1 Kɔrintebi 14

Kewuŋkaŋɛ nɛ ŋgbar pɔtɛana be ŋkɛ be asheŋ

1Amoso, men baa kɔ a fin kasha nseŋ ta menyi be ŋgbene kikɛ n fin ŋkɛ mo nɛ a shi Kiyoyu na kutɔ na, fɔnfɔŋ kewu abɔrɛsheŋ ŋ kaŋɛ be kakɛ na. 2Ŋkpal manɛ so, esa kama nɛ e bee gbar ŋgbar mo nɛ e maa nu na, maa gbar amo nna a sa basa, Ebɔrɛ nɛ e bee gbar amo a sa, ŋkpal manɛ so, esa kama maa nu amo. E bee bɔla Kiyoyu na to nna a malga wuloso be mmalga. 3Ama esa kama nɛ e bee wu abɔrɛsheŋ na to a kaŋɛ bre bee malga nna a sa basa a chɛ bumo to nɛ b baa yɔ anishito nsaa leŋ bumo to a wushi bumo kagbene. 4Esa kama nɛ e bee gbar ŋgbar mo nɛ e maa nu, bee chɛ mo nawule be kumu to nna nɛ e yɔ anishito, ama ekama nɛ e bee wu abɔrɛsheŋ to a kaŋɛ bre, bee chɛ asɔri to ebi na kikɛ to nna nɛ b yɔ anishito. 5Nɛ men kikɛ daa gbar ŋgbar pɔtɛana nna, k daa beeŋ par ma, ama kusɔ nɛ k chɔ loŋ e la men kikɛ ka daa beeŋ baa tiŋ a wu abɔrɛsheŋ to a kaŋɛ. Ŋkpal manɛ so, esa nɛ e bee wu abɔrɛsheŋ to a kaŋɛ, chɔ esa nɛ e bee gbar ŋgbar mo nɛ e maa nu, ama esa ko baa wɔ ndoŋ a beeŋ tiŋ ŋ kute ŋgbar na be afito nɛ asɔri na to ebi kikɛ e nya kechɛto n yɔ anishito. 6Ŋ kurgepoana, nɛ m baŋ ba menyi kutɔ m ba kaa gbar ŋgbar mo nɛ m maa nu ŋkaa maŋ bar menyi kelaraŋŋini ko ŋko kanyiasheŋ ko ŋko kewu abɔrɛsheŋ ŋ kaŋɛ ŋko keŋini ko, mannɛ be tɔnɔ nɛ menyeeŋ nya? 7Hale alaŋsɔ fanɛ kalopi nɛ jaŋjilaŋ nɛ a maŋ kɔ ŋkpa ere gba, nɛ b maŋ foŋ ŋko n laŋ amo amo be ekpa so, nuso nɛ feeŋ wora m pin amo be kushu ka wɔ ebel? 8Ŋko nɛ fanɛ akarma maŋ laŋ ntempeni kananɛ k daga, nuso nɛ basa bee wora a bela ase a yɔ kena to? 9To, loŋ nɛ k du n sa menyi. Nɛ men baa maŋ gbar ŋgbar mo nɛ basa bee nu, nuso nɛ esa beeŋ wora m pin kusɔ nɛ menyee kaŋɛ? Nɛ b baa maa pin amo to, kumo ere fee malga a sa afu nna na. 10Ŋgbar nnaŋ to damta e wɔ durnya ere to, amo alɛ kikɛ be kekama kɔ kifito nna. 11Ama nɛ fanɛ m baa maa nu ŋgbar mo nɛ esa bee malga, kumo ere esa nɛ e bee malga amo la efɔ nna ma kutɔ nɛ ma alɛ la efɔ mo kutɔ. 12Loŋ nɛ k du n sa menyi alɛ gba. Amoso, ŋkpal men ka bee kɔ a fin kenya ŋkɛ mo nɛ Kiyoyu na bee sa so, men baa pere kenishi a nya ŋkɛ mo nɛ a bee shin nɛ asɔri na bee yɔ anishito ga na.

