Tsiv Dlim 13

Fij Cov Tub Hlub Rua Vaajtswv

1Tug TSWV has rua Mauxes has tas, 2“Muab txhua tug tub hlub fij rua Kuv, ruaqhov cov Yixalayees txhua tug tub hlub hab taagnrho tej tsaj thawjtug mivnyuas kws yog tug txiv puavleej yog Kuv tug.” #Teev 3:13; Lukas 2:23

Ua Kevcai Noj Ncuav Tsi Xyaw Keeb

3Mauxes has rua cov pejxeem tas, “Mej yuavtsum ncuntsoov nub nuav, kws yog nub mej tawm huv tebchaws Iziv, qhov chaw kws mej ua luas qhev lug. Nub nuav yog nub kws tug TSWV coj mej tawm lug ntawm Nwg lub fwjchim kws luj kawg nkaus. Mej tsi xob noj tej ncuav kws xyaw keeb hlo le.

4“Nubnua yog lub ib hlis ntuj, kws yog lub hli Anpis, yog nub kws mej tsiv tawm huv tebchaws Iziv lug. 5Tug TSWV tau coglug tseg rua mej cov yawmkoob has tas Nwg yuav muab cov Kana-aas, cov Hitis, cov Amaules, cov Hivis, hab cov Yenpus lub tebchaws rua mej nyob. Thaus Nwg coj mej moog txug rua huv lub tebchaws kws muaj kua mig hab zib ntaab ndlwg ndlo, txhua xyoo thaus lub ib hlis ntuj mej yuavtsum ua kevcai Noj Ncuav Tsi Xyaw Keeb le nuav. 6Xyaa nub ntawd mej yuavtsum noj cov ncuav tsi xyaw keeb nkaus xwb, mas nub thib xyaa mej yuavtsum ua rooj mov noj ua tug TSWV tsaug. 7Mej yuavtsum Noj Ncuav Tsi Xyaw Keeb kuas txwm nkaus xyaa nub; hab tsi pub kuas muaj keeb lossis ncuav xyaw keeb nyob huv mej lub tebchaws le.

8“Nub kws pib ua kevcai ntawd, koj yuavtsum pav txhua yaam rua koj cov mivnyuas has tas, ‘Kuv ua le nuav ruaqhov tug TSWV tau ua rua kuv thaus kuv tsiv tawm huv tebchaws Iziv lug.’ 9Txuj kevcai nuav yog ib yaam kws yuav ua rua mej ncuntsoov, zoole ib yaam kws mej muab khi rua ntawm mej txhais teg lossis sau mej lub hauvplaj; kuas tug TSWV tej lug yuav nyob huv mej lub qhovncauj, ruaqhov tug TSWV tau coj mej tawm huv tebchaws Iziv lug ntawm Nwg lub fwjchim kws luj kawg nkaus. 10Mej yuavtsum ua txuj kevcai nuav txhua xyoo lawvle lub sijhawm kws tau teem tseg lawm.

Fij Thawjtug Tub Hlub Hab Thawjtug Tsaj

11“Tug TSWV yuav coj mej moog nyob huv cov Kana-aas lub tebchaws kws Nwg tub coglug rua mej hab mej cov yawmkoob lawm. Thaus Nwg muab lub tebchaws ntawd pub rua mej, 12mej yuavtsum muab mej txhua tug tub hlub fij rua tug TSWV. Mej tej tsaj thawjtug mivnyuas kws yog tug txiv puavleej yog tug TSWV tug, 13tabsis txhua tug mivnyuas txiv neegluav, mej yuavtsum coj ib tug mivnyuas yaaj moog txhwv ntawm tug TSWV rovqaab. Yog mej tsi xaav txhwv tug mivnyuas neegluav rovqaab, mej cale muab luv cejdlaab kuas tuag. Mej yuavtsum txhwv mej cov tub hlub txhua tug rovqaab huv tuabsi hab. #Tsiv 34:19-20; Lukas 2:23

