1 Kɔrintebi 12

Kiyoyu Cheeŋ na be ŋkɛ be asheŋ

1To, naniere ŋ kurgepoana, men shin nɛ an keni ŋkɛ mo nɛ a bee shi Kiyoyu na to na be asheŋ to. Mee sha fanɛ men baa nyi amo be asheŋ nna. 2Men nyi fanɛ saŋɛ nɛ men daa maŋ nyi Ebɔrɛ na, Setani e daŋ fuli menyi ekpa kama nɛ men daŋ bɔla so nɛ men bɛ agbir nɛ a la asɔ wuso na so. 3Amoso, mee sha fanɛ men pin fanɛ esa kikɛ nɛ e kɔ Ebɔrɛ be Kiyoyu na maaŋ tiŋ ŋ kaŋɛ le: “Kɔnɔso e baa wɔ Yesu so!” Esa kikɛ malɛ maaŋ tiŋ ŋ kaŋɛ: “Yesu e la Enyɛnpe” ama Kiyoyu Cheeŋ na e shin nɛ e kaŋɛ loŋ.

4Kiyoyu to be ŋkɛ be nnaŋ to e wɔtɔ, ama Kiyoyu koŋwule na e naa sa amo kikɛ. 5Ashuŋ be nnaŋ to damta nɛ Enyɛnpe ta m bɔɔ mbe basa enɔ, ama Enyɛnpe koŋwule e wɔtɔ. 6Ekpa be nnaŋ to damtaana so nɛ basa bee bɔla a shuŋ, ama Ebɔrɛ koŋwule na e kɔ amo a wɔ basa to a shuŋ. 7Kiyoyu na bee bɔla ekpa pɔtɛana so nna a lara mbe kumu a ŋini ekama nɛ mbe basa kikɛ e nya kechɛto, 8Kiyoyu na bee kaa sa esa ko kanyiasheŋ be kamalga be kakɛ nna ŋkaa sa eko malɛ nfɛra mo nɛ a shi mo gbagba kutɔ nɛ e malga be kakɛ. 9Kiyoyu koŋwule na malɛ gbagba e naa sa eko malɛ yirda fanɛ Ebɔrɛ beeŋ wora kusɔ ko be kakɛ nseŋ sa esa ko malɛ kakɛ nɛ e baa chɛ basa. 10Eko malɛ e bee sa mo kakɛ nna nɛ e baa wora emamachisheŋ, eko malɛ nɛ e sa mo kewuŋkaŋɛ be kakɛ, n sa eko malɛ kanyiasheŋ mo nɛ k bee shin nɛ esa bee pin ayoyu to be kakɛ, eko malɛ nɛ e sa mo ŋgbar mo nɛ e maa nu be nnaŋ to be ketiŋ ŋ gbar be kakɛ, nseŋ sa eko malɛ ŋgbar mo nɛ e maa nu be afito be kekute be kakɛ. 11Ade malɛ kikɛ Kiyoyu koŋwule na gbagba e naa sa amo, mo e naa sa basa ŋkɛ na be kekama kanaŋkamaso nɛ e bee sha.

