Ashuŋ Shunso 16

Timoti ka tu Pɔɔl nɛ Sailas n yɔ be asheŋ

1Pɔɔl ta loŋ n ya fo Dɛbi n lar ndoŋ n yɔ Listra n ya tu ebɛsopo ko nɛ baa tre Timoti ndoŋ. Mo nio gba daa la eyirdapo nna a la Juw nɛ mo tuto malɛ daa la Griik. 2Timoti daa kɔ ketre ga ashi bekurgepoana nɛ b daa wɔ Listra nɛ Ikoniam na kikɛ nyam kutɔ. 3Pɔɔl ka daa sha keketa Timoti n yɔ so e ku mo kututu nna. E daŋ wora loŋ nna ŋkpal ndoŋ be basa na kikɛ ka daa nyi Timoti mo tuto ka la Griik so. 4Kade kama to nɛ b daŋ yɔ b daa kaŋɛ beyirdapoana na asɔ nɛ beshuŋipo nɛ benimuana nɛ b wɔ Jerusalɛm na wora kɔnɔkoŋwule n yili na nna nsaa kaŋɛ bumo fanɛ b baa bɛ loŋ be mbraana na so. 5Amoso, asɔriebi na daa naŋ nya keyirda be eleŋ nna nseŋ naa wora keshi kachɛ kama malɛ gba a ti so.

Pɔɔl ka ku bɔrɛdare ashi Trowas be asheŋ

6B ka naŋ lar Listra nɛ b bɔla Frijia nɛ Galeesha be efuliana so be egbaŋ to, ŋkpal manɛ so, Kiyoyu Cheeŋ na daa maŋ shin nɛ b bɔ kubɔya na ashi Eeshia be efuli so. 7B ka fo Maisiya be efuli be ekar to a sha keyɔ Bitinia be efuli so nɛ Yesu be Kiyoyu na maŋ sa bumo ekpa. 8Nɛ b bɔla Maisiya to n yɔ Trowas. 9Kumo be kamɔnchɛ be kanyɛso nɛ Pɔɔl ku bɔrɛdare ko n wu Masɛdonia be kanyɛn ko ka yil a kule mo: “Dii a ba Masɛdonia nfe m ba chɛ anyi to!” 10Pɔɔl ka ku le be bɔrɛdare na nɛ an bela ase manaŋ manaŋ m pɛ Masɛdonia be ekpa, ŋkpal manɛ so, an daŋ yili kumo nna fanɛ Ebɔrɛ e tre anyi fanɛ an ya bɔ baru lela na n sa ndoŋebi.

Libiya ka ki ebɛsopo ashi Filipai be asheŋ

11Ndoŋ nna nɛ an yili Trowas n luri ekuloŋgboŋ ko to m bɔla nchu so n ta n yɔ Samɔtrees ŋ klade n yili ndoŋ n yɔ Niyapɔlis. 12Ndoŋ nɛ an ya yili n nite n yɔ Filipai, Masɛdonia be efuli so be kadegboŋ juŋkparso ko. Romebi e daŋ jɔŋɛ kumo ere gba a wɔ ndoŋ. An daŋ wora nchɛnnyɔ kade na to. 13Kewushiachɛ ka fo nɛ an lar kade na to n yɔ lɔr ko ase kakpa nɛ an daa tama Juwebi be kabɔrɛkulekpa beeŋ baa wɔ. 14Ndoŋ nɛ an ya chena m malga n sa beche ko ka ba shɛr. Beche nɛ b daŋ nu anyi be kamalga na be eko e daa la Libiya, e daa la ewajɛ peper kunɔkunɔ nɛ amo be yawu daa du kpakpa na be efapo nna n shi Tayataira. E daa la eche nɛ e daŋ bunyaŋ Ebɔrɛ nna nɛ Enyɛnpe bugi mbe kagbene nɛ e bugi asoe n nu kusɔ nɛ Pɔɔl daa kaŋɛ na. 15B daŋ bɛr mo nɛ mbe laŋ to ebi kikɛ kabɔrɛbɛr nna. Le nɛ e daŋ ba kaŋɛ anyi: “Nɛ men baa nyi fanɛ n la Enyɛnpe na be eyirdapo kashenteŋto nna, men ba kaa wɔ ma pe.” Le nɛ e daŋ ta n shin nɛ an yɔ.

B ka ti Pɔɔl nɛ Sailas ebu be asheŋ

16Kachako an ka bee yɔ kabɔrɛkulekpa nɛ kebichebi ko nɛ kiyoyu lubi ko daa wɔ mo to a shin nɛ e daa wu asheŋ a kaŋɛ na tu anyi. Mbe kewu asheŋ ŋ kaŋɛ na daa shin nɛ e daa nya amansherbi damta ga nna a sa mo nyɛnpeana. 17Ndoŋ nna nɛ e bɛ anyi nɛ Pɔɔl so a ponte a kaŋɛ: “Basa ere la Enyɛnpetale Ebɔrɛ be anya nna. Baa kaŋɛ menyi kananɛ menyeeŋ tiŋ n nya kumɔlga nna.” 18E daŋ malga loŋ nchɛ damta nɛ kachako Pɔɔl be kagbene jija mo ga nɛ e gben ŋ kilgi ŋ kaŋɛ kiyoyu lubi na: “Yesu Kristo be ketre to nɛ mee kaŋɛ fo na: Lar kebichebi ere to!” Epul na gbagba to nɛ kiyoyu lubi na lar kebichebi na to.

