Ashuŋ Shunso 18

Pɔɔl ka ba Kɔrint be asheŋ

1Kede be kaman nɛ Pɔɔl lar Atens n ta n yɔ Kɔrint. 2Ndoŋ nɛ e ya tu Juwnyɛn ko nɛ b daŋ kurge mo ashi Pɔntes a tre mo Akwila na. Mo nɛ mbe eche Prisila ka daŋ shi Itali m ba ndoŋ ŋkpal Ewurgboŋ Klawdias ka daŋ ju Juwebi kikɛ ashi Rom na so, k daa maŋ chɛr. 3Ndoŋ nna nɛ Pɔɔl ya chɔrɔ bumo nseŋ shir bumo pe a wɔtɔ a baa ewajɛbu a fa a nya amansherbi a tɔ mbe asɔ jiso fanɛ kananɛ bumo gbagba daa wora na. 4Kewushiachɛ kama e daa yɔ nshɛrbu na to nna n ya kaa bugi asheŋ to a kaŋɛ Juwebi nɛ Griikebi kikɛ a sha keshin nɛ b wu fanɛ mbe kamalga na e bɔla ekpa.

5Sailas nɛ Timoti ka shi Masɛdonia m ba nɛ Pɔɔl yige kusɔ kama nsaa wɔtɔ a bɔ kubɔya na a bugi kumo to nɛnɛ a kaŋɛ Juwebi na fanɛ Yesu e la Kristo na. 6Nɛ b ji mo emɔrɔ kpakpaso nseŋ tege mo. Nɛ mo alɛ gbaŋgbaŋ mbe asɔbuuso to be shishɛr n lɛ bumo n wora bumo kusha ŋ kaŋɛ: “Menyi be ŋklaŋ e baa wɔ menyi gbagba be amu so, mannɛ ma e bar kumo. Yili kabre a yɔ nnyamase kutɔ nɛ meeŋ baa yɔ n ya kaa bɔ kubɔya na a sa bumo.” 7Kumo be kaman nɛ e yige bumo nseŋ yɔ n ya kaa wɔ kanyɛn ko nɛ e daa bunyaŋ Ebɔrɛ na pe. Mbe ketre e daa la Titias Jɛstes. Mbe kowu daŋ mata ndoŋ be nshɛrbu nna. 8Nshɛrbu na be enimu nɛ b daa tre Krispes na nɛ mbe laŋ to ebi daŋ yirda Enyɛnpe na nɛ Kɔrintebi be basa damta gba nu kubɔya na n yirda nɛ b bɛr bumo kabɔrɛbɛr. 9Kanyɛso ko Pɔɔl ku bɔrɛdare n nu Enyɛnpe ka bee kaŋɛ mo: “Sa maa lɔ kufu n yige, baa kraa malga, ŋkpal manɛ so, n wɔ fo kaman. 10Esa kama maaŋ tiŋ n wora fo shɛŋ, ŋkpal manɛ so, kade ere to be basa damta la meya nna.” 11Kafɛ nɛ afɔl ashe nɛ Pɔɔl daŋ ji ndoŋ a ŋini kade na to ebi Ebɔrɛ be kubɔya na.

12Galio ka ba ki Romebi be gomena ashi Griis nɛ Juwebi na wora kɔnɔkoŋwule n nyaŋ Pɔɔl n ta mo n yɔ demujikpa n ya kaŋɛ gomena na: 13“Kanyɛn ere bee wora ania nna a sha fanɛ basa e nu n sa mo nseŋ bɔla ekpa nɛ anyi be mbra na maa ŋini so m bɛ Ebɔrɛ so.” 14Pɔɔl ka bugi kɔnɔ nɛ e malga nɛ Galio ku mbe kɔnɔ so ŋ kaŋɛ Juwebi na: “Demu ere daa la kulubi ko ŋko dalubisheŋ ko be demu nna, a daŋ daga ŋ ka ji menyi Juwebi ere kanyiti. 15Ama k ka la mmalga nɛ atre nɛ menyi be mbraana be asheŋ ere bre, menyi gbagba e ji kumo kumo be ekpa so. M maaŋ ji loŋ be asheŋ be demu.” 16Kumo be kaman nɛ e shin nɛ b ju bumo n lar demujikpa na. 17Ndoŋ nna nɛ bumo kikɛ nyaŋ Sɔstenis nɛ e daa la nshɛrbu na to be enimu na m bri mo demujikpa na be kabuna to. Ama kumo alɛ daa maŋ tir Galio gbrɛbi gba kikɛ.

