Tsiv Dlim 21

Kev Saib Cov Qhev

(2 Kevcai 15:12-18)

1“Muab cov kevcai nraag nuav rua cov pejxeem Yixalayees: 2Yog mej yuav ib tug tuabneeg Henplais lug ua qhev, nwg tsuas ua mej qhev txug rau xyoo xwb. Xyoo thib xyaa, yuav tau tso nwg nyob ywjsab hab tsi raug them nqe dlaabtsi. 3Yog nwg tsi tau yuav quaspuj thaus nwg lug ua mej qhev, thaus nwg rovqaab moog nwg yuavtsum tsi xob coj tug quaspuj nrug nwg moog, tabsis yog nwg tub muaj quaspuj thaus nwg lug ua mej qhev lawm, thaus nwg rovqaab moog nwg yuavtsum coj nwg tug quaspuj nrug nwg moog. 4Yog tas nwg tug tswv yuav quaspuj rua nwg hab nwg tug quaspuj yug tau tub lossis ntxhais rua nwg, mas tug quaspuj hab cov mivnyuas yog tug tswv le tuabneeg, tes tug qhev nwg tsuas tawm moog tuableeg xwb. 5Tabsis yog tug qhev has meej-meej tas nwg hlub nwg tug tswv, nwg hlub nwg tug quaspuj hab nwg cov mivnyuas, hab tsi xaav tawm moog nyob ywjsab, 6tes nwg tug tswv yuav tau coj nwg moog rua ntawm qhov chaw pehawm Vaajtswv. Kuas nwg sawv npuab ntawm qhovrooj lossis ntawm tug puabrooj hab muab nwg lub nploojntseg tho qhov. Tes nwg yuavtsum ua nwg tug tswv qhev moog taag nwg simneej. #Levi 25:39-46

7“Yog tug txivneej twg muab nwg tug ntxhais muag moog ua luas qhev, mas tug ntxhais ntawd yuav tsi tau tawm moog ywjsab le cov txivneej kws ua qhev. 8Yog muab tug ntxhais ntawd muag rua lwmtug kws xaav yuav ua quaspuj, tabsis yog tug txivneej tsi nyam tug quaspuj ntawd, nwg yuavtsum muab tug quaspuj ntawd muag rov rua nwg txiv; tug txivneej kws xaav yuav nwg ntawd tsi muaj cai muab nwg muag rua cov tuabneeg txawv tebchaws, ruaqhov nwg tau ua tsi ncaaj rua tug quaspuj ntawd lawm. 9Yog tug tswv twg yuav ib tug ntxhais lug ua qhev hab muab txis rua nwg tug tub, nwg yuavtsum saib taug tug ntxhais ntawd ib yaam le yog nwg yug.

10“Yog tug txivneej ntawd yuav namyau, nwg yuavtsum pub tug namhlub kuas muaj noj muaj naav hab pub rua nwg muaj cai ib yaam le yaav taag lug. 11Yog nwg tsi ua le tej kws tau has lug sau nuav rua nwg tug namhlub, nwg yuavtsum xaa tug namhlub ntawd rovqaab hab tsi pub kuas them nyaj rov rua nwg le.

Kevcai Has Txug Kev Ua Limham

12“Yog leejtwg ntaus ib tug tuabneeg twg tuag, tug ntawd yuavtsum raug muab tua kuas tuag. #Levi 24:17 13Tabsis yog yuamkev es tsi yog txhobtxwm tua tug tuabneeg ntawd, nwg yuavtsum tsiv moog nyob huv qhov chaw kws Kuv teem ca rua mej lawm, nwg txhaj yuav tsosab tau. #Teev 35:10-34; 2Kev 19:1-13; Yaus 20:1-9 14Tabsis yog ib tug twg chim hab txhobtxwm tua lwmtug, txawm yog nwg tsiv moog nkaum rua ntawm Kuv lub thaaj los nwg yuavtsum raug muab tua kuas tuag.

15“Yog leejtwg ntaus nwg txiv lossis nwg nam, yuavtsum muab tug ntawd tua kuas tuag.

16“Yog leejtwg moog nyag ib tug tuabneeg coj moog muag lossis coj lug ua nwg qhev, nwg yuavtsum raug muab tua kuas tuag. #2Kev 24:7; 21:17; Levi 20:9; Math 15:4; Malak 7:10

17“Yog leejtwg foom phem rua nwg txiv lossis nwg nam, yuavtsum muab tug ntawd tua kuas tuag.

18-19“Yog muaj ob tug tuabneeg sisntaus, hab muaj ib tug muab pobzeb ntaus lossis xuas nrig rua ib tug, tabsis nwg tsi tuag, tug kws ntaus ntawd yuav tsi raug txim. Yog tug kws raug mob yuavtsum tau pw sau txaaj xwb, tabsis tomqaab ntawd nwg ho sawv taug nreg paas tawm moog rua nrauzoov, tug kws ntaus yuavtsum them nqe rua tug ntawd lub sijhawm kws nwg raug mob hab tu nwg moog txug thaus nwg zoo.

