Mathais 14

Yauhaas Tug Kws Muab Tuabneeg Ua Kevcai Rausdlej Kev Tuag

(Malakaus 6:14-29; Lukas 9:7-9)

1Lub sijhawm ntawd, tug Helauj kws kaav lub xeev Kalilais nov txug Yexus lub moo. 2Nwg txawm has rua nwg cov numtswv has tas, “Tug nuav yeej yog Yauhaas tug kws muab tuabneeg ua kevcai rausdlej xwb, nwg tau sawv rovqaab lug lawm ntaag! Yogle ntawd, nwg txhaj muaj lub fwjchim nuav ua tau tej txujci tseemceeb.”

3Uantej ntawd Helauj tau khaiv tuabneeg moog nteg Yauhaas, muab nwg khi hab coj moog kaw rua huv tsev lojcuj. Helauj ua le ntawd tub yog Helauj yuav Helaudias kws yog nwg tug kwv Filiv tug quaspuj. #Lukas 3:19-20 4Ruaqhov Yauhaas tug kws muab tuabneeg ua kevcai rausdlej pheej has rua Helauj has tas, “Koj tsi muaj cai yuav Helaudias lug ua koj tug quaspuj!” #Levi 18:16; 20:21 5Helauj xaav tua Yauhaas, tabsis nwg ntshai cov Yudais, ruaqhov suavdlawg ntseeg tas Yauhaas yog ib tug xwbfwb cev Vaajtswv lug.

6Thaus txug Helauj nub yug, Helaudias tug ntxhais lug seevcev rua suavdlawg saib, ua rua Helauj txaussab heev, 7Helauj txhaj coglug rua tug ntxhais ntawd has tas, “Kuv coglug rua koj has tas koj thov yaam twg, kuv yuav muab yaam ntawd rua koj!”

8Nwg nam tub rau tswvyim rua nwg lawm, nwg txhaj has tas, “Kuv xaav kuas koj muab Yauhaas tug kws muab tuabneeg ua kevcai rausdlej lub taubhau tso rua huv lub phaaj nqaa lug rua kuv taamsim nuav!”

9Vaajntxwv nyuajsab kawg le, tabsis vim nwg tau coglug taabmeeg suavdlawg lawm, nwg txhaj has kuas puab moog ua lawvle tug ntxhais tau thov. 10Tes nwg txawm khaiv tuabneeg moog txav Yauhaas cejdlaab huv tsev lojcuj. 11Puab muab Yauhaas lub taubhau tso rua huv lub phaaj nqaa lug rua tug ntxhais, tes tug ntxhais nqaa moog rua nwg nam. 12Yauhaas cov thwjtim txhaj tuaj muab nwg lub cev coj moog log; hab puab moog qha tej nuav rua Yexus paub.

Yexus Pub Mov Rua 5,000 Leej Noj

(Malakaus 6:30-44; Lukas 9:10-17; Yauhaas 6:1-14)

13Thaus Yexus nov xuv txug Yauhaas, tes Nwg txawm caij nkoj tawm qhov ntawd moog rua ib qhov chaw kws nyob ntsagtu. Thaus suavdlawg nov le ntawd tes puab txawm tawm huv puab tej nroog hab taug kev caum Nwg qaab moog. 14Thaus Yexus tawm huv nkoj lug, Nwg pum muaj tuabneeg coob-coob, Nwg hlub puab kawg le, hab Nwg khu puab zoo mob huv tuabsi.

15Thaus yuav tsausntuj, Nwg cov thwjtim lug has rua Nwg has tas, “Tub lig-lig lawm, hab ntawm thaaj chaw nuav tsi muaj dlaabtsi le; yuav tau has kuas suavdlawg moog nrhav yuav mov tom tej zog rua puab noj.”

16Yexus teb tas, “Tsi xob kuas puab moog, mej cale nrhav rua puab noj!”

17Cov thwjtim teb tas, “Peb tsuas muaj tsib lub ncuav hab ob tug ntseg xwb.”

