Tsiv Dlim 12
12
Kevcai Hlaa Dlhau
1Tug TSWV has rua Mauxes hab Aloos thaus obtug tseem nyob huv tebchaws Iziv has tas, 2“Ca lub hlis nuav ua thawj lub hlis ntawm lub xyoo rua mej. 3Meb cale has rua taagnrho cov tuabneeg Yixalayees kuas puab paub tas nub xab kaum ntawm lub hlis nuav, kuas ib tug txivtsev twg yuavtsum xaiv ib tug mivnyuas yaaj lossis ib tug mivnyuas tshis npaaj rua nwg tsev tuabneeg. 4Yog yim twg tsev tuabneeg tsawg hab yuav noj tsi taag tug tsaj ntawd, kuas nwg hab yim kws nyob ze nwg koom tua ib tug tsaj, es puab maamle ntsuag seb yuav noj taag tug tsaj luaj lecaag, lawvle qhov kws puab coob lossis tsawg.
5“Tug mivnyuas yaaj lossis tug mivnyuas tshis kws mej yuav xaiv ntawd, yuavtsum yog tug txiv kws muaj noobnyoog ib xyoos xwb, hab yuavtsum tsi xob muaj ib qho phem le. 6Mej muab tug tsaj ntawd ceev ca moog txug nub kaum-plaub ntawm lub hlis nuav; thaus tsausntuj, taagnrho cov tuabneeg Yixalayees yuavtsum tua cov tsaj ntawd noj. 7Kuas txhua yim kws tua tsaj noj ntawd, muab tej ntshaav coj moog pleev rua sau hau qhovrooj hab ob tug puabrooj. 8Mo ntawd puab yuavtsum muab cov nqaj ci, hab noj ntxuag cov ncuav kws tsi xyaw keeb hab tej zaub ab. 9Mej tsi xob noj nqaj nyoog lossis muab hau noj, tabsis mej yuavtsum noj tej tsaj kws muab ci kheej, kws yeej tseem muaj taubhau, muaj plaab nyuv hab sab-ntsws huv tuabsi. 10Mej yuavtsum noj kuas taag tsi xob pub seem ib qho moog txug rua taagkig sawvntxuv le; yog noj tsi taag, yuavtsum muab hlawv huv tuabsi. 11Mej yuavtsum noj ceevnrooj, ruaqhov mej yuav tu cev hab sawvkev moog; rau mej tej khau hab tuav rawv mej tug paas nreg rua ntawm mej txhais teg. Pluag mo nuav yog mej noj ua kevcai Hlaa Dlhau fwm Kuv, kws yog tug TSWV.
12“Mo ntawd Kuv yuav moog phua plhawv huv tebchaws Iziv, tua txhua tug tub hlub hab tej tsaj thawjtug mivnyuas kws yog tug txiv kuas tuag taag huv tuabsi, hab rautxim rua txhuanrho cov Iziv tej nyuas vaajtswv huvsi. Kuv yog tug TSWV. 13Tej ntshaav kws mej pleev ntawm ob tug puabrooj yuav ua lub cim, cim mej tej tsev kws mej nyob. Thaus Kuv pum cov ntshaav ntawd Kuv yuav hlaa mej moog hab rautxim rua cov Iziv, kuas mej txhaj tsi raug kev puamtsuaj. #Levi 23:5; Teev 9:1-5; 28:16; 2Kev 16:1-2 14Mej yuavtsum ncuntsoov muab nubnua ua ib nub tseemceeb rua mej. Mej yuavtsum ua kevcai ncu txug tej kws Kuv, kws yog tug TSWV, tau ua taag lug lawm. Mej yuavtsum ua kevcai le nuav ib tam rua ib tam moog le.”
Ua Kevcai Noj Ncuav Tsi Xyaw Keeb
15Tug TSWV has tas, “Mej yuavtsum noj tej ncuav kws tsi xyaw keeb kuas puv xyaa nub. Thawj nub, mej yuavtsum muab tej keeb kws nyob huv tsev povtseg huv tuabsi, yog xyaa nub ntawd leejtwg tseem noj ncuav xyaw keeb, tes tug ntawd yuav tsi raug suav has tas nwg yog Kuv tsaav tuabneeg moog ntxiv lawm. 16Thawj nub hab nub thib xyaa mej yuavtsum tuaj sissau uake kws yog suav ua nub dlawbhuv. Mej tsi xob ua ib yaam num dlaabtsi rua ob nub ntawd, tsuas pub mej ua pluag noj pluag haus xwb. 17Mej yuavtsum ua kevcai ncu txug nub kws Noj Ncuav Tsi Xyaw Keeb nuav, ruaqhov nubnua yog nub kws Kuv coj mej txhua xeem tawm huv tebchaws Iziv moog. Ib tam rua ib tam, mej yuavtsum ncuntsoov ua txuj kevcai nuav.
