1 ເປໂຕ 3

ການປະຕິບັດຕໍ່ກັນລະຫວ່າງຜົວເມຍ

1ຝ່າຍເຈົ້າທັງຫລາຍຜູ້ເປັນເມຍກໍເໝືອນກັນ ຈົ່ງຍອມຟັງຜົວຂອງຕົນ ເພື່ອວ່າຖ້າຜົວຜູ້ໃດບໍ່ເຊື່ອຟັງພຣະທຳຂອງພຣະເຈົ້າ ການປະຕິບັດຂອງເມຍ ກໍອາດຈະຈູງໃຈຜົວໄດ້ ໂດຍບໍ່ຕ້ອງເວົ້າຫຍັງຈັກຄຳ 2ຄືເພື່ອຜົວຈະໄດ້ເບິ່ງເຫັນການປະຕິບັດອັນບໍຣິສຸດ ແລະອ່ອນນ້ອມຂອງພວກເຈົ້າຜູ້ເປັນເມຍ. 3ການປະດັບຕົບແຕ່ງກາຍນັ້ນ ຢ່າໃຫ້ເປັນການປະດັບຕົບແຕ່ງພາຍນອກ ຄືການແຕ່ງຊົງຜົມ ໃສ່ເຄື່ອງຄຳ ແລະການນຸ່ງຖື. 4ແຕ່ໃຫ້ເປັນການປະດັບທີ່ຊ່ອນໄວ້ໃນຈິດໃຈ ແຕ່ງດ້ວຍເຄື່ອງປະດັບທີ່ບໍ່ຮູ້ເສື່ອມສູນ ຄືດ້ວຍຈິດໃຈອ່ອນສຸພາບແລະສະຫງຽມຄ່ຽມຄົມ ຊຶ່ງເປັນສິ່ງທີ່ມີຄ່າສູງໃນສາຍພຣະເນດຂອງພຣະເຈົ້າ. 5ເຫດວ່າບັນດາແມ່ຍິງ ຜູ້ທີ່ມີສິນທຳໃນເຊັ່ນບູຮານ ຜູ້ຊຶ່ງມີຄວາມຫວັງໃນພຣະເຈົ້າ ໄດ້ຕົບແຕ່ງກາຍຢ່າງນັ້ນ ໂດຍໄດ້ຍອມຟັງຜົວຂອງຕົນ. 6ເໝືອນດັ່ງນາງຊາຣາໄດ້ຍອມຟັງອັບຣາຮາມ ແລະເອີ້ນເພິ່ນວ່າ, “ນາຍ.” ຖ້າພວກເຈົ້າເຮັດດີ ບໍ່ຕົກໃຈຢ້ານກົວຕໍ່ສິ່ງໃດ ພວກເຈົ້າກໍກາຍເປັນລູກຫລານຂອງນາງແລ້ວ.

7ເຈົ້າທັງຫລາຍທີ່ເປັນຜົວກໍເໝືອນກັນ ຈົ່ງຢູ່ກິນກັບເມຍດ້ວຍເຂົ້າໃຈວ່າ ນາງເປັນເພດທີ່ອ່ອນແອກວ່າ ຈົ່ງນັບຖືເມຍ ເໝືອນເປັນຜູ້ຮ່ວມກັນຮັບພຣະຄຸນແຫ່ງຊີວິດ ເປັນມໍຣະດົກ ເພື່ອບໍ່ໃຫ້ສິ່ງໃດສິ່ງໜຶ່ງຂັດຂວາງຄຳພາວັນນາອະທິຖານຂອງພວກເຈົ້າ.

