Tsiv Dlim 16

Manas Hab Ncuab

1Cov Yixalayees sawvkev tawm ntawm Elimes yog nub kaum-tsib, lub ob hlis ntuj, tomqaab kws puab tawm huv tebchaws Iziv lug. Puab lug txug rua huv lub taj suabpuam Xees, kws nyob ntawm Elimes hab lub roob Xinais ntu nruabnraab. 2Puab ywg Mauxes hab Aloos obtug tom taj suabpuam kawg le 3hab has rua obtug tas, “Kheevlaam tug TSWV muab peb tua kuas tuag taag rua huv tebchaws Iziv. Peb nyob nraag, peb tau nyob quastsawg noj zaub, noj nqaj, hab noj mov lawvle peb sab xaav. Tabsis meb coj peb lug nyob rua ntawm taj suabpuam nuav, kuas peb tuag tshaib taag huv tuabsi xwb.”

4Tug TSWV has rua Mauxes has tas, “Zagnua Kuv yuav tso mov poob le naag sau ntuj lug rua mej noj. Cov tuabneeg yuav tau moog khaws txhua nub, hab tsuas khaws kuas txaus noj rua nub ntawd xwb. Kuv ua le nuav yog Kuv sim seb puab puas ua lawvle Kuv tej lug qha. #Yauh 6:31 5Nub thib rau, puab yuavtsum khaws kuas tshaaj le txhua nub ib npaug ntxiv coj lug ua noj.”

6Mauxes hab Aloos obtug txhaj has rua cov Yixalayees has tas, “Mo nuav mej yuav paub tas tug TSWV yog tug kws coj mej tsiv tawm huv tebchaws Iziv lug. 7Thaus sawvntxuv mej yuav pum tug TSWV tug tshwjchim kws ci ntsaa-ab. Nwg tub nov tej lug kws mej ywg Nwg lawm, qhov tseeb, yeej yog mej ywg tug TSWV, ruaqhov wb tsuas yog ob tug kws cev Nwg tej lug qha xwb.” 8Mauxes has ntxiv tas, “Tug TSWV yog tug kws yuav pub nqaj rua mej noj ua mo, hab yuav muab ncuav rua mej noj ua tshais, mej yuav noj tsi taag le, ruaqhov Nwg tau nov tej lug kws mej ywg Nwg lawm. Tag-tag tes, thaus mej ywg wb, tub yog mej ywg tug TSWV ntaag.”

9Mauxes has rua Aloos tas, “Koj has kuas suavdlawg cale tuaj sawv taabmeeg tug TSWV, ruaqhov Nwg tub nov puab tej lug ywg lawm.” 10Thaus Aloos tseem taabtom has rua suavdlawg, puab txawm tig moog saib tom taj suabpuam, uacav taamsim ntawd puab txawm pum tug TSWV tug tshwjchim ci ntsaa-ab sau cov fuab lug. 11Tug TSWV has rua Mauxes tas, 12“Kuv tub nov cov Yixalayees tej lug ywg lawm. Qha rua puab has tas, thaus tsausntuj zuag puab yuav tau nqaj noj, hab thaus sawvntxuv puab yuav tau ncuav noj txaus nkaus le puab lub sab nyam. Thaus ntawd puab yuav paub tas Kuv yog tug TSWV, kws yog puab tug Vaajtswv.”

13Thaus tsausntuj txawm muaj ncuab coob heev yaa ua npoj ntwg lug tsaws puvnkaus rua huv puab lub yeej, hab thaus sawvntxuv muaj lwg ntsu thoobplawg puab lub yeej. 14Thaus lwg yaaj taag lawm, muaj tej dlaim nyag-nyag zoole te, khov dlawbpaug rua sau tej suabpuam. 15Thaus cov Yixalayees pum tej ntawd, puab tsi paub sov yog dlaabtsi, puab txhaj sisnug zumzawg has tas, “Cov nuav yog dlaabtsi?”

Mauxes teb tas, “Cov ko yog tej mov kws tug TSWV tso lug rua mej noj ntaag. #1Klt 10:3 16Tug TSWV tau xaaj kuas mej nyag moog khaws kuas txaus nyag noj. Khaws ib leeg 2 liv#16:16: liv Lulug nuav yog has lawvle lulug Aakiv kws yog “litre.” kuas txhua nwg tsev tuabneeg xwb.”

