Ashuŋ Shunso 15

Beshuŋipo na nɛ benimuana na ka shɛr Jerusalɛm to be asheŋ

1Basa ko daŋ shi Judiya m ba Antiɔk m ba fara a ŋini bekurgepoana le be asheŋ a kaŋɛ: “B baa maŋ ku fo kututu fanɛ kananɛ Mosis be mbra na bee ŋini na, Ebɔrɛ maaŋ mɔlga fo kikɛ.” 2Ndoŋ nna nɛ b kpal loŋ so n ji Pɔɔl nɛ Baanabas emɔrɔ kpakpaso ga nseŋ yili kumo fanɛ Pɔɔl nɛ Baanabas nɛ Antiɔk be basa na be beko e yɔ Jerusalɛm nɛ bumo nɛ beshuŋipo na nɛ benimuana na e ya malga demu na be asheŋ. 3Asɔriebi na ka keta bumo n lar ekpa m bɛta nɛ b bɔla Fenisha nɛ Samɛria ŋ kaŋɛ ndoŋ be asɔriebiana kananɛ nnyamase gba fara a bɛ Ebɔrɛ so nɛ kumo be loŋ be baru na fuli bekurgepoana na kikɛ be ŋgbene ga. 4B ka ba Jerusalɛm nɛ asɔriebi na nɛ beshuŋipo na nɛ benimuana na sɔ bumo nɛnɛ nɛ b kaŋɛ bumo asɔ nɛ bumo nɛ Ebɔrɛ wora kikɛ nyam. 5Nɛ beyirdapoana na be beko nɛ b shi Efarisiana na be katuŋ to na niŋi to n yili ŋ kaŋɛ: “A daga fanɛ b ku bumo atutu ŋkeŋ shin nɛ b baa nu a sa Mosis be mbraana na.”

6Ndoŋ nna nɛ beshuŋipo na nɛ benimuana na shɛr nɛ b keni demu na to. 7B daŋ keni kumo to loŋ nɛ Pita ya niŋi to n yili ŋ kaŋɛ: “Ŋ kurgepoana, men nyi fanɛ ma nɛ Ebɔrɛ daŋ lara menyi to dra na kikɛ fanɛ n ya bɔ baru lela na be kubɔya na n sa nnyamase nɛ b nu nseŋ yirda. 8Ebɔrɛ nɛ e nyi basa kikɛ be ŋgbene kikɛ na malɛ e sa bumo Kiyoyu Cheeŋ na fanɛ kananɛ e daŋ wora n sa anyi na, a ŋini fanɛ nnyamase gba beeŋ tiŋ ŋ ki beyirdapo. 9E maŋ ŋini fanɛ an kɔr bumo to. Bumo be yirda so nɛ e ta bumo be alubi m paŋ bumo. 10Nɛ manɛ e ba nɛ menyee ta le be kesheŋ kpakpaso nɛ an nanaana maŋ tiŋ ŋko an gbagba maaŋ tiŋ n wora a deŋi beyirdapo ere so nɛ men wora Ebɔrɛ ŋ keni? 11Akai, loŋ maŋ nyalɛ. An yirda fanɛ Enyɛnpe Yesu be kuwɔr be kakɛ na so nɛ an nya kumɔlga. Loŋ malɛ e la bumo alɛ gba.”

12Pɔɔl nɛ Baanabas ka bee kute Ebɔrɛ be etɔɔnɛsheŋ nɛ emamachisheŋ damta nɛ Ebɔrɛ shin nɛ b wora nnyamase na to be asheŋ ere nɛ basa na kikɛ la to boeŋ a nu. 13B ka malga n loge nɛ Jeems malɛ ta ŋ kaŋɛ: “Bekurgepoana, men nu ma kutɔ nfe. 14Naniere nɛ Saimɔn kute kananɛ Ebɔrɛ fara n sha nnyamase na n lara bumo to be basa nɛ baaŋ baa la mo peya. 15Loŋ gbagba malɛ nɛ anebiana na be mmalga na bee kaŋɛ abɔrɛsibɛ na to fanɛ:

16‘Kede be kaman meeŋ naŋ bɛta m ba

m ba bar Deevid be kanaŋ ŋkpa to

n naŋ pɔr kanaŋ na be alambure na

m bɛ abar so.

17Nɛ basa pɔtɛ nɛ b ka na kikɛ

nɛ nnyamase nɛ n lara

ŋ ki meya na kikɛ e ba fin ma.

18Enyɛnpe nɛ e bugi kesheŋ ere to

ŋ kaŋɛ dra na kikɛ na e naa kaŋɛ loŋ na.’ ”

19Nɛ Jeems naŋ kaŋɛ: “Ma ere kutɔ an sa maŋ tɔrɔ nnyamase nɛ b fara nɛ b bɛ Ebɔrɛ so ere. 20Ama a daga fanɛ an sibɛ kawɔl ŋ kaŋɛ bumo fanɛ b sa maa ji ajibi nɛ a maŋ walɛ so ŋkpal a ka la kalɔŋɛ be ajibi so. An kaŋɛ bumo fanɛ b baa gelge kubojuaji nsaa maa ji ŋklaŋ ŋko kusɔbɔya kama nɛ b maŋ teŋ. 21Ŋkpal manɛ so, basa ka fara a kraŋ Mosis be mbra na ashi nshɛrbuana to kewushiachɛ kama na nɛ kananɛ b malga amo be asheŋ kade kama to na chɛr ga kabre.”

