Tsiv Dlim 29

Kevcai Tsaa Aloos Hab Nwg Cov Tub Ua Povthawj Hlub

(Levis Kevcai 8:1-36)

1“Nuav yog tej kws koj yuavtsum ua rua Aloos hab nwg cov tub, kws yog muab puab tsaa ua povthawj hlub ua Kuv le dlejnum. Muab ib tug ntsuag nyuj hab ob tug laug yaaj kws tsi muaj ib qho phem le. 2Muab cov moov nplej zoo-zoo kws tsi xyaw keeb zuaj ua ib cov ncuav, muab ib cov moov ntse roj txivntoo ua dlua ib cov ncuav, muab ib cov puab ua tej lub nyag-nyag hab muab roj txivntoo pleev rua. 3Koj muab cov ncuav ntawd ntim rua huv tawb coj tuaj fij rua Kuv thaus kws koj muab tug ntsuag nyuj hab ob tug laug yaaj tuaj fij.

4“Koj coj Aloos hab nwg cov tub moog rua tom lub qhovrooj kws yuav moog rua huv lub Tsevntaub Sisntsib, hab muab dlej lug ua kevcai ntxuav puab. 5Koj muab cev tsoogtsho povthawj hlub rua Aloos naav, kws yog lub tsho ntev, lub tsho kws naav tuaj huvqaab lub efauj, lub efauj, dlaim awv hab txuj hlaab rua nwg sa. 6Khu txuj phuam rua Aloos ntoo sau taubhau, hab muab dlaim phaj kub dlawbhuv kws txaug cov lug ‘Dlawbhuv rua tug TSWV,’ khi rua sau txuj phuam. 7Tes koj muab cov roj kws txhawb meejthawj laub rua Aloos taubhau hab muab nwg tsaa ua povthawj hlub.

8“Koj coj Aloos cov tub tuaj hab muab tsho rua puab naav; 9muab hlaab rua puab sa hab muab mom rua puab ntoo. Qhov ntawd yog kev tsaa Aloos hab nwg cov tub ua povthawj hlub. Puab hab puab caajceg yuav ua povthawj hlub ua Kuv tegnum moog ibtxhis le.

10“Cale caab tug txiv nyuj moog rua tom hauvntej ntawm lub qhovrooj Tsevntaub Sisntsib, has rua Aloos hab nwg cov tub kuas puab tsaa teg rua sau tug txiv nyuj taubhau. 11Muab tug txiv nyuj ntawd tua taabmeeg tug TSWV rua ntawm lub qhovrooj Tsevntaub Sisntsib. 12Muab koj tug ntivteg tub tug txiv nyuj ntawd cov ntshaav moog pleev cov kub nyob rua ntawm plaub cegkaum ntawm lub thaaj. Tes dlua le cov ntshaav kws seem muab laub ywg lub taw thaaj kuas taag. 13Dlhau ntawd, koj muab cov paavywj, nplooj sab kws zoo tshaajplawg, hab ob lub raum nrug cov npluag roj kws qhwv ob lub raum ntawd, coj moog hlawv rua sau lub thaaj fij rua Kuv. 14Tabsis muab tug nyuj cov nqaj, dlaim tawv, hab cov plaab nyuv coj moog hlawv rua saabnrau ntug yeej. Qhov nuav yog muab fij ua kev tshem cov povthawj hlub lub txim.

15“Muab ib tug yaaj lug hab has rua Aloos hab nwg cov tub, kuas puab tsaa teg rua sau tug yaaj ntawd taubhau. 16Muab tug yaaj ntawd tua, muab cov ntshaav coj moog ywg thoobplawg lub thaaj ntawd plaub saab huv tuabsi. 17Tes muab tug yaaj ntawd txav ua tej dlaim; ntxuav tej plaab nyuv hab cov cegqaab kuas huv, coj moog tso tshooj rua sau lub taubhau hab sau cov nqaj. 18Muab taagnrho tug yaaj ntawd coj moog hlawv rua sau lub thaaj ua khoom noj rua tug TSWV, kuas tej paa tswqaab ntxag rua tug TSWV. #Efex 5:2; Filipi 4:18

19“Koj muab dlua ib tug yaaj lug hab has kuas Aloos hab nwg cov tub tsaa teg rua sau tug yaaj ntawd taubhau. 20Muab tug yaaj ntawd tua, hab muab mivntsiv ntshaav coj moog pleev rua Aloos hab nwg cov tubsaab taubntseg xis, rua puab tug taubteg saab xis, hab rua puab cov taubtaws saab xis. Muab cov ntshaav kws seem coj moog ywg thoobplawg lub thaaj ntawd plaub saab huv tuabsi. 21Koj muab mivntsiv ntshaav kws nyob sau lub thaaj hab mivntsiv roj txhawb meejthawj coj moog nchus rua Aloos hab nwg cov tub tej tsoogtsho, sub nwg hab nwg cov tub, nrug rua puab tej tsoogtsho txhaj dlawbhuv txaus Kuv sab.

22“Muab tug yaaj ntawd tej nqaj rog hlais tseg, tug kutwv kws rog, tej paavywj, nplais sab kws zoo tshaajplawg, ob lub raum nrug cov npluag roj kws qhwv ob lub raum, hab cegqaab saab xis. (Nuav yog tug laug yaaj kws siv lug rua kev tsaa povthawj hlub). 23Rhu cov ncuav huv lub tawb kws tub muab fij rua Kuv lawm lug, muab ib yaam ib lub le nuav: muab ib lub kws xyaw roj txivntoo, muab ib lub kws tsi xyaw roj, hab muab ib lub kws nyag-nyag. 24Koj muab taagnrho cov khoom fij nuav rua Aloos hab nwg cov tub, kuas puab muab yom fij tshwjxeeb rua Kuv. 25Tes koj rov txais cov zaub-mov ntawm puab teg lug, hab muab coj moog hlawv rua sau lub thaaj, tso tshooj ntxiv rua sau cov kws tub muab hlawv fij ua khoom noj rua Kuv. Tej paa ntawd yuav tswqaab ntxag txaus Kuv sab heev.

