Tsiv Dlim 10
10
Kooj
1Tes tug TSWV has rua Mauxes has tas, “Koj cale moog cuag Falaus. Kuv tau ua rua Falaus hab nwg cov numtswv kuas muaj lub sab tawv, Kuv txhaj tau ua tej txujci tseemceeb nuav rua puab pum 2hab mej txhaj yuav tau pav rua mej tej mivnyuas hab tej xeebleej xeebntxwv noog has tas thaus Kuv ua Kuv tej txujci ntawd, cov tuabneeg Iziv poob ntsejmuag npaum lecaag. Mej suavdlawg txhaj yuav paub tas Kuv yog tug TSWV.”
3Mauxes hab Aloos moog cuag Falaus hab has rua nwg tas, “Tug TSWV, kws yog cov Henplais tug Vaajtswv, has tas, ‘Koj yuav tawv moog txug thaus twg es koj maamle txu fwjchim rua ntawm Kuv? Cale tso Kuv tsaav tuabneeg moog, puab txhaj tau moog pehawm Kuv. 4Yog koj pheej tsi kaam tso puab moog, mas pigkig Kuv yuav tso kooj lug rua koj lub tebchaws. 5Cov kooj ntawd yuav coob heev, plooj nkaus ua rua saib tsi pum aav le. Puab yuav noj txhua yaam kws lawg ntaus tuag tsi taag, xaam taagnrho tej xyoob ntoo kws nyob huv tej teb huv tuabsi. 6Cov kooj ntawd yuav yaa lug puvnkaus huv koj lub loog, hab huv koj cov numtswv, hab koj cov pejxeem tej tsev. Puab tseem yuav heev tshaaj tej kws koj cov yawmkoob txeev pum lug lawm.’ ” Tes Mauxes txawm tawm moog lawm.
7Falaus cov numtswv has rua Falaus has tas, “Koj tseem yuav ca tug tuabneeg nuav tsim teebmeem rua peb moog txug thaus twg? Cale tso cov Yixalayees moog, puab txhaj tau moog pe tug TSWV, kws yog puab tug Vaajtswv. Koj tsi pum tas lub tebchaws Iziv tub puamtsuaj taag lawm lov?”
8Falaus khaiv tuabneeg moog hu Mauxes hab Aloos obtug tuaj cuag nwg, hab nwg has rua obtug tas, “Mej cale moog pehawm tug TSWV, kws yog mej tug Vaajtswv! Tabsis cov kws yuav moog ntawd yog leejtwg tag?”
9Mauxes teb tas, “Peb suavdlawg yuav moog taagnrho, xaam peb tej mivnyuas hab tej laug huv tuabsi. Peb yuav coj peb tej tub tej ntxhais, tej yaaj tej tshis, hab tej nyuj moog huv tuabsi, ruaqhov peb yuav moog ua ib rooj mov noj qhuas tug TSWV.”
10Falaus teb tas, “Kuv coglug rua tug TSWV has tas kuv yuav tsi pub mej coj mej tej quaspuj mivnyuas moog! Qhov nuav qha meej tas mej taabtom tuavhuv yuav ntxeevsab. 11Tsi tau, tsi pub moog! Yog tas mej xaav moog pehawm tug TSWV tag, tes tsuas pub cov txivneej moog xwb.” Tes Falaus txawm ntab Mauxes hab Aloos obtug tawm huv nwg lub loog moog.
12Tug TSWV has rua Mauxes has tas, “Koj cale tsaa teg rua sau lub tebchaws Iziv, kuas kooj lug rua huv lub tebchaws Iziv nuav. Puab yuav lug noj txhua tsaav txhua yaam qoobloo kws rov hlaav tuaj hab noj tej kws lawg ntaus puamtsuaj tsi taag.”
