Ashuŋ Shunso 13

B ka lara Baanabas nɛ Sɔɔl n shuŋi be asheŋ

1Anebiana nɛ beŋinipo ko daa wɔ Antiɔk be asɔriebi na to. Bumo be atreana e daa la Baanabas nɛ Saimɔn, emo nɛ baa tre esa lembir na nɛ Sairini be Lisias nɛ Maneeyen, emo nɛ b daŋ bela mo nɛ Gomena Hɛrɔd na nɛ Sɔɔl. 2Saŋko b ka bee bunyaŋ Enyɛnpe nsaa kishi nɛ Kiyoyu Cheeŋ na kaŋɛ bumo: “Men lara Baanabas nɛ Sɔɔl n sa ma nɛ b shuŋ kushuŋ nɛ n lara bumo fanɛ b ba shuŋ ere.” 3Nɛ b kishi nseŋ kule Ebɔrɛ n ta bumo be enɔana n deŋi basa anyɔ na so nseŋ shin nɛ b yɔ.

Baanabas nɛ Sɔɔl ka ba Saipres be asheŋ

4Kiyoyu na ka shuŋi Baanabas nɛ Sɔɔl na nɛ b yɔ Sɛlyusia n ya yili ndoŋ n luri ekuloŋgboŋ to m bɔla nchu so n yɔ Saipres be kepla so. 5B ka ba kepla na to be kade ko nɛ baa tre Salamis na nɛ b ya bɔ Enyɛnpe be kubɔya na ashi Juwebi be nshɛrbuana na to. Bumo nɛ Jɔn Maak e daa la nɛ e bee chɛ bumo to kushuŋ na to. 6B nite kepla na so loŋ hale n ya fo Pafɔs. Ndoŋ nɛ b ya tu ŋkilgiwura ko nɛ baa tre Baa Jizes. E daa la Juw nna a tre mbe kumu anebi. 7Kepla na so be Gomena Sɛjes Pɔɔles mo teri e daa la mo. Sɛjes Pɔɔles ere daa la enyiashempo nna ga. Ndoŋ nna nɛ gomena na tre Baanabas nɛ Sɔɔl ŋkpal kenu abɔrɛsheŋ na so. 8Nɛ Elimas, ŋkilgiwura ere, Baa Jizes na be Griik tre be kifito e daa la loŋ na, ba kaa kuŋ bumo ekpa a fin kekuŋ gomena na ekpa nɛ e sa maŋ yirda Yesu. 9Nɛ Kiyoyu Cheeŋ na luri m bɔlɔ Sɔɔl, mo koŋwule e la Pɔɔl na to nɛ e keni ŋkilgiwura na be anishito nseŋ kaŋɛ: 10“Setani pibi ere. Fo la kelela be yiri kikɛ be edompo nna. Kafule be kulubi be yiri kikɛ e baŋ bɔlɔ fo to nɛ saŋkama fee kɔ a fin keta Enyɛnpe be nshenteŋ ŋ ki efɛ. 11Enyɛnpe malɛ beeŋ gberge fo kusoe naniere nɛ fo tan a maaŋ naŋ tiŋ n wu efuli hale n ya fo saŋko.” Epul na to nɛ k wora Elimas na fanɛ kumɔɔ lembir ko ka ba buu mbe anishi kikɛ so nɛ e fara a nite a kulti a laa a fin esa nɛ e beeŋ pɛ mbe enɔ to. 12Gomena na ka daŋ wu kusɔ nɛ k wora na nɛ e yirda. Enyɛnpe be asheŋ nɛ b daa ŋini na daŋ chinchiŋ mo ga.

Pɔɔl nɛ Baanabas ka yɔ Pisidia be Antiɔk be asheŋ

13Ndoŋ nna nɛ Pɔɔl nɛ mo braana luri ekuloŋgboŋ to ashi Pafɔs n ta n ya fo Pɛga nɛ k wɔ Pamfilia na. Nɛ Jɔn Maak ba yige bumo ndoŋ nseŋ bɛta n yɔ Jerusalɛm. 14Nɛ bumo alɛ lar Pɛga n ta n yɔ Pisidia be Antiɔk. Kewushiachɛ ka fo nɛ b yɔ ndoŋ be nshɛrbu to n ya chena. 15Esa ko ka kraŋ Mosis be mbraana na nɛ anebiana be nwɔl na be mboŋ ko n loge nɛ nshɛrbu na to be benimuana na shuŋi kabɔ bumo kutɔ ŋ kaŋɛ: “Bekurgepoana, nɛ men kɔ kamalga nɛ menyeeŋ ta ŋ leŋ basa ere to, men baa malga.” 16Nɛ Pɔɔl niŋi to n yili n wora bumo enɔ fanɛ b lo to nseŋ fara mbe kamalga.

