Mathais 7

Kev Txavtxim Rua Lwmtug

(Lukas 6:37-38, 41-42)

1“Tsi xob txavtxim rua lwmtug, sub Vaajtswv txhaj yuav tsi txavtxim rua mej. 2Ruaqhov Vaajtswv yuav txavtxim rua mej ib yaam nkaus le mej txavtxim rua lwmtug, hab mej muab lub luaj lecaag luj rua lwmtug, Vaajtswv yuav muab lub luaj le ntawd luj rov rua mej. #Malak 4:24

3“Vim lecaag koj saib qhov nyuas moov ntoo kws nyob huv koj tug kwvtij lub qhovmuag, tabsis koj ho tsi quavntsej txug yaav ntoo kws nyob huv koj lub qhovmuag? 4Koj tub muaj ib yaav ntoo nyob huv koj lub qhovmuag, vim lecaag koj tseem muaj cuabkaav moog has rua koj tug kwvtij tas, ‘Ca kuv paab muab qhov nyuas moov ntoo kws nyob huv koj lub qhovmuag rhu tawm?’ 5Koj yog tuabneeg ntsejmuag ncaaj sabnkhaus! Koj yuavtsum xub muab yaav ntoo kws nyob huv koj lub qhovmuag rhu tawm tsaiv, koj txhaj yuav pumkev tseeb muab qhov nyuas moov ntoo kws nyob huv koj tug kwvtij lub qhovmuag rhu tawm.

6“Tsi xob muab yaam kws dlawbhuv rua dlev, nyobtsaam dlev tig lug tum mej. Tsi xob muab tej hlaws pov rua npua hauvntej, nyobtsaam npua muab tsuj.

Thov, Nrhav, Khob

(Lukas 11:9-13)

7“Mej thov, mej yuav tau; mej nrhav, mej yuav ntsib; mej khob, lub qhovrooj yuav qheb rua mej. 8Ruaqhov txhua tug kws thov yeej tau, txhua tug kws nrhav yeej ntsib, hab txhua tug kws khob, lub qhovrooj yeej qheb rua nwg. 9Mej cov kws yog leejtxiv, yog mej tug mivnyuas thov ncuav, mej puas yuav muab ib lub pobzeb rua nwg? 10Lossis yog tug mivnyuas thov ib tug ntseg, mej puas yuav muab ib tug naab rua nwg? 11Txawm mej yog tuabneeg phem npaum lecaag los mej tseem paub muab yaam kws zoo rua mej tej mivnyuas. Yogle ntawd, mej Leejtxiv kws nyob sau ntuj ceebtsheej, yimfuab yuav muab tej kws zoo dlua tej ntawd rua txhua tug kws thov Nwg!

12“Yog mej xaav kuas lwmtug ua lecaag rua mej, mej yuavtsum ua ib yaam le ntawd rua lwmtug hab. Qhov nuav txhaj yog lub ntsablug huv Mauxes txuj Kevcai hab yog cov xwbfwb cev Vaajtswv lug tej lug qha. #Lukas 6:31

Lub Qhovrooj Nqaim

(Lukas 13:24)

13“Mej yuavtsum moog ntawm lub qhovrooj nqaim moog, ruaqhov lub qhovrooj luj hab txujkev dlaav yog yuav coj moog ntsib kev puamtsuaj hab cov tuabneeg kws taug txujkev ntawd muaj coob heev. 14Tabsis lub qhovrooj kws coj moog tau txujsa mas nqaim hab txujkev moog yeej nyuaj, cov tuabneeg kws nrhav tau txujkev ntawd muaj tsawg heev.

Tsob Ntoo Hab Cov Txiv

(Lukas 6:43-44)

15“Mej yuavtsum ceevfaaj txug cov xwbfwb cevlug cuav; thaus puab tuaj txug ntawm mej, saib saabnrau mas zoo cuag yaaj, tabsis saabhuv mas phem cuag maa. 16Thaus mej pum puab tegnum mej yuav paub. Tsob xuavpaug nqai hlau yeej tsi txi txivmaab, hab tsob ntoo xuavpaug paaj ntshaa yeej tsi txitxiv ncuavpas. 17Ib yaam nkaus le ntawd, tsob ntoo zoo yeej txi cov txiv zoo, tsob ntoo phem yeej txi cov txiv phem. 18Tsob ntoo zoo yeej tsi txi cov txiv phem, hab tsob ntoo phem yeej tsi txi cov txiv zoo. 19Txhua tsob ntoo kws tsi txi cov txiv zoo, yeej raug muab ntuv hab muab pov rua huv cub suavtawg. #Math 3:10; Lukas 3:9 20Yogle ntawd, mej yeej yuav paub cov xwbfwb cevlug cuav lug ntawm tegnum kws puab ua. #Math 12:33

Kuv Yeej Tsi Paub Mej

(Lukas 13:25-27)

21“Tsi yog txhua tug kws hu Kuv has tas, ‘Tug Tswv, Tug Tswv,’ tes yuav tau moog Vaajtswv lub Ntuj Ceebtsheej, tabsis tsuas yog tug kws ua lawvle Kuv Txiv kws nyob sau ntuj lub sab nyam txhaj tau moog xwb. 22Thaus Nub Txavtxim lug txug, yuav muaj ntau leej has rua Kuv tas, ‘Tug Tswv, Tug Tswv, peb tau siv Koj lub npe qha Vaajtswv Txujlug, peb tau tuav Koj lub npe ntab ntau tug dlaab tawm hab ua ntau yaam txujci tseemceeb!’ 23Thaus ntawd Kuv yuav has rua puab tas, ‘Kuv yeej tsi paub mej. Cov nam tuabneeg sabphem, mej cale tsiv ntawm Kuv moog!’ #Nnkauj 6:8

Ob Tug Kws Ua Tsev

(Lukas 6:47-49)

24“Yogle ntawd, txhua tug kws nov Kuv tej lug hab ua lawvle tej lug ntawd, nwg pev ib yaam le tug kws muaj tswvyim tsaa nwg lub tsev rua sau pobzeb. 25Thaus lug naagxub naagcua, dlej nyaab hab cua ntsawj ntaus lub tsev, los lub tsev ntawd tsi qaug, ruaqhov yog nwg tsaa rua sau pobzeb lawm.

26“Tabsis tug kws nov Kuv tej lug hab tsi ua lawvle tej lug ntawd, tes nwg pev ib yaam le tug kws tsi muaj tswvyim, nwg ua nwg lub tsev rua sau cov xuabzeb. 27Thaus lug naagxub naagcua, dlej nyaab hab cua ntsawj ntaus lub tsev, tes lub tsev ntawd txawm qaug hab puamtsuaj taag huv tuabsi lawm!”

Yexus Muaj Fwjchim

28Thaus Yexus qha tej nuav taag lawm, cov tuabneeg coob-coob kws tuaj noog Yexus qha ntawd xaav tsi thoob le, 29Vim Nwg qha le ib tug kws muaj fwjchim heev, tsi thooj le cov xwbfwb kws qha Kevcai qha. #Malak 1:22; Lukas 4:32

Currently Selected:

Mathais 7: HNJ2022

Highlight

Copy