20“Yog tug tswv twg muab paas ntaus nwg tug tubqhe lossis ntxhais qhev tuag taamsim ntawd, tug tswv ntawd yuavtsum raug txim. 21Tabsis yog tug qhev ntawd tseem nyob tau ib nub lossis ob nub, maamle tuag, tes tug tswv yuav tsi raug txim; ruaqhov nwg tub poob qhov nyaj kws moog yuav tug qhev ntawd lug lawm.

22“Yog muaj tej txivneej siscaav sistshe es ntaus raug ib tug quaspuj kws suab mivnyuas huv plaab, ua rua nwg tug mivnyuas pob, tabsis tug leejnam ntawd tsi raug mob, mas yuavtsum muab tug kws ntaus raug tug quaspuj ntawd nplua lawvle nwg tug quasyawg xaav tau, hab lawvle cov tu plaub pumzoo. 23Tabsis yog tug quaspuj ntawd raug mob txaus txhawj, mas yuavtsum rautxim sav pauj sav, 24qhovmuag pauj qhovmuag, nav pauj nav, teg pauj teg, kutaw pauj kutaw, #Levi 24:19-20; 2Kev 19:21; Math 5:38 25kubnyab pauj kubnyab, qhovtxhaab pauj qhovtxhaab, hab qhov dloog pauj qhov dloog.

26“Yog leejtwg ntaus nwg tug tubqhe lossis tug ntxhais qhev qhovmuag dlig, nwg yuavtsum tso tug qhev ntawd moog ywjsab; qhov ntawd zoo ib yaam le nwg them tug nqe qhovmuag rua tug qhev ntawd. 27Yog nwg ntaus nwg tug qhev luv nav, nwg yuavtsum tso tug qhev ntawd moog ywjsab; qhov ntawd zoo ib yaam le nwg them tug nqe nav rua tug qhev ntawd.

Feemxyuam Ntawm Cov Tswv

28“Yog nyuj nrau ib tug tuabneeg twg tuag, yuavtsum muab pobzeb ntaus tug nyuj ntawd kuas tuag, hab tsi xob noj tug nyuj ntawd tej nqaj; tabsis tsi xob rautxim rua tug tswv nyuj. 29Yog tug nyuj ntawd tub yeej txeev nrau tuabneeg lug lawm hab tub muaj tuabneeg moog has rua tug tswv nyuj paub lawm, tabsis nwg tsi ceev tug nyuj ntawd rua huv nkuaj, txhaj moog nrau tuabneeg tuag, yuavtsum muab pobzeb ntaus tug nyuj kuas tuag, hab tug tswv nyuj ntawd yuavtsum raug muab tua kuas tuag ib yaam nkaus.

30“Txawm le ntawd los, yog tug tswv txaussab muab nyaj txhwv nwg txujsa, nwg yuavtsum them lawvle tug nqe kws luas kuas nwg them. 31Yog tug nyuj ntawd nrau ib tug mivtub lossis ib tug mivntxhais twg tuag, los yeej siv tuab txuj kevcai nuav hab. 32Yog tug nyuj ntawd nrau tug tubqhe lossis tug ntxhais qhev twg tuag, tug tswv nyuj yuavtsum them pebcaug lub txajnyag nqe taubhau rua tug qhev ntawd tug tswv, hab yuavtsum muab pobzeb ntaus tug nyuj ntawd kuas tuag.

33“Yog leejtwg qheb dlaim kws npug lub qhovtshij lossis khawb ib lub qhovtshij ca tsi muab npug, es muaj ib tug nyuj lossis ib tug neegluav poob rua huv lub qhovtshij ntawd, 34nwg yuavtsum them tug nqe tsaj ntawd. Nwg them nyaj rua tug tswv tsaj hab nwg yuav tug tsaj ntawd los kuj tau. 35Yog leejtwg tug nyuj moog nrau lwmtug tug nyuj tuag, mas obtug yuavtsum muab tug nyuj kws tseem caj ntawd moog muag hab muab cov nyaj lug faib sisnpaug zog rua obtug, hab muab tug nyuj tuag lug faib ib leeg ib saab. 36Tabsis yog tug tswv nyuj tub paub tas nwg tug nyuj txeev nrau lwmtug lug lawm, tabsis nwg tsi ceev tug nyuj ntawd rua huv nkuaj, nwg yuav tau muab ib tug nyuj lug pauj tug nyuj kws tuag ntawd, hab nwg yuav tug nyuj kws tuag ntawd los kuj tau.

Currently Selected:

Tsiv Dlim 21: HNJ2022

Highlight

Copy