔɔl nna n yɔ kesɔnyige be ebu lempo na to. 35Ebu na be kabondiikpa nawule nɛ b daŋ fo nɛ benapo na maŋ mo so ŋkpal kananɛ jimaŋ yenso na nyaŋɛ to na so. 36Bumo kikɛ daa shil nna a buu mo a ponte a kaŋɛ: “Men mɔ mo.”

Kananɛ Pɔɔl malga ŋ kuŋ mbe kumu be asheŋ

37B ka daa shin nɛ b ta Pɔɔl n luri kesɔnyige be ebu lempo na to nɛ e malga benapo be enimu na kutɔ ŋ kaŋɛ: “Jande, shin nɛ ŋ kaŋɛ fo kusɔ ko.” Nɛ benapo be enimu na bishi mo: “Fee nu Griik to a? 38Kumo ere, mannɛ fo e la Ijipt be kanyɛn nɛ e daŋ koso jemanɛ ko so a kɔ mbe abane kena nseŋ keta benapo yenso ŋgboŋ ana n luri kiyi to nna ŋko?” 39Nɛ Pɔɔl kaŋɛ: “N la Juw nna ashi Silisia be Taases nɛ k maŋ la kade fɔmbi na. Jande shin nɛ m malga n sa basa ere.” 40Ndoŋ nna nɛ benapo be enimu na sa Pɔɔl ekpa nɛ e yili ebu na be kabondiikpa nseŋ wora basa na enɔ nɛ b la to nɛ e malga Hibruw to ŋ kaŋɛ:

Currently Selected:

Ashuŋ Shunso 21: GJNb

Highlight

Copy

Compare