1 ເປໂຕ 2
2
ພຣະສີລາທີ່ຊົງຊີວິດ ແລະຊົນຊາດບໍຣິສຸດ
1ເຫດສະນັ້ນ ເຈົ້າທັງຫລາຍຈົ່ງລະຖິ້ມຄວາມຄິດຮ້າຍທັງປວງ ກົນອຸບາຍທຸກຢ່າງ ການໜ້າຊື່ໃຈຄົດ ຄວາມອິດສາ ແລະຄຳເວົ້ານິນທາທັງໝົດ. 2ຈົ່ງເປັນເໝືອນດັ່ງເດັກນ້ອຍໆທີ່ເກີດໃໝ່ ຈົ່ງຮ້ອນໃຈປາຖະໜາຫານໍ້ານົມອັນບໍຣິສຸດຝ່າຍຈິດວິນຍານ ເພື່ອວ່າດ້ວຍນໍ້ານົມນັ້ນ ພວກເຈົ້າຈະໄດ້ຈະເລີນຂຶ້ນເຖິງຄວາມພົ້ນ. 3ພວກເຈົ້າໄດ້ຄົ້ນພົບ ແລະສຳພັດດ້ວຍຕົນເອງແລ້ວວ່າ, ອົງພຣະຜູ້ເປັນເຈົ້າປະກອບດ້ວຍພຣະເມດຕາກະລຸນາ.
4ຈົ່ງມາຫາພຣະອົງ ຜູ້ຊົງເປັນພຣະສີລາທີ່ຊົງຊີວິດ ຊຶ່ງຝ່າຍມະນຸດໄດ້ປະຖິ້ມເສຍ ແຕ່ຝ່າຍພຣະເຈົ້າໄດ້ຊົງເລືອກໄວ້ ແລະຊົງຖືວ່າມີຄຸນຄ່າສູງ. 5ເຈົ້າທັງຫລາຍກໍເປັນເໝືອນຫີນທີ່ມີຊີວິດຢູ່ ພວກເຈົ້າຈົ່ງຍອມໃຫ້ພຣະເຈົ້າຊົງກໍ່ຂຶ້ນເປັນວິຫານຝ່າຍວິນຍານ ເປັນປະໂຣຫິດບໍຣິສຸດ ເພື່ອຖວາຍເຄື່ອງບູຊາຝ່າຍວິນຍານ ຊຶ່ງພໍພຣະໄທຂອງພຣະເຈົ້າ ໂດຍທາງພຣະເຢຊູຄຣິດເຈົ້າ. 6ເພາະມີຄຳຂຽນໄວ້ໃນພຣະຄຳພີແລ້ວວ່າ,
“ເບິ່ງແມ! ເຮົາວາງຫີນກ້ອນໜຶ່ງລົງ
ໃນເມືອງຊີໂອນ
ເປັນຫີນເສົາເອກທີ່ເລືອກໄວ້ແລ້ວ,
ແລະເປັນຫີນທີ່ມີຄ່າອັນປະເສີດ
ຜູ້ທີ່ວາງໃຈໃນຫີນນັ້ນ ກໍຈະບໍ່ໄດ້ຮັບ
ຄວາມອັບອາຍຈັກເທື່ອ.”
7ຫີນທີ່ມີຄ່າສູງຫລາຍນີ້ ມີສຳລັບເຈົ້າທັງຫລາຍທີ່ວາງໃຈເຊື່ອ ແຕ່ສຳລັບຄົນທັງຫລາຍທີ່ບໍ່ເຊື່ອນັ້ນ
“ຫີນທີ່ຊ່າງກໍ່ຖິ້ມເສຍແລ້ວ
ຫີນນັ້ນແຫຼະ ໄດ້ກັບກາຍມາເປັນຫີນເສົາເອກ.”
8ແລະ
“ເປັນຫີນທີ່ຈະເຮັດໃຫ້ຄົນຕຳສະດຸດ
ແລະເປັນຫີນທີ່ເຮັດໃຫ້
ພວກເຂົາສະດຸດລົ້ມ”
ທີ່ພວກເຂົາສະດຸດນັ້ນ ກໍເພາະພວກເຂົາບໍ່ເຊື່ອຟັງພຣະທຳ ພວກເຂົາກໍຖືກຊົງກຳນົດໄວ້ ສຳລັບການນີ້ແຫຼະ.
