Mathais 9

Yexus Khu Tug Txivneej Kws Tuagteg Tuagtaw

(Malakaus 2:1-12; Lukas 5:17-26)

1Yexus txawm nce moog rua huv nkoj hab hlaa havtxwv rov lug txug rua huv Nwg lub nroog.#9:1: Nwg lub nroog: Kapena-us (saib 4:13). 2Txawm muaj tuabneeg muab ib dlaim lev kwv ib tug txivneej tuagteg tuagtaw tuaj cuag Yexus. Thaus Yexus pum tas puab muaj kev ntseeg heev, Nwg txhaj has rua tug txivneej kws tuagteg tuagtaw ntawd tas, “Mivtub 'e, tsi xob txhawj! Koj lub txim tub raug zaam lawm.”

3Tes cov xwbfwb kws qha Kevcai qeeleej txawm xaav huv sab tas, “Tug tuabneeg nuav haslug saib tsi taug Vaajtswv!”

4Yexus tub paub tej kws puab xaav lawm, Nwg txhaj has rua puab tas, “Uacaag mej lub sab yuav xaav tej yaam phem ualuaj le? 5Lulug kws has tas, ‘Koj lub txim tub raug zaam lawm,’ lossis lu kws has tas ‘Koj cale sawvtseeg moog tsev,’ ob lulug nuav lu twg yoojyim has dlua? 6Kuv ua le nuav qha rua mej paub tas Tuabneeg Leejtub muaj fwjchim nyob huv nplajteb nuav zaam tau tuabneeg lub txim.” Yexus txhaj has rua tug txivneej tuagteg tuagtaw has tas, “Cale sawvtseeg, nqaa koj dlaim lev hab moog tsev!”

7Tug txivneej ntawd txawm sawvtseeg moog tsev lawm. 8Thaus suavdlawg pum le ntawd, puab ntshai kawg hab puab qhuas Vaajtswv qhov kws Nwg tau pub fwjchim rua tuabneeg.

Yexus Hu Mathais

(Malakaus 2:13-17; Lukas 5:27-32)

9Thaus Yexus taabtom taug kev tawm qhov chaw ntawd moog, Nwg pum ib tug txivneej sau se hu ua Mathais nyob quastsawg ntawm lub rooj sau se. Yexus has rua nwg tas, “Koj cale nrug Kuv moog.” Mathais txawm sawvtseeg nrug Nwg moog.

10Thaus Yexus taabtom noj mov huv Mathais tsev,#9:10: huv Mathais tsev; lossis huv Nwg (kws yog Yexus) tsev. cov tuabneeg sau se hab cov tuabneeg muaj txim ntau leej tuaj nrug Yexus hab Nwg cov thwjtim noj mov uake. #Lukas 15:1-2 11Thaus cov Falixais pum le ntawd, puab txawm nug Yexus cov thwjtim has tas, “Ua lecaag mej tug xwbfwb nrug cov tuabneeg sau se hab cov tuabneeg muaj txim noj mov uake?”

12Yexus nov puab nug le ntawd, Nwg txawm teb tas, “Cov tuabneeg tsi muaj mob yeej tsi cheemtsum kws-khumob, tsuas yog cov muaj mob txhaj cheemtsum xwb. 13Mej cale moog kawm Vaajtswv Txujlug kuas mej totaub lub ntsablug kws has tas, ‘Kuv ntshaw txuj kev taabncuab, tsi yog ntshaw tug tsaj kws tua theej txhoj.’ Kuv tsi yog lug hu cov tuabneeg ncaajnceeg, tabsis yog lug hu cov tuabneeg muaj txim.” #Math 12:7; Hauxe 6:6

Nug Txug Kevcai Yoo Mov

(Malakaus 2:18-22; Lukas 5:33-39)

14Dlhau ntawd Yauhaas tug kws muab tuabneeg ua kevcai rausdlej cov thwjtim txawm tuaj nug Yexus has tas, “Vim lecaag peb hab cov Falixais pheej nquag ua kevcai yoo mov, tabsis Koj cov thwjtim ho tsi ua le?”

15Yexus teb puab has tas, “Mej xaav tas thaus tug nraugvauv tseem nrug nwg cov phoojywg noj tshoob uake, puab yuav nyuajsab nua lov? Puab yeej tsi nyuajsab le! Tabsis yuav muaj ib lub sijhawm kws luas tuaj coj tug nraugvauv tawm ntawm puab moog, thaus ntawd puab maam yoo mov.

16“Yeej tsi muaj leejtwg yuav muab dlaim ntaub tshab lug ntxiv rua lub tsho qub, ruaqhov thaus dlaim ntaub tshab txoom, yuav ua rua lub tsho qub yimfuab ndluag luj dlua qub ntxiv. 17Lossis tsi muaj leejtwg yuav muab cov cawv txivmaab tshab ntim rua huv lub naabtawv qub, ruaqhov lub naabtawv qub yuav tawg, cov cawv txivmaab yuav xaw taag, hab lub naabtawv yuav tsi zoo siv lawm. Yogle ntawd, yuavtsum muab cov cawv txivmaab tshab ntim rua huv lub naabtawv tshab, sub lub naabtawv txhaj tsi tawg hab cov cawv txivmaab txhaj tsi txeej.”