B ka sibɛ kawɔl n sa nnyamase na be asheŋ

22Ndoŋ nna nɛ beshuŋipo na nɛ benimuana na nɛ asɔriebi na kikɛ wora kɔnɔkoŋwule fanɛ b lara katuŋ na to be basa ko n shuŋi bumo nɛ Pɔɔl nɛ Baanabas Antiɔk. Judas nɛ baa tre Baasabas na nɛ Sailas nɛ b daŋ lara. Bumo benyɔ na daa la basa nɛ bekurgepoana na kikɛ daa sa bunyaŋ nna. 23Le be kawɔl nɛ b daŋ ta n shuŋi mbɔ na: “Beshuŋipo na nɛ benimuana na bee chɔrɔ menyi nnyamase nɛ men la bekurgepoana a wɔ Antiɔk nɛ Siriya nɛ Silisia to na.

24An nu kananɛ anyi to be beko ya malga asheŋ ko a tɔrɔ menyi n shin nɛ menyi be ŋgbene jija menyi ga, ama men baa nyi fanɛ mannɛ anyi e shuŋi bumo fanɛ b ya kaŋɛ menyi loŋ. 25Amoso nɛ an shɛr n wora kɔnɔkoŋwule n lara anyi to be beko n shuŋi bumo menyi kutɔ na. 26Bumo nɛ Baanabas nɛ Pɔɔl, an teri lelaana nɛ b kpal Enyɛnpe Yesu Kristo so n ji kenyɛn m mɔ bumo be amu n shuŋ na e naa yɔ. 27Menyeeŋ nu asheŋ koŋwule nɛ anyee sibɛ ere gbagba ashi Judas nɛ Sailas nɛ anyee shuŋi ere be kɔnɔ to. 28Ŋkpal manɛ so, anyi nɛ Kiyoyu Cheeŋ na wora kɔnɔkoŋwule nna fanɛ an sa maŋ naŋ sa menyi tɔrɔ kama n ti le be mbraana nɛ an tama fanɛ a daga ere so fanɛ: 29Men sa maa ji nlɔŋɛjibi, men sa maa ji ŋklaŋ, men sa maa we kusɔbɔya kama nɛ b maŋ teŋ. Kumo nɛ k ka na e la fanɛ men baa gelge kubojuaji. Men baa gelge asheŋ ere, asheŋ beeŋ nyalɛ n sa menyi. Ebɔrɛ e chɛ menyi to.”

30Kede be kaman nɛ b sa mbɔ na ekpa nɛ b yɔ Antiɔk n ya shɛr beyirdapoana na kikɛ n ta kawɔl na n sa bumo. 31Basa na ka kraŋ kawɔl na nɛ bumo be ŋgbene fuli bumo ga ŋkpal kananɛ kubɔya na leŋ bumo to na so. 32Judas nɛ Sailas nɛ bumo alɛ gba daa la anebiana na daŋ malga n chɛr ga a ŋini bekurgepoana na asheŋ n leŋ bumo to. 33B ka wora nchɛnnyɔ ndoŋ nɛ bekurgepoana na sa bumo ekpa nɛ b bɛta n yɔ nɛ kagbenewushi bumo nɛ b shuŋi bumo na kutɔ. 34Ama Sailas bre daŋ kaŋɛ fanɛ e beeŋ ka ndoŋ. 35Nɛ Pɔɔl nɛ Baanabas wora nchɛnnyɔ ashi Antiɔk nɛ bumo nɛ bebɛsopoana na be bedamta ŋini basa abɔrɛsheŋ m bɔ Enyɛnpe be kubɔya na n sa bumo.

Pɔɔl nɛ Baanabas ka barga to be asheŋ

36B wɔtɔ loŋ nɛ kachako Pɔɔl ba kaŋɛ Baanabas: “Shin nɛ an naŋ ya bɔɔ nde nɛ an daŋ ya bɔ Enyɛnpe be kubɔya n sa na to ebi be bekurgepoana na so ŋ keni kananɛ baa bɛ so.” 37Nɛ Baanabas yɛ b keta Jɔn Maak n ti bumo be amu so a yɔ. 38Nɛ Pɔɔl yɛ loŋ maŋ daga, ŋkpal manɛ so, Jɔn Maak daa maŋ tu bumo n loge bumo be sososo be kushuŋ nɛ b daŋ ba to na nseŋ yili Pamfilia n yige bumo nseŋ bɛta n yɔ epe. 39Ndoŋ nna nɛ b ji kumo be emɔrɔ ga m barga to. Nɛ Baanabas keta Maak n luri ekuloŋgboŋ ko to m bɔla nchu so n yɔ Saipres. 40Nɛ Pɔɔl malɛ ta Sailas, nɛ bekurgepoana na ta bumo m bɔɔ Ebɔrɛ enɔ nɛ e baa keni bumo so. Kumo be kaman nɛ b yɔ. 41Nɛ b bɔla Siriya nɛ Silisia n ya kaa leŋ asɔriebiana na to ashi bumo be kebɛso to fanɛ b baa kɔ yirda na to kpakpa.

Currently Selected:

Ashuŋ Shunso 15: GJNb

Highlight

Copy

Compare