Tsiv Dlim 8

Qaav

1Tug TSWV has rua Mauxes has tas, “Cale moog cuag Falaus hab has rua nwg tas, ‘Koj cale tso Kuv tsaav tuabneeg moog, sub puab txhaj yuav tau pehawm Kuv. 2Yog koj tsi kaam tso le, Kuv yuav rautxim rua koj lub tebchaws kws yog tso qaav lug nyob puvnkaus koj lub tebchaws. 3Qaav yuav nyob puvnkaus huv tug Dlej Nais, hab tseem yuav tawm lug nyob huv koj lub loog, huv koj chaav pw, sau koj lub txaaj, huv koj cov numtswv hab koj cov pejxeem tsev, huv koj lub qhovcub, hab koj tej laujkaub ua noj ua haus. 4Cov qaav ntawd yuav dlha cawsqa lug nce koj, nce koj tej pejxeem hab koj cov numtswv huv tuabsi.’ ”

5Tug TSWV has rua Mauxes has tas, “Koj kuas Aloos muab nwg tug paas nreg tsaa rua sau tej dlej luj, dleg miv, hab tej paag dlej, ua kuas qaav tawm tuaj nyob thoobplawg tebchaws Iziv.” 6Yogle ntawd, Aloos txhaj muab nwg tug paas tsaa rua sau tej dlej, tes qaav txawm tawm tuaj puvnkaus tebchaws Iziv. 7Tabsis cov Iziv kws txawj ua yeegsiv, kuj ua tau kuas qaav tawm tuaj puvnkaus lub tebchaws Iziv hab.

8Falaus hu Mauxes hab Aloos obtug moog cuag nwg, nwg has rua obtug tas, “Meb cale thov kuas tug TSWV tshem tej qaav nuav moog, kuv yuav tso mej cov tuabneeg moog, sub puab txhaj yuav coj tau tsaj moog fij rua tug TSWV.”

9Mauxes teb Falaus has tas, “Kuv zoosab thov Vaajtswv paab koj. Seb koj muab lub sijhawm twg rua kuv thov Vaajtswv rua koj, rua koj cov numtswv, hab koj cov pejxeem kuas tej qaav ntawd tsiv tawm ntawm mej moog kuas taag, tsuas pub muaj nyob huv tug Dlej Nais xwb.”

10Falaus teb tas, “Pigkig koj maamle thov Vaajtswv rua kuv.”

Mauxes teb tas, “Kuv yuav ua lawvle koj thov, sub koj txhaj yuav paub tas tsi muaj lwmtug vaajtswv kws zoo npaum le tug TSWV, kws yog peb tug Vaajtswv le. 11Tej qaav ntawd yuav tsiv tawm ntawm koj, koj cov numtswv hab koj cov pejxeem moog taag huvsi; tsuas pub muaj nyob rua huv tug Dlej Nais xwb.”

12Tes Mauxes hab Aloos txawm tawm huv Falaus tsev moog, hab Mauxes thov tug TSWV kuas tshem tej qaav kws Nwg tau tso lug rua Falaus ntawd moog kuas taag. 13Tug TSWV ua lawvle Mauxes thov, tes tej qaav kws nyob huv tej tsev, ntawm tej tshaavloog, hab tom tej teb puavleej tuag taag huv tuabsi lawm. 14Cov tuabneeg Iziv khaws tej qaav tuag ntawd lug tso ua tej pawg tswlwj ntxag thoob lub tebchaws. 15Tabsis thaus Falaus pum tej qaav ntawd tuag taag lawm, nwg lub sab rov tawv ib yaam le qub, lawv nraim le tug TSWV tau has tseg lawm, Falaus yeej yuav tsi noog Mauxes hab Aloos obtug tej lug le.

Yoov-qab

16Tug TSWV has rua Mauxes has tas, “Koj kuas Aloos muab nwg tug paas nreg nplawm aav, tej moov aav kws nyob thoobplawg huv lub tebchaws Iziv nuav yuav hloov ua yoov-qab taag.” 17Yogle ntawd, Aloos txhaj muab nwg tug paas nreg nplawm aav, tes tej moov aav thoobplawg lub tebchaws Iziv txawm hloov ua yoov-qab moog ntsauv tuabneeg hab tej tsaj. 18Cov Iziv kws txawj ua yeegsiv, puab taag zug ua kuas muaj yoov-qab, tabsis puab ua tsi tau le. Yoov-qab yaa lug puvnkaus txhua qhov chaw, 19cov kws txawj ua yeegsiv ntawd has rua Falaus has tas, “Vaajtswv yog tug kws ua tej xwm nuav tag!” Tabsis Falaus lub sab tseem tawv heev, lawv nraim le tug TSWV tau has tseg lawm, nwg yeej tsi noog Mauxes hab Aloos obtug tej lug le. #Lukas 11:20

