Filipis 2

Khetos Txuj Kev Txu Fwjchim Hab Raug Tsaa Ua Tug Luj

1Yog tas qhov kws mej nrug Khetos koom ib txujsa ntawd txhawb tau mej lub zug ntxiv, Nwg txuj kev hlub ua rua mej txaussab, ua rua mej nrug Vaaj Ntsujplig sis raugzoo,#2:1: mej nrug Vaaj Ntsujplig sis raugzoo; lossis Vaaj Ntsujplig tau coj mej ib leeg nrug ib leeg sis raugzoo. ua rua mej muaj lub sabdlawb sabzoo hab ib leeg txawj taabncuab ib leeg, 2tes kuv thov kuas mej ua rua kuv txuj kev zoosab nuav tavlog lug ntawm qhov kws mej koom tuab txuj kev xaav, koom tuab txuj kev hlub, hab suavdlawg koomsab koomntsws uake. 3Tsi xob ua ib yaam dlaabtsi kuas zoo rua mej lossis ua kuas tuabneeg qhuas has tas mej yog tug zoo, tabsis lug ntawm txuj kev txu fwjchim mej yuavtsum ncuntsoov tas lwmtug zoo dlua mej. 4Mej tsi xob xaav txug yaam kws mej nyam xwb, tabsis mej yuavtsum xaav txug yaam kws lwmtug nyam hab. 5Tsimnyog mej yuavtsum muaj tug cwjpwm kws zoo ib yaam le Yexus Khetos:

6Nwg yeej ibtxwm muaj Vaajtswv tug fwvxyeej,

tabsis Nwg tsi tau xaav tas Nwg yuav ua kuas Nwg muaj fwjchim sisluag zog le Vaajtswv.

7Nwg txaussab hlo tso txhua yaam tseg,

lug ua lub neej zoole ib tug tubkhai.

Nwg lug yug ua tuabneeg

hab ua lub neej zoole tuabneeg.

8Nwg txu Nwg lub fwjchim hab noog Vaajtswv lug txug qeb kws tuag taug,

txawm yog tuag sau ntoo khaublig los xij!

9Tub yog vimle nuav Vaajtswv txhaj tsaa Nwg rua lub chaw kws sab dlua ndlais,

hab tis lub npe kws zoo tshaaj txhua lub npe huv tuabsi rua Nwg,

10sub nyob rua ntawm Yexus lub npe

txhua tug kws nyob sau ntuj ceebtsheej hab huv nplajteb, hab tej kws nyob huv nruab tivtxwv#2:10: nruab tivtxwv: Qhov nuav yog qha has tas tseem muaj cov tuag kws nyob qhov tsausntuj nti huv nruab tivtxwv hab.

yuav txhuscaug pe Nwg,

11hab txhua tug nplaig yuav leeg has tas Yexus Khetos yog tug Tswv,

kuas Vaajtswv tug kws yog Leejtxiv tau koobmeej. #Yaxaya 45:23 (LXX)

Ci Le Cov Teeb Kws Nyob Huv Lub Nplajteb

12Yogle ntawd, cov kwvtij kws kuv hlub 'e, thaus kuv tseem nrug mej nyob, mej yeej ibtxwm noog kuv lug; txawm yog nwgnuav kuv tsi nrug mej nyob lawm los mej yuavtsum noog kuv lug heev dlua yaav taag lug. Mej yuavtsum kubsab rua mej txuj kev dlim txim lug ntawm kev paub ntshai Vaajtswv ua ibce tsheenyo, 13ruaqhov Vaajtswv yog tug kws najnub ua num nyob huv mej kuas mej muaj lub sab xaav ua hab ua tau lawvle Vaajtswv lub sab nyam.

14Txhua yaam kws mej ua mej tsi xob sis ywg hab siscaav, 15sub mej txhajle tsi raug thuam hab txhajle tsi muaj txim, ua tau Vaajtswv cov mivnyuas kws zoo kawg nkaus nrug tam tuabneeg tsi ncaaj hab muaj txim nyob uake huv nplajteb nuav. Mej yuavtsum ci rua huv puab ib yaam le cov nubqub ci sau nruabntug, #2Kev 32:5 16yaam nkaus le mej muab txujlug kws cajsa pub rua puab ntaag. Yog mej ua le ntawd, thaus txug Nub kws Khetos rovqaab lug kuv yuav txaussab heev, vim qhov ntawd yuav qha tau has tas kuv tej kev khwv hab tej dlejnum yeej tsi nkim zug kag le.

17Txawm kuv cov ntshaav yuav raug muab laub tawm lug fij rua Vaajtswv es txhaj yuav ua rua mej txuj kev ntseeg tav los kuv yeej txaussab hab yeej nrug mej suavdlawg zoosab. 18Ib yaam nkaus le ntawd, tsimnyog mej yuavtsum zoosab hab qha kuas kuv nrug mej zoosab hab.

Timautes Hab Epafauditus

19Yog Tswv Yexus pumzoo, kuv casab has tas tsi ntev nuav kuv yuav khaiv Timautes tuaj saib mej, sub thaus kuv nov xuv txug mej lawm, yuav ua rua kuv zoosab heev. 20Timautes tuableeg xwb txhajle xaav ib yaam le kuv hab mobsab txug mej tag-tag. 21Dlua le lwmtug, puab tsuas xaav txug puab tej num xwb, puab yeej tsi xaav txug Yexus Khetos tej num le. 22Tabsis mej tub paub txug Timautes lawm has tas nwg muajnqes npaum lecaag; nwg tau nrug kuv ua tegnum kws qha Txuj Moo Zoo ib yaam le wb yog ob txivtub. 23Yogle ntawd, thaus kuv paub kag has tas yuav muaj dlaabtsi tshwmsim rua kuv lawm, tes kuv yuav khaiv kag Timautes tuaj cuag mej kuas sai le sai tau. 24Hab kuv casab has tas yog Vaajtswv pumzoo, tsi ntev nuav kuv yuav tau tuaj saib mej hab.

25Kuv xaav tas, ntshe kuv yuav tau khaiv peb tug kwv Epafauditus kws tau nrug kuv ua num hab nrug kuv ua tubrog, kws mej tau khaiv nwg tuaj paab kuv ntawd, rovqaab lug tim mej. 26Nwg yeej xaav pum mej suavdlawg kawg le hab nwg nyuajsab kawg vim mej tau nov tas nwg mob. 27Nwg yeej mob tag, hab tub yuavlaug tuag. Tabsis Vaajtswv taabncuab nwg heev, tsi yog Vaajtswv taabncuab nwg ib leeg xwb, Vaajtswv kuj taabncuab kuv hab, sub kuv txhaj tsi ntsib ob-peb tom kev nyuajsab.

28Yogle ntawd, kuv txhajle maaj khaiv nwg rovqaab lug tim mej, sub thaus mej rov sis pum lawm, mej txhaj yuav zoosab hab kuv tej kev nyuajsab los txhaj yuav pluj zujzug moog. 29Mej yuavtsum zoosab hlo txaistog nwg, yaam le nwg yog ib tug kwvtij kws ntseeg tug Tswv, hab yuavtsum fwm txhua tug tuabneeg kws zoole nwg, 30ruaqhov nwg tau pheejsav tuag hab muab hlo nwg lub neej ua Khetos tegnum, sub nwg txhaj paab tau kuv ua tej kws mej paab tsi tau.

Currently Selected:

Filipis 2: HNJ2022

Highlight

Copy