9ແຕ່ຝ່າຍເຈົ້າທັງຫລາຍ ເປັນຊາດທີ່ພຣະເຈົ້າຊົງເລືອກໄວ້ແລ້ວ ເປັນປະໂຣຫິດຫລວງ ເປັນປະຊາຊາດບໍຣິສຸດ ເປັນພົນລະເມືອງຂອງພຣະເຈົ້າ ເພື່ອເຈົ້າທັງຫລາຍຈະໄດ້ປະກາດພຣະບາລະມີຂອງພຣະອົງ ຜູ້ໄດ້ຊົງເອີ້ນພວກເຈົ້າໃຫ້ອອກມາຈາກຄວາມມືດ ເຂົ້າໄປສູ່ຄວາມສະຫວ່າງອັນມະຫັດສະຈັນຂອງພຣະອົງ. 10ຄືເມື່ອກ່ອນນັ້ນ ເຈົ້າທັງຫຼາຍບໍ່ມີຊາດ, ແຕ່ບັດນີ້ເປັນພົນລະເມືອງຂອງພຣະເຈົ້າ ເມື່ອກ່ອນພວກເຈົ້າບໍ່ໄດ້ຮັບພຣະກະລຸນາ, ແຕ່ບັດນີ້ພວກເຈົ້າໄດ້ຮັບພຣະກະລຸນາແລ້ວ.
ດຳເນີນຊີວິດເໝືອນເປັນຂ້ອຍຂ້າຂອງພຣະເຈົ້າ
11ເຈົ້າທັງຫລາຍທີ່ຮັກເອີຍ ຂ້າພະເຈົ້າຂໍເຕືອນສະຕິພວກເຈົ້າ ເໝືອນເປັນຄົນຕ່າງຊາດທີ່ທ່ອງທ່ຽວໃນໂລກນີ້ ໃຫ້ງົດເວັ້ນຈາກຕັນຫາແນວມະນຸດ ຊຶ່ງທຳການຕໍ່ສູ້ຈິດວິນຍານ. 12ຈົ່ງດຳເນີນຊີວິດອັນດີງາມຢູ່ໃນທ່າມກາງຄົນຕ່າງຄວາມເຊື່ອ ເພື່ອວ່າເມື່ອພວກເຈົ້າຖືກກ່າວຫາວ່າເປັນຄົນເຮັດຊົ່ວນັ້ນ, ພວກເຂົາກໍຈະໄດ້ເຫັນຄຸນຄວາມດີຂອງພວກເຈົ້າ ຈະໄດ້ສັນລະເສີນພຣະເຈົ້າ ໃນວັນທີ່ພຣະອົງສະເດັດມາປາກົດ.
13ເພາະເຫັນແກ່ອົງພຣະຜູ້ເປັນເຈົ້າ ເຈົ້າທັງຫລາຍຈົ່ງຍອມຢູ່ໃຕ້ຂໍ້ບັງຄັບທຸກຢ່າງ ທີ່ມະນຸດຕັ້ງໄວ້ ບໍ່ວ່າຜູ້ນັ້ນຈະເປັນກະສັດຜູ້ສູງສຸດ 14ຫລືບັນດາຜູ້ປົກຄອງທີ່ໄດ້ຮັບແຕ່ງຕັ້ງຈາກເພິ່ນ ໃຫ້ລົງໂທດຜູ້ທີ່ເຮັດຊົ່ວແລະຍ້ອງຍໍຜູ້ທີ່ເຮັດດີ. 15ດ້ວຍວ່າ, ພຣະເຈົ້າຢາກໃຫ້ພວກເຈົ້າລະງັບຄວາມໂງ່ງ່າວຂອງຄົນ ດ້ວຍຄຸນຄວາມດີທີ່ພວກເຈົ້າໄດ້ເຮັດນັ້ນ. 16ຈົ່ງດຳເນີນຊີວິດຢ່າງຄົນມີເສລີພາບ ແຕ່ຢ່າໃຊ້ເສລີພາບນັ້ນ ເປັນຂໍ້ອ້າງເພື່ອເຮັດຄວາມຊົ່ວ ແຕ່ຈົ່ງດຳເນີນຊີວິດເໝືອນເປັນຂ້ອຍຂ້າຂອງພຣະເຈົ້າ. 17ຈົ່ງໃຫ້ກຽດແກ່ທຸກໆຄົນ ຈົ່ງຮັກບັນດາພີ່ນ້ອງໃນຄວາມເຊື່ອດຽວກັນ ຈົ່ງຢຳເກງພຣະເຈົ້າ ແລະຈົ່ງເຄົາຣົບນັບຖືຜູ້ທີ່ມີອຳນາດສູງສຸດ.
