Tsiv Dlim 28

Tej Tsoogtsho Rua Cov Povthawj Hlub

(Tsiv Dlim 38:1-7)

1“Cale hu koj tug tijlaug Aloos hab nwg cov tub: Nadas, Anpihus, Ele-axas hab Ithamas tuaj. Muab puab cais tawm ntawm cov tuabneeg Yixalayees, sub puab txhaj ua tau dlejnum rua Kuv le cov povthawj hlub. 2Xaws cov khaubdluag povthawj hlub kws zoo-zoo rua koj tug tijlaug Aloos naav, kuas tsaav nwg lub meejmom. 3Hu taagnrho cov tuabneeg txujteg zoo kws Kuv tau pub puab muaj peevxwm ua txhua yaam tuaj, hab qha kuas puab xaws ib cov khaubdluag rua Aloos, es muab nwg tsaa ua povthawj hlub ua Kuv dlejnum.

4“Qha kuas puab ua ib lub awv, lub tsho efauj, lub tsho ntev, lub tsho txaij, txuj phuam kws ntoo, hab txuj hlaab sa. Puab yuavtsum ua cov tsho povthawj hlub nuav rua koj tug tijlaug Aloos hab nwg cov tub naav, sub puab txhaj ua tau dlejnum rua Kuv le cov povthawj hlub. 5Cov tuabneeg kws txujteg zoo ntawd yuavtsum muab xuv xav, xuv tsaamxem, xuv lab, xuv kub, hab cov ntaub maag kws zoo heev xaws ua cov tsoogtsho ntawd.

6“Puab muab xuv xav, xuv tsaamxem, xuv lab, xuv kub, hab muab cov ntaub maag kws zoo heev xaws ua lub tsho efauj hab xaws paajntaub txaij nraug zeeg rua. 7Yuavtsum muaj ob pluaj ntaub khuam xubpwg, kws zawm tau, kws txuas tau rua ob lub kaum tom nrauqaum hab tom xubndlag. 8Txuj hlaab sa yog muab cov ntaub kws xaws lub tsho efauj lug ua, hab muab xaws lu uake rua ntawm lub tsho efauj.

9“Muab ob lub qai zeb kanelis txaug Yakhauj kaum-ob tug tub cov npe rua; 10txaug kuas lawvle puab tej noobnyoog ib tug zujzug, txaug rau lub npe rua ib lub qai zeb hab txaug dlua rau lub npe rua lwm lub qai zeb. 11Kuas ib tug kws txawj ntaus nplhaib, txaug Yakhauj cov tub tej npe rua ntawm ob lub qai zeb, hab muab ob lub qai zeb ntawd cog rua ntawm ob dlaim phaj. 12Muab ob lub qai zeb ntawd tis rua ntawm lub tsho efauj ob txuj hlaab sau xubpwg, ua lub cim ncu txug kaum-ob xeem Yixalayees. Ua le ntawd Aloos txhaj tau coj rawv puab tej npe rua sau nwg ob saab xubpwg, kuas Kuv, kws yog tug TSWV, txhaj ncuntsoov Kuv tsaav tuabneeg. 13Muab tej tseem kub nchuav ua ob lub hum txaij nraug zeeg, 14hab ua ob txuj saw kws tseem-tseem kub ntswj zoole txujhlua, hab muab tis rua ntawm ob dlaim phaj ntawd.

Dlaim Awv

(Tsiv Dlim 39:8-21)

15“Cale ua dlaim awv rua tug Tuam Povthawj Hlub tau siv kuas nwg paub nrhav Vaajtswv tug dlejsab. Muab cov ntaub kws xaws lub tsho efauj ua dlaim awv hab xaws paajntaub txaij nraug zeeg rua hab. 16Dlaim ntaub ntawd yuavtsum yog dlaim xwmfaab xwmmeem hab muab tais ua ob tsem, ntev 22 xaatimev hab dlaav 22 xaatimev. 17Cog plaub leej qai zeb kws muajnqes rua; thawj leej cog ib lub lab dlaaj lig, ib lub dlaaj ntshabsi, hab ib lub lab tshab-tshab; 18leej thib ob, cog ib lub ntsuab ci hob, ib lub xav, hab ib lub dlawb ci hob; 19leej thib peb, cog ib lub lab ntshabsi, ib lub txho tawg, hab ib lub lab ua tsaamxem ntshaa; 20hab leej thib plaub, cog ib lub txho xav, ib lub dlawb txho, hab ib lub dlawb ci ntshabsi. Cov qai zeb nuav puavleej muab cog rua ntawm ob dlaim phaj kub.

