Ashuŋ Shunso 20

Pɔɔl ka naŋ bɛta n yɔ Masɛdonia nɛ Griis be asheŋ

1Basa na be kebagato na ka baŋ loge nɛ Pɔɔl tre beyirdapoana na n ta mmalga damta n leŋ bumo to ga nseŋ kela bumo nseŋ ta n yɔ Masɛdonia n ya yɔ ndoŋ be ndeana na to 2n ya kaa ta mmalga damta a leŋ beyirdapoana na to. 3Ade be kaman nɛ e yili ndoŋ n yɔ Griis n ya ji afɔl asa ndoŋ. E daŋ naa bela ase nna nɛ e luri ekuloŋgboŋ ko to m bɔla nchu so n yɔ Siriya nseŋ nu Juwebi na ka bee sha kemɔ mo nɛ e naŋ bɛta m bɔla Masɛdonia. 4Mo nɛ Pires nɛ e shi Beriya na pibi Sopata nɛ Aristaakes nɛ Sɛkundes nɛ b shi Tɛsalɔnika na nɛ Gayes nɛ e shi Dɛbi na nɛ Timoti nɛ Eeshia be efuli so ebi Tikikes nɛ Trɔfimes na e daŋ yɔ. 5Bumo e daŋ juŋkpar n ya kaa jo anyi ashi Trowas. 6Bodobodo nɛ a maŋ kɔ yiisi be Kejigboŋ na be jemanɛ ka choŋ nɛ an yili Filipai n luri ekuloŋgboŋ ko to m bɔla nchu so n ji nchɛ anu nseŋ ya tu bumo Trowas nɛ an kikɛ ji bɔkwe ndoŋ.

Pɔɔl be lalaloge be kechɔrɔ Trowas be bebɛsopo be asheŋ

7Bɔkwe be kachɛ juŋkparso be kanyɛso ko an shɛr m bɔ enɔ n wɔtɔ kɔnɔkoŋwuleso be kawiejibi na to nɛ Pɔɔl kpal e ka beeŋ lar kade na to kumo be ŋklade na so m bɔ kubɔya na loŋ nɛ kiidiso ya fo. 8Ndia damta ko malɛ e daa wɔ esoso be ebu nɛ an daŋ shɛr na to. 9Kabrantiɛbia ko daa tase tokuro so nɛ baa tre mo Yutikes. Ŋkpal Pɔɔl ka malga n chɛr na so nɛ edi laa mo nɛ e fara a di hale n ya di n choŋ so n shi esoso be ebu sasopo na to m ba tɔr kasawule nɛ b ba nɛ b ba ta mo nɛ e wu. 10Ndoŋ nna nɛ Pɔɔl gbelge n ya teŋi mbe kumu to n dese mo so nseŋ ta mbe enɔana m mea mo nseŋ kaŋɛ: “Men sa maa fɔŋ so, e kɔ ŋkpa.” 11Kumo be kaman nɛ Pɔɔl naŋ bɛta n dii n yɔ esoso be ebu na to n ya buri bodobodo to n we. Pɔɔl ka malga bumo kutɔ loŋ hale nɛ epeŋi ya pete nɛ e yige bumo nseŋ yɔ. 12Ndoŋ nna nɛ b keta kabrantiɛbia na ŋkpa to n yɔ epe. Bumo be ŋgbene daŋ fuli bumo ga ŋkpal loŋ so.

Pɔɔl ka shi Trowas n yɔ Mailites be asheŋ

13Ndoŋ nna nɛ an juŋkpar n yɔ ekuloŋgboŋ ko to m bɔla nchu so n ta n yɔ Asɔs, kakpa nɛ an daa yɔ nɛ an ya ta Pɔɔl na. E ka daŋ bɔla aya so n yɔ ndoŋ na so nɛ e daŋ kaŋɛ fanɛ an wora loŋ. 14E ka tu anyi Asɔs nɛ an ta mo n wɔtɔ ekuloŋ na to n ta n yɔ Mitilini 15n ya yili ndoŋ n luri ekuloŋgboŋ ko to n di ŋ klade m ba baŋ Kiyɔs so n choŋ. Kumo be ŋklade nɛ an ta n yɔ Samɔs n naŋ klade n yɔ Mailites. 16Pɔɔl daa sha kekpar Ɛfeses so nna n yɔ, ŋkpal manɛ so, e daa maŋ naa sha kenaŋ n chɛr Eeshia be efuli so. E daa kuse nna nɛ e ya fo Jerusalɛm ta a ba Pɛntekɔst be kachɛgboŋ na, nɛ e beeŋ tiŋ nna na.

