Tsiv Dlim 30

Lub Thaaj Hlawv Moov Tshuaj Tswqaab

(Tsiv Dlim 37:25-28)

1“Cale muab ntoo kubtwg ua ib lub thaaj hlawv moov tshuaj tswqaab. 2Lub thaaj ntawd yuavtsum muab txua ua xwmfaab xwmmeem, ntev 45 xaatimev hab dlaav 45 xaatimev, hab sab 90 xaatimev. Txua plaub tug kub koom hlo rua plaub cegkaum thaaj. 3Muab tej tseem-tseem kub vuam saab sau, vuam rua plaub saab, hab plaub tug kub huv tuabsi, hab muab ib pluaj kub ntsa puab tug ntug thoobplawg. 4Ua plaub lub khawb kub rua lub thaaj hab muab ntsa rua ob saab huvqaab tug ntug, ib saab twg ob lub ua chaw ntxig laag kwv lub thaaj. 5Muab ntoo kubtwg txua ua ob tug laag kwv lub thaaj hab muab kub vuam rua huv tuabsi.

6“Muab lub thaaj ntawd txawb rua ntawm dlaim ntaub kws thaiv lub Phijxaab Lug Cogtseg saabnrau nuav. Qhov chaw ntawd yog qhov chaw kws Kuv yuav ntsib koj. 7Txhua taagkig kws Aloos tuaj tu cov teeb, nwg yuavtsum hlawv moov tshuaj kuas tswqaab ntxag rua sau lub thaaj ntawd. 8Thaus yaav yuav tsausntuj kws Aloos tuaj taws cov teeb, los nwg yuavtsum hlawv tej moov tshuaj tswqaab ntawd ib yaam nkaus hab. Tej moov tshuaj tswqaab nuav yuavtsum hlawv fij rua tug TSWV ib tam rua ib tam moog le. 9Tsi xob muab tej yaam moov tshuaj tswqaab kws tsi dlawbhuv, lossis tsaj, lossis qoobloo, hlawv rua sau lub thaaj ntawd; hab tsi pub laub cawv txivmaab fij rua sau lub thaaj ntawd. 10Aloos yuavtsum muab tej ntshaav tsaj kws tua theej txhoj, pleev lub thaaj plaub tug kub ua kevcai ntxuav ib xyoos ib zag. Ib tam rua ib tam, yuavtsum ua le nuav txhua xyoo moog le. Lub thaaj nuav yog lub kws dlawbhuv kawg nkaus rua Kuv, kws yog tug TSWV.”

Sau Se Rua Lub Tsevntaub Sisntsib

11Tug TSWV has rua Mauxes tas, 12“Thaus koj txheeb cov Yixalayees npe, txhua tug txivneej yuavtsum them nyaj rua Kuv ua tug nqe txhwv nwg txujsa rovqaab, sub thaus koj taabtom txheeb npe, puab txhaj yuav tsi raug kev puamtsuaj. 13Txhua tug kws tau muaj npe teev ca lawm yuavtsum them nyaj kuas puvntoob le kws tau kom tseg, kws yog muab luj kuas nyaav ntaus nqe lawvle numtswv kevcai. Txhua tug yuavtsum them cov nyaj nuav ua khoom fij rua Kuv, kws yog tug TSWV. #Tsiv 38:25-26; Math 17:24

14“Txhua tug tuabneeg kws muaj noobnyoog neegnkaum xyoo rov sau kws tub sau npe taag lawm, yuavtsum them nyaj rua Kuv, kws yog tug TSWV. 15Thaus puab them cov nyaj txhwv puab txujsa nuav, kuas tug npluanuj tsi pub them tshaaj, hab tug pluag tsi pub them tsawg. 16Txais cov nyaj kws cov pejxeem Yixalayees coj tuaj khaws tseg tau siv ua dlejnum rua huv lub Tsevntaub Sisntsib. Cov se nuav yuav ua rua puab ncuntsoov tug nqe kws puab txhwv puab txujsa; Kuv yuav ncuntsoov tsomkwm puab.”

Lub Phab Tooj

17Tug TSWV has rua Mauxes has tas, 18“Koj muab tooj lug ua ib lub phab hab lub taw tag phab. Coj moog txawb rua kis nruabnraab ntawm lub Tsevntaub Sisntsib hab lub thaaj, hab nqaa dlej lug laub rua huv lub phab ntawd. 19Aloos hab nwg cov tub txhaj tau cov dlej ntawd ntxuav teg ntxuav taw 20uantej puab moog huv lub Tsevntaub Sisntsib lossis thaus puab moog sawv fij khoom noj rua ntawm lub thaaj, sub puab txhaj tsi raug tua tuag. 21Puab yuavtsum ncuntsoov ntxuav teg hab ntxuav taw, sub puab txhaj yuav tsi tuag. Qhov nuav ua ib txuj kevcai rua puab hab puab caajceg yuavtsum tau coj ua ib tam rua ib tam moog le.”

