Loos 16

Paulus Has Nojqaab Nyobzoo

1Kuv xaav qha rua mej txug peb tug muam Faunpis, kws ua num paab pawg ntseeg huv lub nroog Kheekhias. 2Thov mej txaistog nwg ntawm tug Tswv lub npe, kuas tsimnyog le cov ntseeg, hab paab nwg lawvle nwg kev cheemtsum; ruaqhov nwg tau paab suavdlawg hab paab kuv ntau kawg lug lawm.

3Thov has nojqaab nyobzoo rua Pixilas hab Akhilas obtug; obtug yog ob tug kws nrug kuv ua Yexus Khetos tegnum; #Tegnum 18:2 4obtug tau pheejsav pub rua kuv. Tsi yog kuv tuableeg txhaj ua obtug tsaug xwb, tabsis txhua pawg ntseeg kws yog Lwmtsaav Tuabneeg puavleej ua obtug tsaug hab. 5Thov has nojqaab nyobzoo rua cov ntseeg kws tuaj saablaaj huv obtug tsev hab.

Thov has nojqaab nyobzoo rua kuv tug phoojywg Epanetus, kws yog thawjtug huv lub xeev Exias lug ntseeg Khetos. 6Thov has nojqaab nyobzoo rua Malis, kws tau siv zug ua num paab mej. 7Thov has nojqaab nyobzoo rua Aanraunikus hab Yuniyas,#16:7: Yuniyas; lossis Yunai-as; tej phoo ntawv qub kws xuas teg sau, muaj Yulias. kws yog kuv le txheebze kws raug kaw nrug kuv huv tsev lojcuj; obtug kuj yog ob tug kws nto npe nyob rua huv cov timthawj, hab obtug tseem xub lug ntseeg Yexus uantej kuv.

8Thov has nojqaab nyobzoo rua Apliatus, kws yog tug phoojywg kws kuv hlub nyob rua huv tug Tswv. 9Thov has nojqaab nyobzoo rua Awnpanus, kws yog ib tug phoojywg nrug peb ua Khetos tegnum, hab has rua Xitakhis, kws yog kuv tug phoojywg. 10Thov has nojqaab nyobzoo rua Apeles, kws ncaajnceeg rua Khetos heev. Has nojqaab nyobzoo rua Alitaunpulus tsev tuabneeg. 11Thov has nojqaab nyobzoo rua kuv ib tug kwvtij Helaudi-oos, hab has nojqaab nyobzoo rua cov ntseeg Yexus kws nyob huv Nakixus tsev tuabneeg.

12Has nojqaab nyobzoo rua Tifainas hab Tifauxas, kws ua dlejnum rua tug Tswv, hab has rua kuv tug phoojywg zoo Pawxis, kws tau ua dlejnum ntau heev pub rua tug Tswv. 13Kuv xaa lug nojqaab nyobzoo rua Lufus, kws yog ib tug ua tau tug Tswv le dlejnum zoo heev; hab has nojqaab nyobzoo rua nwg nam, kws yeej ibtxwm ua ib leejnam rua kuv hab. #Malak 15:21 14Has nojqaab nyobzoo rua Axikitus, Filenkoos, Hawmes, Pataunpas, Hawmas, hab taagnrho cov kwvtij hab cov muam kws nrug puab nyob ntawd huv tuabsi. 15Thov has nojqaab nyobzoo rua Filaulaunkus, Yulias, Nele-us, hab nwg tug muam, hab Auloopas hab taagnrho cov ntseeg kws nrug puab nyob uake ntawd huv tuabsi.

16Mej ib leeg has nojqaab nyobzoo rua ib leeg hab ib leeg nwj ib leeg ntawm txuj kev dlawbhuv. Taagnrho Khetos cov pawg ntseeg puavleej xaa kev nojqaab nyobzoo tuaj rua mej.