ຍອມທົນທຸກຍ້ອນເຮັດການດີ

8ໃນທີ່ສຸດນີ້ ຂໍໃຫ້ພວກເຈົ້າທຸກຄົນຈົ່ງເປັນນໍ້າໜຶ່ງໃຈດຽວກັນ, ຈົ່ງເຫັນອົກເຫັນໃຈກັນ, ຈົ່ງຮັກກັນເໝືອນພີ່ນ້ອງຮ່ວມທ້ອງ, ຈົ່ງມີຈິດໃຈເມດຕາ ແລະອ່ອນນ້ອມຖ່ອມຕົວລົງ. 9ຢ່າຮ້າຍຕອບແທນການຮ້າຍ ແລະຢ່າປ້ອຍດ່າຕອບແທນການປ້ອຍດ່າ, ແຕ່ກົງກັນຂ້າມຈົ່ງອວຍພອນແກ່ພວກເຂົາ. ດ້ວຍວ່າ, ພຣະເຈົ້າຊົງເອີ້ນພວກເຈົ້າໃຫ້ເຮັດການຢ່າງນີ້ແຫຼະ ເພື່ອພວກເຈົ້າຈະໄດ້ຮັບພຣະພອນມາເປັນມໍຣະດົກ. 10ເພາະວ່າ

“ຜູ້ທີ່ຢາກຮັບຊີວິດອັນດີ

ແລະ ປາຖະໜາທີ່ຈະເຫັນວັນສະໜຸກ

ກໍໃຫ້ຜູ້ນັ້ນຫ້າມລີ້ນຂອງຕົນ

ບໍ່ໃຫ້ເວົ້າຄວາມຊົ່ວ

ແລະ ຫ້າມປາກບໍ່ໃຫ້ກ່າວ

ຄຳອຸບາຍລໍ້ລວງ.

11 ຈົ່ງໃຫ້ຜູ້ນັ້ນເວັ້ນໜີຈາກການຊົ່ວ

ແລະເຮັດການດີ ຈົ່ງໃຫ້ຜູ້ນັ້ນສະແຫວງຫາສັນຕິສຸກ

ແລະພະຍາຍາມຕິດຕາມໄປ.”

12 “ພຣະເນດຂອງອົງພຣະຜູ້ເປັນເຈົ້າ

ຊົງເຝົ້າເບິ່ງຄົນຊອບທຳ

ແລະພຣະອົງກໍຊົງຮັບຟັງຄຳພາວັນນາ

ອະທິຖານຂອງເຂົາ

ແຕ່ພຣະພັກຂອງພຣະອົງ

ຊົງຕໍ່ສູ້ບັນດາຄົນທີ່ເຮັດການຊົ່ວ.”

