Mathais 8

Yexus Khu Tug Txivneej Mob Ruas

(Malakaus 1:40-45; Lukas 5:12-16)

1Thaus Yexus nqeg peg roob lug, muaj tuabneeg coob-coob lawv Yexus qaab. 2Muaj ib tug txivneej mob ruas#8:2: mob ruas: lug Kilis siv lulug nuav rua ntau yaam kaab mob kws yog mob phem-phem rua ntawm dlaim tawv nqaj, kuj yuav tsi yog kag mob ruas hab. lug txhuscaug ndlua ntawm Nwg xubndlag hab thov has tas, “Tug Tswv, yog Koj txaussab tag, Koj yeej muaj cuabkaav khu tau kuas kuv zoo.”#8:2: khu tau kuas kuv zoo: Yaam mob nuav puab suav has tas yog ib yaam kws ua rua tuabneeg tsi huv lawvle puab tej kevcai.

3Yexus txhaj cev teg moog tuav nkaus tug txivneej ntawd hab has tas, “Kuv txaussab paab koj, koj tej ruas cale zoo hlo!” Taamsim ntawd nwg tej ruas txawm zoo taag huv tuabsi lawm. 4Yexus has rua nwg tas, “Koj tsi xob moog qha zaaj nuav rua leejtwg le, tabsis koj cale ncaajnraim moog cuag tug povthawj hlub hab kuas nwg tshuaj saib koj lub cev; hab koj nqaa khoom moog hlawv fij rua Vaajtswv lawvle Mauxes tau qha tseg, txhaj ua tau timkhawv rua suavdlawg paub tas koj tub zoo lawm.” #Levi 14:1-32

Yexus Khu Tug Thawj Tubrog Loos Tug Tubkhai

(Lukas 7:1-10)

5Thaus Yexus moog txug huv lub nroog Kapena-us, muaj ib tug thawj tubrog pawg pua tau tuaj cuag Yexus hab thov kuas Yexus paab nwg. Nwg thov has tas, 6“Tug Tswv, kuv tug tubkhai mob nyaav hab pw tom tsev, nwg tuagteg tuagtaw, mas nwg txomnyem kawg le.”

7Yexus has tas, “Kuv yuav moog khu nwg kuas zoo.”

8Tug thawj tubrog teb tas, “Tug Tswv, Koj tsi xob moog. Kuv yog ib tug kws tsi tsimnyog yuav txais Koj moog rua huv kuv lub tsev. Thov Koj has ib lus xwb tes kuv tug tubkhai yeej yuav zoo. 9Kuv kuj yog ib tug tuabneeg kws nyob huvqaab kev tswjfwm ntawm lwmtug thawjcoj, tabsis kuj muaj ib cov tubrog kws nyob huvqaab kev tswjfwm ntawm kuv hab. Yog kuv has rua tug nuav tas, ‘Moog!’ tes nwg yeej moog. Yog kuv has rua tug tod tas, ‘Lug!’ tes nwg yeej lug. Hab yog kuv has rua kuv tug tubqhe tas, ‘Ua le nuav!’ tes nwg yeej ua le ntawd.”

10Thaus Yexus nov le ntawd, Nwg xaav tsi thoob le, Nwg txhaj tig moog has rua cov tuabneeg kws lawv Nwg qaab has tas, “Kuv qha tseeb rua mej has tas, Kuv tsi tau pum dlua ib tug tuabneeg huv cov Yixalayees kws muaj kev ntseeg luj npaum le nuav. 11Kuv qha rua mej has tas, yuav muaj tuabneeg coob-coob tuaj saab nubtuaj hab saab nubpoob tuaj. Puab yuav nrug Anplahaas, Ixaj, hab Yakhauj nyob nojhaus uake huv Vaajtswv lub Ntuj Ceebtsheej. #Lukas 13:29 12Tabsis cov tuabneeg kws tub tsimnyog tau moog nyob huv Vaajtswv lub Ntuj Ceebtsheej, yuav raug pov rua huv qhov kws tsausntuj nti. Puab yuav quaj qw qes nav qawv nyob rua qhov ntawd.” #Math 22:13; 25:30; Lukas 13:28 13Yexus txhaj has rua tug thawj tubrog ntawd tas, “Koj cale rovqaab moog tsev, koj ntseeg lecaag koj yeej yuav tau txais le ntawd.” Tes taamsim ntawd tug thawj tubrog tug tubkhai txawm cale zoo hlo lawm.

Yexus Khu Ntau Leej

(Malakaus 1:29-34; Lukas 4:38-41)

14Thaus Yexus moog rua huv Petus tsev, Nwg pum Petus namtais uanpaws hab pw sau txaaj. 15Yexus tuav nwg txhais teg tes nwg txawm zoo hab nwg sawv lug tam Yexus.