18Yexus has tas, “Cale muab lug rua Kuv.” 19Yexus has kuas suavdlawg nyob quastsawg ntawm tej nyom; tes Nwg txawm muab tsib lub ncuav hab ob tug ntseg lug, Nwg tsaa qhovmuag saib rua sau ntuj hab ua Vaajtswv tsaug. Nwg muab cov ncuav ndlais cev rua cov thwjtim tes cov thwjtim txawm nqaa moog faib rua suavdlawg. 20Txhua tug puavleej tau noj tsau huv tuabsi. Cov thwjtim moog sau tej seem kws suavdlawg noj tsi taag tau kaum-ob tawb puvnkaus. 21Cov kws tau noj mov ntawd, cov txivneej xwb yog muaj kwvlaam le 5,000 leej, tsi suav cov quaspuj hab mivnyuas.

Yexus Moog Sau Nplaimdlej

(Malakaus 6:45-52; Yauhaas 6:15-21)

22Taamsim ntawd Yexus txawm has kuas cov tuabneeg suavdlawg rov moog tsev, hab has kuas cov thwjtim nce nkoj hab caij hlaa havtxwv uantej moog rua saab tim u. 23Thaus cov tuabneeg moog taag lawm, Yexus tuableeg txawm nce moog thov Vaajtswv peg roob. Thaus tsausntuj lawm los Nwg tseem nyob Nwg ib leeg peg roob. 24Lub sijhawm ntawd lub nkoj tub moog dleb rua tom havtxwv lawm. Cua ntsawj hlub heev ua rua dlej ndlaas tej nam nthwv tuaj ntaus lub nkoj.

25Kwvlaam le thaus peb teev moog rua rau teev yaav yuav kaajntug ntawd, Yexus txawm moog kutaw sau nplaimdlej lug cuag cov thwjtim. 26Thaus puab pum Nwg moog kutaw sau nplaimdlej, puab ntshai kawg le, puab qw has tas, “Dlaab 'auj!”

27Taamsim ntawd Yexus has rua puab tas, “Xob poobsab! Yog Kuv xwb, tsi xob ntshai!”

28Petus has tas, “Tug Tswv, yog tas yog Koj tag, thov Koj has kuas kuv moog kutaw sau nplaimdlej lug cuag Koj.”

29Yexus teb tas, “Lug maj!” Petus txawm tawm huv lub nkoj hab pib rhais ruam sau nplaimdlej moog rua ntawm Yexus. 30Tabsis thaus Petus pum cua ntsawj hlub heev nwg txawm ntshai, tes nwg cale pib tog rua huv dlej. Nwg txhaj hu nrov-nrov has tas, “Tug Tswv, thov cawm kuv!”

31Taamsim ntawd Yexus txawm cev loo teg moog tuav nkaus Petus hab has tas, “Uacaag koj kev ntseeg yuav miv ualuaj le! Uacaag koj tsi ntseeg?”

32Thaus obtug nce moog rua huv lub nkoj, tes cua txawm tu zujzug lawm. 33Cov thwjtim kws nyob huv lub nkoj txawm txhuscaug ndlua hawm Yexus hab has tas, “Koj yog Vaajtswv tug Tub tag lau!”

Yexus Khu Mob Huv Nkenexales

(Malakaus 6:53-56)

34Yexus hab Nwg cov thwjtim caij nkoj hlaa havtxwv moog txug tim Nkenexales. 35Thaus cov tuabneeg kws nyob ntawd paub tas yog Yexus, puab txawm xaa xuv moog qha rua cov tuabneeg kws nyob puagncig cheebtsaam ntawd kuas coj cov tuabneeg muaj mob tuaj cuag Nwg. 36Puab thov kuas Nwg ca cov tuabneeg muaj mob ntawd kov Nwg lub tw tsho; txhua tug kws tau kov lawd puavleej zoo huv tuabsi.

Currently Selected:

Mathais 14: HNJ2022

Highlight

Copy