Ashuŋ Shunso 17

B ka tɔrɔ Pɔɔl nɛ mo braana ashi Tɛsalɔnika be asheŋ

1B ta loŋ m ba bɔla Amfipɔlis nɛ Apɔlonia m ba fo Tɛsalɔnika, kakpa nɛ Juwebi be nshɛrbu ko daa wɔ na. 2Nɛ Pɔɔl yaŋ yɔ nshɛrbu na to fanɛ kananɛ e chɛr a wora kade kama to na. Mbe kewushiachɛ asa nɛ e wɔ ndoŋ a kɔ abɔrɛsibɛ na a ji basa na emɔrɔ 3a ta amo a bugi asheŋ to a ŋini bumo kananɛ a daga Kristo na ka beeŋ luri etɔrɔ to nɛ Ebɔrɛ e naŋ tiŋi mo luwu to ŋ kaŋɛ bumo: “Yesu nɛ mee malga mbe asheŋ ere e la Kristo na.” 4Nɛ bumo be beko yirda Pɔɔl be kamalga na nɛ bumo nɛ Pɔɔl nɛ Sailas ba ki basa koŋwule a bɛ Yesu so. Loŋ koŋwule na nɛ Griikebi be bedamta ko nɛ b daa bunyaŋ Ebɔrɛ na nɛ bebunyampocheana na be bedamta malɛ gba daŋ wora. 5Ama kayurbesa daŋ pɛ Juwebi na ga nɛ b chala basa fuloŋ tɔlpo ko ashi kubɔrbi so nseŋ nya jimaŋ ko n ta kade na kikɛ to n wɔtɔ awɔrgboŋ ko to nseŋ ya mel Jeesɔn pe a fin kepɛ Pɔɔl nɛ Sailas m ba sa basa na. 6B ka fin Pɔɔl nɛ Sailas ŋ gben nɛ b gberge Jeesɔn nɛ bekurgepo ko n ya sa kade na to be benimuana m ponte ŋ kaŋɛ: “Basa ere na nde kama to nna a baga amo to nseŋ ba anyi alɛ be kade ere to. 7Nɛ Jeesɔn ta bumo n wɔtɔ mo pe. Bumo kikɛ wɔtɔ nna a wora a da Romebi be ewurgboŋ na be mbraana na so a kaŋɛ basa fanɛ ewura ko malɛ gba naa wɔtɔ nɛ baa tre Yesu.” 8Ndoŋ nna nɛ jimaŋ na nɛ kade na to be benimuana na be kebagato sɔ kakpa kikɛ. 9Nɛ benimu na shin nɛ Jeesɔn nɛ mo braana na yili Pɔɔl nɛ Sailas be katelamu to ŋ ka kumo be loŋ be amansherbi pɔɛŋ nɛ b yige bumo.

Pɔɔl nɛ Sailas ka ba Beriya be asheŋ

10Kanyɛ ka baŋ biri nɛ bekurgepoana na shin nɛ Pɔɔl nɛ Sailas yɔ Beriya. B ka fo ndoŋ nɛ b yɔ ndoŋ be nshɛrbu to. 11Ndoŋebi bre daŋ bugi bumo be asoe a sha kenu kubɔya na ga nsaa koya abɔrɛsibɛ na kachɛ kama a keni ŋko Pɔɔl be mmalga na bɔla ekpa a. 12Bumo be bedamta daŋ yirda nɛ Griikebi be bebunyampocheana be bedamta nɛ Egriiknyɛn be bedamta gba ba yirda. 13Tɛsalɔnika be Juwebi na ka nu fanɛ Pɔɔl bɔ Ebɔrɛ be kubɔya na ashi Beriya gba nɛ b ba ndoŋ m ba fara a we a wɔtɔ basa na a yeŋ bumo to a wɔtɔ kebagato to. 14Epul na to nɛ bekurgepoana na nya manaŋ n shin nɛ Pɔɔl yɔ teku ase be nde to nseŋ ka Sailas nɛ Timoti Beriya to. 15Atens kikɛ nɛ bumo nɛ b daŋ shuŋi Pɔɔl a yɔ na daŋ ya yige mo nseŋ bɛta n ta Pɔɔl be ŋkela n yɔ Beriya fanɛ Sailas nɛ Timoti e ba manaŋ m ba tu mo.

