Tsiv Dlim 9

Tsajtxhu Tuag

1Tug TSWV has rua Mauxes has tas, “Cale moog cuag Falaus hab has rua nwg has tas tug TSWV, kws yog cov Henplais tug Vaajtswv, has tas, ‘Koj cale tso Kuv tsaav tuabneeg moog, puab txhaj tau moog pehawm Kuv. 2Yog koj tseem rov tsi pub puab moog hab, 3Kuv yuav rautxim rua koj kws yog tso mob aws lug rua mej tej tsaj, kws yog mej tej neeg, tej neegluav, tej ntxhuav, tej nyuj, tej yaaj, hab tej tshis. 4Kuv yuav ua ib yaam lug cais cov Iziv tej tsajtxhu hab cov Yixalayees tej tsajtxhu; cov Yixalayees tej tsaj yuav tsi muaj ib tug tuag hlo le. 5Kuv, kws yog tug TSWV, tub teem sijhawm ca rua pigkig lawm, Kuv yuav ua tej nuav.’ ”

6Nub tomqaab, tug TSWV txawm ua lawvle Nwg tau has ntawd, tes cov Iziv tej tsaj tuag taag huv tuabsi, tabsis cov Yixalayees tej tsaj tsi tuag ib tug le. 7Falaus tso tuabneeg moog tshuaj saib tej xwm ntawd hab puab pum tas cov Yixalayees tej tsaj yeej tsi tuag ib tug le. Tabsis Falaus lub sab tseem tawv le qub hab yeej tsi kaam tso cov Yixalayees moog le.

Mob Rwj

8Tes tug TSWV txhaj has rua Mauxes hab Aloos obtug tas, “Meb cale tsuab ob-peb taus tshauv huv qhovcub moog, es kuas Mauxes muab w rua sau nruabntug taabmeeg Falaus. 9Cov moov tshauv ntawd yuav yaa ri nab moog thoobplawg lub tebchaws Iziv, yuav ua rua txhua tug tuabneeg hab tej tsaj mob rwj ua paug thoobplawg ibce.”

10Yogle ntawd, obtug txhaj moog tsuab ib leeg ib taus tshauv hab moog sawv ze ntawm Falaus xubndlag. Mauxes muab cov tshauv ntawd w rua sau nruabntug, tes cov tshauv ntawd txawm ua rua tuabneeg hab tej tsaj mob rwj thoobplawg ibce. #Tshwm 16:2 11Cov tuabneeg kws txawj ua yeegsiv, puab tsi muaj peevxwm lug sawv taabmeeg Mauxes, ruaqhov puab mob rwj thoobplawg ibce ib yaam le cov tuabneeg Iziv lawm hab. 12Tabsis tug TSWV ua rua Falaus muaj lub sab tawv, lawv nraim le tug TSWV tau has tseg lawm, Falaus yeej tsi noog Mauxes hab Aloos obtug tej lug le.

Lawg

13Tug TSWV has rua Mauxes has tas, “Pigkig koj cale sawvntxuv moog cuag Falaus hab has rua nwg tas, tug TSWV, kws yog cov Henplais tug Vaajtswv, has tas, ‘Koj cale tso Kuv tsaav tuabneeg moog, puab txhaj tau moog pehawm Kuv. 14Zag nuav tsi yog Kuv yuav rautxim rua koj cov numtswv hab koj cov pejxeem xwb, tabsis Kuv yuav rautxim rua koj hab ntaag, sub koj txhaj yuav paub tas nyob thoobplawg lub nplajteb nuav yeej tsi muaj ib tug kws zoole Kuv. 15Yog Kuv tsaa teg lug ntaus koj hab koj cov pejxeem lug ntawm qhov kws tso kaab mob lug rua mej, tes mej yeej yuav tuag tu noob nrho moog. 16Tabsis Kuv yuav tsi pub koj tuag, ruaqhov Kuv xaav kuas koj pum Kuv lub fwjchim, sub Kuv lub koobmeej txhaj yuav nrov-nchaa moo lug moog thoobplawg lub nplajteb. #Loos 9:17 17Nwgnuav koj tseem tsaa fwjchim hab tsi kaam tso Kuv tsaav tuabneeg moog. 18Pigkig lub sijhawm nuav Kuv yuav tso lawg lug hlub heev. Txij thaus muaj lub tebchaws Iziv nuav lug, yeej tsi tau muaj dlua ib zag lawg lug hlub npaum le zag nuav. 19Koj yuavtsum xaaj kuas tuabneeg muab koj tej tsajtxhu lawv lug rua huv nkuaj hab muab txhua yaam kws koj muaj nyob tom tej tshaavpuam coj lug tso rua huv tsev, ruaqhov lawg yuav lug ntaus cov tuabneeg hab tej tsaj kws nyob tom tej tshaavpuam es tsi muaj chaw nkaum kuas tuag taag huv tuabsi.’ ”

