Filipis 3

Txuj Kev Ncaajnceeg Kws Tseeb

1Cov kwvtij, thaus kawg nuav, mej cale zoosab vim qhov kws mej tau nrug tug Tswv koom uake. Qhov kws kuv rov sau tej kws kuv tub sau tuaj rua mej yaav taag lug lawm, yeej tsi muaj dlaabtsi nyuaj rua kuv, tabsis tsuas yog yuav ua kuas mej muaj kev cobphum dlua qub xwb.

2Mej yuavtsum ceevfaaj cov dlev ntawd, ceevfaaj cov tuabneeg kws ua phem ua qas, hab ceevfaaj cov tuabneeg kws muab puab tej tawv nqaj txav. 3Peb txhaj yog cov ua kevcai txav kws tseeb tag, tsi yog puab; peb pehawm Vaajtswv lug ntawm Vaaj Ntsujplig, peb khaav ntxhas txug Yexus Khetos, hab peb yeej tsi casab rua tej kevcai ntawm saab nqajtawv hlo le. 4Yog kuv yuav casab rua tej ntawd los yeej tau kawg. Yog mej leejtwg xaav tas nwg casab tau rua tej kevcai ntawm saab nqajtawv ntawd, kuv tseem hajyam muaj chaw casab rua tej ntawd dlua nwg.

5Thaus yug kuv puv yim nub xwb, puab tub muab kuv ua kevcai txav lawm. Kuv yog tuabneeg Yixalayees, kuv yog xeem Npeeyamees, kuv yog tseem-tseem rojntshaa tuabneeg Henplais; yog yuav has txug qhov kws coj lawvle Yudais tej kevcai, kuv yog ib tug Falixais ntaag, #Loos 11:1; Tegnum 23:6; 26:5 6kuv lub sab kublug xwb, kuv txhajle tsimtxom pawg ntseeg. Yog tas ib tug tuabneeg twg muaj cuabkaav cale dlawbhuv tau vim nwg coj lawvle txuj kevcai, tes yeej tsi muaj leejtwg yuav thuam tau kuv le. #Tegnum 8:3; 22:4; 26:9-11

7Tabsis txhua yaam kws yaav taag lug muajnqes rua kuv, nwgnuav kuv suav has tas tej ntawd tsi muajnqes lawm, vim kuv xaav rua Yexus Khetos lawm xwb. 8Tshaaj qhov ntawd hab, kuv suav has tas txhua yaam tsi muajnqes le lawm, vim kuv tau yaam kws tseem muajnqes heev dlua tej ntawd; yaam ntawd yog qhov kws kuv lug paub Yexus Khetos tug kws yog kuv tug Tswv. Kuv saib tej ntawd zoo ib yaam le tej lamsim lawm xwb, kuv txhajle muab txhua yaam povtseg huv tuabsi sub kuv txhaj tau Yexus Khetos 9hab tau nrug Nwg koom ib txujsa. Qhov kws kuv coj lawvle txuj Kevcai ntawd yeej ua tsi tau kuas kuv ua tau tuabneeg dlawbhuv. Qhov kws kuv muaj txuj kev dlawbhuv yog lug ntawm txuj kev ntseeg Khetos xwb, kws yog txuj kev dlawbhuv lug ntawm Vaajtswv lug, kws yog txuj kev ntseeg.

10Qhov kws kuv xaav tau tshaajplawg yog kuv xaav paub Khetos hab xaav saaj lub fwjchim kws ua rua Nwg sawv huv qhovtuag rovqaab lug, xaav muaj feem koom nrug Nwg raug kev txomnyem hab xaav tuag zoole Nwg, 11kws casab has tas Vaajtswv yeej yuav tsaa kuv sawv huv qhovtuag rovqaab lug.

Dlha Moog Rua Tug Nrim Tom Kawg

12Kuv tsi tau has tas kuv tub tau txais tej nuav lawm lossis ua tau kuv lub neej zoo kawg nkaus lawm, tabsis kuv tseem taabtom siv zug ua kuas kuv tau tej ntawd lug ua kuv tug, ib yaam nkaus le Yexus Khetos tau coj kuv lug ua Nwg tug. 13Cov kwvtij, kuv tsi xaav#3:13: tsi xaav; tej phoo ntawv qub kws xuas teg sau, muaj tsi tau xaav. has tas kuv tub tau txais qhov ntawd lawm; tabsis muaj ib yaam kws kuv ua, yaam ntawd yog tsi xob xaav txug yaav taag lug lawm, tabsis rausab ntso moog kuas txug yaam kws tseem nyob tom hauvntej. 14Yogle ntawd, kuv txhajle dlha ncaajnraim moog rua tug nrim tom kawg kuas kuv tau qhov nqezug kws Vaajtswv tau hu kuas kuv lug txais huv Tswv Yexus nyob sau ntuj ceebtsheej.

15Peb cov kws yeej lujhlub tav nam tav txiv ntawm saab kev ntseeg lawm, tsimnyog peb yuavtsum muaj qhov kev xaav zoo ib yaam nkaus. Tabsis yog muaj qeeyaam kws mej xaav txawv lawm, Vaajtswv yeej yuav qha kuas meej rua mej paub. 16Txawm lecaag los xij, ca peb coj lawvle tej kws peb tub coj lug txug najnub nua lawm.

17Cov kwvtij, mej yuavtsum xyum ua lawvle kuv ua. Mej yuavtsum ua tuabzoo saib cov tuabneeg kws puab coj lawvle tej yaamntxwv kws peb tub ua rua mej xyum lawm. #1Klt 4:16; 11:1 18Kuv tub qha tej nuav rua mej ntau zag lawm, nwgnuav kuv rov qha dlua rua mej nrug lub kuamuag poob, vim muaj ntau leej ua puab lub neej zoole puab yog yeebncuab rua Khetos tug ntoo khaublig. 19Thaus kawg puab yuav raug kev puamtsuaj, vim puab tug vaajtswv yog puab lub plaab; puab tseem muab yaam kws tsimnyog txaajmuag coj lug khaav, hab puab tsuas xaav txug tej kws yog nplajteb le xwb. 20Peb yog tuabneeg qaumntuj, peb najnub ua sabntev tog peb tug Cawmseej, kws yog Tswv Yexus Khetos, tug kws yuav lug sau ntuj lug. 21Nwg yuav muab peb lub cev kws txawj mob txawj tuag nuav hloov dlua tshab kuas zoole Nwg lub cev kws ci ntsaa-ab kws yog lug ntawm Nwg lub fwjchim kws muaj peevxwm kaav tau ibpuas tsaavyaam huv tuabsi.

Currently Selected:

Filipis 3: HNJ2022

Highlight

Copy