ພຣະເຢຊູເຈົ້າເປັນແບບຢ່າງຂອງການທົນທຸກ
18ເຈົ້າທັງຫຼາຍຜູ້ເປັນຄົນຮັບໃຊ້ເອີຍ, ຈົ່ງຍອມຟັງນາຍຂອງຕົນ ດ້ວຍຄວາມເຄົາຣົບທຸກຢ່າງ ບໍ່ແມ່ນແຕ່ນາຍຜູ້ໃຈດີ ແລະຜູ້ໃຫ້ຄວາມເຫັນອົກເຫັນໃຈເທົ່ານັ້ນ ແຕ່ທັງຕໍ່ນາຍຜູ້ທີ່ໂຫດຮ້າຍດ້ວຍ. 19ຖ້າພວກເຈົ້າທົນຄວາມທຸກລຳບາກອັນບໍ່ເປັນທຳ ເນື່ອງຈາກຄວາມເຊື່ອໃນພຣະເຈົ້າ ພຣະອົງຈະຊົງອວຍພອນແກ່ພວກເຈົ້າ. 20ເພາະຖ້າພວກເຈົ້າເຮັດການຊົ່ວ ແລະອົດທົນເອົາການຂ້ຽນຕີເພາະເຮັດຊົ່ວ ຈະເປັນການດີການຊອບຢ່າງໃດ? ແຕ່ຖ້າພວກເຈົ້າເຮັດການດີ ແລະອົດທົນເອົາຄວາມທຸກທໍລະມານເພາະການດີນັ້ນ ເຈົ້າກໍເປັນທີ່ພໍພຣະໄທຕໍ່ພຣະພັກພຣະເຈົ້າ. 21ເພາະວ່າ ພຣະເຈົ້າໄດ້ຊົງເອີ້ນພວກເຈົ້າໄວ້ສຳລັບການນີ້ແຫຼະ ເພາະພຣະຄຣິດກໍໄດ້ຊົງທົນທຸກທໍລະມານ ແທນເຈົ້າທັງຫລາຍເໝືອນກັນ ໂດຍໃຫ້ເປັນແບບຢ່າງແກ່ພວກເຈົ້າ ເພື່ອພວກເຈົ້າຈະໄດ້ຕິດຕາມຮອຍພຣະບາດຂອງພຣະອົງ. 22ພຣະອົງບໍ່ໄດ້ເຮັດບາບຈັກປະການ ແລະຄວາມຕົວະຈາກປາກຂອງພຣະອົງກໍບໍ່ມີ. 23ເມື່ອເຂົາກ່າວຄຳໝິ່ນປະໝາດພຣະອົງ ພຣະອົງກໍບໍ່ໄດ້ຕອບຄືນ ເມື່ອພຣະອົງທົນທຸກທໍລະມານພຣະອົງກໍບໍ່ໄດ້ຂູ່ອາຄາດ ແຕ່ພຣະອົງໄດ້ມອບຄວາມຫວັງໄວ້ກັບພຣະເຈົ້າຜູ້ຕັດສິນຢ່າງຍຸດຕິທຳ. 24ໃນພຣະກາຍຂອງພຣະອົງເອງ ພຣະອົງໄດ້ຊົງຮັບແບກບາບຂອງພວກເຮົາໄປເຖິງຕົ້ນໄມ້ນັ້ນ ເພື່ອພວກເຮົາຈະໄດ້ຕາຍເສຍຝ່າຍການບາບ ແລະມີຊີວິດຝ່າຍຄວາມຊອບທຳ, ດ້ວຍບາດແຜຂອງພຣະອົງ ເຈົ້າທັງຫລາຍກໍດີປົກກະຕິແລ້ວ. 25ເພາະວ່າ ພວກເຈົ້າເປັນເໝືອນດັ່ງແກະທີ່ຫລົງເສຍໄປ, ແຕ່ບັດນີ້ພວກເຈົ້າຖືກນຳຄືນມາຫາພຣະຜູ້ລ້ຽງ ແລະຜູ້ເບິ່ງແຍງຈິດວິນຍານຂອງພວກເຈົ້າແລ້ວ.
Currently Selected:
1 ເປໂຕ 2: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
