Ashuŋ Shunso 14

Pɔɔl nɛ Baanabas ka ba Ikoniam be asheŋ

1Kusɔ nɛ k daŋ wora Antiɔk na koŋwule na e daŋ wora Ikoniam gba. Pɔɔl daŋ yɔ ndoŋ be Juwebi be nshɛrbu to nna n ya bɔ kubɔya na kenyɛnso nɛnɛ ga nɛ Juwebi damta ko nɛ nnyamase damta ko ba ki beyirdapo. 2Nɛ Juwebi nɛ b kini Yesu na we n wɔtɔ nnyamase na nɛ b fara a kishi bekurgepoana na. 3Beshuŋipo na daŋ chɛr ndoŋ ga a malga Enyɛnpe na be asheŋ kenyɛnso, nɛ e sa bumo eleŋ nɛ b wora emamachisheŋ nɛ Ebɔrɛ be etɔɔnɛsheŋ damta ŋ ŋini fanɛ bumo be kubɔya nɛ k bee kute mbe kuwɔr be kakɛ na be asheŋ na la kashenteŋ nna. 4Nɛ kadegboŋ na to ebi barga to nɛ beko bɛ Juwebi na so nɛ beko malɛ bɛ beshuŋipo na so. 5Nɛ nnyamase na nɛ Juwebi nɛ bumo be benimuana gba kre ketɔrɔ nɛ kekpa beshuŋipo na ajembu m mɔ be nia. 6Beshuŋipo na ka nu loŋ nɛ b shile n yɔ Listra nɛ Dɛbi, Laikonia be ndeana to nɛ efuli na so be nde kikɛ nyam to 7n ya kaa bɔ baru lela na a sa ndoŋebiana.

B ka kpa Pɔɔl ajembu nɛ e bɛlɛ ashi Listra be asheŋ

8Kanyɛn ko daa wɔ Listra nɛ mbe aya daŋ wu hale mbe kebiato kikɛ. E daa maŋ naŋ nite ŋ ku so. 9Pɔɔl ka bee bɔ kubɔya na nɛ e wu kananɛ kanyɛn na kaŋ kusoe a nu kamalga na nɛ kananɛ e kɔ yirda a beeŋ tiŋ n nya kechɛ. Nɛ Pɔɔl keni mo diimbi nseŋ malga awɔrso ŋ kaŋɛ: “Niŋi to n teŋ to n yili fo aya so.” 10Nɛ kanyɛn na tɛ to ŋ koso a nite a kilgi to. 11Jimaŋ na ka wu kusɔ nɛ Pɔɔl wora na nɛ b fara a wora awɔr bumo be ŋgbar Laikonia to a kaŋɛ: “Anyi be ebɔrɛana e ki enyiŋgbasa n shi ebɔrɛso ŋ gbelge m ba anyi kutɔ na.” 12Ketre nɛ b daŋ nase Baanabas e daa la Zius, bumo be kegbir ko be ketre nseŋ nase Pɔɔl malɛ Hɛmes, bumo be kegbir ko malɛ be ketre, ŋkpal manɛ so mo e daa malga. 13Ndoŋ nna nɛ kegbirwura nɛ e daa keni kegbir Zius be kelɔŋɛ be ebu nɛ k daa wɔ kade na be ekarso na so na ta egbolu nɛ atoto m ba kabuna na to. Mo nɛ jimaŋ na daa sha kemɔ amo nna n lara sarga n sa beshuŋipo na. 14Baanabas nɛ Sɔɔl ka nu kusɔ nɛ b daa shin nɛ b wora na nɛ b kpɛa bumo be asɔbuuso to a ŋini kananɛ kesheŋ na jija bumo be ŋgbene nseŋ shile n luri jimaŋ na be nferinto a boŋ to a bishi bumo a kaŋɛ: 15“Manɛ e ba nɛ menyee wora loŋ? Anyi alɛ gba la enyiŋgbasa nna fanɛ menyi. An ba nfe nna nɛ an ba kaŋɛ menyi baru lela na be asheŋ n shin nɛ men lar le be asheŋ jiga ere to m ba Ebɔrɛ nɛ e wɔ ŋkpa to nsaa la esa nɛ e to ebɔrɛso nɛ kasawule nɛ teku nɛ asɔ nɛ a wɔ amo to na kikɛ kutɔ. 16Saŋɛ na e daŋ yige basa kikɛ nna fanɛ b baa bɛ bumo gbagba be aparsheŋ be ekpaana so. 17Ama jemanɛ kikɛ, mo alɛ bee wora asɔ lela damta nna a ŋini menyi esa nɛ e la mo. Mo e naa sa menyi bɔrɛchu nɛ adɔjibi jemanɛ nɛ a daga. Mo e naa sa menyi ajibi jiso nsaa shin nɛ kagbenefuli bee bɔlɔ menyi to.” 18Kamalga ere be kaman gba, keju basa na ashi sarga na be kelara n sa bumo to daa du kpakpa.

19Juwebi ko daŋ shi Pisidia be Antiɔk nɛ Ikoniam m ba kilgi jimaŋ na be ŋgbene nseŋ kpa Pɔɔl ajembu ŋ gbɛ mo n lar kade na to n ya lɛ a tama fanɛ e wu na. 20Ama beyirdapoana na ka ba chala ŋ kulti mo nɛ e koso n niŋi to m bɛta n luri kade na to. Kumo be ŋklade nɛ mo nɛ Baanabas yɔ Dɛbi.

Pɔɔl nɛ Baanabas ka naŋ bɛta n yɔ Siriya be Antiɔk be asheŋ

21Pɔɔl nɛ Baanabas daŋ bɔ baru lela na n sa Dɛbiebi n shin nɛ basa damta ki bebɛsopo ndoŋ. 22Kumo be kaman nɛ b bɛta n yɔ Listra nɛ Ikoniam nɛ Pisidia be Antiɔk a wushi beyirdapoana na be ŋgbene nseŋ naa leŋ bumo to fanɛ b baa kɔ yirda nɛ kashenteŋto kpakpa. Le nɛ b daŋ naa kaŋɛ bumo: “An kikɛ beeŋ luri etɔrɔ damta to pɔɛŋ nseŋ luri Ebɔrɛ be kuwura na to.” 23Asɔri kama to, b daa lara benimu nna a sa kumo to be basa nseŋ daa ta kabɔrɛkule nɛ ekishi a ta basa na kikɛ a bɔɔ Enyɛnpe nɛ bumo be yirda daa wɔ so na enɔ.

24B ka bɔla Pisidia be kasawule so m ba lar nɛ b ba Pamfilia 25m ba bɔ kubɔya na ashi Pɛga nseŋ yɔ Atalia 26n ya yili ndoŋ n luri ekuloŋgboŋ ko to m bɛta n yɔ Antiɔk kakpa nɛ b daŋ yili n ta bumo m bɔɔ Ebɔrɛ enɔ nɛ e baa keni bumo so ashi kushuŋ nɛ b daa loge na to. 27B ka ba Antiɔk nɛ b shɛr asɔriebi na kikɛ ŋ kaŋɛ bumo asɔ nɛ bumo nɛ Ebɔrɛ wora kikɛ nɛ kananɛ e bugi ekpa n sa nnyamase gba nɛ b yirda. 28Kumo be kaman nɛ b chena bebɛsopo na kutɔ kade na to n chɛr ga.

Currently Selected:

Ashuŋ Shunso 14: GJNb

Highlight

Copy

Compare