Mathais 6

Qha Txug Kev Paab Lwmtug

1“Mej yuavtsum ceevfaaj, tsi xob ua ncaajnceeg kuas luas qhuas mej xwb. Yog mej ua le ntawd, mej Leejtxiv kws nyob sau ntuj ceebtsheej yuav tsi muab nqezug rua mej. #Math 23:5

2“Yogle ntawd, thaus mej muab ib yaam dlaabtsi rua tej tuabneeg txomnyem, mej tsi xob ibke muab ibke tshuab raaj, zoole cov tuabneeg ntsejmuag ncaaj sabnkhaus ua nyob rua huv tej tsev saablaaj hab tom tej kev tshuam kuas luas qhuas. Kuv qha rua mej has tas, puab tub tau puab tej nqezug txaus nkaus lawm. 3Tabsis thaus mej muab ib yaam dlaabtsi rua tej tuabneeg txomnyem, mej tsi xob pub mej saab teg txhumphem paub tas mej saab teg xis ua dlaabtsi, 4sub qhov kws mej ua ntawd txhaj tsi muaj leejtwg paub. Mej Leejtxiv tug kws pum tej mej ua tuabywv ntawd, Nwg yuav muab nqezug rua mej.

Qha Txug Kev Thov Vaajtswv

(Lukas 11:2-4)

5“Thaus mej thov Vaajtswv, mej tsi xob ua le cov tuabneeg ntsejmuag ncaaj sabnkhaus ua! Puab nyam moog sawv thov Vaajtswv huv tej tsev saablaaj hab ntawm tej kev tshuam sub txhua tug txhaj yuav pum puab. Kuv qha rua mej has tas, puab tub tau puab tej nqezug txaus nkaus lawm. #Lukas 18:10-14 6Tabsis thaus mej thov Vaajtswv, cale moog rua huv mej chaav tsev hab kaw qhovrooj tsaiv, mej maamle thov mej Leejtxiv tug kws mej qhovmuag tsi pum. Mej Leejtxiv tug kws pum tej mej ua tuabywv ntawd, Nwg yuav muab nqezug rua mej.

7“Thaus mej thov Vaajtswv, tsi xob has moog has lug tej kws tsi muaj qaabhau ib yaam le cov tuabneeg tsi paub Vaajtswv has; puab xaav tas yog puab has ntau-ntau lu, mas puab cov nyuas vaajtswv txhaj yuav nov. 8Mej tsi xob ua le puab, vim mej Leejtxiv tub paub uantej txug tej kws mej xaav yuav ntawd lawm. 9Mej yuavtsum thov le nuav has tas,

“ ‘Peb Leejtxiv kws nyob sau ntuj ceebtsheej,

thov kuas suavdlawg fwm Koj lub npe;

10thov kuas Koj lub tebchaws lug;

thov kuas peb ua tau lawvle Koj lub sab nyam ib yaam le cov kws nyob sau ntuj.

11Thov Koj pub kuas peb muaj noj muaj haus txhua nub.#6:11: txhua nub; lossis rua nubnua, lossis rua pigkig.

12Thov Koj zaamtxim rua peb

ib yaam le peb tub zaamtxim rua cov kws tau ua txhum rua peb lawm.

13Thov Koj tsi xob coj peb moog raug kev simsab,

tabsis thov Koj paab kuas peb dlim ntawm dlaab ntxwgnyoog.’#6:13: Tej phoo ntawv qub kws xuas teg sau, ntxiv Ruaqhov lub tebchaws, lub fwjchim, hab tug tshwjchim puavleej yog Koj le moog ibtxhis. Amees.

14“Yog mej zaamtxim rua tug kws ua txhum rua mej lawm, mej Leejtxiv kws nyob sau ntuj ceebtsheej yuav zaam mej lub txim hab. #Malak 11:25-26 15Tabsis yog mej tsi zaamtxim rua lwmtug, mej Leejtxiv yuav tsi zaam mej lub txim hab.

Qha Txug Kevcai Yoo Mov

16“Thaus mej ua kevcai yoo mov, mej tsi xob ua ntsejmuag mluagmlob zoole cov tuabneeg ntsejmuag ncaaj sabnkhaus ua. Puab uatxuj tsi ntxuav muag le, kuas suavdlawg paub tas yog puab yoo mov. Kuv qha rua mej has tas, puab tub tau puab tej nqezug txaus nkaus lawm. 17Tabsis thaus mej ua kevcai yoo mov, mej cale ntxuav muag hab ntsis plaubhau, 18kuas lwmtug txhaj tsi paub tas yog mej yoo mov. Tsuas yog mej Leejtxiv tug kws mej qhovmuag tsi pum tuableeg txhaj paub xwb. Mej Leejtxiv tug kws pum tej mej ua tuabywv ntawd, Nwg yuav muab nqezug rua mej.