Pɔɔl ka malga ashi Atens be asheŋ

16Pɔɔl ka wɔ Atens a jo Sailas nɛ Timoti nseŋ wu kananɛ agbir bɔlɔ kade na to nɛ mbe kagbene jija mo ga. 17Amoso, saŋkama e daa ji Juwebi nɛ nnyamase nɛ b daa bunyaŋ Ebɔrɛ na emɔrɔ nna ashi nshɛrbu na to nseŋ naa yɔ kelɔnɛ so gba kachɛ kama n ya kaa ji basa nɛ e daa tu ndoŋ emɔrɔ. 18Kanyiashenfinpoana be ntuŋ nɛ baa tre Epikyurisebi nɛ Stowikebi na malɛ gba be beko daŋ ba ji mo emɔrɔ nɛ beko bishi abar: “Manɛ nɛ kanyiashenfuloŋwura ere bee sha keŋini ere?” Nɛ beko kaŋɛ: “K du fanɛ e bee malga ebɔrɛ pɔtɛana ko be asheŋ nna.” Pɔɔl ka daa malga Yesu be ketiŋi luwu to na be asheŋ so nɛ b daŋ kaŋɛ loŋ na. 19Ndoŋ nna nɛ b keta Pɔɔl n yɔ nshɛrwuraana ko nɛ b daa shɛr Ariɔpages be kebee so na kutɔ n ya kaŋɛ mo: 20“Kaŋɛ anyi keŋini popɔr nɛ fee malga ere be asheŋ. Asheŋ popɔr nɛ fee malga na, anyi maŋ naŋ nu amo be asheŋ kikɛ, amoso nɛ anyee sha fanɛ fo kaŋɛ anyi amo be afito.” 21Atens be ndetoebi kikɛ nɛ befɔana na daa maa kɔ wale she kebaatase a nu ŋko a kaŋɛ abar ebaru popɔr nɛ b nu be asheŋ so so nɛ b daŋ kaŋɛ loŋ na.

22Nɛ Pɔɔl niŋi to n yili Ariɔpages be nshɛr na to nseŋ kaŋɛ: “Atensebi, n wu kananɛ men ta menyi be yirda n wɔtɔ ebɔrɛ damtaana to. 23Ŋkpal manɛ so, ŋ ka nite menyi be kade ere to nseŋ wu asɔ nɛ menyee bunyaŋ, n wu bɔrɛsure ko nɛ b sibɛ kumo so: ‘Ebɔrɛ nɛ b maŋ nyi peya.’ Kusɔ nɛ menyee bunyaŋ nsaa maa nyi na be asheŋ nɛ m baa kaŋɛ menyi naniere na. 24Ebɔrɛ nɛ e to durnya ere nɛ asɔ nɛ a wɔ kumo to kikɛ ere e la ebɔrɛso nɛ kasawule kikɛ be Enyɛnpe, mo alɛ maa chena nshɛrbu nɛ enyiŋgbasa pɔr nɛ b baa bunyaŋ mo to. 25Mo alɛ maŋ naa sha kusɔ kama nɛ nyiŋgbasa ta enɔ a shuŋ a sa mo, ŋkpal manɛ so, mo e naa sa nyiŋgbasa ŋkpa nɛ efute nɛ kusɔ kama nyam. 26Esa koŋwule nɛ e daŋ fara n to nseŋ bɔla mo to n to yiri kikɛ n shin nɛ b sɔ kasawule so kikɛ nyam a wɔtɔ na. Mo gbagba malɛ e daŋ yili saŋɛ nɛ kakpa nɛ baaŋ ba kaa wɔ pɔɛŋ nseŋ to bumo. 27E daŋ wora loŋ nna nɛ b laa n fin mo kukoko to n ya nya mo ashi bumo be kafin na to. Ama anyi be ekama ere nyam nɛ Ebɔrɛ maŋ wɔ kufɔ, 28ŋkpal manɛ so:

‘Mo e naa shin nɛ an wɔtɔ

a nite a kilgi to

a du kananɛ an du ere na.’

Menyi be besibɛpo malɛ e naa kaŋɛ loŋ:

‘Anyi alɛ gba la mbe mbia nna.’

29Ŋkpal anyi alɛ ka la mbe mbia so, an sa maa fɛ fanɛ Ebɔrɛ du fanɛ shuwa be kusɔ pɔrso ŋko gbiti be kusɔ pɔrso ŋko kejembu be kusɔ pɔrso ko nɛ nyiŋgbasa ta mo gbagba be kenyi be nfɛra n wora nna. 30Ebɔrɛ kplaŋ saŋɛ nɛ basa daa maŋ nyi na so, ama naniere e bee kaŋɛ ekama kaplɛkama fanɛ e lar mbe alubi to. 31Ŋkpal manɛ so, e lara kachako n yili a sha keshin nɛ esa ko nɛ e lara n yili na e ji durnya ere demu kumo be ekpa so. Mo alɛ ŋini ekama nyam kumo be loŋ n shin nɛ amodoŋwura tiŋi luwu to.”

32B ka nu Pɔɔl ka malga ketiŋi luwu to be asheŋ na nɛ bumo be beko wora mo eyurto nɛ beko malɛ kaŋɛ: “Anyi ere kraa sha kenamba n nu fo kamalga na.” 33Ndoŋ nna nɛ Pɔɔl lar nshɛr na to n yɔ. 34Nɛ basa ko yɔ mo kutɔ n ya ki bebɛsopo. Bumo to be beko e daa la Dayɔnaisias, Ariɔpages be katuŋ na to be esa, nɛ kache ko nɛ baa tre Damaris na n ta beko malɛ gba n ti so.

Currently Selected:

Ashuŋ Shunso 17: GJNb

Highlight

Copy

Compare