Tsiv Dlim 22

Kevcai Has Txug Kev Them Rovqaab

1“Yog leejtwg nyag luas ib tug nyuj lossis ib tug yaaj hab muab tug tsaj ntawd tua lossis muab muag lawm, nwg yuavtsum them tsib tug nyuj pauj ib tug nyuj, hab plaub tug yaaj pauj ib tug yaaj. 2-4Nwg yuavtsum them rua tej kws nwg moog nyag lug. Yog nwg tsi muaj nyaj them, nwg yuavtsum muab nwg muag moog ua luas qhev hab muab cov nyaj lug them tej nqe kws nwg nyag ntawd. Yog tug tubsaab ntawd nyag tsaj, txawm yog nyuj, neegluav, lossis yaaj, kws moog nrhav tau tseem cajsa hab nwg caab rawv ntawm nwg teg, mas nwg yuavtsum them ob tug pauj ib tug.

“Yog muaj tubsaab tuaj tsoo tsev montuj hab raug tua tuag, tug kws tua tug tubsaab ntawd tsi muaj kev txhum. Tabsis yog nwg tua thaus nruabnub, tes nwg muaj kev txhum.

5“Yog leejtwg tso nwg tej tsaj moog noj zaub huv teb lossis vaaj txivmaab, hab cov tsaj ntawd cale moog noj luas lwmtug tej qoob#22:5: Yog … qoob; lossis Yog leejtwg hlawv ib dlaim teb lossis ib lub vaaj txivmaab, hab ca suavtawg kis moog kub luas tej qoob. huv luas thaaj teb, nwg yuavtsum muab tej qoob kws zoo tshaajplawg huv nwg thaaj teb lossis huv nwg lub vaaj txivmaab moog them.

6“Yog leejtwg hlawv nwg thaaj teb hab kis moog kub luas tej pawg nplej huv luas tej teb, hab kub luas tej nplej kws tsi tau sav lossis tub hlais taag hab muab sau ua pawg lawm, tug kws ua suavtawg kub ntawd yuavtsum them tej kws raug puamtsuaj taag lawm.

7“Yog leejtwg zoosab khaws lwmtug tej nyaj lossis tej khoom muajnqes ca rua huv nwg tsev hab muaj tubsaab tuaj nyag tej ntawd huv nwg tsev lawm, yog nwg nteg tau, mas tug tubsaab ntawd yuavtsum them ob npaug. 8Tabsis yog nteg tsi tau tug tubsaab ntawd, mas yuav tau coj tug kws ca cov nyaj ntawd moog rua ntawm qhov chaw pehawm Vaajtswv, hab kuas nwg tsaa teg twv has tas nwg yeej tsi tau nyag cov nyaj ntawd.

9“Txhua rooj plaub kws yog sistxeeb tej cuabtxhaj cuabtaam, xwsle: nyuj, neegluav, yaaj, rigtsho lossis lwmyaam kws pluj lawm, yuavtsum coj ob tug kws sistxeeb tej ntawd moog rua ntawm qhov chaw pehawm Vaajtswv. Yog Vaajtswv txavtxim rua tug twg swb, tug ntawd yuavtsum them ob npaug rua tug kws yeej.

10“Yog leejtwg txaussab tu lwmtug tej neegluav, nyuj, yaaj lossis lwmyaam tsaj, yog tug tsaj ntawd tuag lossis raug mob lossis muaj lwmtug muab lawv tsiv lawm, hab tsi muaj tuabneeg ua timkhawv pum, 11tes nwg yuavtsum moog rua ntawm qhov chaw pehawm Vaajtswv hab tsaa teg twv has tas nwg tsi tau nyag. Yog tsi muaj tuabneeg nyag tug tsaj ntawd, tes tug tswv tsaj yuavtsum zoosab ca tug tsaj ntawd pluj moog, hab tug kws saib tug tsaj ntawd tsi taag yuav them rovqaab; 12tabsis yog muaj tuabneeg nyag tug tsaj ntawd lawm, nwg yuavtsum them rua tug tswv tsaj. 13Yog muaj tsaj qus tum tug tsaj ntawd lawm, tug kws saib tug tsaj ntawd yuavtsum coj tug tsaj kws raug tum ntawd lub cev moog ua puavpheej rua tug tswv paub, yog tas tug tsaj ntawd yeej raug tsaj nyaum tum tuag tag, tes nwg tsi tau them.

