Tsiv Dlim 26

Lub Tsevntaub Sisntsib#26:1: Lub Tsevntaub Sisntsib: Saib Cov Lug Txhais kws teev rua tomqaab.

(Tsiv Dlim 36:8-38)

1“Muab kaum dlaim ntaub maag kws zoo heev kws yog xuas xuv xav, xuv tsaamxem, hab xuv lab lug xaws rua saabhuv lub Tsevntaub dlawbhuv, kws yog lub Tsevntaub Sisntsib. Xaws ib cov khelunpees rua ntawm cov ntaub ntawd. 2Txav cov ntaub ntawd kuas sisluag zog, ib dlaim twg yog ntev 12 xaatimev hab dlaav 2 xaatimev. 3Muab tsib dlaim lug xaws ua ib dlaig taag maam rov muab tsib dlaim kws u lug xaws ua ib dlaig hab. 4Muab ntaub xav xaws ua ib cov ntsej tis lawv tug ntug thoobplawg dlaim ntaub ob saab ntug nrau. 5Ua tsibcaug lub ntsej rua thawj dlaim ntaub hab tsibcaug lub ntsej rua dlaim thib ob hab ntsuag kuas sisncaag nkaus. 6Muab kub ntaus ua tsibcaug lub khawb khawm ob dlaim ntaub ua ib dlaig.

7“Muab kaum-ib dlaim ntaub plaub tshis xaws ua ib dlaig vuv lub Tsevntaub ntawd. 8Txav cov ntaub ntawd kuas sisluag zog, ib dlaim twg yog ntev 13 xaatimev hab dlaav 2 xaatimev. 9Muab tsib dlaim lug xaws ua ib dlaig, hab muab rau dlaim kws u lug xaws ua dlua ib dlaig. Tabsis muab dlaim thib rau quav ob tsem dlauv ua lub hauvmum Tsevntaub. 10Ua tsibcaug lub ntsej tis rua tog taw tom nuav, hab ua tsibcaug lub ntsej tis rua tog taw tom u. 11Muab tooj ntaus ua tsibcaug lub khawb khawm ob dlaim ntaub ntawd ua ib dlaig vuv lub tsev. 12Dlaim ntaub kws vuv lub tsev, tseg ibnraab nqug moog thaiv saab peg qaum Tsevntaub. 13Tseg tw dlauv rua ob saab, ib saab twg tseg ntev le 50 xaatimev dlauv lug npug lub Tsevntaub.

14“Vuv ob txheej tuaj sau, ib txheej yog muab cov tawv laug yaaj kws zaas lab, hab ib txheej yog muab cov tawv kws zoo heev.

15“Txav ntoo kubtwg lug ua cov cuav ncej txheem lub Tsevntaub. 16Txhua tug cuav ncej ntev 4 mev hab dlaav 66 xaatimev, 17muab ob saab npoo qhais ua qwb dla sisdlhos, kuas cov ncej ntawd sisdlhos uake. Taagnrho cov cuav ncej ntawd puavleej muab qhais ua qwb dla huv tuabsi. 18Muab neegnkaum tug cuav ncej txhus rua saab qaabtse, 19muab plaubcaug pluaj nyaj ua taw tag cov cuav ncej, ob pluaj tag ib tug cuav ncej, kuas ob tug cuav ncej ntawd txhaj sisdlhos ruaj. 20Muab neegnkaum tug cuav ncej txheem lub Tsevntaub saab qaumtsev, 21hab muab plaubcaug pluaj nyaj ua cov tag taw, ob pluaj tag ib tug cuav ncej. 22Muab rau tug cuav ncej txhus rua tomqaab lub Tsevntaub saab nubpoob, 23hab txhus ob tug rua ob lub kaumtsev. 24Ob tug cuav ncej kws nyob ntawm kaumtsev, muab sisdlhos huv taw nto plawg rua sau. Ob tug cuav ncej ntawm ob lub kaumtsev puavleej ua zoo ib yaam nkaus. 25Yogle ntawd, muaj yim tug cuav ncej hab kaum-rau lub taw pluaj nyaj, ob pluaj tag ib tug ncej.

26“Txua kaum-tsib tug taab ntoo kubtwg, muab tsib tug ua taab rua saab phaabntsaa Tsevntaub saab peg, 27muab tsib tug ua taab rua saab phaabntsaa saab nraag, hab muab tsib tug ua taab rua saab hauvmum tomqaab kawg kws yog saab nubpoob. 28Tug taab nruabnraab, yog tug kws yuam lub Tsevntaub saab phaabntsaa tom nuav moog ti nkaus tom u. 29Muab cov tseem kub vuam cov taab hab muab cov khawb kub khawm cov taab rua ntawm cov nqaaj, cov nqaaj ntawd puavleej muab kub vuam huv tuabsi. 30Tsaa lub Tsevntaub kuas lawvle qhov kws Kuv tau qha rua koj sau roob lawm.

31“Muab ib dlaim ntaub maag kws zoo heev kws yog xuas xuv xav, xuv tsaamxem, hab xuv lab, lug ua dlaim ntaub thaiv; xaws cov dluab khelunpees rua ntawm dlaim ntaub ntawd. 32Muab cov nqailauj kub dlai rua hab coj moog khuab rua ntawm plaub tug ncej ntoo kubtwg kws vuam kub, hab muab txawb rua sau plaub pluaj nyaj kws tag taw. 33Muab dlaim ntaub ntawd dlai rua ntawm cov khawb, hab muab lub Phijxaab Lug Cogtseg kws ntim ob dlaim txag zeb txawb rua ntawm dlaim ntaub saab tod. Dlaim ntaub ntawd quas Chaav Dlawbhuv hab Chaav Dlawbhuv Kawg Nkaus. #Henpl 6:19; 9:3-5 34Muab lub hau moog khwb lub Phijxaab Lug Cogtseg huv Chaav Dlawbhuv Kawg Nkaus. 35Muab lub rooj moog txawb rua saabnrau dlaim ntaub saab peg, hab muab tug ncej txawb teeb txawb rua ntawm lub Tsevntaub saab nraag.

36“Muab ib dlaim ntaub maag zoo heev kws yog xuas xuv xav, xuv tsaamxem, hab xuv lab, kws xaws ua paajntaub txaij nraug zeeg, lug ua dlaim ntaub npug lub qhovrooj kws nkaag rua huv lub Tsevntaub. 37Koj yuavtsum ua tsib tug ncej ntoo kubtwg hab muab tej tseem kub vuam rua hab ua ib co nqailauj kub dlai dlaim ntaub nuav rua sau; hab ua tsib tug taw tooj tag cov ncej ntawd.

Currently Selected:

Tsiv Dlim 26: HNJ2022

Highlight

Copy