21“Kaum-ob lub qai zeb ntawd puavleej txaug Yakhauj kaum-ob tug tub npe rua; kws yog sawvcev kaum-ob xeem Yixalayees. 22Muab cov tseem-tseem kub lug ntaus ua ib cov saw ntswj zoole txujhlua, tis rua ntawm dlaim awv. 23Ua ob lub khawb kub tis rua dlaim awv ob lub ntsej saab sau, 24hab muab ob txuj saw kub tis rua ntawm ob lub khawb kub. 25Muab ob tog qaab tis rua ob dlaim phaj, ua le nuav kuas ob txuj saw lu lub tsho efauj ob dlaim tag xubpwg kws dlauv rua ntawm xubndlag. 26Ua dlua ob lub khawb kub tis rua ntawm dlaim awv ob lub kaum huvqaab ntawm tug ntug saabhuv kws puab lub tsho efauj. 27Ua dlua ob lub khawb kub tis ntxiv rua lub tsho khuam ob txuj hlaab khuam xubpwg ob tog tw kawg tom xubndlag kws ze kaab xaws hab txuas nkaus txuj hlaab sa lub tsho efauj. 28Muab ob txuj hlaab ntaub xav khi dlaim awv ob lub khawb rua ntawm lub tsho efauj ob lub khawb, kuas txuas nkaus rua ntawm txuj hlaab lab, sub dlaim awv nyob ncaaj rua ntawm lub tsho efauj txhaj yuav tsi hle.

29“Thaus Aloos moog rua huv Chaav Dlawbhuv, nwg yuavtsum naav rawv dlaim awv kws txaug cov Yixalayees kaum-ob xeem npe rua lawm, kuas Kuv, kws yog tug TSWV, txhaj ncuntsoov Kuv tsaav tuabneeg. 30Muab lub Ulees hab lub Thumees#28:30: lub Ulees hab lub Thumees: Ob lub nuav, yog tug povthawj hlub siv kuas paub Vaajtswv lub sab nyam, tabsis tsi paub sov cov povthawj siv lecaag. ntsaws rua huv dlaim awv, sub thaus Aloos tuaj cuag Kuv timntsej timmuag, nwg txhaj nqaa rawv ob yaam ntawd. Txhua zag nwg yuavtsum npua dlaim awv tuaj, sub nwg txhaj yuav paub txug Kuv tug dlejsab rua cov Yixalayees. #Teev 27:21; 2Kev 33:8; Exala 2:63; Nehemi 7:65

Cov Povthawj Hlub Lwmyaam Tsho Ntev

(Tsiv Dlim 39:22-31)

31“Muab cov ntaub xav xaws ua lub tsho ntev naav tuaj huvqaab lub tsho efauj. 32Lub tsho ntawd, xaws looj sau taubhau tuaj, hab foob lub cejdlaab tsho kuas thoobplawg txhaj tsi ndluag. 33-34Muab xuv xav, xuv tsaamxem, hab xuv lab khi ua tej lub txiv ntsab pobkws, dlai ib lub txiv ntsab pobkws quas ib lub tswb kub, thoobplawg lub tw tsho ntev. 35Aloos yuavtsum naav lub tsho ntev ntawd thaus nwg moog ua tegnum le tug povthawj hlub, sub thaus nwg moog rua huv Chaav Dlawbhuv timntsej timmuag tug TSWV hab thaus nwg tawm rovqaab lug, txhaj yuav nov tej tswb ntawd nrov, es nwg txhaj tsi raug tua tuag.

36“Hab koj muab cov tseem-tseem kub ntaus ua ib dlaim phaj, hab txaug ib cov lug rua ntawm dlaim phaj ntawd has tas, ‘Dlawbhuv rua tug TSWV.’ 37Muab ib txuj hlaab ntaub xav khi dlaim phaj ntawd rua sau txuj phuam kws ntoo sau taubhau. 38Aloos yuavtsum coj dlaim phaj ntawd rua sau nwg hauvplaj, sub txawm yog cov pejxeem fij tej yaam khoom yuamkev mivntsiv los Kuv, kws yog tug TSWV, txhaj yuav txais cov Yixalayees tej khoom kws puab coj tuaj fij rua Kuv ntawd.

39“Muab cov xuv maaj kws zoo-zoo lug ntus ua ib lub tsho rua Aloos naav hab ntus ua ib txuj phuam rua Aloos ntoo, hab xaws ua paajntaub rua txuj hlaab kuas txaij nraug zeeg.

40“Ua ib cov tsho, ib cov hlaab, hab ib cov mom kws zoo-zoo rua Aloos cov tub, kuas tsaav puab lub meejmom. 41Muab cov tsho nuav rua koj tug tijlaug Aloos hab nwg cov tub naav. Muab roj txivntoo pleev puab hab tsaa puab ua cov povthawj hlub ua Kuv le dlejnum. 42Koj muab ntaub maag xaws ib cov rig tuablu rua puab naav tuaj huvqaab kuas txij ndlua ntawm dluav rua nraag ncejqaab, txhaj tsi pum puab chaw txaajmuag. 43Aloos hab nwg cov tub yuavtsum ncuntsoov naav cov rig nuav thaus puab moog rua huv lub Tsevntaub Sisntsib lossis thaus puab moog sawv ntawm lub thaaj ua tegnum povthawj hlub huv Chaav Dlawbhuv, sub puab txhaj tsi raug tua vim pum puab tej chaw txaajmuag. Qhov nuav yog txuj kevcai kws Aloos hab nwg caajceg yuav tau coj moog ibtxhis le.

Currently Selected:

Tsiv Dlim 28: HNJ2022

Highlight

Copy