14“Yog leejtwg moog qev lwmtug ib tug tsaj lug ua raug mob lossis ua tuag thaus tug tswv tsi nyob ntawd pum, tes tug qev yuavtsum them tug tsaj ntawd. 15Tabsis yog tuag thaus tug tswv pum ntsoov, tes tug qev tsi taag them. Yog tug tsaj ntawd yog tsaj xauj, tes tsuas them cov nqe xauj ntawd xwb.

Has Txug Kev Ncaajnceeg Hab Kev Ntseeg

16“Yog ib tug txivneej twg moog ntxag ib tug nkaujxwb kws tsi tau muaj tuabneeg qhab hab moog nrug nwg pw lawm, tug ntawd yuavtsum them tug ntxhais ntawd nqe tshoob hab yuav nwg ua quaspuj. 17Tabsis yog leejtxiv tsi kaam muab nwg tug ntxhais rua tug ntawd yuav ua quaspuj, los nwg yuavtsum them nyaj rua leejtxiv kuas txaus nkaus tug ntxhais ntawd cov nqe tshoob vim nwg tseem yog tug nkaujxwb. #2Kev 22:28-29

18“Tug quaspuj twg kws ua khawvkoob hab yeegsiv, yuavtsum muab nwg tua kuas tuag. #2Kev 18:10-11

19“Tug txivneej twg dleev tsaj, yuavtsum muab nwg tua kuas tuag. #Levi 18:23; 20:15-16; 2Kev 27:21

20“Yog leejtwg fij khoom rua lwmtug nyuas vaajtswv kws tsi yog tug TSWV, yuavtsum muab nwg ua kuas puamtsuaj moog. #2Kev 17:2-7

21“Mej tsi xob tsimtxom lossis caijtsuj ib tug tuabneeg txawv tebchaws twg, ruaqhov thaus mej nyob huv tebchaws Iziv, mej tub yog tuabneeg txawv tebchaws hab. 22Mej tsi xob tsimtxom ib tug pujntsuag lossis ib tug mivnyuas ntsuag twg. #Tsiv 23:9; Levi 19:33-34; 2Kev 24:17-18; 27:19 23Yog mej tsimtxom puab, Kuv, kws yog tug TSWV, yuav teb puab tej suab quajntsuag thaus puab hu txug Kuv. 24Kuv yuav npautawg rua mej hab yuav tua mej huv tshaavrog. Mej cov quaspuj yuav dlhau moog ua pujntsuag hab mej cov mivnyuas yuav tsi muaj txiv.

25“Yog mej qev nyaj rua Kuv cov tuabneeg kws yog cov pluag, tsi xob ua le mej yog lub chaw qev nyaj es yuav tsub paaj rua puab them. #Levi 25:35-38; 2Kev 15:7-11; 23:19-20 26Yog leejtwg muab nwg lub tsho ntev tuaj yuam nqe rua koj hab nwg coglug has tas nwg yuav txhwv rovqaab, koj yuavtsum xaa rovqaab rua nwg uantej nub poobqho, 27ruaqhov nwg tsuas muaj tuablub tsho ntawd naav kuas suv xwb. Nwg yuav ua lecaag pw tsaugzug? Thaus nwg quaj thov Kuv, Kuv yuav teb nwg tej lug thov ruaqhov Kuv yog tug kws muaj lub sab taabncuab. #2Kev 24:10-13

28“Mej tsi xob haslug saib tsi taug Vaajtswv,#22:28: Vaajtswv; lossis cov txavtxim. hab tsi xob foom phem rua mej ib tug numtswv twg. #Tegnum 23:5

29“Muab mej tej qoobloo, mej tej txivmaab, hab mej tej roj txivntoo, coj tuaj fij rua Kuv thaus kws tej ntawd sav lawm.

“Muab mej cov tub hlub fij rua Kuv. 30Muab mej tej nyuj hab tej yaaj thawjtug mivnyuas kws yog tug txiv coj tuaj fij rua Kuv. Thawjtug mivnyuas kws yog tug txiv, mas ca nrug tug nam nyob xyaa nub xwb, nub thib yim yuavtsum coj tuaj fij rua Kuv.

31“Mej yog Kuv tsaav tuabneeg kws dlawbhuv, yogle ntawd, mej tsi xob noj tej nqaj tsaj kws raug tsaj qus tum tuag, cale muab pov rua dlev noj xwb. #Levi 17:15

Currently Selected:

Tsiv Dlim 22: HNJ2022

Highlight

Copy