20Falaus cov numtswv qeeleej ntshai heev vim tej lug kws tug TSWV has ntawd, puab txhaj coj puab cov qhev lug tsev hab caab puab tej tsaj lug rua huv nkuaj. 21Tabsis cov tuabneeg kws tsi quavntsej tug TSWV tej lug ceebtoom, puab tso puab cov qhev hab tej tsaj nwg nyob nwg rua huv tej tshaavpuam.

22Tes tug TSWV has rua Mauxes has tas, “Cale tsaa koj txhais teg rua sau ntuj, kuas lawg poob lug thoobplawg lub tebchaws Iziv, lug ntaus tuabneeg, ntaus tej tsajtxhu, hab tej qoobloo kws nyob huv tej teb kuas puamtsuaj taag huvsi.” 23Yogle ntawd, Mauxes txhaj muab nwg tug paas nreg tsaa rua sau ntuj, tes tug TSWV ua xub nroo, tso lawg poob lug, hab muaj tsagligxub laim lug ti nkaus rua huv aav. 24Tug TSWV tso lawg lug hlub heev ua rua xub laim lab pis vog. Txij thaus muaj lub tebchaws Iziv lug, yeej tsi tau muaj dlua ib zag kws lawg yuav lug hlub npaum le zag nuav. #Tshwm 8:7; 16:21

25Tej tuabneeg, tej tsajtxhu hab txhua yaam kws nyob tom tej tajnraag thoobplawg lub tebchaws Iziv, raug lawg ntaus puamtsuaj taag. Lawg tseem ntaus tej qoobloo kws cog rua huv tej teb hab txhua tsob ntoo luv taag huv tuabsi. 26Tsuas tshuav cheebtsaam Nkausees kws yog thaaj chaw cov Yixalayees nyob txhaj tsi muaj lawg poob lug xwb.

27Falaus khaiv tuabneeg moog hu Mauxes hab Aloos obtug tuaj cuag nwg hab has tas, “Zag nuav kuv ua txhum lawm; tug TSWV yeej ua yog lawm, kuv hab kuv cov pejxeem puavleej ua txhum. 28Thov koj thov tug TSWV lau! Vaajtswv tej suab xub nroo hab tej lawg nuav txaus peb kawg le lawm! Kuv thov coglug has tas kuv yuav tso mej moog, mej tsi taag yuav nyob huv nuav ntxiv lawm.”

29Mauxes teb Falaus has tas, “Thaus kuv tawm kag huv lub nroog nuav moog, tes kuv yuav tsaa teg thov tug TSWV. Xub yuav tsi nroo, hab lawg yuav tsi lug ntxiv lawm, sub koj txhaj yuav paub tas lub nplajteb nuav yog tug TSWV tug. 30Tabsis kuv paub tas koj hab koj cov numtswv yeej tseem tsi ntshai tug TSWV, kws yog Vaajtswv le.”

31Tej maaj hab nplej raug puamtsuaj taag, ruaqhov nplej taabtom sav, hab maaj taabtom tawgpaaj. 32Tabsis tej mog tsi raug puamtsuaj, ruaqhov tseem tuaj tsi tau nto npoo aav.

33Mauxes tawm huv Falaus lub loog hab moog rua saabnrau ntug nroog, tes nwg txawm tsaa teg thov tug TSWV. Xub cale ntsag, lawg hab naag cale tu. 34Thaus Falaus pum tas xub tsi nroo, lawg hab naag tsi lug lawm, tes nwg rov ua txhum dlua. Nwg hab nwg cov numtswv lub sab rov tawv le qub, 35lawv nraim le kws tug TSWV tau has rua Mauxes lawm has tas Falaus yeej yuav tsi kaam tso cov Yixalayees moog.

Currently Selected:

Tsiv Dlim 9: HNJ2022

Highlight

Copy