14“Lwmnub, thaus koj tug tub nug koj has tas, ‘Uacaag txhaj ua le nuav?’ Koj qha rua nwg has tas, ‘Tug TSWV txhais teg kws muaj fwjchim luj kawg nkaus tau coj peb tawm huv tebchaws Iziv, qhov chaw kws peb ua luas qhev lug. 15Thaus Falaus lub sab tawv tsi kaam tso peb tawm, tug TSWV tau tua txhua tug tub hlub kws nyob huv lub tebchaws Iziv, hab tua tej tsaj thawjtug mivnyuas kws yog tug txiv tuag taag huv tuabsi. Vimle nuav, peb txhajle muab peb tej tsaj thawjtug mivnyuas kws yog tug txiv tua fij rua tug TSWV, kws yog txhwv peb tej tub hlub rovqaab. 16Txuj kevcai nuav yog ib yaam kws yuav ua rua peb ncuntsoov, zoole ib yaam kws peb muab khi rua ntawm peb txhais teg lossis sau peb lub hauvplaj; kuas peb ncuntsoov tas tug TSWV tau coj peb tawm huv tebchaws Iziv lug ntawm Nwg lub fwjchim kws luj kawg nkaus.’ ”

Tug Ncej Fuab Hab Tug Ncej Suavtawg

17Thaus Falaus tso cov Yixalayees moog lawm, Vaajtswv tsi coj puab taug txujkev kws lawv ntug havtxwv ncaajnraim moog rua peg tebchaws Filixatees, txawm yog txujkev ntawd ze los Nwg tsi coj puab moog txuj ntawd. Vaajtswv xaav tas, “Kuv ntshai tsaam ib ntsiv puab moog ntsib tsuvrog tes puab yuav hloov sab tsiv rovqaab moog rua huv tebchaws Iziv.” 18Yogle ntawd, Nwg txhaj coj puab taug kev lawv taj suabpuam moog rua tom Havtxwv Lab.#13:18: Havtxwv Lab: (Lawvle lug Henplais mas yog “Havtxwv Lojkov”) kws yog has txug (1) ib cov paag dlej kws nyob ntu nruabnraab ntawm Havtxwv Xu-es hab Meditelanees, cheebtsaam kws thaus u has nyob rua huv phoo Tsiv Dlim tshooj 13, kws yog has txug (2) Havtxwv Xu-es hab (3) Havtxwv Akanpas. Thaus cov Yixalayees taug kev tawm huv tebchaws Iziv lug, puab yeej npaaj cuabyeej uarog nrugnraim puab txhijzog xwb.

19Mauxes coj Yauxej cov pobtxhaa nrug nwg moog, lawvle Yauxej tau has kuas cov Yixalayees coglug rua nwg lawm. Yauxej tau has tas, “Thaus Vaajtswv lug paab mej dlim lawm, mej yuavtsum coj kuv tej pobtxhaa tawm huv tebchaws Iziv nuav nrug mej moog.” #Chiv 50:25; Yaus 24:32

20Cov Yixalayees tsiv tawm huv Xukhaus moog tsuam chaw su rua ntawm Ethas kws nyob ntawm ntug taj suabpuam. 21Nruabnub tug TSWV ua ib tug ncej fuab moog ua puab ntej coj puab kev, hab thaus montuj Nwg ua ib tug ncej suavtawg cig laamlug moog ua puab ntej kuas puab pumkev. Yogle ntawd, puab txhaj taug kev moog nruabnub hab montuj los tau huv tuabsi. 22Nruabnub los tug ncej fuab yeej moog ua puab ntej hab coj puab kev; montuj los tug ncej suavtawg yeej moog ua puab ntej hab coj puab kev tsi ncaim puab le.

Currently Selected:

Tsiv Dlim 13: HNJ2022

Highlight

Copy