Kev Npluanuj Sau Ntuj Ceebtsheej

(Lukas 12:33-34)

19“Tsi xob khaws nyajtxag hab txhua yaam muajnqes ca rua mej huv lub nplajteb nuav vim tas yuav muaj ntsaum kaabrwg hab xeb noj, hab muaj tubsaab tuaj nyag tau. #Yakau 5:2-3 20Tabsis mej cale khaws nyajtxag hab txhua yaam kws muajnqes ca sau ntuj ceebtsheej, qhov ntawd tsi muaj ntsaum kaabrwg hab xeb noj, hab tsi muaj tubsaab tuaj tsoo nkaag rua huv tsev hab nyag tau. 21Ruaqhov mej tej nyajtxag nyob qhovtwg, mej lub sab yeej yuav nyob qhov ntawd.

Lub Teeb Kws Ci Rua Lub Cev

(Lukas 11:34-36)

22“Lub qhovmuag yog lub teeb kws ci rua lub cev pumkev. Yog mej lub qhovmuag tseem zoo, taagnrho mej lub cev yuav pumkev kaajnrig; 23tabsis yog mej lub qhovmuag tsi zoo lawm, tes taagnrho mej lub cev yuav tsausntuj nti. Yog tas qhov kaaj kws nyob rua huv mej tsaus lawm, qhov tsaus ntawd yuav tsaus npaum lecaag ntxiv!

Vaajtswv Hab Nyajtxag

(Lukas 16:13; 12:22-31)

24“Tsi muaj leejtwg yuav ua tau dlejnum rua ob tug tswv. Nwg yeej yuav ntxub ib tug hab nyam ib tug; nwg yeej yuav fwm ib tug hab saib tsi taug ib tug. Yog mej yuav muab Vaajtswv hab nyajtxag saib hlub ib yaam nkaus yeej tsi tau hlo le.

25“Vimle nuav Kuv txhaj qha kuas mej tsi xob txhawj txug mej lub neej has tas mej yuav noj yuav haus dlaabtsi, lossis txhawj txug mej lub cev has tas mej yuav naav dlaabtsi. Puas yog txujsa tseemceeb dlua tej zaub-mov, hab lub cev tseemceeb dlua tej rigtsho? 26Mej ua tuabzoo saib tej miv naag miv noog: puab tsi cog qoobloo, tsi sau lug ntim rua huv txhaab; tabsis mej Leejtxiv kws nyob sau ntuj ceebtsheej tseem yug puab! Mej tseem muajnqes tsi npaum tej naag-noog ntawd hab lov? 27Mej tej kev txhawj puas yuav ua rua mej muaj sa nyob ntev zog ntxiv?#6:27: nyob ntev zog ntxiv; lossis sab zog tuaj.

28“Hab ua lecaag mej yuav txhawj tas mej yuav muab dlaabtsi naav? Mej saib tej paajntoos tom tajnraag tawg lecaag: puab tub tsi ua num lossis tsi ntus ntaub ntus xuv. 29Tabsis Kuv qha rua mej has tas, txawm yog vaajntxwv Xalumoos npluanuj npaum ntawd los nwg tub tsi tau naav ib cev rigtsho zoo npaum le tej paajntoos ntawd ib lub le. #1Vaaj 10:4-7; 2Xwm 9:3-6 30Tej nyuas nrojtsuag kws muaj nyob nubnua, pigkig xwb luas tub yuav muab pov hlawv rua huv qhovcub, los Vaajtswv tseem pub rua nwg tawgpaaj zoonkauj kawg le. Mej xaav tas Vaajtswv yuav tsi pub rua mej muaj naav zoo dlua tej nrojtsuag ntawd nua lov? Uacaag mej kev ntseeg yuav miv ualuaj le!

31“Yogle ntawd, mej tsi xob txhawj tas, ‘Peb yuav noj dlaabtsi? lossis yuav haus dlaabtsi? lossis yuav naav dlaabtsi?’ 32(Cov tuabneeg kws tsi paub Vaajtswv, puab najnub txhawj txug tej nuav.) Mej Leejtxiv kws nyob sau ntuj ceebtsheej yeej paub tas mej cheemtsum muaj tej nuav. 33Tabsis mej yuavtsum xub nrhav Vaajtswv lub Tebchaws hab Nwg txuj kev ncaajnceeg tsaiv, Vaajtswv maamle muab taagnrho tej nuav rua mej. 34Yogle ntawd, mej tsi xob txhawj rua pigkig, ruaqhov pigkig yeej muaj kev txhawj txaus rua pigkig lawm. Kev nyuajsab nub twg yeej muaj txaus rua nub ntawd, tsi xob moog nrhav kev nyuajsab lug tsaav ntxiv.

Currently Selected:

Mathais 6: HNJ2022

Highlight

Copy