19Kebichebi na mo nyɛnpeana ka pin fanɛ e maaŋ naŋ tiŋ n nya amansherbi n sa bumo nɛ b nyaŋ Pɔɔl nɛ Sailas ŋ gberge bumo n yɔ kelɔnɛ so, demujikpa n ya sa benimuana na. 20Romebi be ekrachigboŋana na kutɔ nɛ b daŋ bar bumo m ba kaŋɛ: “Basa ere la Juwebi nna a wɔ kade ere to a tɔrɔ basa. 21Edaŋkaresheŋ ko nɛ a maa bɛ anyi be mbra na so nɛ b wɔtɔ a ŋini. Anyi alɛ la Romebi nna, an maaŋ tiŋ m bɛ loŋ be edaŋkare so.” 22Nɛ jimaŋ na malɛ ta bumo be nnɔ n wɔtɔ a bri bumo, nɛ benimuana na kpɛa Pɔɔl nɛ Sailas be asɔbuuso to nseŋ shin nɛ b kuya bumo so. 23B ka shin nɛ b bri bumo ga n loge nɛ b shin nɛ b ti bumo ebu nseŋ kaŋɛ kabutikenipo na fanɛ e ti bumo kpakpa n wɔtɔ. 24Kabutikenipo na ka nu loŋ nɛ e ta bumo n wɔtɔ lalaloge be ebu na to nseŋ kre bumo be ayaana m mata ŋgbuliŋ gbɛgbɛso ko.

25Kumo be kamɔnchɛ be kiidiso Pɔɔl nɛ Sailas ka bee kule Ebɔrɛ nsaa boŋ nshɛ a di Ebɔrɛ epaŋ nɛ bumo braana nɛ b wɔ kabuti na to na bee nu. 26Nɛ kebembeŋgboŋ ko ba epul na to m ba gbuŋgbuŋ kasawule nɛ ebu na daa yil so na gba to nɛ mbuna na kikɛ bugi epul na to nɛ kabutipoana na be ŋgbɛlɛbiana lar bumo so n tɔr. 27Kabutikenipo na ka tiŋi n wu kananɛ mbuna na kikɛ bugi a yil na nɛ e pe tokobi nɛ e mɔ mbe kumu, ŋkpal manɛ so, e daa tama fanɛ basa na kikɛ lar nna. 28Ndoŋ nna nɛ Pɔɔl boŋ to awɔrso ga ŋ kaŋɛ: “Sa maŋ doro fo kumu. Anyi kikɛ wɔtɔ.” 29Nɛ kabutikenipo na shin nɛ b sa mo fitila nɛ e jɔ to n luri ŋ gbir Pɔɔl nɛ Sailas be anishito a chicha. 30Ndoŋ nna nɛ e keta bumo n lar n ya bishi bumo: “N nyɛnpeana, nuso nɛ meeŋ wora n tiŋ n nya kumɔlga?” 31Nɛ b kaŋɛ mo: “Yirda Enyɛnpe Yesu Kristo nɛ fo nɛ fo laŋ to ebi e nya kumɔlga.” 32Kumo be kaman nɛ b bɔ Enyɛnpe na be kubɔya na n sa mo nɛ mbe kowu to ebi kikɛ. 33Jemanɛ na malɛ kikɛ so nɛ kabutikenipo na fɔr bumo be achuuana na nɛ b bɛr mo nɛ mbe laŋ to ebi kabɔrɛbɛr epul na to. 34E daŋ yɛr Pɔɔl nɛ Sailas mo pe nna n ya sa bumo ajibi. Mo nɛ mbe eche nɛ bibi be ŋgbene daŋ fuli bumo ga ŋkpal b ka yirda Ebɔrɛ naniere so.

35Kumo be ŋklade nɛ Romebi be ekrachigboŋana na ta le be kubɔya n shuŋi bepurshi ŋ kaŋɛ: “Men shin nɛ basa na e baa yɔ.” 36Nɛ kabutikenipo na ta kumo ŋ kaŋɛ Pɔɔl: “Ekrachigboŋana na shuŋi n sa ekpa fanɛ b lara menyi kabuti to. Amoso, men koso kagbenewushiso a yɔ.” 37Nɛ Pɔɔl kaŋɛ bepurshi na: “B maŋ ji anyi demu ŋ keni nseŋ shin nɛ b bri anyi basa to. Anyi alɛ la Rom be efuli so ebi nna. B ka bri anyi n loge nɛ b ta anyi n ti ebu nseŋ naa sha keŋana boeŋ n lara anyi a? Akai, loŋ maaŋ nya. A daga fanɛ bumo, Romebi be ekrachigboŋana na gbagba ka ba nfe m ba lara anyi.” 38Ndoŋ nna nɛ bepurshi na ya kute kesheŋ na n sa Romebi be benimuana na nɛ kufu pɛ bumo ŋkpal b ka nu basa nɛ b ti ebu na ka la Rom be efuli so ebi so. 39Ndoŋ nna nɛ b ya kule bumo fanɛ b ta m paŋ bumo. Kumo be kaman nɛ b lara bumo kabuti na to nseŋ kule bumo fanɛ b lar kade na to. 40Nɛ Pɔɔl nɛ Sailas lar kabuti na to n yɔ Libiya pe n ya tu bekurgepoana na ndoŋ n leŋ bumo to nseŋ lar kade na to.

Currently Selected:

Ashuŋ Shunso 16: GJNb

Highlight

Copy

Compare