Filipis 4

Tej Lug Qha

1Yogle ntawd, cov kwvtij kws kuv hlub hab ncu, mej ua rua kuv zoosab hab ua rua kuv tau ntsejmuag kawg le! Cov kwvtij kws kuv hlub 'e, mej yuavtsum sawv khovkho rua huv tug Tswv.

2Yu-audias hab Xeetikhes, kuv thov kuas meb muaj lub sab xaav ib yaam nkaus le meb yog ob vivncaug nyob rua huv tug Tswv. 3Kuv thov koj, tug kws koomsab koomntsws nrug kuv ua num, kuas koj paab ob tug quaspuj nuav, vim obtug tau muab sab rau paab kuv qha Txuj Moo Zoo, nrug rua Klhemees hab taagnrho lwmtug kws nrug kuv ua num. Puab yog cov kws muaj npe sau rua huv Vaajtswv phoo ntawv kws sau cov tuabneeg muaj txujsa le npe.

4Cale zoosab huv tug Tswv txhua lub sijhawm. Kuv rov has dlua ib zag ntxiv tas: Cale zoosab!

5Ca kuas txhua tug pum mej lub sabmog sabmuas. Tug Tswv tub yuav lug sai-sai nuav. 6Tsi xob nyuajsab rua ib yaam dlaabtsi le, tabsis thaus mej thov Vaajtswv, mej cale qha txhua yaam kws mej xaav yuav rua Nwg, hab ncuntsoov thov lug ntawm lub sab kws paub ua Nwg tsaug. 7Vaajtswv txuj kev nyaabxeeb, kws tseem tub tshaaj qhov tuabneeg muaj cuabkaav totaub tau, yuav tsomkwm mej lub sab hab mej tej kev xaav kuas ruaj-khov nyob rua huv Yexus Khetos.

8Thaus xaus nuav, cov kwvtij suavdlawg, yaam twg kws tseeb, yaam twg kws tsimnyog fwm, yaam twg kws ncaajnceeg, yaam twg kws dlawbhuv, yaam twg kws ntxim hlub, hab yaam twg kws tsimnyog qhuas, mej cale khaws tej ntawd ca rua huv mej txuj kev xaav. 9Tej kws mej tau kawm lossis tau txais lossis tau nov ntawm kuv lug lawm, cale xyum coj ua lawvle tej ntawd. Vaajtswv tug kws ua rua peb muaj kev kaajsab, txhaj yuav nrugnraim mej nyob.

Paulus Ua Cov Ntseeg Tsaug

10Kuv zoosab kawg le nyob rua huv tug Tswv vim tub dlhau lug ntev lawm tabsis thaus kawg nuav mej rov raag txug hab tseem txhawjxeeb txug kuv. Kuv has le nuav tsi yog txhais has tas mej tsi hlub kuv lawm, tabsis tsuas yog mej tsi tau muaj sijhawm qha rua kuv paub xwb. 11Kuv has le nuav tsi yog kuv ywg has tas kuv muaj kev tuncua, ruaqhov txawm kuv muaj lecaag los kuv yeej txaussab rua tej kws kuv muaj ntawd. 12Kuv paub tas thaus muaj kev tuncua zoo lecaag hab thaus muaj nplua-mag ho zoo lecaag. Kuv tub kawm tau txug txuj kev txaussab nuav lawm has tas txawm kuv nyob qhovtwg hab lub sijhawm twg, txawm yuav tshaib yuav tsau, txawm yuav muaj ntau muaj tsawg los kuv yeej tsi txhawj. 13Kuv muaj cuabkaav ua tau txhua yaam lug ntawm Khetos tug kws txhawb kuv lub zug.

14Txawm yogle ntawd los qhov kws mej paab kuv thaus kuv raug kev txomnyem ntawd yog ib yaam kws zoo kawg nkaus. 15Mej cov kws yog tuabneeg Filipis, mej yeej paub zoo has tas thaus ntxuv kws kuv tawm huv lub xeev Makedaunias moog qha Txuj Moo Zoo, yeej tsi muaj ib pawg ntseeg twg kws paab nyaj paab txaj rua kuv le, tsuas yog mej nkaus xwb txhajle paab kuv. #2Klt 11:9 16Thaus kuv nyob huv lub nroog Thexalaunikes, kuv muaj kev tuncua, los mej yeej xaa nyajtxag tuaj paab kuv tshaaj le kws ib zag. #Tegnum 17:1 17Tsi yog tas kuv xaav tau mej tej kev paab xwb, tabsis kuv xaav kuas tau paajlaum rov lug rua huv mej tej ntaub ntawv. 18Kuv tau txais tej nqezug puvntoob hab tseem tau txais tshaaj ntawd lawm hab; tej kws mej muab rua Epafauditus nqaa tuaj rua kuv; mej muab ntau kawg siv tsi taag le! Tej ntawd zoo ib yaam le tej tshuaj tswqaab kws muab fij rua Vaajtswv hab yog ib yaam kws Vaajtswv txaussab txais yuav. #Tsiv 29:18 19Kuv tug Vaajtswv yuav pub txhua yaam kws mej xaav tau rua mej lug ntawm Nwg txuj kev npluanuj kws muaj nyob rua huv Yexus Khetos. 20Thov kuas Vaajtswv tug kws yog peb Leejtxiv tau koobmeej moog ibtxhis le! Amees.

Lug Xaa Xuv Thaus Xaus

21Kuv thov xaa kev nojqaab nyobzoo rua mej txhua tug ntseeg kws nyob huv Yexus Khetos. Cov kwvtij ntseeg kws nrug kuv nyob ntawm nuav, puab kuj xaa kev nojqaab nyobzoo rua mej txhua tug ib yaam nkaus hab. 22Cov ntseeg Vaajtswv txhua tug kws nyob ntawm nuav, puab puavleej has nojqaab nyobzoo tuaj rua mej suavdlawg, tshwjxeeb yog cov kws nyob huv Fuabtais lub loog.

23Thov kuas tug Tswv Yexus Khetos txuj moovhlub nrug mej txhua tug nyob.

Currently Selected:

Filipis 4: HNJ2022

Highlight

Copy