Ashuŋ Shunso 22

1“M braana nɛ n tutoana, men lo to n nu ma kamalga nɛ mee sha kemalga ŋ kuŋ ma kumu ashi menyi kutɔ ere.” 2B ka nu e ka bee malga Hibruw to nɛ bumo kikɛ wora shruum a chɔ sososo b ka fara n lo to na nɛ Pɔɔl kaŋɛ: 3“N la Juw nna ashi Silisia be Taases, ama Jerusalɛm to nfe nɛ b bela ma nɛ Gameelial daa la ma eŋinipo. Kananɛ k daga fanɛ esa e bɛ an nanaana be mbra na so na nɛ b daŋ ŋini ma nɛ n ta ma kumu m bɔɔ Ebɔrɛ enɔ nɛ n shuŋ mbe kushuŋ fanɛ kananɛ menyi kikɛ nfe ere bee wora na. 4N daŋ tɔrɔ basa nɛ b bɛ le be ekpa ere na so hale a sha kemɔ bumo kikɛ. Beche nɛ benyɛn kikɛ nɛ n daŋ pɛ n shin nɛ b ti ebu. 5Bɔrɛmatapo nimuso nɛ nshɛrwuraana na kikɛ e la ma shɛdajipoana. Bumo kutɔ nɛ n daa sɔ nwɔl a yɔ bekurgepo Juwebi nɛ b wɔ Damaskɔs na kutɔ nɛ b sa ma ekpa nɛ m pɛ loŋ be basa na ŋ kre bumo ŋgbɛlɛbi m ba Jerusalɛm to nfe m ba kaa shin nɛ baa gberge bumo kusoe.

Pɔɔl ka malga kananɛ e ba ki ebɛsopo be asheŋ

6Kachako ŋ ka wɔ loŋ be enite na to m ba kaa taga to Damaskɔs kapaso ko nɛ kefultogboŋ ko nyaŋɛ n shi ebɔrɛso m ba yuu ma so. 7Ndoŋ nna nɛ n tɔr kasawule nseŋ nu ebɔl ka bee bishi ma: ‘Sɔɔl, Sɔɔl, manɛ e ba nɛ fee tɔrɔ ma?’ 8Nɛ m bishi: ‘Fo wanɛ, Enyɛnpe?’ Nɛ e kaŋɛ: ‘Ma Nazarɛt be Yesu nɛ fee tɔrɔ na.’ 9Ma nɛ basa nɛ b daa la na daŋ wu kefulto na, ama b daa maŋ nu esa nɛ e daŋ malga n sa ma na be ebɔl na. 10Ndoŋ nna nɛ m bishi: ‘Nɛ nuso nɛ meeŋ wora Enyɛnpe?’ Nɛ Enyɛnpe na kaŋɛ ma: ‘Niŋi to ŋ koso n luri Damaskɔs nɛ b kaŋɛ fo kusɔ kama nɛ Ebɔrɛ bee sha fanɛ fo wora.’ 11Ŋkpal kefultogboŋ na so n daŋ tan nna, amoso, m braana na e daŋ pɛ ma enɔ to n luri Damaskɔs to. 12Kanyɛn ko daa wɔtɔ a la abɔrɛshenshapo a bɛ anyi be mbra na so nɛ baa tre mo Ananiyas. Damaskɔs to be Juwebi na kikɛ daa sa mo bunyaŋ nna. 13Mo e daŋ ba yili ma kutɔ ŋ kaŋɛ ma: ‘Ekurgepo Sɔɔl, naŋ bɛta a wu.’ Epul na malɛ to nɛ n naŋ nya ma anishi n wu mo. 14Nɛ e kaŋɛ: ‘An nanaana be Ebɔrɛ na e lara fo fanɛ fo pin kusɔ nɛ e bee sha kewora nseŋ shin nɛ fo wu mbe Kenya cheembi na n naŋ shin nɛ fo nu mbe ebɔl na. 15Ŋkpal manɛ so, feeŋ ki mbe shɛdajipo ŋ kaŋɛ basa kikɛ mbe kusɔ nɛ fo wu nɛ kusɔ nɛ fo nu be asheŋ. 16Amoso, sa maŋ naŋ jo, koso n shin nɛ b bɛr fo kabɔrɛbɛr a ti Yesu be ketre na nɛ Ebɔrɛ e fɔr fo alubi n lɛ.’

