Mathais 15

Cov Yawmkoob Tej Lug Qha

(Malakaus 7:1-13)

1Thaus ntawd cov Falixais hab cov xwbfwb kws qha Kevcai qeeleej tuaj nraag lub nroog Yeluxalees tuaj cuag Yexus hab nug has tas, 2“Uacaag Koj cov thwjtim tsi ua lawvle peb cov yawmkoob tej lug kws ibtxwm qha rua peb? Puab tsi xub ntxuav teg maamle noj mov!”

3Yexus teb tas, “Mej ua lawvle tej kws mej ibtxwm ua lug, tabsis uacaag mej tsi ua lawvle Vaajtswv Txujlug qha? 4Vaajtswv has tas, ‘Koj yuavtsum fwm koj nam koj txiv,’ hab has tas, ‘Yog leejtwg tshev nwg nam nwg txiv, yuavtsum muab tug ntawd tua kuas tuag.’ #Tsiv 20:12; 2Kev 5:16; Tsiv 21:17; Levi 20:9 5Tabsis mej qha has tas yog leejtwg muaj ib yaam dlaabtsi kws yuav siv lug paab tau nwg nam nwg txiv, tabsis nwg has tas, ‘Yaam nuav tub muab rua Vaajtswv lawm,’ 6tsi taag tug ntawd yuav fwm nwg txiv#15:6: nwg txiv; tej phoo ntawv qub kws xuas teg sau has tas nwg nam nwg txiv. lawm. Qhov kws mej ua le nuav yog mej ua saib tsi taug Vaajtswv Txujlug sub mej txhaj ua tau lawvle tej kws mej ibtxwm ua lug. 7Cov nam tuabneeg ntsejmuag ncaaj sabnkhaus! Qhov kws tug xwbfwb cev Vaajtswv lug, Yaxayas tau has txug mej ntawd yeej muaj tseeb tag!

8“ ‘Vaajtswv has tas cov tuabneeg nuav lub ncauj qhuas Kuv

tabsis puab lub sab nyob dleb Kuv heev. #Yaxaya 29:13 (LXX)

9Qhov kws puab pehawm Kuv tsi muaj qaabhau le,

ruaqhov puab muab tuabneeg tej kevcai qha ib yaam le tej ntawd yog Kuv tej kevcai!’ ”

Tej Kws Ua Rua Tuabneeg Tsi Huv

(Malakaus 7:14-23)

10Yexus hu cov tuabneeg coob-coob lug cuag Nwg hab has rua puab tas, “Mej ua tuabzoo noog Kuv has, mej txhaj totaub! 11Tsi yog yaam kws moog rua huv tuabneeg lub qhovncauj, ua rua tuabneeg tsi huv, tabsis yog yaam kws tawm huv tuabneeg lub qhovncauj lug, ua rua tuabneeg tsi huv xwb.”

12Thaus ntawd cov thwjtim lug has rua Yexus has tas, “Koj puas paub tas tej lug kws Koj has ko ua rua cov Falixais chim kawg le?”

13Yexus teb tas, “Txhua tsob ntoo kws tsi yog Kuv Txiv kws nyob sau ntuj cog, yuav raug muab rhu caag hlo moog povtseg huv tuabsi. 14Puamchawj puab! Puab yog cov dligmuag kws coj cov dligmuag kev; yog tug dligmuag coj tug dligmuag kev, obtug yeej yuav moog poob qaabke xwb.” #Lukas 6:39

15Petus has tas, “Thov Koj txhais zaaj lug pevtxwv nuav rua peb.”

16Yexus teb cov thwjtim has tas, “Mej tseem tsi totaub le hab lov? 17Mej tsi paub tas yaam kws nkaag rua huv tuabneeg lub qhovncauj, yaam ntawd moog rua huv tuabneeg lub plaab, hab tawm dlhau moog lawm xwb. 18Tabsis tej kws tawm huv tuabneeg lub qhovncauj lug, yog tawm huv tuabneeg lub sab lug, tej ntawd yog tej kws ua rua tuabneeg tsi huv. #Math 12:34 19Ruaqhov lub tswvyim kws xaav ua kev phem, kev tua tuabneeg, kev dleev luas quaspuj luas quasyawg, kev nkauj kev nraug, kev ua tubsaab, kev ua timkhawv cuav, hab kev rhuav lwmtug ntsejmuag, puavleej yog yaam kws tawm huv tuabneeg lub sab lug. 20Tej nuav yog tej kws ua rua tuabneeg tsi huv, tabsis qhov kws tsi ntxuav teg uantej noj mov, yeej ua tsi tau rua tuabneeg tsi huv.”