“M braana Israɛlebi nɛ menyi kikɛ nɛ men la nnyamase a wɔ nfe a bunyaŋ Ebɔrɛ ere, men nu nfe. 17Israɛlebi be Ebɔrɛ e daŋ lara an nanaana Juwebi n shin nɛ b wora keshi ga saŋɛ nɛ b daa la befɔ a wɔ Ijipt be kasawule so na. 18Ebɔrɛ na e daŋ ta mbe eleŋgboŋ n lara bumo ashi Ijipt ŋ keni bumo so kiyi to kanyitiso loŋ nfɛ adena. 19Keenan be kasawule so be efuli ashunu nɛ e shin nɛ a mur nseŋ ta kasawule na kikɛ n sa mbe basa na. 20Asheŋ ere kikɛ daŋ fo fanɛ nfɛ alfa ana nɛ adunu. Kumo be kaman benimu ko nɛ Ebɔrɛ daa sa a sa bumo pɔɛŋ nɛ anebi Samuɛl ya ba. 21Jemanɛ na so nɛ b kule Samuɛl fanɛ e lara ewura n sa bumo nɛ Ebɔrɛ ta Sɔɔl, Kish nɛ e shi Bɛnjamin be kanaŋ to na pibi n sa bumo fanɛ e ji bumo so kuwura nfɛ adena. 22Ebɔrɛ ka gboŋi mo kuwura na to nɛ e shin nɛ Deevid ki bumo be ewura. Le nɛ Ebɔrɛ daŋ malga Deevid be asheŋ: ‘N wu fanɛ Jɛsi pibi Deevid be kaduli gbagba nɛ mee sha na. Mo e la emo nɛ e beeŋ wora kusɔ kama nɛ mee sha fanɛ e wora na.’ 23Yesu nɛ Ebɔrɛ shin nɛ e ki Israɛlebi be emɔlgapo a bɔla mbe kɔnɔ nɛ e daŋ nase na daŋ shi Deevid be kanaŋ to nna. 24Pɔɛŋ nɛ Yesu fara mbe kushuŋ na, Jɔn daŋ kaŋɛ Israɛlebi na kikɛ nna fanɛ b lar bumo be alubi to nɛ b bɛr bumo kabɔrɛbɛr. 25Jɔn ka daa sha keloge mbe kushuŋ nɛ e bishi basa na: ‘Wanɛ nɛ menyee tama fanɛ n la? Mannɛ ma e la emo nɛ menyee jo na. Ama ma kaman esa ko beeŋ ba a chɔ ma ga, m maŋ fo mbe aya to be shishɛr gba so.’

26Ŋ kurgepoana, Eebraham mo nanabiana nɛ menyi nɛ men la nnyamase a wɔ nfe a bunyaŋ Ebɔrɛ ere kikɛ, anyi kikɛ nɛ b ta le be kumɔlga be kubɔya ere n sa. 27Ŋkpal manɛ so, basa nɛ bumo nɛ bumo be benimu wɔ Jerusalɛm to ere daa maŋ nyi fanɛ mo e la emɔlgapo na, bumo alɛ daa maŋ pin anebiana be mmalga nɛ b sibɛ n nase nɛ b baa kraŋ amo kewushiachɛ kama na gba to. Ama bumo alɛ daŋ shin nɛ b mɔ Yesu n shin nɛ anebiana be mmalga na bɔla ekpa. 28B daa maŋ wu kulubi kikɛ mo so nɛ k daga mbe luwu, ama b daŋ shin nɛ Pailat shin nɛ b mɔ mo. 29B ka wora asɔ nɛ abɔrɛsibɛ na kaŋɛ fanɛ baaŋ wora mo na n loge, nɛ b lara mo kedibi largato na so n ta mo n wɔtɔ kejembulaŋ kurso ko to. 30Nɛ Ebɔrɛ shin nɛ e tiŋi luwu na to. 31Kumo be kaman nchɛ damta ko nɛ e bee lar bumo nɛ mo nɛ bumo daŋ shi Galili m ba Jerusalɛm na so nɛ baa wu mo. Bumo e la mbe eshɛdajipoana a sa Israɛlebi kabre na. 32Baru lela na nɛ anyi alɛ bee bar menyi nfe na, kusɔ nɛ Ebɔrɛ daŋ nase kɔnɔ ŋ kaŋɛ an nanaana fanɛ e beeŋ wora na nɛ e tiŋi Yesu luwu to n wora n sa anyi nɛ an la bumo nanabiana kabre na. 33Nshɛ be Kawɔl be kashɛ nyɔsopo malɛ to nɛ baa kaŋɛ loŋ:

‘Fo e la m Pibinyɛn.

Kabre ŋ ki fo Tuto.’

34Le malɛ nɛ Ebɔrɛ daŋ malga ketiŋi mo luwu to nɛ e maaŋ naŋ bɛta n wu kikɛ na be asheŋ ŋ kaŋɛ:

‘Meeŋ ta nɛfa cheembi

nɛ n nase kɔnɔ kashenteŋto fanɛ

meeŋ sa Deevid na n sa fo.’