13ຖ້າພວກເຈົ້າດຸໝັ່ນໃນການເຮັດດີ ແມ່ນຜູ້ໃດຈະເຮັດຮ້າຍພວກເຈົ້າ? 14ແຕ່ຖ້າພວກເຈົ້າຕ້ອງທົນທຸກຍ້ອນເຮັດສິ່ງທີ່ຖືກຕ້ອງ ພວກເຈົ້າກໍເປັນສຸກ. ຢ່າຢ້ານກົວຕໍ່ຜູ້ທີ່ເຮັດໃຫ້ເຈົ້າສະດຸ້ງຕົກໃຈ ແລະຢ່າວິຕົກກັງວົນໃຈເລີຍ. 15ແຕ່ໃນໃຈຂອງເຈົ້າທັງຫລາຍ ຈົ່ງເຄົາຣົບນັບຖືພຣະຄຣິດວ່າ ເປັນອົງພຣະຜູ້ເປັນເຈົ້າ ຈົ່ງມີໃຈພ້ອມຢູ່ສະເໝີ ເພື່ອພວກເຈົ້າຈະສາມາດຕອບແກ້ຕົວໄດ້ຕໍ່ທຸກຄົນທີ່ຖາມພວກເຈົ້າວ່າ, ເຈົ້າມີເຫດຜົນປະການໃດຈຶ່ງມີຄວາມຫວັງຢ່າງນີ້. 16ແຕ່ຈົ່ງຕອບດ້ວຍໃຈສຸພາບແລະຢຳເກງ ແລະໃຫ້ມີໃຈສຳນຶກຜິດແລະຊອບອັນເສາະໃສ ເພື່ອວ່າເມື່ອພວກເຈົ້າຖືກປະໝາດນິນທາ ຄົນທີ່ກ່າວຫຍາບຊ້າ ຕໍ່ທຳນຽມຄຣິສຕຽນອັນດີຂອງພວກເຈົ້ານັ້ນ ກໍຈະໄດ້ຮັບຄວາມອັບອາຍ. 17ເພາະວ່າຖ້ານໍ້າພຣະໄທຂອງພຣະເຈົ້າຊົງເຫັນດີໃຫ້ພວກເຈົ້າທົນທຸກຍ້ອນເຮັດການດີ ກໍດີກວ່າຕ້ອງທົນທຸກຍ້ອນເຮັດການຊົ່ວ. 18ດ້ວຍວ່າ, ພຣະຄຣິດກໍເໝືອນກັນ ໄດ້ສິ້ນພຣະຊົນເທື່ອດຽວເປັນການສິ້ນສຸດ ເພື່ອແທນຄວາມຜິດບາບ ຄືພຣະອົງຜູ້ຊອບທຳ ແທນຜູ້ບໍ່ຊອບທຳ ເພື່ອຈະໄດ້ນຳເຮົາທັງຫລາຍໄປເຖິງພຣະເຈົ້າ ຝ່າຍກາຍພຣະອົງຊົງຖືກປະຫານເສຍ ແຕ່ຝ່າຍວິນຍານ ພຣະອົງຖືກຊົງບັນດານໃຫ້ຄືນພຣະຊົນ. 19ແລະໂດຍທາງວິນຍານນັ້ນ ພຣະອົງໄດ້ສະເດັດໄປປະກາດແກ່ບັນດາວິນຍານທີ່ຖືກຄຸກຢູ່. 20ຊຶ່ງເມື່ອກ່ອນນັ້ນບໍ່ໄດ້ຍອມເຊື່ອຟັງພຣະເຈົ້າ ຄືເມື່ອພຣະເຈົ້າຊົງສຳແດງຄວາມອົດທົນດົນນານ. ໃນສະໄໝຂອງໂນອາ ຂະນະທີ່ເພິ່ນກຳລັງສ້າງເຮືອຢູ່ ໃນເຮືອມີຄົນຈຳນວນໜ້ອຍ ຄືແປດຄົນທີ່ໄດ້ຜ່ານພົ້ນນໍ້າຖ້ວມນັ້ນ. 21ນໍ້ານັ້ນໝາຍເຖິງພິທີຮັບບັບຕິສະມາ ທີ່ໃຫ້ພວກເຈົ້າລອດພົ້ນດຽວນີ້ ບັບຕິສະມານີ້ ບໍ່ແມ່ນການຊຳລະສິ່ງເປື້ອນເປິທາງຮ່າງກາຍ ແຕ່ເປັນການຮຽນຂໍຕໍ່ພຣະເຈົ້າ ດ້ວຍໃຈສຳນຶກຜິດແລະຊອບອັນເສາະໃສ. ບັບຕິສະມານີ້ໃຫ້ເຖິງທີ່ພົ້ນ ເພາະດ້ວຍການທີ່ພຣະເຢຊູຄຣິດເຈົ້າ ຊົງເປັນຄືນມາຈາກຕາຍ 22ຜູ້ໄດ້ສະເດັດເຂົ້າໃນສະຫວັນ ແລະຊົງສະຖິດຢູ່ເບື້ອງຂວາພຣະຫັດຂອງພຣະເຈົ້າ ໂດຍມີຝູງເທວະດາແລະບັນດາຜູ້ມີອຳນາດ ແລະຣິດເດດຖືກຊົງມອບໄວ້ ໃຫ້ຢູ່ໃຕ້ອຳນາດຂອງພຣະອົງແລ້ວ.

Currently Selected:

1 ເປໂຕ 3: ພຄພ

Highlight

Copy