Tug Quaspuj Kana-aas Kev Ntseeg

(Malakaus 7:24-30)

21Yexus tawm qhov ntawd moog rua peg cheebtsaam kws ze lub nroog Thailes hab lub nroog Xidoos. 22Muaj ib tug quaspuj kws yog tuabneeg Kana-aas nyob huv cheebtsaam ntawd tuaj cuag Yexus hab thov has tas, “Tug Tswv, Daviv tug Tub, thov Koj hlub kuv! Kuv tug ntxhais raug ib tug dlaab mas nwg txomnyem kawg le.”

23Tabsis Yexus tsi teb tug quaspuj ntawd ib lus le. Yexus cov thwjtim txhaj lug hab thov Yexus has tas, “Koj cale has kuas nwg tsiv moog! Ruaqhov nwg pheej lawv peb qaab hab quaj thov le ntawd!”

24Yexus teb tas, “Vaajtswv tsuas khaiv Kuv lug nrhav cov Yixalayees kws yog paab yaaj kws pluj lawm xwb.”

25Thaus ntawd, tug quaspuj ntawd txawm lug txhuscaug ndlua ntawm Yexus kutaw thov has tas, “Tug Tswv, thov paab kuv!”

26Yexus teb tas, “Tsi tsimnyog kws yuav muab mivnyuas tej mov pov rua dlev noj.” 27Tug quaspuj ntawd teb tas, “Yog los mas tug Tswv, tabsis txawm yog dlev los yeej tau noj tej mov kws poob sau nwg tug tswv lub rooj lug hab.”

28Yexus teb tug quaspuj ntawd has tas, “Koj yog ib tug quaspuj kws muaj kev ntseeg luj heev! Koj yuav tau lawvle koj thov.” Tes lub sijhawm taamsim ntawd nwg tug ntxhais txawm zoo hlo lawm.

Yexus Khu Ntau Leej

29Yexus tawm qhov chaw ntawd hab taug ntug Havtxwv Kalilais, Nwg txawm nce moog nyob quastsawg peg roob. 30Muaj tuabneeg coob-coob tuaj cuag Nwg, puab coj tej tuabneeg kws tuagteg tuagtaw, dligmuag, cegtawv, has tsi tau lug, hab cov tuabneeg kws muaj mob ntau leej tuaj tso rua ntawm Yexus kutaw; mas Nwg khu puab txhua tug zoo huv tuabsi. 31Thaus suavdlawg pum cov tuabneeg kws has tsi tau lug rov has tau lug, cov tuabneeg cegtawv rov zoo, cov tuabneeg qhuavteg qhuavtaw rov moog taug kev, hab cov tuabneeg dligmuag rov pumkev lawm, mas puab xaav tsi thoob le; puab cale qhuas cov Yixalayees tug Vaajtswv.

Yexus Pub Mov Rua 4,000 Leej Noj

(Malakaus 8:1-10)

32Yexus hu Nwg cov thwjtim lug cuag Nwg hab has rua puab tas, “Kuv hlub cov tuabneeg nuav heev, vim puab tub tuaj nrug Kuv nyob tau peb nub lawm, taamsim nuav puab tsi muaj ib yaam dlaabtsi noj le. Kuv tsi xaav kuas puab cale moog tsev kws tsi tau noj ib yaam dlaabtsi, nyobtsaam puab laam tsausmuag qaug tom tej kev.”

33Cov thwjtim nug Yexus has tas, “Ntawm nuav yog roob mojsaab qhua xwb, peb yuav moog nrhav mov qhovtwg lug kuas txaus cov tuabneeg nuav noj?”

34Yexus nug cov thwjtim has tas, “Mej muaj pistsawg lub ncuav?” Puab teb tas, “Muaj xyaa lub ncuav hab tug puav ntseg miv-miv xwb.”

35Yexus has kuas suavdlawg nyob quastsawg huv pegteb. 36Tes Nwg txawm muab xyaa lub ncuav hab cov ntseg ntawd lug ua Vaajtswv tsaug, muab ndlais hab cev rua cov thwjtim coj moog faib rua suavdlawg. 37Txhua tug puavleej tau noj tsau huv tuabsi. Cov thwjtim moog sau tej seem kws suavdlawg noj tsi taag tau xyaa tawb puvnkaus. 38Cov txivneej kws tau noj zag nuav muaj 4,000 leej, tsi suav cov quaspuj hab mivnyuas.

39Yexus txawm kuas suavdlawg rov moog tsev, tes Nwg txawm nce nkoj moog rua tim cheebtsaam Mankadaas lawm.

Currently Selected:

Mathais 15: HNJ2022

Highlight

Copy