Tsiv Dlim 27

Lub Thaaj

(Tsiv Dlim 38:1-7)

1“Cale muab ntoo kubtwg lug ua ib lub thaaj xwmfaab xwmmeem. Ntev 2.2 mev, dlaav 2.2 mev, hab sab 1.3 mev. 2Ua plaub tug kub rua sau plaub cegkaum thaaj. Plaub tug kub ntawd, txua koom hlo nrug lub thaaj hab muab tooj vuam huv tuabsi. 3Ua ib co laug ntim tshauv, ib co dluav, ib co taig, ib co dlav rawg hab ib cov yag rau ncaigtawg. Tej cuabyeej nuav puavleej yog muab tooj ua. 4Muab tooj ua ib dlaim ntxaij; hab muab tooj ntaus ua plaub lub khawb ntsa rua plaub cegkaum ua teg nqaa. 5Muab dlaim ntxaij tooj ntawd tso rua huvqaab ntawm tug ntug lub thaaj txug ncua ibnraab. 6Muab ntoo kubtwg ua ob tug laag kws kwv lub thaaj, hab muab tooj vuam rua, 7hab muab ob tug laag ntawd ntxig rua ntawm plaub lub khawb kws ntsa rua ntawm lub thaaj ob saab. 8Muab txag ntoo ua lub thaaj hab tseg huv plawv khoob, lawvle qhov kws Kuv tau qha rua koj sau roob lawm.

Xov Vaaj Ncig Lub Tsevntaub Sisntsib

(Tsiv Dlim 38:9-20)

9“Koj yuavtsum xov vaaj ncig lub tshaavloog ntawm Tsevntaub. Yuavtsum muab dlaim ntaub maag kws ntev 44 mev lug xov rua saab nraag, 10muab neegnkaum tug kaav tooj ua ncej, muab neegnkaum lub taw tooj lug tag taw, tabsis cov khawb hab cov hlua paav yog muab nyaj ua. 11Xov zoo ib yaam le ntawd rua saab peg hab. 12Saab nubpoob, yuavtsum muab dlaim ntaub kws ntev 22 mev lug xov ncig lub tshaavloog ntawd, txhus kaum tug ncej hab kaum lub taw. 13Saab nubtuaj, kws yog lub roojloog nkaag moog rua huv, saab tshaavloog ntawd xov 22 mev dlaav ib yaam nkaus hab. 14-15Ib saab roojloog twg muab cov ntaub kws ntev 6.6 mev lug dlai rua, hab txhus peb tug ncej hab peb dlaim tag taw.

16“Lub qhovrooj kws nkaag moog huv lub tshaavloog, yog muab dlaim ntaub maag kws ntev 9 mev kws xuas xuv xav, xuv tsaamxem, hab xuv lab, xaws ua paajntaub txaij nraug zeeg rua. Txhus plaub tug ncej hab plaub lub taw tag dlai dlaim ntaub ntawd. 17Taagnrho cov ncej kws xov ncig lub tshaavloog ntawm lub tsev, puavleej muab xuv nyaj paav, tej khawb khawm los yog khawb nyaj, hab cov tag taw puavleej yog tooj. 18Lub tshaavloog, qhov ntev muaj 44 mev, qhov dlaav muaj 22 mev, hab qhov sab muaj 2.2 mev. Muab cov ntaub maag kws zoo heev xaws ntswj ua ntsaa vaaj hab muab tooj ua cov tag taw. 19Taagnrho txhua yaam cuabyeej siv huv lub Tsevntaub, tej tswg kws txhus nqug lub Tsevntaub hab tug ntsaa vaaj yuavtsum yog muab tooj ua.

Tu Lub Teeb

(Levis Kevcai 24:1-4)

20“Koj yuavtsum xaaj rua cov Yixalayees kuas puab nqaa cov roj txivntoo kws zoo tshaajplawg tuaj rua koj saam rua lub teeb, sub txhaj tau taws txhua mo. 21Aloos hab nwg cov tub ua cov kws saib hab taws lub teeb huv lub Tsevntaub Sisntsib kws ncaaj lub Phijxaab Lug Cogtseg ntawm dlaim ntaub saabnrau nuav kuas cig taabmeeg Kuv ib mos kaajntug. Cov Yixalayees hab puab caajceg yuavtsum ceev cov lug xaaj nuav moog ibtxhis le.

Currently Selected:

Tsiv Dlim 27: HNJ2022

Highlight

Copy