Yoov

20Tug TSWV has rua Mauxes has tas, “Pigkig sawvntxuv thaus Falaus taabtom moog rua nraag haavdlej, koj cale moog cuag nwg hab has rua nwg has tas tug TSWV has tas, ‘Koj cale tso Kuv tsaav tuabneeg moog, sub puab txhaj yuav tau pehawm Kuv. 21Kuv ceebtoom rua koj has tas, yog koj tsi kaam tso, Kuv yuav rautxim rua koj kws yog tso yoov lug tsaws koj, tsaws koj cov numtswv, hab koj cov pejxeem. Cov tuabneeg Iziv tej tsev los yuav muaj yoov puvnkaus, hab huv aav los yuav muaj yoov tsaws puvnkaus. 22Tabsis Kuv yuav tseg cheebtsaam Nkausees, thaaj chaw kws Kuv tsaav tuabneeg nyob, yuav tsi pub kuas muaj yoov hlo le. Kuv yuav ua le nuav kuas koj txhaj paub tas Kuv, kws yog tug TSWV, yog tug kws ua dlejnum nyob huv lub tebchaws nuav. 23Kuv yuav ua ib yaam lug cais#8:23: Tej cov ntawv qub-qub thaus u sau has tas ib yaam lug cais; phoo lug Henplais has tas tso tawm. Kuv tsaav tuabneeg hab koj tsaav tuabneeg. Qhov txujci tseemceeb nuav yuav tshwmsim nyob rua pigkig.’ ”

24Tug TSWV tso yoov yaa poog ntwg lug tsaws puvnkaus rua huv Falaus lub loog hab huv nwg cov numtswv tej tsev. Cov yoov nuav ua rua thoobplawg tebchaws Iziv tau txais kev puamtsuaj.

25Falaus txhaj khaiv tuabneeg moog hu Mauxes hab Aloos obtug tuaj cuag nwg, hab has tas, “Mej cale moog hab muab khoom hlawv fij rua mej tug Vaajtswv nyob huv lub tebchaws nuav lau.”

26Mauxes teb tas, “Ua le ntawd tsi yog cai, ruaqhov cov tuabneeg Iziv yuav tsi txaussab rua tej tsaj kws peb tua fij rua tug TSWV, kws yog peb tug Vaajtswv. Yog peb muab tej tsaj kws cov tuabneeg Iziv tsi txaussab lug tua ua khoom fij nyob rua ntawm tej chaw kws puab pum, puab yeej yuav muab pobzeb ntaus kuas peb tuag xwb. 27Yogle ntawd, peb yuavtsum moog peb nub ke rua tom taj suabpuam, peb maam tua tsaj fij rua tug TSWV, kws yog peb tug Vaajtswv, lawvle Nwg tau xaaj tseg rua peb lawm.”

28Falaus has tas, “Yog mej moog tsi dleb, kuv yuav tso mej moog tua tsaj hlawv fij rua tug TSWV, kws yog mej tug Vaajtswv, tom taj suabpuam. Meb cale thov Vaajtswv paab kuv.”

29Mauxes teb tas, “Thaus kuv tawm kag ntawm nuav moog, tes kuv yuav thov tug TSWV kuas pigkig Nwg tshem cov yoov nuav tawm ntawm koj, koj cov numtswv hab koj cov pejxeem moog kuas taag. Tabsis koj tsi xob dlaag peb ntxiv lawm, hab tsi xob txwv peb cov Yixalayees qhov kws yuav moog tua tsaj fij rua tug TSWV.”

30Mauxes tawm ntawm Falaus moog hab thov tug TSWV kuas tshem cov yoov tawm moog, 31tes tug TSWV txawm ua lawvle Mauxes tej lug thov. Cov yoov cale yaa tawm ntawm Falaus, ntawm nwg cov numtswv hab ntawm nwg cov pejxeem moog taag tsi tshuav ib tug seem nyob qhovtwg le lawm. 32Tabsis zagnua los Falaus lub sab tseem tawv le qub, hab nwg rov tsi kaam tso cov Yixalayees moog le hab.

Currently Selected:

Tsiv Dlim 8: HNJ2022

Highlight

Copy