13Yogle ntawd, Mauxes txhaj muab nwg tug paas nreg tsaa rua sau lub tebchaws Iziv, tes tug TSWV txawm tso cua ntsawj saab nubtuaj tuaj rua huv lub tebchaws, ib nub hab ib mos. Taagkig sawvntxuv tes cua txawm ntsawj ib cov kooj yaa ua npoj ntwg lug. 14Cov kooj ntawd yaa ua tsheej ntshuas lug tsaws puvnkaus lub tebchaws Iziv. Zag nuav yog zag kws kooj txomfaav coob tshaajplawg le kws txeev pum lug lossis yuav tsi pum ib zag ntxiv le lawm. 15Tej kooj ntawd yaa lug tsaws plooj nkaus aav, ua rua tsuas pum tsaus nti lawm xwb. Puab lug noj tej txivntoo hab txhua yaam kws lawg ntaus puamtsuaj tsi taag, yeej tsi seem ib dlaim nyuas nplooj ntsuab nyob rua sau ntoo los yog ntawm tej nrojtsuag qhovtwg nyob huv tebchaws Iziv le. #Tshwm 9:2-3
16Falaus khaiv tuabneeg ceev heev moog hu Mauxes hab Aloos obtug tuaj hab has tas, “Kuv tau ua txhum rua tug TSWV, kws yog mej tug Vaajtswv hab ua txhum rua mej lawm. 17Thov zaamtxim rua kuv ib zag ntxiv hab thov tug TSWV, kws yog mej tug Vaajtswv, tshem lub txim kws yuav coj kuv moog rua txuj kev tuag tawm ntawm kuv moog.”
18Mauxes txawm tawm huv Falaus lub loog moog thov tug TSWV. 19Tes tug TSWV txawm muab cov cua kws ntsawj saab nubtuaj tuaj hloov kuas ntsawj saab nubpoob tuaj, ntsawj tej kooj ntawd kuas moog poob taag rua huv Havtxwv Lab.#10:19: Havtxwv Lab: Saib 13:18. Tsi pub kuas seem ib tug kooj nyob rua huv tebchaws Iziv le. 20Tabsis tug TSWV ua rua Falaus lub sab tawv heev, tsi kaam tso cov Yixalayees moog le hab.
Kev Tsausntuj
21Vaajtswv has rua Mauxes has tas, “Cale tsaa koj txhais teg rua sau ntuj, yuav tsausntuj nti thoobplawg lub tebchaws Iziv. Txuj kev tsausntuj nuav yuav tsaus hab tuab txug qhov kws koj muaj cuabkaav kov tau.” 22Mauxes txhaj tsaa teg rua sau ntuj, tes txawm tsausntuj nti thoobplawg lub tebchaws Iziv tau peb nub. #Nnkauj 105:28; Tshwm 16:10 23Cov tuabneeg Iziv ib tug saib tsi pum ib tug le, hab lub sijhawm ntawd yeej tsi muaj leejtwg yuav tawm tau huv puab tej tsev moog rua qhovtwg le. Tabsis thaajtsaam kws cov Yixalayees nyob pumkev kaajnrig.
24Falaus khaiv tuabneeg moog hu Mauxes lug cuag nwg hab has tas, “Mej cale moog pehawm tug TSWV; txawm yog mej yuav coj mej cov quaspuj mivnyuas nrug mej moog los tau. Tabsis mej tej yaaj, tej tshis, hab tej nyuj ca nyob ntawm nuav.”
25Mauxes teb tas, “Yogle ntawd, koj yuavtsum muab tsaj rua peb coj moog tua hlawv fij rua tug TSWV, kws yog peb tug Vaajtswv. 26Tsi tau, peb yuavtsum caab peb tej tsaj nrug peb moog xwb; tsi pub tseg ib tug ca rua tomqaab le. Peb yuavtsum xaiv tej tsaj kws yuav tua hlawv fij rua tug TSWV, kws yog peb tug Vaajtswv. Yuavtsum yog thaus peb moog txug tod lawm mas peb txhaj paub tas yuav muab tug tsaj zoo lecaag lug tua fij rua Nwg.”
27Tug TSWV ua rua Falaus lub sab tawv, nwg txhaj tsi kaam tso cov Yixalayees moog. 28Falaus has rua Mauxes has tas, “Koj cale tawm moog! Tsi xob tuaj tshwm ntsejmuag rua kuv pum ib zag ntxiv lawm nawb! Nub twg yog kuv pum koj, mas koj yuavtsum tuag xwb!”
29Mauxes teb tas, “Ua le ntawd kag! Koj los yuav tsi pum kuv lub ntsejmuag ib zag ntxiv lawm hab!”
Currently Selected:
Tsiv Dlim 10: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