26“Koj muab tug yaaj lub hauvnrob coj lug yom fij tshwjxeeb rua Kuv. Thooj nqaj hauvnrob nuav yog koj tug.

27“Thaus ua kevcai tsaa tug povthawj hlub, yuavtsum muab lub hauvnrob hab cegqaab ntawm tug yaaj kws muab tua yom fij rua Kuv ntawd tshwj rua ibcaag, es tseg rua Aloos hab nwg cov tub kws yog cov povthawj hlub. 28Thaus Kuv tsaav tuabneeg fij puab tej khoom ua kev sis raugzoo, yuavtsum muab lub hauvnrob hab cegqaab ntawm tug tsaj rua cov povthawj hlub; txujcai nuav Kuv yuav tsi hloov le. Qhov nuav yog cov pejxeem qhov khoomplig kws muab rua Kuv, kws yog tug TSWV.

29“Tomqaab Aloos tuag lawm, yuavtsum muab nwg cov tsoogtsho povthawj hlub rua nwg cov tub, ruaqhov puab yuav naav thaus kws tsaa puab ua povthawj hlub. 30Aloos tug tub kws yuav lug ua povthawj hlub hloov nwg chaw, kws yog moog ua Kuv tegnum huv Chaav Dlawbhuv huv lub Tsevntaub Sisntsib, yuavtsum naav cev rigtsho ntawd xyaa nub.

31“Coj tug yaaj kws tua ua kevcai tsaa Aloos hab nwg cov tub ntawd, moog hau rua huv chaav dlawbhuv. 32Puab yuav noj cov nqaj yaaj hab cov ncuav kws tseg rua huv lub tawb nyob ntawm Kuv lub Tsevntaub Sisntsib lub qhovrooj. 33Puab yuavtsum noj tej zaub-mov kws siv lug ua kevcai ntxuav zaamtxim thaus tsaa puab ntawd. Tsuas yog cov povthawj hlub txhaj noj tau cov zaub-mov ntawd xwb, ruaqhov tej ntawd yog zaub-mov dlawbhuv. 34Tsi xob noj tej nqaj lossis tej mov kws seem txug taagkig sawvntxuv, cale muab hlawv povtseg; ruaqhov tej ntawd yog tej khoom kws dlawbhuv lawm.

35“Koj ua kevcai tsaa rua Aloos hab nwg cov tub kuas txwm nkaus xyaa nub, lawvle Kuv tau xaaj rua koj lawm. 36Txhua nub twg koj yuavtsum muab ib tug txiv nyuj lug tua theej txhoj, ua kev zaam puab lub txim. Qhov nuav yog kev ua kevcai ntxuav lub thaaj, hab muab roj txivntoo laub rua lub thaaj ua kuas lub thaaj dlawbhuv. 37Ua le nuav txhua nub kuas txwm xyaa nub. Tes lub thaaj yuav dlawbhuv, hab txhua tug tuabneeg lossis txhua yaam kws moog chwv lub thaaj ntawd yuav cale dlhau moog ua yaam dlawbhuv, vim chwv raug yaam kws dlawbhuv lawm.

Kev Fij Khoom Txhua Nub

(Teev Npe 28:1-8)

38“Txhua nub twg, yuavtsum muab ob tug mivnyuas yaaj kws muaj ib xyoo moog tua hlawv rua sau lub thaaj. 39Muab ib tug tua rua yaav sawvntxuv hab muab ib tug tua rua yaav tsausntuj. 40Luj 1 kilus moov nplej zuaj xyaw ib laamfwj tseem roj txivntoo, hab ib laamfwj cawv txivmaab fij nrug thawjtug mivnyuas yaaj. 41Tug mivnyuas yaaj thib ob kws hlawv theej txhoj thaus yaav tsausntuj, muab moov nplej, roj txivntoo, hab cawv txivmaab sib npaug zog le tug kws fij thaus sawvntxuv hab. Cov nuav yog tej kws fij ua khoom noj rua Kuv, kws yog tug TSWV. Tej paa ntawd yuav tswqaab ntxag txaus Kuv sab.

42“Ib tam rua ib tam, mej yuavtsum ua kevcai hlawv khoom fij le nuav taabmeeg Kuv rua ntawm lub Tsevntaub Sisntsib lub qhovrooj moog le. Qhov chaw ntawd yog qhov chaw kws Kuv yuav ntsib Kuv tsaav tuabneeg hab nrug koj thaam. 43Kuv yuav ntsib cov Yixalayees ntawm qhov chaw ntawd, hab Kuv tug tshwjchim kws ci ntsaa-ab yuav ua rua qhov chaw ntawd dlawbhuv. 44Kuv yuav ua kuas lub Tsevntaub Sisntsib hab lub thaaj dlawbhuv, hab Kuv yuav tsaa Aloos hab nwg cov tub ua cov povthawj hlub ua Kuv tegnum. 45Kuv yuav nrug cov Yixalayees nyob, hab Kuv yuav ua puab tug Vaajtswv. 46Puab yuav paub tas Kuv yog tug TSWV, yog puab tug Vaajtswv kws coj puab tawm huv tebchaws Iziv lug, Kuv txhaj nrug puab nyob. Kuv yog tug TSWV kws yog puab tug Vaajtswv.

Currently Selected:

Tsiv Dlim 29: HNJ2022

Highlight

Copy