Tsiv Dlim 15

Mauxes Zaaj Nkauj

1Thaus ntawd Mauxes hab cov Yixalayees txhaj hu zaaj nkauj nuav rua tug TSWV:

“Kuv yuav hunkauj rua tug TSWV, ruaqhov Nwg tau kovyeej luj heev;

Nwg tau muab cov neeg hab cov tuabneeg caij neeg pov rua huv havtxwv. #Tshwm 15:3

2Tug TSWV yog kuv lub zug hab yog kuv zaaj nkauj;

Nwg yog kuv txuj kev cawmdlim.

Nwg yog kuv tug Vaajtswv, kuv yuav qhuas Nwg,

Nwg yog kuv txiv tug Vaajtswv, kuv yuav hunkauj qhuas Nwg lub fwjchim kws luj kawg nkaus. #Nnkauj 118:14; Yaxaya 12:2

3Tug TSWV yog tug thawj tubrog;

tug TSWV yog nwg lub npe.

4“Nwg muab cov Iziv tej tubrog hab puab tej tsheb neeg pov rua huv havtxwv;

puab tej tubrog kws zoo tshaajplawg tau raug tuag rua huv Havtxwv Lab.

5Havtxwv tau nphau lug npug nkaus puab;

puab tog rua huv qaabthu ib yaam le lub pobzeb.

6“Tug TSWV, Koj saab teg xis muaj fwjchim heev;

Koj saab teg xis tau ua rua tej yeebncuab tawg ntsoog taag.

7Lug ntawm Koj lub fwjchim kws luj kawg nkaus ua rua Koj kovyeej Koj cov yeebncuab;

Koj txuj kev chim cig moog hlawv puab yaaj taag ib yaam le tej quavnyaab.

8Koj tshuab paa rua sau havtxwv ua rua dlej cale sawv sis tsub moog sab heev;

dlej cale sawv nreg zoo ib yaam le tug ntsaayeej;

tej dlej huv qaabthu havtxwv kws tub kawg nkaus cale nkoog khovkho.

9Cov yeebncuab has tas, ‘Kuv yuav caum puab qaab hab nteg kuas tau puab;

kuv yuav muab puab tej nyajtxag lug sisfaib hab fuab txhua yaam kws kuv xaav tau;

kuv yuav rhu kuv raab ntaaj hab txeeb taagnrho tej kws puab muaj.’

10Tabsis tug TSWV, Koj tshuab ib nyuas paas xwb, ua rua cov Iziv tog taagnrho rua huv qaabthu dlej;

ib yaam le tej quav txhuas tog rua huv tej dlej kws tsw phem.

11“Tug TSWV, puas yuav muaj tej nyuas vaajtswv twg kws zoole Koj?

Leejtwg txhaj zoole Koj, kws yog dlawbhuv kawg nkaus?

Leejtwg txhaj tsimnyog qhuas hab ua tau tej txujci tseemceeb luj npaum le Koj?

12Koj tsaa hlo Koj saab teg xis,

tes aav txawm muab peb cov yeebncuab nqog kag lawm.

13Lug ntawm Koj txuj kev hlub kws ncaajnceeg, Koj coj cov tuabneeg kws Koj tau txhwv lug lawm;

lug ntawm Koj lub zug, Koj coj puab moog rua lub tebchaws kws dlawbhuv.

14Txhua tsaav tuabneeg kws nov tej nuav, puab ntshai ua ibce tsheenyo;

cov tuabneeg Filixatees ntshai, ua rua puab cale mob nyaav heev.

15Cov tuabneeg Edoos tej numtswv puavleej ntshai;

Mau-am cov thawjcoj los ntshai ua ibce tshee quas nyo;

cov tuabneeg Kana-aas cale taag kev casab.

16Tej kev txhawj kev ntshai hab kev poobsab tau lug raug rua puab.

Tug TSWV, puab pum Koj lub fwjchim,

ua rua puab ibce txhaav taag ib yaam le phaab zeb

ca moog txug thaus Koj tsaav tuabneeg moog dlhau lawm,

kws yog tsaav tuabneeg kws Koj tau coj tawm huv txuj kev ua luas qhev lug.

17Koj coj puab lug hab muab puab cog rua sau Koj lub roob,

kws yog qhov chaw kws tug TSWV, Koj tau xaiv ca ua Koj qhov chaw nyob,

kws yog lub Tuamtsev kws Koj tau ua.

18Tug TSWV, Koj yuav ua vaajntxwv moog ibtxhab ibtxhis.”

Mili-as Zaaj Nkauj

19Cov Yixalayees taug kev qhuav qhawv huv havtxwv moog rua saab tim u, tabsis thaus cov tubrog Iziv tej tsheb hab cov tuabneeg tsaav tsheb neeg moog huv havtxwv, tug TSWV tau ua kuas dlej nphau lug npug puab tuag taag huv tuabsi.

20Mili-as kws yog tug xwbfwb cev Vaajtswv lug, kws yog Aloos tug muam; nwg nqaa ib lub nruag npuaj moog uantej hab cov quaspuj ib leeg nqaa ib lub nruag npuaj seevcev lawv nwg qaab. 21Mili-as hunkauj rua puab noog has tas:

“Hunkauj ua Vaajtswv tsaug, ruaqhov Nwg tau kovyeej luj heev;

Nwg tau muab cov neeg hab cov tuabneeg caij neeg pov taag rua huv havtxwv lawm.”

Dlej Ab

22Dlhau ntawd, Mauxes txhaj coj cov Yixalayees tawm ntawm ntug Havtxwv Lab moog rua tom taj suabpuam Saws. Puab moog tau peb nub ke huv lub taj suabpuam, tabsis nrhav tsi muaj dlej haus le. 23Puab moog txug ntawm ib qhov chaw npe hu ua Malas, tabsis lub qhovdlej kws nyob ntawd ab heev, puab haus tsi taug le. Vimle ntawd, qhov chaw ntawd txhaj hu ua Malas.#15:23: Malas: Lub npe nuav lug Henplais txhais has tas “Ab.” 24Cov Yixalayees ywg Mauxes hab nug has tas, “Peb yuav haus dlaabtsi nua?” 25Mauxes quaj qw thov tug TSWV hab tug TSWV qha ib yaav ntoo rua Mauxes, tes Mauxes muab yaav ntoo ntawd pov rua huv lub qhovdlej, dlej txawm cale zoo haus hab tsi ab lawm.

Tug TSWV tau muab kevcai rua puab hab Nwg sim puab sab ntawm qhov chaw ntawd. 26Tug TSWV has rua puab tas, “Yog mej ua tuabzoo noog Kuv lug hab ua lawvle tej kws Kuv pum tas yog lawm, lug ntawm qhov kws mej ua lawvle Kuv tej lug xaaj, Kuv yuav tsi rautxim rua mej kuas muaj mob muaj nkeeg le kws Kuv tso rua cov Iziv; ruaqhov Kuv yog tug TSWV, tug kws khu mej tej mob tej nkeeg.”

27Tomqaab ntawd puab lug txug rua ntawm Elimes, nyob rua qhov ntawd muaj kaum-ob lub qhovdlej cag, hab muaj xyaacaum tsob toovlaaj; puab tsuam chaw su ze rua ntawm cov qhovdlej ntawd.

Currently Selected:

Tsiv Dlim 15: HNJ2022

Highlight

Copy