17Cov Yixalayees ua lawvle Mauxes has, muaj ibtxha khaws ntau ibtxha khaws tsawg. 18Tabsis thaus puab muab lug luj, cov kws khaws ntau kuj tsi tshaaj ntau, hab cov kws khaws tsawg los kuj muaj txaus. Suavdlawg nyag khaws txaus nyag noj xwb. #2Klt 8:15 19Mauxes has rua puab tas, “Tsi pub ib leeg twg khaws mov tseg ca rua pigkig.” 20Tabsis muaj qeeleej tsi noog Mauxes lug, puab txawm qee ibnraab ca rua pigkig. Taagkig kaajntug tej mov ntawd ua kaas hab lwj taag, Mauxes chim rua puab heev. 21Txhua taagkig sawvntxuv nyag yeej moog khaws kuas txaus nyag noj; thaus tshaavntuj tuaj kub lawm, tes tej mov kws puab khaws tsi taag ntawd yaaj huv tuabsi lawm.

22Thaus txug nub thib rau, puab ib leeg khaws tshaaj ib npaug, kws yog ib leeg khaws 4 liv. Cov Yixalayees tej thawjcoj suavdlawg tuaj pav zaaj nuav qha rua Mauxes noog. 23Mauxes teb puab has tas, “Tej lug nuav yog tug TSWV tau xaaj ca has tas pigkig yog nub su kws dlawbhuv rua tug TSWV. Yogle ntawd, tej kws mej xaav muab ci los cale muab ci, hab tej kws mej xaav muab hau los cale muab hau nubnua. Tej kws seem cale muab khaws tseg ca rua pigkig.” #Tsiv 20:8-11 24Cov Yixalayees ua lawvle Mauxes tau xaaj rua puab. Puab khaws tej mov ntawd ca txug taagkig los cov mov tsi lwj lossis tsi ua kaas le.

25Mauxes has rua puab tas, “Nubnua mej yuavtsum noj tej mov ntawd, ruaqhov nubnua yog nub Xanpataus, kws yog tug TSWV nub su; mej yuav moog nrhav tsi tau mov nyob tom tshaavpuam lawm. 26Mej tsuas tau khaws rau nub xwb, tabsis nub thib xyaa, kws yog nub Xanpataus, yuav tsi muaj mov rua mej khaws lawm.”

27Nub thib xyaa muaj qeeleej tseem moog nrhav khaws mov, tabsis puab yeej tsi pum muaj ib lub mov nyob qhovtwg le. 28Tug TSWV has rua Mauxes has tas, “Mej tseem yuav tawv tsi ua lawvle Kuv tej lug xaaj hab Kuv tej kevcai moog txug thaus twg? 29Ncuntsoov tas Kuv, kws yog tug TSWV, yog tug pub nub Xanpataus rua mej; vimle ntawd, nub thib rau Kuv txhaj pub mov kuas txaus mej noj ob nub. Nub thib xyaa txhua tug nyag yuavtsum nyob tuabywv huv nyag tsev, tsi xob tawm moog nrauzoov le.” 30Yogle ntawd, nub thib xyaa tuabneeg txhaj su, tsi ua dlejnum.

31Cov Yixalayees hu cov mov ntawd ua manas.#16:31: Manas: Lulug nuav has muaj ntsiv thooj le lulug Henplais kws has tas “Yog dlaabtsi?” (saib nqai 15). Cov mov ntawd ua tej lub dlawb-dlawb luaj le noob zaub txhwbqab, qaab ib yaam le mov xyaw zib ntaab. #Teev 11:7-8 32Mauxes has tas, “Tug TSWV tau xaaj kuas peb ceev ib co manas tseg ca rua peb tej caajceg tau saib, puab txhajle pum tej mov kws tug TSWV pub rua peb noj tom taj suabpuam thaus Nwg coj peb tawm huv tebchaws Iziv lug.”

33Mauxes has rua Aloos has tas, “Muab ib lub hub lug yawm ob taig manas ntim rua huv, hab nqaa moog txawb rua huv tug TSWV lub xubndlag, khaws tseg rua peb tej caajceg tau saib.” #Henpl 9:4 34Lawvle tug TSWV tau xaaj rua Mauxes lawm, Aloos txhaj muab lub hub kws ntim cov manas ntawd coj moog txawb rua ntawm lub Phijxaab Lug Cogtseg hauvntej. 35Cov Yixalayees noj cov manas ntawd tau plaubcaug xyoo, moog txug rua thaus puab lug txug rua huv tebchaws Kana-aas, qhov chaw kws puab lug ua vaaj ua tsev nyob. #Yaus 5:12 ( 36Lub thoob kws ibtxwm yeem nplej yog ntim tau 20 liv.)

Currently Selected:

Tsiv Dlim 16: HNJ2022

Highlight

Copy