Pɔɔl ka bɛta n yɔ Antiɔk be asheŋ

18Pɔɔl ka chena bekurgepoana na kutɔ ashi Kɔrint n wora nchɛnnyɔ nɛ e kela bumo nɛ mo nɛ Prisila nɛ Akwila luri ekuloŋgboŋ ko to m bɔla nchu so n yɔ Siriya. E daŋ nase kɔnɔ ashi Kɛŋkriya nna n sa Ebɔrɛ n shin nɛ b she mbe kumu pɔɛŋ nɛ e luri ekuloŋgboŋ to n yɔ. 19B ka ba fo Ɛfeses nɛ Pɔɔl yige Prisila nɛ Akwila nseŋ yɔ ndoŋ be nshɛrbu to nɛ mo nɛ Juwebi na ya ji abɔrɛsheŋ na be emɔrɔ. 20Nɛ b kule mo fanɛ e chena bumo kutɔ kade na to n wora nchɛnnyɔ nɛ e kini. 21Ama le nɛ e daŋ kaŋɛ bumo nseŋ pɛ ekpa: “Nɛ Ebɔrɛ shuli, meeŋ naŋ bɛta m ba menyi kutɔ.” Kede be kaman nɛ e yili Ɛfeses n luri ekuloŋgboŋ ko to m bɔla nchu so n yɔ.

22E ka ta m ba fo Sizariya nɛ e yɔ Jerusalɛm n ya chɔrɔ ndoŋ be asɔriebi na nseŋ yɔ Antiɔk. 23E ka ya wora nchɛnnyɔ ndoŋ nɛ e lar ndoŋ m bɔla Galeesha nɛ Frijia be efuliana so be egbaŋ to a leŋ beyirdapoana na kikɛ to.

Apɔlɔs ka ba Ɛfeses nɛ Kɔrint be asheŋ

24Juwnyɛn ko nɛ baa tre Apɔlɔs nɛ b daŋ kurge mo Alɛkzaandria na daŋ ba Ɛfeses. E daa nyi kamalga to ga nsaa nyi abɔrɛsibɛ na malɛ ga. 25B daŋ ŋini mo Enyɛnpe be ekpa na be asheŋ nna nɛ e daa wɔtɔ a yeŋi so a malga nsaa ŋini basa Yesu be asheŋ na kashenteŋto nɛ amo be ekpa so. Ama Jɔn be kabɔrɛbɛr na nawule be asheŋ nɛ e daa nyi. 26Prisila nɛ Akwila ka nu e ka malga nshɛrbu na to kenyɛnso n loge nɛ b keta mo n yɔ epe n ya bugi Ebɔrɛ be asheŋ na to ŋ ŋini mo nɛnɛ. 27Kumo be kaman nɛ Apɔlɔs yili kumo fanɛ e beeŋ yɔ Griis. Nɛ Ɛfeses be beyirdapoana na leŋ mo to nseŋ chɛ mo to n sibɛ nwɔl n sa bumo kurgepoana ashi Griis a kaŋɛ bumo fanɛ b sɔ mo nɛnɛ. E ka fo ndoŋ nɛ e chɛ bumo nɛ Ebɔrɛ ta mbe kuwɔr be kakɛ n shin nɛ b ki beyirdapo na to ga, 28ŋkpal manɛ so, e daŋ ta kamalganyi nna n ji m bri Juwebi na basa to a ta abɔrɛsibɛ na a bugi asheŋ a ŋini bumo nɛnɛ fanɛ Yesu e la Kristo na.

Currently Selected:

Ashuŋ Shunso 18: GJNb

Highlight

Copy

Compare