Tej Lug Qha Thaus Kawg

17Cov kwvtij, kuv thov nquahu kuas mej ceevfaaj txug cov tuabneeg kws ntxag kuas suavdlawg tawg paab tawg pawg hab muab suavdlawg txuj kev ntseeg lem kuas yuamkev hab tawmtsaam tej lug qha kws mej tub nov lug lawm. Mej yuavtsum nyob kuas dleb ntawm cov tuabneeg ntawd! 18Ruaqhov cov tuabneeg kws ua le ntawd tsi yog cov kws ua peb tug Tswv Khetos tegnum, tabsis yog puab le kev nrhav noj nrhav haus xwb. Hab puab has tej lug mog lug muas dlaag-ntxag cov tuabneeg kws tsi paub qaabhau lub sab kuas yuamkev. 19Suavdlawg puavleej nov txug mej txuj kev ncaajnceeg rua Txuj Moo Zoo, yogle ntawd kuv zoosab rua mej kawg le. Kuv xaav kuas mej ua tuabneeg txawjntse rua yaam kws zoo, tabsis ua le tug tuabneeg ruag rua yaam kws phem. 20Tshuav tsi ntev, Vaajtswv tug kws pub tau kev thaajyeeb rua peb, tub yuav ua kuas Xataas puagntsoog nyob huv mej qaab xibtaws.

Thov kuas peb tug Tswv Yexus txuj moovhlub nrug mej suavdlawg nyob.#16:20: Tej phoo ntawv qub kws xuas teg sau, muab kaab nuav rhu tawm lawm.

21Timautes, tug kws nrug kuv ua num uake, kuj has nojqaab nyobzoo rua mej; hab Lukius, Yaxoos, hab Xauxipataws kws yog kuv cov kwvtij Yudais, puab has nojqaab nyobzoo rua mej hab. #Tegnum 16:1

22Kuv yog Tawtius, yog tug kws sau Paulus tsaab ntawv nuav, kuv has nojqaab nyobzoo rua mej cov kws ntseeg Yexus hab.

23Nkai-us tug kws kuv nrug nyob, hab yog tug kws muab nwg lub tsev rua pawg ntseeg ua chaw saablaaj, nwg has nojqaab nyobzoo rua mej suavdlawg. Elatus, kws yog tug tuav lub nroog tej nyajtxag, hab peb tug kwvtij Khuatus, has nojqaab nyobzoo rua mej suavdlawg hab. #Tegnum 19:29; 1Klt 1:14; 2Tim 4:20 24#16:24: Tej phoo ntawv qub kws xuas teg sau, ntxiv nqai 24 nuav rua: Thov kuas peb tug Tswv Yexus Khetos txuj moovhlub nrug mej suavdlawg nyob. Amees. Tabsis tej phoo ho muab nqai nuav moog ntxiv rua tomqaab nqai 27.

Paulus Cov Lug Qhuas Vaajtswv Thaus Xaus

25Peb cale qhuas Vaajtswv! Nwg yog tug kws muaj cuabkaav ua kuas mej sawv khovkho rua ntawm mej txuj kev ntseeg, lawvle Txuj Moo Zoo kws has txug Yexus Khetos kws kuv qha, hab lawvle tej lug tseeb kws tau muab npug ca tau ntau tam lug lawm. 26Tabsis nwgnuav qhov tseeb ntawd tub raug muab nthuav rua suavdlawg paub lawvle Vaajtswv tug kws muaj sa nyob moog ibtxhis tau has rua cov xwbfwb cev Vaajtswv lug kuas muab sau tseg rua huv ntawv, sub txhua tsaav tuabneeg txhaj yuav ntseeg hab noog Nwg lug.

27Thov kuas Vaajtswv tug kws muaj kev txawjntse tshaajplawg, tuableeg tau koobmeej lug ntawm Yexus Khetos moog ibtxhis le. Amees.#16:27: Tej phoo ntawv qub kws xuas teg sau, muaj nqai 25-27 nyob rua ntawm nuav hab tomqaab 14:23; lwm phoo tsuas muaj cov nqai nuav nyob tomqaab 14:23 xwb; muaj ib phoo muaj cov nqai nuav nyob tomqaab 15:33.

Currently Selected:

Loos 16: HNJ2022

Highlight

Copy