16Thaus yuav tsausntuj muaj tuabneeg coj cov tuabneeg kws raug dlaab coob leej tuaj cuag Yexus. Yexus has tuablus xwb ntab tau cov ntsujplig phem ntawd tawm, hab Nwg khu tej tuabneeg kws muaj mob txhua tug zoo huv tuabsi. 17Yexus ua le nuav kuas tav lawvle Yaxayas, kws yog tug xwbfwb cev Vaajtswv lug tau qha tseg lawm has tas, “Nwg tau tshem peb tej kev tsaugmuas hab ris peb tej kaab mob huv tuabsi moog.” #Yaxaya 53:4

Tug Kws Xaav Nrug Yexus Moog

(Lukas 9:57-62)

18Thaus Yexus pum cov tuabneeg coob-coob tuaj nyob puagncig Nwg, Yexus txawm has rua Nwg cov thwjtim kuas puab hlaa havtxwv moog rua saab tim u. 19Muaj ib tug xwbfwb kws qha Kevcai tuaj cuag Yexus hab has tas, “Xwbfwb, txawm yog Koj moog qhovtwg los kuv yuav nrug Koj moog qhov ntawd.”

20Yexus teb nwg has tas, “Maa tseem muaj qhov nkaum hab noog tseem muaj zeg nyob, tabsis Tuabneeg Leejtub tsi muaj lub chaw rau ncoo.”

21Muaj dlua ib tug thwjtim has tas, “Tug Tswv, thov ca kuv xub rovqaab moog log kuv txiv tsaiv.”

22Yexus teb tas, “Koj cale nrug Kuv moog, ca cov tuabneeg tuag log puab tug tuag.”

Yexus Txwv Cua

(Malakaus 4:35-41; Lukas 8:22-25)

23Tomqaab ntawd Yexus txawm nce moog rua huv nkoj hab Nwg cov thwjtim nrug Nwg moog. 24Taamsim ntawd txawm muaj cuadlaaj cuadlub hlub heev ntsawj lub nkoj hab dlej nphau lug rua huv lub nkoj. Tabsis Yexus tseem pw tsaugzug. 25Cov thwjtim txawm moog tsaa Yexus hab has tas, “Tug Tswv, thov Koj paab peb, peb yuav tuag tag-tag le lau!”

26Yexus teb tas, “Uacaag mej yuav ntshai ualuaj? Uacaag mej kev ntseeg yuav miv ualuaj le!” Tes Yexus txawm sawvtseeg lug txwv cua hab dlej, ua rua cua txawm tu hab dlej tsi ndlaas lawm.

27Cov thwjtim xaav tsi thoob le, puab sisnug zumzawg has tas, “Tug tuabneeg nuav yog leejtwg? Txawm yog cua hab dlej los tseem noog Nwg lug hab!”

Yexus Khu Ob Tug Tuabneeg Raug Dlaab

(Malakaus 5:1-20; Lukas 8:26-39)

28Thaus Yexus hlaa havtxwv moog txug saab tim u kws yog cheebtsaam Nkadalas, Yexus txawm ntsib ob tug txivneej kws raug dlaab tawm tom roob tojntxaas lug. Obtug nyaum heev, ua rua tsi muaj leejtwg taug tau txujkev ntawd le. 29Taamsim ntawd obtug txawm qw nrov-nrov has tas, “Vaajtswv tug Tub, Koj tuaj thaab wb ua dlaabtsi? Tub tsi tau txug lub sijhawm, Koj txawmsiv tuaj rautxim rua wb lawm lov?”

30Nyob tsi dleb ntawd, muaj ib paab npua coob-coob taabtom nrhav noj. 31Cov dlaab txawm thov Yexus has tas, “Yog Koj yuav ntab peb tawm, thov ca peb nkaag moog nyob rua huv paab npua ntawd.”

32Yexus has rua cov dlaab ntawd tas, “Cale moog!” Yogle, cov dlaab ntawd txhajle tawm hab moog nkaag rua huv paab npua, tes taagnrho paab npua ntawd txawm dlha moog poob tsaag tsua rua huv havtxwv hab tuag taag huv tuabsi.

33Cov tuabneeg kws zuv npua ntawd txhaj dlha moog rua huv nroog, qha tej xwmtxheej ntawd hab qha txug ob tug txivneej kws raug dlaab rua suavdlawg noog. 34Yogle ntawd, taagnrho cov tuabneeg kws nyob huv nroog txawm tawm tuaj saib Yexus; thaus puab pum Yexus, puab txawm thov kuas Nwg tawm huv puab cheebtsaam ntawd moog rua lwmqhov.

Currently Selected:

Mathais 8: HNJ2022

Highlight

Copy