Eyur koŋwule nɛ kumo be mba damta be asheŋ

12Fanɛ kananɛ eyur baa la kukoŋwule kumo alɛ nsaa kɔ mba damta nɛ kumo be mba na kikɛ wɔ eyur koŋwule so na gbagba na nɛ Kristo gba du. 13Ŋkpal manɛ so, Kiyoyu koŋwule na e shin nɛ anyi kikɛ, Juwebi ŋko Griikebi, anya ŋko bumo nɛ b wɔ bumo be amu kikɛ nyam bɔla kabɔrɛbɛr so ŋ ki eyur koŋwule to ebi nyam nɛ anyi kikɛ ba nya Kiyoyu koŋwule na. 14Ŋkpal manɛ so, eyur na maŋ la kaba koŋwule nna, mba damta nna. 15Nɛ eyur be keya baŋ kaŋɛ le: “Ŋkpal ŋ ka maŋ la enɔ so so, m maŋ la eyur na be kaba,” loŋ maaŋ tiŋ n shin nɛ k sa maŋ naa la eyur na be kaba. 16Nɛ kusoe baŋ kaŋɛ fanɛ: “Ŋkpal ŋ ka maŋ la kenishi so, m maŋ la eyur na be kaba,” loŋ maaŋ tiŋ n shin nɛ k sa maŋ naa la eyur na be kaba. 17To, nɛ eyur ere kikɛ daa la kenishi nna, nnɛ nɛ kenu daa beeŋ baa wɔ? Ŋko nɛ eyur ere kikɛ daa la kusoe nna, nnɛ nɛ efɛa be kenu daa beeŋ baa wɔ? 18Ama kananɛ k du ere Ebɔrɛ ta eyur be kaba kama nna n wɔtɔ eyur na to kananɛ e bee sha fanɛ a baa du. 19Nɛ amo kikɛ daa la kaba koŋwule nna, nuso nɛ eyur na daa beeŋ baa du? 20Ama kananɛ k du ere, mba damta e wɔtɔ, ama eyur koŋwule malɛ nna. 21Kenishi maaŋ tiŋ ŋ kaŋɛ enɔ le: “M maa sha fo kechɛto.” Kumu malɛ maaŋ tiŋ ŋ kaŋɛ ayadra le: “M maa sha men be kechɛto.” 22Ama nɛ fo keni to, feeŋ wu fanɛ eyur ere be mba nɛ a pɔ ga a chɔ mba nɛ a ka na e daga anyi. 23Mba mo nɛ anyee kaa fɛ fanɛ a maŋ la shɛŋ na malɛ nɛ anyee kaa ta bunyaŋ damta a sa. Mba mo nɛ a maŋ walɛ kenishiso na malɛ nɛ anyee kaa keni so nɛnɛ. 24An be mba mo nɛ a walɛ kenishiso na bre maŋ daga le be kekeniso ere. Ebɔrɛ gbagba e ta eyur be mba kikɛ n chɔga abar so nɛ e ta bunyaŋ n sa mba mo nɛ a maŋ kɔ bunyaŋ amo gbagba be amu so na. 25Saŋɛ na so kebarga to kama maaŋ baa wɔ eyur na to, ama mbaana na kikɛ beeŋ baa kɔ kagbene koŋwule a keni abar so. 26Eyur na be kaba koŋwule baa wu ebesa, eyur na kikɛ bee wu ebesa nna, kaba koŋwule malɛ baa nya bunyaŋ, mba na kikɛ bee nya kagbenefuli nna. 27To, menyi e la Kristo be eyur na nsaa la kumo be mba kukoko to.

28Asɔri na to, basa nɛ Ebɔrɛ juŋkpar n lara e la beshuŋipo, bumo nɛ b bɛ so e la abɔrɛsheŋ be bewuŋkaŋɛpo, besasopo e la beŋinipo, n ta emamachishumpoana m bɛ so, n ta bechɛpo nɛ bechɛtopo nɛ bumo nɛ baa keni ashuŋ be asheŋ to so m bɛ so nseŋ ta bumo nɛ baa gbar ŋgbar mo nɛ bumo gbagba maa nu m bɛ so. 29Bumo kikɛ e la beshuŋipo a? Bumo kikɛ e la abɔrɛsheŋ be bewuŋkaŋɛpo a? Bumo kikɛ e la beŋinipo a? Bumo kikɛ e naa shuŋ emamachishuŋ a? 30Bumo kikɛ e kɔ kechɛ be kakɛ a? Bekama e naa gbar ŋgbar nɛ bumo gbagba maa nu a? Bekama e naa kute ŋgbar nɛ bumo gbagba maa nu be afito a? Ayai, mannɛ bumo kikɛ e naa wora loŋ. 31Amoso, men baa ta men be ŋgbene kikɛ a fin ŋkɛ mo nɛ a walɛ ga na.

Ma alɛ beeŋ ŋini menyi ekpa mo nɛ k beeŋ yɛr menyi anishito n ti so.

Currently Selected:

1 Kɔrintebi 12: GJNb

Highlight

Copy

Compare