Tsiv Dlim 25

Coj Khoom Moog Fij Rua Lub Tsevntaub Dlawbhuv

(Tsiv Dlim 35:4-9)

1Tug TSWV has rua Mauxes tas, 2“Koj has rua cov Yixalayees kuas coj khoom tuaj fij rua Kuv. Koj cale txais txhua yaam kws cov tuabneeg txaussab coj tuaj fij. 3Cov khoom kws puab yuav coj tuaj fij nuav mas yog: kub, nyaj, tooj; 4ntaub maag kws zoo-zoo; xuv xav, xuv tsaamxem, hab xuv lab; hab tej rigtsho kws muab plaub tshis lug ntus ua; 5hab tej tawv yaaj kws muab zaas tshuaj lab, tej tawv nyuj kws zoo heev, ntoo kubtwg; 6hab roj saam teeb, tej roj pleev txhawb meejthawj hab tej moov tshuaj kws tswqaab; 7tej qai zeb kanelis hab tej hlaws kws muajnqes tshaajplawg kws coj moog dlai rua ntawm tug Tuam Povthawj Hlub lub tsho efauj#25:7: Tsho efauj: Txhua zaaj kws has txug tsho efauj, mas yog has txug lub tsho kws khuam sau xubpwg kws yeej zoole lub tsho khuam ntaag. Lub tsho efauj nuav yog siv tej ntaub kws raug nqe ntau heev lug xaws, hab yog lub tsho txaij kws muab lub Ulees hab lub Thumees tso rua, kws yog ob yaam khoom siv kuas hum Vaajtswv sab nyam. hab nwg lub awv. 8Puab yuavtsum ua ib lub Tsevntaub kws dlawbhuv rua Kuv, sub Kuv txhaj yuav nrug tau puab nyob. 9Ua lub Tsevntaub hab npaaj ua tej khoom siv rua huv lub Tsevntaub ntawd lawvle tug qauv kws Kuv yuav qha rua koj ua.

Lub Phijxaab Lug Cogtseg

(Tsiv Dlim 37:1-9)

10“Muab cov ntoo kubtwg lug ua ib lub Phijxaab, qhov ntev yog 110 xaatimev, qhov dlaav yog 66 xaatimev, hab qhov sab yog 66 xaatimev. 11Muab cov tseem-tseem kub vuam lub phijxaab ntawd saabnrau hab saabhuv nruabnrog, hab muab kub lug ua tug ntug thoobplawg. 12Muab kub ua plaub lub khawb ntsa rua ntawm plaub tug ceg, ib saab twg yog ntsa ob lub khawb. 13Muab ntoo kubtwg ua ob tug laag kwv hab muab kub vuam ob tug laag ntoo ntawd huv tuabsi, 14hab muab ob tug laag ntawd ntxig rua huv cov khawb ntawm lub Phijxaab ib saab ib tug laag. 15Thaus ntxig rua huv cov khawb lawm tsi xob rhu le. 16Tes muab ob dlaim txag zeb kws sau Kuv tej lug xaaj kws Kuv yuav muab rua koj ntawd tso rua huv lub Phijxaab.

17“Muab cov tseem-tseem kub ua dlaim khwb, qhov ntev yog 110 xaatimev, qhov dlaav yog 66 xaatimev. #Henpl 9:5 18Muab kub ntaus ua ob tug khelunpees, 19txawb ib tug rua ib tog hau Phijxaab. Muab ob tug khelunpees ntawd cog keevxeeb rua lub hau Phijxaab ib tug rua ib tog. 20Tso ob tug khelunpees ntawd tig ntsejmuag tuaj uake, kuas cov koojtis nthuav lug npug lub Phijxaab. 21Muab ob dlaim txag zeb ca rua huv lub Phijxaab hab muab lub hau khwb rua. 22Kuv yuav ntsib koj qhov ntawd; Kuv yuav nyob sau lub hau Phijxaab kis nruabnraab ntawm ob saab koojtis khelunpees hab yuav muab taagnrho Kuv tej kevcai rua koj coj moog qha cov Yixalayees.

Lub Rooj Txawb Ncuav Fij Rua Vaajtswv

(Tsiv Dlim 37:10-16)

23“Muab ntoo kubtwg lug ua ib lub rooj ntev 88 xaatimev, dlaav 44 xaatimev, sab 66 xaatimev. 24Muab cov tseem-tseem kub vuam lub rooj ntawd, hab muab kub ua ib tug ntug thoobplawg rua. 25Lub npoo rooj ntawd ua tuab le 7.5 xaatimev, hab muab kub ua ib tug ntug thoobplawg lub npoo rooj. 26Muab kub ntaus ua plaub lub khawb ntsa rua plaub lub kaum rooj ntawm plaub tug ceg. 27Cov khawb kws ntxig laag kwv lub rooj ntawd, muab ntsa kuas ze rua ntawm tug npoo. 28Muab ntoo kubtwg lug txua ua ob tug laag hab muab kub vuam rua ob tug laag ntawd. 29Ua phaaj, khob, hub, hab taig tau siv rau cawv txivmaab ua khoom fij. Tej twj taig nuav yuavtsum muab cov tseem-tseem kub ua xwb. 30Lub rooj ntawd yuavtsum txawb rua ntawm hauvntej lub Phijxaab Lug Cogtseg, hab yuavtsum muaj cov ncuav dlawbhuv kws fij rua Kuv nyob rua sau lub rooj ntawd txhua lub sijhawm. #Levi 23:5-8

Tug Ncej Txawb Teeb

(Tsiv Dlim 37:17-24)

31“Muab cov tseem-tseem kub ntaus ua ib tug ncej txawb teeb. Lub taw hab tug ncej los muab tej tseem kub ntaus ua paaj, cos paaj, hab nplai paaj, kuas keevxeeb rua ntawm tug ncej. 32Hab ua kuas ncau ua rau ceg, ib saab peb ceg. 33Rau ceg ntawd, ib ceg ua peb lub paaj zoole paaj txiv ovmees, nrug cov cos paaj hab tej nplai paaj. 34Tug ncej txawb teeb mas zaig ua plaub lub paaj zoole paaj txiv ovmees, nrug cov cos paaj hab tej nplai paaj. 35Ntawm rau tug ceg teeb ntawd, ua ib lub paaj rua huvqaab ntawm cov ceg ncau. 36Cov cos paaj, cov ceg hab tug ncej txawb teeb yog muab tuab thooj tseem-tseem kub ntaus ua xwb. 37Ua xyaa lub teeb rua ntawm tug ncej txawb teeb, hab taws kuas cig pumkev laamlug rua tom hauvntej. 38Muab cov tseem-tseem kub ntaus ua phaaj hab txab txav teebxeeb. 39Muab 35 kilus kws tseem-tseem kub lug ntaus ua tug ncej txawb teeb hab taagnrho tej twj siv rua lub teeb nuav. 40Yuavtsum ua txhua yaam nuav lawvle qhov kws Kuv tau qha rua koj sau roob lawm. #Tegnum 7:44; Henpl 8:5

Currently Selected:

Tsiv Dlim 25: HNJ2022

Highlight

Copy