Tug Nom Tug Ntxhais Hab Tug Quaspuj Kws Kov Yexus Tw Tsho

(Malakaus 5:21-43; Lukas 8:40-56)

18Thaus Yexus tseem taabtom has le ntawd, cov Yudais ib tug nom txawm tuaj txhuscaug ndlua ntawm Yexus kutaw hab thov has tas, “Kuv tug ntxhais nyavnyuas tusav nrho, thov Koj moog tsaa teg rua nwg, kuas nwg rov muaj sa.” 19Yexus txawm sawvtseeg nrug tug nom ntawd moog, Nwg cov thwjtim los kuj nrug Nwg moog hab.

20Thaus ntawd muaj ib tug quaspuj kws muaj mob txomnyem kawg le vim nwg nchuav cev tau kaum-ob lub xyoos, txawm lawvlag Yexus qaab hab tuab kov Yexus lub tw tsho. 21Nwg xaav huv sab tas, “Yog kuv tau kov Yexus lub tw tsho, kuv tug mob yeej yuav zoo xwb.”

22Yexus tig hlo hab pum tug quaspuj ntawd, Nwg txhaj has tas, “Mivntxhais 'e, koj tsi xob txhawj! Koj txuj kev ntseeg tub khu koj zoo lawm.” Taamsim ntawd tug quaspuj ntawd tug mob txawm zoo hlo lawm.

23Thaus Yexus moog txug huv tug nom ntawd lub tsev, Nwg pum cov tuabneeg tshuab qeej ntaus nruag hab suavdlawg quaj-nyav ntshunrooj. 24Nwg txawm has tas, “Mej txhua tug cale tawm moog! Tug mivntxhais nuav tub tsi tau tuag, nwg tsuas yog tsaugzug xwb!” Tes suavdlawg txawm luag Yexus zumzawg. 25Tabsis thaus cov tuabneeg tawm moog taag lawm, Yexus txawm moog rua huv chaav kws tug ntxhais ntawd pw hab tuav nkaus nwg txhais teg, tes tug mivntxhais ntawd txawm sawvtseeg. 26Zaaj nuav nrov-nchaa moo lug moog thoobplawg saab tebchaws ntawd.

Yexus Khu Ob Tug Tuabneeg Dligmuag

27Thaus Yexus tawm ntawm qhov chaw ntawd moog, muaj ob tug txivneej dligmuag txawm lawv Nwg qaab. Obtug hu nrov-nrov has tas, “Daviv tug Tub, thov Koj taabncuab wb hab lau!”

28Thaus Yexus moog rua huv tsev lawm, ob tug txivneej dligmuag ntawd txawm lug cuag Nwg. Yexus nug obtug has tas, “Meb puas ntseeg tas Kuv muaj cuabkaav khu tau meb?”

Obtug teb tas, “Tug Tswv, wb ntseeg.”

29Tes Yexus txawm kov obtug lub qhovmuag hab has tas, “Cale muaj lawvle qhov kws meb ntseeg!” 30Tes obtug txawm rov pumkev lawm. Yexus txwv obtug has tas, “Meb tsi xob qha zaaj nuav rua leejtwg le!”

31Tabsis obtug tawm moog pav txug Yexus lub moo thoobplawg saab tebchaws ntawd.

Yexus Khu Tug Txivneej Kws Has Tsi Tau Lug

32Thaus ob tug txivneej dligmuag ntawd taabtom tawm moog, txawm muaj tuabneeg coj ib tug txivneej kws raug ib tug dlaab hab has tsi tau lug tuaj cuag Yexus. 33Thaus Yexus ntab tug dlaab ntawd tawm kag lawm, tes tug txivneej txawm has tau lug taamsim ntawd, ua rua suavdlawg xaav tsi thoob le. Puab has tas, “Peb tsi tau pum dlua tej yaam zoole nuav nyob huv lub tebchaws Yixalayees nuav ib zag le!” 34Tabsis cov Falixais has tas, “Tub yog ntxwgnyoog kws yog cov dlaab tug thawj pub fwjchim rua Yexus ntab cov dlaab ntawd tawm.” #Math 10:25; 12:24; Malak 3:22; Lukas 11:15

Yexus Hlub Cov Tuabneeg Suavdlawg

35Yexus moog txhuanrho tej nroog hab tej zejzog. Nwg cobqha huv tej tsev saablaaj, qhuabqha txug Txuj Moo Zoo kws has txug Vaajtswv lub Tebchaws, hab khu tej tuabneeg kws muaj txhua yaam mob, tsi has yaam mob twg. #Math 4:23; Malak 1:39; Lukas 4:44 36Thaus Yexus pum cov tuabneeg coob-coob ntawd, Nwg hlub puab kawg le, ruaqhov puab ntxhuvsab hab tsi muaj leejtwg paab puab, zoole paab yaaj kws tsi muaj tug tswv yug. #Teev 27:17; 1Vaaj 22:17; 2Xwm 18:16; Exek 34:5; Malak 6:34 37Tes Nwg txawm has rua Nwg cov thwjtim tas, “Cov nplej kws zoo hlais lawm muaj ntau, tabsis cov tubzug kws hlais muaj tsawg. #Lukas 10:2 38Mej cale thov tug Tswv teb kuas khaiv dlua ib co tubzug moog paab hlais Nwg cov nplej.”

Currently Selected:

Mathais 9: HNJ2022

Highlight

Copy