1 Kɔrintebi 13
13
Kasha be asheŋ
1Nɛ m baa tiŋ a gbar basa nɛ emalaika gba be ŋgbar ŋkaa maa kɔ kasha, kumo ere m baa du fanɛ kakure bureso nna ŋko awɔr fuloŋ.
2Hale nɛ m baa kɔ abɔrɛsheŋ be kewuŋkaŋɛ be kakɛ nsaa tiŋ a pin ewulosheŋ kikɛ nɛ kanyiasheŋ kikɛ to nsaa kɔ yirda kikɛ ma to a tiŋ a tia abee
ŋkaa maa kɔ kasha bre,
m maŋ la shɛŋ.
3Nɛ m baa tiŋ a ta kusɔ nɛ ŋ kɔ a kɛ basa ŋkaa beeŋ naŋ tiŋ n ta ma eyur n sa fanɛ b chɔɔ edɛ ŋkpal ma yirda so,
ma alɛ ŋkaa maa kɔ kasha bre,
kumo ere m maŋ nya tɔnɔ kikɛ.
4Kasha la kanyiti nna nɛ
kebaala esa.
Kasha maa besa eyur,
kumo alɛ maa maŋ kumu so.
K maŋ la kumu be ketinto
ŋko nfɛlso be kebaawɔtɔ.
5Esa nɛ e kɔ kasha maa fin mo gbagba nawule be kelela.
Kasha wɔ esa to e maa nya agbo manaŋ manaŋ,
mo alɛ maa ta alubi nɛ esa wora mo a wɔtɔ kagbene to.
6Kasha wɔ esa to, mbe kagbene maa fuli mo ŋkpal kulubi so, kashenteŋ e naa fuli mbe kagbene. 7Kasha wɔ esa to e maa gben a yige kusɔ kama to, e bee yirda kusɔ kama nna a tama kusɔ kama nsaa yil to kanyitiso malɛ saŋkama.
8Kasha maa loge kikɛ.
Ama kewuŋkaŋɛana bre
nɛ ŋgbar pɔtɛana be kegbar
nɛ kanyiasheŋ bre kikɛ beeŋ ba choŋ.
9Ŋkpal manɛ so, anyi be kanyiasheŋ ere nɛ anyi be kewuŋkaŋɛ ere maŋ naŋ bɔlɔ so n loge.
10Ama kusɔ nɛ k bɔlɔ so kaŋ ba, kusɔ nɛ k maŋ bɔlɔ so beeŋ choŋ.
11Ŋ ka daa la kebia, n daa malga fanɛ kebia nna
a fɛ nfɛra fanɛ kebia
a pin asheŋ to fanɛ kebia.
Ama ŋ ka ba ki enimu nɛ n yige mbibisheŋ ma asheŋ to.
12Naniere bre anyee wu asɔ nna lii fanɛ an ka bee keni digi to na. Ama saŋko anyeeŋ wu kusɔ kama kenishiso nɛnɛ.
Naniere n nyi asheŋ to gbrɛbi nna, ama saŋko meeŋ pin kusɔ kama to nɛnɛ n loge fanɛ kananɛ Ebɔrɛ nyi ma to na.
13Ama asheŋ ere kikɛ to asɔ nɛ a beeŋ baa wɔtɔ e la, yirda nɛ tama nɛ kasha, ama amo alɛ kikɛ be kejuŋkparso e la kasha.
Currently Selected:
1 Kɔrintebi 13: GJNb
Highlight
Copy
Compare
Share
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