13Amoso, ekama nɛ e bee gbar ŋgbar mo nɛ e maa nu, e baa kule Ebɔrɛ fanɛ e shin nɛ e baa tiŋ a kute amo be afito. 14Ŋkpal manɛ so, nɛ m baa kule Ebɔrɛ ŋgbar mo nɛ m maa nu to, ma kiyoyu e naa kule, ama ma nfɛra bre maa wora shɛŋ shɛŋ. 15To, naniere, nuso nɛ meeŋ baa wora? Meeŋ baa ta ma kiyoyu a kule Ebɔrɛ nseŋ naa ta ma nfɛra gba a kule Ebɔrɛ. Meeŋ baa ta ma kiyoyu a boŋ nshɛ nseŋ naa ta ma nfɛra gba a boŋ amo. 16Nɛ fee ta fo kiyoyu a chɔrɔ Ebɔrɛ, nuso nɛ esa pɔtɛ mo nɛ e ba asɔri na to ŋkaa maa nu ŋgbar na bee wora a shuli ‘Amɛn’ a wɔtɔ fo kechɔrɔ na to? Ŋkpal manɛ so, e maŋ nyi kusɔ nɛ fee kaŋɛ. 17Shere fo kabɔrɛchɔrɔ na beeŋ baa kɔ kifito ga, ama esa pɔtɛ na maaŋ nya kechɛto kama n yɔ anishito. 18Mee chɔrɔ Ebɔrɛ ga fanɛ mee gbar ŋgbar mo nɛ m maa nu a chɔ menyi be ekama. 19Ama nɛ m baa wɔ asɔri to mee kaa sha kemalga mmalga anu mo nɛ basa beeŋ tiŋ n nu to nna nɛ n ta amo ŋ ŋini basa na asɔ, a chɔ ŋ ka gbar mmalga ŋgboŋ kudu mo nɛ a wɔ ŋgbar mo nɛ b maa nu to.

20Ŋ kurgepoana, men sa maa fɛ nfɛra fanɛ mbia. Alubi bre be kewora be kaplɛa so men baa la mbia, ama men be nfɛra bre to, men baa la basa kpar. 21Abɔrɛsibɛ na malɛ e naa kaŋɛ loŋ fanɛ Enyɛnpe na yɛ: “Meeŋ bɔla basa nɛ b kɔ ŋgbar pɔtɛana nɛ befɔ be nnɔana to m malga n sa basa ere, ama nɛ n wora loŋ gba, b maaŋ nu n sa ma.” 22Amoso, ŋgbar mo nɛ amo be begbarpo maa nu be kegbar bee ŋini basa nɛ b maŋ la beyirdapo kusɔ ko nna, mannɛ beyirdapo na, ama kewu abɔrɛsheŋ ŋ kaŋɛ bre la kusɔ nɛ k bee ŋini beyirdapo kusɔ ko nna, k maŋ kɔ shɛŋ a ŋini bumo nɛ b maŋ la beyirdapo.

23Ŋkpal manɛ so, nɛ asɔri na to ebi kikɛ ba shɛr nɛ ekama nyam bee gbar ŋgbar nɛ b maa nu ana nɛ esa pɔtɛ ŋko bumo nɛ b maŋ la beyirdapo ba luri nshɛr na to, b maaŋ kaŋɛ fanɛ menyee lɔ eboŋ nna a? 24Ama nɛ fanɛ asɔri na to ebi kikɛ bee wu abɔrɛsheŋ na to a kaŋɛ nɛ emo nɛ e maŋ la eyirdapo ŋko esa pɔtɛ ba luri nshɛr na to, asheŋ nɛ e bee nu na kikɛ beeŋ shin nɛ e keni mbe asheŋ to n shin nɛ e wu mbe alubi. 25Mbe wulo to be nfɛra beeŋ lar n dii efuli nɛ e gbir n dese kasawule m maŋ Ebɔrɛ so ŋ kaŋɛ le: “Kashenteŋto, Ebɔrɛ wɔ menyi kutɔ nfe.”

