Tsiv Dlim 20

Kaum Nqai Kevcai

(2 Kevcai 5:1-21)

1Cov lug nuav yog Vaajtswv ua tug has: 2“Kuv yog tug TSWV, kws yog mej tug Vaajtswv, tug kws coj mej tawm huv tebchaws Iziv kws mej ua luas qhev lug.

3“Tsi xob muaj dlua lwmtug vaajtswv, tabsis tsuas muaj Kuv tuableeg xwb.

4“Tsi xob puab tej mlom kws zoole tej nyob sau nruabntug lossis huv nplajteb nuav lossis huv tivtxwv rua mej. 5Tsi xob qhau hau lossis pehawm ib tug mlom twg le, ruaqhov Kuv yog tug TSWV, kws yog mej tug Vaajtswv, Kuv khib mej heev. Kuv yog tug kws rautxim rua cov kws ntxub Kuv, hab rautxim rua puab cov xeebntxwv moog txug peb hab plaub tam tuabneeg. #Tsiv 34:17; Levi 19:4; 26:1; 2Kev 4:15-18; 27:15 6Tabsis Kuv yuav qha Kuv txuj kev hlub rua cov kws hlub Kuv hab coj lawvle Kuv tej kevcai, moog txug ntau txheeb tam tuabneeg.#20:6: ntau txheeb tam tuabneeg; lossis ntau txheeb leej. #Tsiv 34:6-7; Teev 14:18; 2Kev 7:9-10; Levi 23:3

7“Tsi xob muab Kuv lub npe siv ua-dlog ua-dlig, ruaqhov Kuv yog tug TSWV, kws yog mej tug Vaajtswv, yuav rautxim rua cov tuabneeg kws muab Kuv lub npe moog siv ua-dlog ua-dlig. #Levi 19:12

8“Yuavtsum ncuntsoov nub Xanpataus,#20:8: Xanpataus: Lulug nuav lug Henplais txhais has tas “nub su.” hab ceev ca ua nub dlawbhuv. #Tsiv 16:23-30; 31:12-14 9Mej muaj rau nub ua mej tej dlejnum, 10tabsis nub thib xyaa yog nub Xanpataus, kws yog Kuv nub su. Nub ntawd mej yuavtsum tsi xob ua dlejnum le, txawm yog mej tugkheej, mej tej mivnyuas, mej tej tubqhe, mej tej tsajtxhu lossis lwmtsaav tuabneeg kws nrug mej nyob huv mej lub tebchaws. #Tsiv 23:12; 31:15; 34:21; 35:2; Levi 23:3 11Kuv, kws yog tug TSWV, tsim lub ntuj hab lub nplajteb tau rau nub; tsim dlej havtxwv, hab txhua yaam kws nyob sau nruabntug hab nyob huv havtxwv, tabsis Kuv su rua nub thib xyaa. Yogle ntawd, Kuv, kws yog tug TSWV, txhaj foom koobmoov rua nub Xanpataus hab muab nub ntawd ua nub dlawbhuv. #Chiv 2:1-3; Tsiv 31:17

12“Yuavtsum fwm mej nam mej txiv, sub mej txhaj yuav muaj sa ua neej nyob ntev rua huv lub tebchaws kws Kuv muab pub rua mej. #2Kev 27:16; Math 15:4; 19:19; Malak 7:10; 10:19; Lukas 18:20; Efex 6:2; Efex 6:3

13“Tsi xob tua tuabneeg. #Chiv 9:6; Levi 24:17; Math 5:21; 19:18; Malak 10:19; Lukas 18:20; Loos 13:9; Yakau 2:11

14“Tsi xob dleev luas quaspuj luas quasyawg. #Levi 20:10; Math 5:27; 19:18; Malak 10:19; Lukas 18:20; Loos 13:9; Yakau 2:11

15“Tsi xob ua tubsaab. #Levi 19:11; Math 19:18; Malak 10:19; Lukas 18:20; Loos 13:9

16“Tsi xob ua timkhawv cuav tawmtsaam mej tej kwvtij zejzog. #Tsiv 23:1; Math 19:18; Malak 10:19; Lukas 18:20

17“Tsi xob ntshaw luas vaaj luas tsev; tsi xob ntshaw luas puj luas sev, luas tej tubqhe, luas tej nyuj, luas tej neegluav lossis ib yaam dlaabtsi kws yog luas tug.” #Loos 7:7; 13:9

Cov Tuabneeg Txuj Kev Ntshai

(2 Kevcai 5:22-33)

18Thaus suavdlawg nov xub nroo hab nov suab raaj nrov ntxhe ntwg, hab pum tsagligxub laim hab paa nchu auv nab sau roob, puab ntshai ua ibce tsheenyo. Puab sawv dleb-dleb 19has rua Mauxes tas, “Yog koj has rua peb, mas peb yuav noog koj has; tabsis tsi xob ca Vaajtswv has rua peb, nyobtsaam peb tuag!”

20Mauxes teb tas, “Tsi xob ntshai; Vaajtswv tsuas yog lug sim mej hab ua kuas mej fwm Nwg, sub mej txhaj tsi moog ua txhum xwb.” 21Tabsis cov pejxeem tseem sawv nrug dleb heev, tsuas yog Mauxes tuableeg xwb txhajle moog ze tauv fuab tsaus nti kws Vaajtswv nyob rua huv.

Tej Kevcai Has Txug Lub Thaaj

22Tug TSWV kuas Mauxes has rua cov Yixalayees tas, “Mej tub pum Kuv, kws yog tug TSWV, haslug sau ntuj tuaj rua mej lawm. 23Mej tsi xob muab nyaj muab kub lug nchuav ua tej nyuas vaajtswv lug ntxiv Kuv rua mej pehawm.

24“Muab aav lug puab ua ib lub thaaj ua qhov chaw kws coj mej tej yaaj hab tej nyuj tuaj tua hlawv theej txhoj hab ua kevcai fij ua kev sis raugzoo nrug lwmtug. Txhua qhov chaw kws Kuv kuas mej pehawm Kuv, Kuv yuav nrug mej nyob hab foom koobmoov rua mej. 25Yog mej muab pobzeb teeb ua Kuv lub thaaj, tsi xob muab tej kws tub txaug tau lawm, ruaqhov tej pobzeb kws mej siv caj lug txaug lawm yuav ua rua lub thaaj tsi huv. 26Mej tsi xob ua qeb ntai nce moog rua sau lub thaaj kws mej ua rua Kuv, yog mej ua le ntawd, thaus mej nce moog rua sau, luas yuav pum mej chaw txaajmuag.

Currently Selected:

Tsiv Dlim 20: HNJ2022

Highlight

Copy