Roj Txhawb Meejthawj

22Tug TSWV has rua Mauxes has tas, 23“Koj cale muab cov khoom tswqaab kws zoo tshaajplawg: 6 kilus tshuaj tswqaab maules kws ua kua, 3 kilus xinamoos tswqaab, 3 kilus quavntsuas tauj tswqaab, 24hab 6 kilus ntoo kubtwg (muab luj kuas nyaav ntaus nqe lawvle numtswv kevcai). Laub 4 liv roj txivntoo ntxiv rua, 25hab muab nyoj ua cov roj txhawb meejthawj dlawbhuv, sistov kuas tsheej le cov tshuaj tswqaab.

26“Muab cov roj ntawd pleev lub Tsevntaub Sisntsib hab lub Phijxaab Lug Cogtseg, 27pleev lub rooj hab tej cuabyeej kws siv rua lub rooj, pleev tug ncej txawb teeb hab tej cuabyeej kws siv rua tug ncej txawb teeb, lub thaaj hlawv moov tshuaj tswqaab, 28lub thaaj kws hlawv tej khoom fij nrug rua tej cuabyeej kws siv rua lub thaaj ntawd, hab lub phab tooj kws ntxuav teg ntxuav taw hab lub taw tag phab. #Tsiv 38:8; 30:22-28; Tsiv 37:29 29Qhov kws koj ua le nuav yog muab tej ntawd fij kuas dlawbhuv, txhua tug tuabneeg lossis txhua yaam kws moog chwv lub thaaj ntawd yuav cale dlhau moog ua yaam dlawbhuv, vim puab chwv raug yaam kws dlawbhuv lawm.

30“Koj muab cov roj txhawb meejthawj laub ywg Aloos hab nwg cov tub, hab muab puab tsaa ua cov povthawj hlub ua Kuv dlejnum. 31Koj has rua cov pejxeem Yixalayees tas, ‘Mej yuavtsum siv cov roj txhawb meejthawj kws dlawbhuv nuav rua kev ua Kuv le dlejnum ib tam rua ib tam moog le. 32Tsi xob muab cov roj nuav laub rua tej tug tuabneeg kws tsi raug tsaa, hab tsi xob siv tug qauv nuav moog ua dlua lwm cov roj kws zoole cov nuav. Cov nuav yog roj dlawbhuv, mas koj yuavtsum suav has tas nwg yog roj dlawbhuv. 33Yog leejtwg laam siv tug qauv nuav moog ua dlua ib cov roj kws zoole cov nuav lossis muab cov nuav moog laub rua tug tuabneeg kws tsi yog povthawj hlub, tug ntawd yuav raug rhu tawm huv Kuv tsaav tuabneeg moog.’ ”

Tej Moov Tshuaj Tswqaab

34Tug TSWV has rua Mauxes has tas, “Koj cale muab cov tseem roj ntoo tswqaab nuav ib yaam mivntsiv lug: xatates, aunikas, nkanpanoos hab cov tseem roj ntoo tswqaab ntxag, muab luj kuas nyaav sisnpaug zog. 35Coj moog zum uake ua ib cov moov tshuaj tswqaab; muab ntsev ntxiv rua kuas sistov zoo hab dlawbhuv. 36Muab zum kuas ua moov mog-mog, hab nqaa moog ca rua huv lub Tsevntaub Sisntsib, hab muab nphoo rua ntawm hauvntej lub Phijxaab Lug Cogtseg. Mej yuavtsum suav has tas cov moov tshuaj tswqaab nuav yog yaam kws dlawbhuv heev. 37Tsi xob siv tug qauv nuav moog ua ib cov moov tshuaj tswqaab rua mej siv. Mej yuavtsum suav has tas cov moov tshuaj tswqaab nuav yog yaam kws dlawbhuv rua tug TSWV. 38Yog leejtwg tseem ua dlua ib cov moov tshuaj tswqaab zoole nuav lug siv, tug ntawd yuav raug rhu tawm huv Kuv tsaav tuabneeg moog.”

Currently Selected:

Tsiv Dlim 30: HNJ2022

Highlight

Copy