Asɔri to be asheŋ nɛ amo be ekpa so be asheŋ

26To, ŋ kurgepoana, naniere manɛ e naŋ ka nɛ an kaŋɛ? Men baŋ ba shɛr asɔri to, eko beeŋ baa kɔ kapandi be kashɛ ŋko keŋini ko ŋko kelaraŋŋini be kesheŋ ko ŋko ŋgbar nɛ e maa nu be kegbar ŋko amo be kifito be kekute. A daga fanɛ men baa wora ade kikɛ nɛ asɔriebi na e nya kechɛto n yɔ anishito. 27Nɛ basa baa shin nɛ b gbar ŋgbar mo nɛ b maa nu, men shin nɛ k baa la fanɛ basa anyɔ ŋko b baa shi ga, b baa la basa asa ŋ gbar amo kukoko to nɛ esa ko malɛ e kute amo be afito. 28Nɛ esa nɛ e beeŋ tiŋ ŋ kute ŋgbar na be afito maŋ wɔtɔ, egbarpo na e lo mbe kɔnɔ asɔri na to nseŋ malga mo gbagba be kumu to nɛ Ebɔrɛ kutɔ. 29Kekama malɛ to a daga fanɛ abɔrɛsheŋ be bewuŋkaŋɛpo anyɔ ŋko besa e malga abɔrɛsheŋ nɛ bumo nɛ bumo alɛ ka na e belsi asheŋ nɛ bumo na kute na. 30Ama nɛ abɔrɛsheŋ be ewuŋkaŋɛpo kama nɛ e bee malga nɛ kelaraŋŋini be kubɔya ko shi Ebɔrɛ kutɔ m ba esa ko nɛ e tase nshɛr na to na kutɔ, ewuŋkaŋɛpo na e lo to. 31Ŋkpal manɛ so, men kikɛ beeŋ tiŋ n wu abɔrɛsheŋ to ŋ kaŋɛ kukoko to, saŋɛ na so ekama beeŋ koya kusɔ ko nseŋ nya keleŋto. 32Abɔrɛsheŋ be bewuŋkaŋɛpoana gbagba e wɔ bumo be kewuŋkaŋɛ be ayoyu. 33Ŋkpal manɛ so, Ebɔrɛ maŋ la kebagato be Ebɔrɛ nna, kagbenewushi be Ebɔrɛ e la mo.

34A daga fanɛ beche e baa lo bumo be nnɔ to ashi asɔriana to fanɛ kananɛ k du ashi Ebɔrɛ be basa larasoana na kikɛ be asɔriana na to na. B maŋ kɔ ekpa nɛ b malga, a daga fanɛ b baa bar bumo be amu kaseto fanɛ kananɛ abɔrɛsibɛ na bee kaŋɛ na. 35Kusɔ kama nɛ baa sha kepinto, b bishi bumo kulana epe, ŋkpal manɛ so, k la anishinyɔr be kesheŋ nna fanɛ eche e baa malga asɔri to. 36Cha, menyi kutɔ nɛ Ebɔrɛ be kamalga na fara ŋko menyi nawule kutɔ nɛ k yɔ?

37Ekama nɛ e bee fɛ fanɛ abɔrɛsheŋ be ewuŋkaŋɛpo e la mo ŋko fanɛ e la kiyoyu to be esa nna e baa nyi fanɛ kusɔ nɛ mee sibɛ a sa menyi ere la kamalga naseso mo nɛ k shi Enyɛnpe kutɔ nna. 38Nɛ e baŋ kplaŋ le be kesheŋ ere so, baaŋ kplaŋ mo alɛ gba so.

39Amoso, ŋ kurgepoana, men baa kɔ a fin kewu abɔrɛsheŋ ŋ kaŋɛ, menyi alɛ e sa maa kuŋ ŋgbar mo nɛ amo be begbarpo maa nu amo be kegbar ekpa ashi menyi to. 40Ama a daga fanɛ men baa wora kusɔ kama nɛnɛ ekpa niŋiso so.

Currently Selected:

1 Kɔrintebi 14: GJNb

Highlight

Copy

Compare