18“Lub ib hlis ntuj, suav txij le mo kaum-plaub moog txug mo neegnkaum-ib, mej yuavtsum noj cov ncuav kws tsi xyaw keeb nkaus xwb. 19Xyaa nub ntawd tsi pub muaj ib qho keeb nyob huv mej tej tsev hlo le. Txawm yog tsaav tuabneeg Yixalayees lossis lwmtsaav tuabneeg los xij, yog leejtwg tseem noj ncuav xyaw keeb hab, tes tug ntawd yuav tsi raug suav has tas yog Kuv tsaav tuabneeg moog ntxiv lawm. 20Txawm yog mej nyob qhovtwg los xij, mej tsi xob noj tej ncuav kws xyaw keeb hlo le; mej yuavtsum noj tej ncuav kws tsi xyaw keeb xwb.” #Tsiv 23:15; 34:18; Levi 23:6-8; Teev 28:17-25; 2Kev 16:3-8
Thawjzag Ua Kevcai Hlaa Dlhau
21Mauxes hu cov Yixalayees cov thawjcoj tuaj uake hab has rua puab tas, “Mej txhua tug nyag cale moog xaiv nyag ib tug mivnyuas yaaj lossis mivnyuas tshis lug rua mej tej tsev tuabneeg tua noj ua kevcai Hlaa Dlhau. 22Mej muab ib re nplooj hixauv moog raus rua huv lub phab kws rau#12:22: raus rua huv lub phab kws rau; lossis tso rua sau lub hau puabrooj. cov ntshaav tsaj, hab coj cov ntshaav ntawd moog pleev rua ob tug puabrooj hab sau hau qhovrooj. Mo ntawd tsi pub mej ib tug twg tawm rua nrauzoov moog txug taagkig sawvntxuv. 23Thaus tug TSWV lug hlaa phua lub tebchaws Iziv kws yog lug tua cov tuabneeg Iziv, yog Nwg pum tej ntshaav kws mej pleev rua sau hau qhovrooj hab ob tug puabrooj, Nwg yuav tsi pub tug Timtswv kws yog Kev Tuag nkaag lug rua huv mej tej tsev hab tua mej. #Henpl 11:28
24“Mej hab mej cov tubki yuavtsum coj txuj kevcai nuav moog ibtxhis tsi kawg le. 25Thaus mej moog txug huv lub tebchaws kws tug TSWV tau coglug muab pub rua mej, mej yuavtsum ncuntsoov ua txuj kevcai nuav. 26Thaus mej cov mivnyuas nug mej has tas, ‘Tej kevcai nuav lub ntsab yog lecaag?’ 27Mej yuavtsum pav qha rua puab has tas, ‘Yog txuj kevcai Hlaa Dlhau kws peb ua tug TSWV tsaug, ruaqhov Nwg tau lug hlaa dlhau peb cov Yixalayees tej vaajtse kws nyob rua huv tebchaws Iziv. Nwg tua cov tuabneeg Iziv tabsis Nwg tseg peb ca.’ ”
Ibtsoom pejxeem Yixalayees txawm txhuscaug ndlua rua huv aav hab pehawm tug TSWV. 28Tes puab txawm rovqaab lug tsev hab ua le tug TSWV tau xaaj tseg rua Mauxes hab Aloos obtug lawm.
Cov Iziv Tej Tub Hlub Tuag
29Thaus ib taagmo tug TSWV lug tua cov Iziv cov tub hlub tuag taagnrho, suav txij Falaus tug tub hlub kws yuav lug nyob sau lub zwmtxwv, moog txug rua cov tuabneeg raug txim kws nyob huv tej qhovtshij kws tsausntuj nti cov tub hlub; hab taagnrho tej tsajtxhu thawjtug mivnyuas kws yog tug txiv puavleej raug tua tuag taag huv tuabsi. #Tsiv 4:22-23 30Mo ntawd Falaus, nwg cov numtswv, hab taagnrho cov tuabneeg Iziv sawv lug quaj ntshunrooj thoobplawg tebchaws Iziv, ruaqhov yeej tsi muaj ib lub tsev kws tsi muaj tuabneeg tuag nyob rua huv le.
31Mo ntawd kag xwb, Falaus khaiv tuabneeg moog hu Mauxes hab Aloos tuaj cuag nwg hab has tas, “Meb hab meb cov nyuas tuabneeg Yixalayees cale tsiv moog! Cale tawm huv peb lub tebchaws nuav moog pe tug TSWV, lawvle mej tau thov kuv lawm. 32Coj mej tej yaaj, tej tshis, tej nyuj, hab cale tsiv moog. Meb thov Vaajtswv foom koobmoov rua kuv hab.”
