Tsiv Dlim 7

1Tug TSWV has rua Mauxes tas, “Kuv yuav ua kuas koj zoole Vaajtswv rua Falaus, hab koj tug tijlaug Aloos yuav ua koj tug cevlug. 2Koj yuavtsum pav rua Aloos txug txhua yaam kws Kuv xaaj koj, mas nwg yuav has kuas Falaus tso cov Yixalayees tawm huv nwg lub tebchaws moog. 3Tabsis Kuv yuav ua kuas Falaus muaj lub sab tawv heev, txawm yog nwg yuav pum Kuv ua tej txujci txaus ntshai heev nyob huv tebchaws Iziv nuav npaumtwg los nwg yuav tsi noog koj tej lug. #Tegnum 7:36 4Thaus ntawd Kuv yuav tsaa Kuv txhais teg rautxim nyaav rua cov Iziv hab yuav coj Kuv tsaav tuabneeg Yixalayees txhua xeem tawm huv tebchaws Iziv moog. 5Thaus Kuv tsaa Kuv txais teg lug tawmtsaam cov tuabneeg Iziv hab coj tsaav tuabneeg Yixalayees tawm huv puab lub tebchaws moog, puab yuav paub tas Kuv yog tug TSWV tag.”

6Mauxes hab Aloos txhaj ua lawvle kws tug TSWV tau xaaj tseg rua obtug. 7Thaus obtug moog cuag Falaus, Mauxes muaj noobnyoog yimcaum xyoo, hab Aloos yog muaj yimcaum-peb xyoos.

Aloos Tug Paas Nreg

8Tug TSWV has rua Mauxes hab Aloos obtug tas, 9“Yog Falaus has kuas meb ua txujci rua nwg saib, tes koj kuas Aloos muab nwg tug paas nreg povrhees rua ntawm Falaus xubndlag, tes tug paas ntawd yuav hloov kag ua ib tug naab.”

10Yogle ntawd, Mauxes hab Aloos txawm moog cuag Falaus hab ua lawvle tej kws tug TSWV tau xaaj tseg rua obtug. Aloos muab nwg tug paas nreg povrhees rua ntawm Falaus hab nwg cov numtswv xubndlag, tes tug paas ntawd txawm hloov kag ua ib tug naab. 11Falaus txawm hu nwg cov tuabneeg txawjntse hab cov txawj ua yeegsiv tuaj, hab puab ua tau yeegsiv ib yaam le Mauxes obtug ua. 12Puab muab puab tej paas pov rua huv aav, tej paas ntawd txawm hloov ua naab taag le hab. Tabsis Aloos tug paas nreg muab puab tej paas nreg nqog taag huv tuabsi lawm. 13Txawm yogle ntawd los Falaus lub sab tseem tawv le qub, lawv nraim le tug TSWV tau has tseg lawm, nwg yeej tsi noog Mauxes hab Aloos obtug tej lug le.

Subtawg Subntshaa Lug Raug Tebchaws Iziv

Ntshaav

14Tes tug TSWV has rua Mauxes tas, “Falaus lub sab tawv heev, nwg tsi kaam tso cov tuabneeg tawm moog. 15Yogle ntawd, thaus sawvntxuv koj cale moog cuag Falaus thaus nwg moog nraag tug Dlej Nais. Nqaa tug paas nreg kws hloov tau ua naab, hab moog tog nwg nraag ntug dlej. 16Koj has rua Falaus has tas, ‘Tug TSWV, kws yog cov Henplais tug Vaajtswv, khaiv kuv tuaj has kuas koj cale tso Nwg tsaav tuabneeg moog, sub puab txhaj yuav tau moog pehawm Nwg tom taj suabpuam. Tabsis lug txug rua taamsim nuav los koj tseem tsi noog Nwg lug le hab. 17Falaus, tug TSWV has tas zagnua koj yuav paub tas Nwg yog leejtwg lug ntawm tej txujci kws Nwg tseem taabtom yuav ua nuav. Koj saib nawb, kuv yuav muab tug paas nreg nuav nplawm tug Dlej Nais, mas tug dlej yuav hloov ua ntshaav. #Tshwm 16:4 18Ntseg yuav tuag, hab dlej yuav tswlwj ntxag, ua rua cov tuabneeg Iziv yuav haus tsi taug tej dlej ntawd le.’ ”

19Tug TSWV has rua Mauxes has tas, “Koj kuas Aloos muab nwg tug paas nreg tsaa rua sau txhua tug dlej luj, dlej miv, hab tej paag dlej huv tebchaws Iziv. Tej dlej ntawd yuav dlhau moog ua ntshaav, hab yuav muaj ntshaav thoobplawg lub tebchaws, txawm yog huv tej thoob ntoo hab tej hub pobzeb los yuav muaj ntshaav taag huv tuabsi.”

20Tes Mauxes hab Aloos txawm ua lawvle tug TSWV tau xaaj tseg. Aloos muab nwg tug paas nreg nplawm tug Dlej Nais taabmeeg Falaus hab nwg cov numtswv, tes tej dlej txawm hloov ua ntshaav taag huv tuabsi. 21Tej ntseg huv dlej tuag taag, tswlwj ntxag ua rua cov tuabneeg Iziv haus tsi taug tej dlej ntawd le. Muaj ntshaav thoobplawg tebchaws Iziv. 22Cov Iziv kws txawj ua yeegsiv, los puab kuj ua tau ib yaam le ntawd hab, tes Falaus txhaj tseem muaj lub sab tawv le qub. Nwg yeej tsi noog Mauxes hab Aloos tej lug, lawv nraim le tug TSWV tau has tseg lawm. 23Thaus zoole ntawd tes Falaus txhaj rovqaab moog tsev hab tsi quavntsej txug zaaj nuav le. 24Cov tuabneeg Iziv txhaj moog khawb qhovdlej lawv tug ntug Dlej Nais lug haus, ruaqhov puab haus tsi taug tug Dlej Nais ntawd lawm.

25Tomqaab xyaa nub kws tug TSWV muab dlej hloov ua ntshaav tau dlhau moog.

Currently Selected:

Tsiv Dlim 7: HNJ2022

Highlight

Copy