Pɔɔl ka kela Ɛfeses be asɔri to be benimuana be asheŋ

17Ndoŋ nna nɛ Pɔɔl yili Mailites n shuŋi kabɔ fanɛ e ya kaŋɛ ndoŋ be asɔriebi be benimuana fanɛ b shɛr mo to. 18B ka ba nɛ e kaŋɛ bumo: “Men nyi kebaawɔtɔ nɛ n daa kɔ a wɔ menyi kutɔ na yili kachɛ nɛ n fara m ba Eeshia be efuli ere so na m ba fo kabre. 19N daa shuŋ ma kushuŋ nna fanɛ kebɔrɛnya nsaa yɔɔ ma kumu saŋkama a wɔtɔ a nya kagbenejija a shu nchɛ nchɛ to ŋkpal Juwebi be nia nɛ b daa kre ma na so. 20Men nyi fanɛ saŋɛ nɛ n daŋ bɔ kubɔya na n sa menyi nseŋ ŋini menyi asheŋ basa to nɛ menyi peana na, n daa maŋ ta kusɔ kama nɛ k beeŋ chɛ menyi to ŋ ŋana menyi so kikɛ. 21Juwebi nɛ nnyamase kikɛ nɛ n daŋ fiɛ so kpakpa fanɛ b lar bumo be alubi to a bɛ Ebɔrɛ so nseŋ yirda an Nyɛnpe Yesu. 22Naniere malɛ, kenu n sa Kiyoyu Cheeŋ na so nɛ mee yɔ Jerusalɛm a maŋ nyi kusɔ nɛ k beeŋ ya wora ma ndoŋ na. 23Kusɔ nɛ m baa nyi e la fanɛ Kiyoyu Cheeŋ na bee fiɛ ma so kade kama to fanɛ kabuti nɛ etɔrɔ bee jo ma saŋko. Ama amo alɛ maŋ tir ma, ŋkpal manɛ so, m maa ta ŋ gbagba be ŋkpa ere fanɛ k la kusɔ ko ma kutɔ. 24Kusɔ nɛ k tir ma e la kananɛ meeŋ tiŋ n loge Enyɛnpe Yesu be kushuŋ nɛ e sa ma na. Kumo alɛ e la kebɔ Ebɔrɛ be kuwɔr be kakɛ na be baru lela na. 25N yɔ menyi be ekama ere nyam kutɔ n ya bɔ Ebɔrɛ be kuwura na to be asheŋ n sa menyi, ama naniere n nyi fanɛ menyi be ekama maaŋ naŋ wu ma kikɛ. 26Amoso, m baa bugi asheŋ to nna a kaŋɛ menyi kabre nna fanɛ: Nɛ menyi be ekama baŋ foe ekpa, mannɛ ma e bar kumo, 27ŋkpal manɛ so, m maŋ ta kusɔ nɛ Ebɔrɛ yili fanɛ e beeŋ wora na ŋ ŋana menyi so. 28Men baa de men gbagba be amuana so nsaa de basa nɛ Kiyoyu Cheeŋ na ta m bɔɔ menyi enɔ na so. Men baa keni Ebɔrɛ be asɔriebi nɛ e ta ŋ ki mo peya ashi mo gbagba Pibinyɛn be luwu na so fanɛ kananɛ asɔbɔyakpapo bee keni mbe asɔbɔya so na. 29Ŋkpal manɛ so, n nyi fanɛ ŋ kaŋ yɔ, befɛpo damta beeŋ ba menyi to m ba fin kemur asɔriebi na fanɛ kananɛ kuntuŋ bee luri mbolpɔ to a mur amo na. 30Menyi to be beko malɛ gba beeŋ koso kachako ŋ ku efɛ n shin nɛ beyirdapoana na e bɛ bumo so. 31Amoso, men baa da so a nyiŋi kananɛ n daŋ shu n fiɛ menyi so kenishipereso kapa nɛ kanyɛ nfɛ asa a ŋini menyi be ekama asheŋ na. 32Naniere, Ebɔrɛ be enɔ to nɛ mbe kuwɔr be kakɛ be kubɔya na be kebaawɔtɔ to nɛ mee ta menyi a wɔtɔ to na. Kubɔya na e naaŋ tiŋ n shin nɛ menyi be kenyi e wora keshi n ti so n naŋ shin nɛ men nya nɛfa nɛ Ebɔrɛ kɔ a jo nɛ e sa mbe basa cheembi na. 33M maŋ yɛlga esa kama be gbiti ŋko shuwa ŋko asɔbuuso. 34Menyi gbagba nyi fanɛ ma enɔana ere nɛ n daŋ ta n shuŋ n nya asɔ nɛ a daga fanɛ ma nɛ m braana na e nya. 35M bɔla kusɔ kama to ŋ ŋini menyi fanɛ kebaashuŋ le ere nɛ anyee chɛ bepɔshipo to nsaa nyiŋi Enyɛnpe Yesu gbagba be mmalga nɛ e kaŋɛ na: ‘Kakɛ kɔ kagbenefuli a chɔ kesɔ.’ ”

36Pɔɔl ka malga n loge nɛ mo nɛ bumo kikɛ gbir ŋ kule Ebɔrɛ. 37Ndoŋ nna nɛ bumo kikɛ ba kaa nyaŋ mo a mata bumo be amu kashaso a kela mo nsaa shu. 38Kusɔ nɛ k daŋ baa jija bumo be ŋgbene ga e daa la kananɛ e kaŋɛ fanɛ b maaŋ naŋ wu mo kikɛ na. Ade be kaman nɛ b shuŋi mo n lar ekpa n yɔ ekuloŋgboŋ nɛ e beeŋ luri na akpa.

Currently Selected:

Ashuŋ Shunso 20: GJNb

Highlight

Copy

Compare