33Cov Iziv txhib ceevnrooj kuas cov Yixalayees cale tsiv tawm huv lub tebchaws moog; puab has tas, “Yog mej tsi tawm moog mas peb yeej yuav tuag taag le lau!” 34Yogle ntawd, cov Yixalayees txhajle muab tej moov nplej tsi xyaw keeb kws puab tub muab ntse tau lawm nrug rua tej phaaj qhwv rua huv tej khaubdluag hab kwv sau xubpwg moog. 35Cov Yixalayees txhaj ua txhua yaam lawvle Mauxes tub has rua puab lawm; puab moog thov cov Iziv tej saw nyaj saw kub hab tej tsoogtsho nqaa moog huv tuabsi. 36Tug TSWV ua rua cov Iziv fwm cov Yixalayees heev, puab txhaj muab puab tej nyaj tej kub rua cov Yixalayees lawvle cov Yixalayees thov. Yogle ntawd, cov Yixalayees txhaj sau cov Iziv tej nyajtxag dlu lug nrug puab moog. #Tsiv 3:21-22
Cov Yixalayees Tawm Huv Tebchaws Iziv
37Cov Yixalayees tawm huv lub nroog Lamexes moog rua nraag lub nroog Xukhaus. Cov txivneej muaj kwvlaam le 600,000 leej, tsi xaam cov quaspuj hab cov mivnyuas. 38Muaj lwmtsaav tuabneeg coob heev nrug puab moog hab, puab caab yaaj, caab tshis, hab caab nyuj coob ua npoj ntwg nrug puab moog. 39Puab muab tej moov nplej tsi xyaw keeb kws puab tub muab ntse tau huv tebchaws Iziv lawm coj lug ci ua ncuav noj, ruaqhov cov Iziv ntab puab tsiv tawm sai heev, ua rua puab npaaj tsi yeej tej ncuav kws xyaw keeb hab tej khoom noj le.
40Cov Yixalayees nyob huv lub tebchaws Iziv tau 430 xyoo. #Chiv 15:13; Kalat 3:17 41Thaus txug nub kws txwm nkaus 430 xyoo, txhua xeem kws yog tug TSWV tsaav tuabneeg txawm tawm huv tebchaws Iziv moog. 42Mo ntawd tug TSWV yog tug zuv hab tsomkwm puab kev tawm huv tebchaws Iziv moog. Mo ntawd yog mo kws cov Yixalayees muab fij rua tug TSWV, puab txhaj muaj zuv mo lug ua kevcai ncu txug tug TSWV ib tam rua ib tam.
Tej Cai Has Txug Kevcai Hlaa Dlhau
43Tug TSWV has rua Mauxes hab Aloos obtug tas, “Nuav yog tej cai rua kevcai Hlaa Dlhau: Tsi pub cov tuabneeg txawv tebchaws noj rooj mov ua kevcai Hlaa Dlhau nuav, 44tabsis txhua tug tubqhe kws mej yuav lug, yog mej tub muab ua kevcai txav tawv lawm, tug ntawd noj tau. 45Txwv tsi pub tug kws tuaj ua qhua ib nyuas ntu lossis raug ndlav tuaj ua zug xwb, nrug mej noj. 46Pluag mov nuav nyag yuavtsum noj huv nyag tsev xwb, tsi xob nqaa nqaj tawm moog noj nrauzoov, hab tsi xob muab tug tsaj ntawd tej pobtxhaa luv le. #Teev 9:12; Yauh 19:36
47“Taagnrho cov tuabneeg Yixalayees yuavtsum ua txuj kevcai nuav, 48tabsis tsi pub cov txivneej kws tsi tau ua kevcai txav tawv noj rooj mov nuav. Yog cov tuabneeg txawv tebchaws kws nrug mej nyob, tug twg xaav nrug mej koom ua kevcai Hlaa Dlhau ua tug TSWV tsaug, mej yuavtsum xub muab txhua tug txivneej huv nwg tsev tuabneeg ua kevcai txav tawv tsaiv. Thaus ntawd mej yuav tau suav has tas nwg zoo ib yaam le tug kws yug huv tsev tuabneeg Yixalayees lawm, hab muaj feem koom nrug mej ua kevcai Hlaa Dlhau. 49Cov Yixalayees hab cov tuabneeg txawv tebchaws kws lug nrug mej nyob, suavdlawg yuavtsum coj txuj kevcai nuav.”
50Cov Yixalayees txhua tug puavleej ua lawvle tej lug kws tug TSWV tau xaaj tseg rua Mauxes hab Aloos obtug. 51Nub ntawd kag ntaag, yog nub kws tug TSWV coj cov Yixalayees txhua xeem tawm huv tebchaws Iziv moog.
Currently Selected:
Tsiv Dlim 12: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