B ka tre Pɔɔl nnyamase to be asheŋ

17Kumo be kaman nɛ m bɛta m ba Jerusalɛm m ba kaa kule Ebɔrɛ bɔrɛlambu na to nseŋ ku bɔrɛdare n wu Enyɛnpe Yesu nɛ e kaŋɛ ma: 18‘Nya manaŋ n lar Jerusalɛm, ŋkpal manɛ so, nfe be basa ere maaŋ yirda ma shɛda nɛ fee sha keji n sa bumo ere.’ 19Nɛ ŋ kaŋɛ: ‘Enyɛnpe, b baa nyi geeŋ ŋ ka daŋ yɔ nshɛrbuana to n ya pɛ basa nɛ b yirda fo na nseŋ bri bumo. 20Saŋɛ nɛ baa mɔ fo shɛdajipo Stiven na nɛ ma alɛ gba yil a keni mbe bemɔpo na be asɔbuuso so nsaa kaŋɛ fanɛ kashenteŋto e daga luwu.’ 21Nɛ Enyɛnpe kaŋɛ ma: ‘Lar nɛ n shuŋi fo kufɔ kufɔ nnyamase kutɔ.’ ”

22Pɔɔl ka bee malga asheŋ na kikɛ nɛ basa na bee nu. Ama e ka ba malga keyɔ nnyamase na kutɔ be asheŋ nɛ b fara a ponte ga a kaŋɛ: “Men lara mo durnya ere to. Men mɔ mo!” 23B daŋ baa ponte to nna a kpa bumo be nle a lɛ nsaa jɔ shishɛr a lɛ esoso. 24Nɛ Romebi be benapo be enimu na shin nɛ mbe benapo ba keta Pɔɔl n yɔ kesɔnyige be ebu lempo na to nseŋ shin nɛ e kaŋɛ bumo fanɛ b kuya Pɔɔl so nɛ e kaŋɛ bumo kusɔ nɛ k ba nɛ Juwebi na bee boŋ to a malga a gbiti mo loŋ na. 25B ka kre mo nɛ b kuya mo so nɛ Pɔɔl bishi enapo nimusobi ko nɛ e daa yil ndoŋ na le: “Ekpa wɔtɔ fanɛ b kuya Rom be efuli so be esa so nɛ b maŋ ji mo demu ŋ keni a?” 26Enapo nimusobi na ka nu loŋ na nɛ e yɔ benapo be enimu na kutɔ n ya bishi mo: “Manɛ nɛ fo yɛ fo wora ere? Kanyɛn na la Rom be esa nna.” 27Ndoŋ nna nɛ benapo be enimu na yɔ Pɔɔl kutɔ n ya bishi mo: “Kaŋɛ ma, Rom be esa e la fo a?” Nɛ Pɔɔl shuli so ŋ kaŋɛ: “Mm.” 28Nɛ benapo be enimu na kaŋɛ: “Amansherbi damta nɛ ŋ ka n sa abane pɔɛŋ nseŋ ki Rom be esa.” Nɛ Pɔɔl kaŋɛ: “Ma ere, b kurge ma Rom be esa nna.” 29Epul na to nɛ basa nɛ b daa sha nɛ b bishi Pɔɔl asheŋ na bɛta kaman nɛ kufu pɛ benapo be enimu na gba ŋkpal e ka pin Pɔɔl ka la Rom be esa nɛ ŋkpal e ka shin nɛ b ta ŋgbɛlɛbi ŋ kre mo so so.

30Benapo be enimu na daa sha kepin kusɔ nɛ k baŋ ba nɛ Juwebi na nɛ Pɔɔl daŋ baa kɔ abar loŋ nna. Amoso, kare ka chɛ nɛ e shin nɛ b saŋɛ Pɔɔl be ŋgbɛlɛbi na nseŋ shin nɛ bɔrɛmatapowuraana na nɛ nshɛrwuraana na kikɛ shɛr nɛ e shin nɛ Pɔɔl ba yili bumo be anishito.

Currently Selected:

Ashuŋ Shunso 22: GJNb

Highlight

Copy

Compare