35Abɔrɛsibɛ na malɛ kraa kaŋɛ kakpa ko fanɛ:

‘Fo maaŋ shin nɛ fo kenya nɛ e bee bɛ fo so

nɛ kagbene koŋwule e wu m bɛ.’

36Ŋkpal manɛ so, Deevid be jemanɛ na, e daŋ wora Ebɔrɛ be aparsheŋ nna nseŋ wu nɛ b ta mo m puli m mata mo nanaana nɛ e bɛ. 37Ama emo nɛ Ebɔrɛ shin nɛ e tiŋi luwu to na maŋ bɛ. 38Ŋ kurgepoana, men kikɛ e baa nyi geeŋ fanɛ Yesu nawule so nɛ b bɔ alubi be ketampaŋ be kubɔya na a sa menyi. 39Men baa nyi fanɛ ekama nɛ e yirda mo, b sɔ mo ashi kulubi be yiri kikɛ to n yige. 40Loŋ nɛ Mosis be mbraana daa maŋ tiŋ n wora n sa menyi na. Amoso, men baa da so nɛ kusɔ nɛ anebiana be eko kaŋɛ na e sa maŋ wora menyi. E yɛ:

41‘Menyi nɛ menyee fɛl

kusɔ nɛ Ebɔrɛ kaŋɛ na,

men nu nfe. Menyeeŋ kooba nseŋ wu.

Meeŋ wora kusɔ ko menyi be ŋkpa ere to,

ama esa bugi kumo to n sa menyi gba,

men maaŋ yirda kumo.’ ”

42Pɔɔl nɛ Baanabas ka bee lar nshɛrbu na to nɛ basa na kule bumo fanɛ b naŋ bɛta m ba kewushiachɛ nɛ k naa ba m ba kaŋɛ bumo asheŋ na be ako n ti so. 43Basa na ka lar nshɛr na to n yɔ nɛ Juwebi damta nɛ nnyamase nɛ b tuba a bɛ Juwebi be kabɔrɛbɛso so na be bedamta ba buu Pɔɔl nɛ Baanabas so nɛ b malga n leŋ bumo to fanɛ b baa kraa yirda a kɔ Ebɔrɛ be kelela na to kpakpa.

44Kewushiachɛ nɛ k naŋ bɛ so ka fo kade na to ebi be galeŋga e ba nɛ b ba nu Enyɛnpe be kubɔya na. 45Juwebi na ka wu jimaŋ na nɛ yurkishi luri m bɔlɔ bumo to nɛ b malga ŋ gbiti kusɔ nɛ Pɔɔl daa malga na nseŋ tege mo. 46Ama Pɔɔl nɛ Baanabas daŋ kplaŋ bumo so nna nsaa malga kenyɛnso a kaŋɛ: “Menyi nɛ b daŋ yili kumo fanɛ b fara m malga Ebɔrɛ be kamalga na n sa, ama men ka kini kumo nsaa ta menyi be amu fanɛ men maŋ daga Ebɔrɛ be ŋkpa nɛ k maŋ kɔ ekar na bre so, anyeeŋ yige menyi nseŋ yɔ nnyamase kutɔ. 47Ŋkpal manɛ so, le be mbra nɛ Enyɛnpe sa anyi:

‘Fo nɛ n lara nɛ fo baa la kefulto

a sa nnyamase.

Fo so nɛ Ebɔrɛ beeŋ bɔla

m mɔlga durnya kikɛ.’ ”

48Nnyamase na ka nu loŋ nɛ bumo be ŋgbene fuli bumo ga nɛ b yɛ Enyɛnpe be kubɔya na wɔ ebel. Nɛ bumo nɛ Ebɔrɛ lara fanɛ b nya Ebɔrɛ be ŋkpa nɛ k maŋ kɔ ekar na ki beyirdapo. 49Nɛ Enyɛnpe be kubɔya na sɔ nde na be kaplɛkama nyam.

50Nɛ Juwebi na we n wɔtɔ kadegboŋ na to be benimu nɛ bebunyampocheana nɛ baa bunyaŋ Ebɔrɛ na nɛ b fara a tɔrɔ Pɔɔl nɛ Baanabas n ju bumo bumo be kasawule so. 51Ndoŋ nna nɛ beshuŋipoana na gbaŋgbaŋ bumo be aya to be shishɛr n lɛ bumo a ŋini fanɛ b wora bumo kusha nseŋ yɔ Ikoniam. 52Nɛ kagbenefuli nɛ Kiyoyu Cheeŋ na bɔlɔ Antiɔk be bebɛsopo na to ga.

Currently Selected:

Ashuŋ Shunso 13: GJNb

Highlight

Copy

Compare