2 Kauleethaus 13
13
Tej Lug Ntuag Hab Lug Xaa Xuv Thaus Kawg
1Zagnuav yog zag thib peb kws kuv yuav tuaj saib mej. Lawvle Vaajtswv Txujlug has tas, “Yog muaj xaiv muaj lug, yuavtsum muaj ob leeg lossis peb leeg ua timkhawv txhaj tseeb.” #2Kev 17:6; 19:15 2Kuv tub ntuag mej cov kws yaav taag lug tau ua txhum hab ntuag taagnrho suavdlawg ib zag lug lawm, kws yog zag thib ob kws kuv tuaj saib mej. Zagnua, txawm yog kuv nyob dleb mej los kuv rov ntuag mej has tas, lwm zag kws kuv rov tuaj, kuv yuav tsi txuag puab ntxiv lawm.
3Mej yuav pum tseeb has tas Khetos yog tug kws siv kuv has Nwg tej lug. Thaus Nwg taug mej zaaj, Nwg yuav tsi ua tug nyuas qaug zujzig, tabsis Nwg yuav ua kuas mej pum Nwg lub fwjchim. 4Txawm yog Nwg raug muab ntsa rua sau ntoo khaublig zoole tug kws qaug zujzig los Nwg tseem muaj sa nyob vim Vaajtswv lub fwjchim. Ib yaam nkaus le ntawd, txawm yog peb qaug zujzig nyob rua huv Nwg los, lug ntawm Vaajtswv lub fwjchim, peb yuav nyob rua huv Nwg hab ua dlejnum pub rua mej.
5Mej cale sojntsuam hab ntsuag mej tugkheej seb mej puas tseem ua neej nyob rua huv txuj kev ntseeg. Mej tsi paub lov, has tas Yexus Khetos nyob rua huv mej? Yog mej tsi paub, tes yog mej tub tsi ua neej nyob rua huv txuj kev ntseeg lawm. 6Kuv casab tas nyaj mej yuav paub tas peb yeej tsi tau poob ntawm txuj kev ntseeg lawm.
7Peb thov Vaajtswv paab kuas mej tsi xob ua txhum. Peb thov le ntawd tsi yog peb ua rua suavdlawg xaav tas peb yog cov kws tub ua zoo lawm. Txawm yog zoole peb tub ua tsi tau zoole los peb xaav kuas mej ua tau qhov zoo. 8Ruaqhov peb yeej ua tsi tau ib yaam dlaabtsi kws yuav cuamtshuam qhov tseeb le, tsuas muaj kws yuav ua lawvle qhov tseeb xwb. 9Thaus peb qaugzug es mej tseem muajzug npho los peb kuj zoosab. Peb yuav thov Vaajtswv paab kuas mej ua tau lub neej zoo zujzug ntxiv. 10Tub yog vimle ntawd, thaus kuv tseem nyob dleb mej kuv txhaj sau tsaab ntawv nuav tuaj rua mej; sub thaus kuv tuaj txug lawm kuv txhaj yuav tsi siv lub fwjchim kws tug Tswv muab rua kuv ntawd lug ua nyaum rua mej, lub fwjchim ntawd yog tsaa mej sawv, tsi yog yuav rhuav mej.
11Cov kwvtij, thaus kawg nuav, kuv thov ncaim mej moog! Mej yuavtsum muab sab rau xyum ua lub neej kuas zoo kawg nkaus, khaws kuv tej lug ca, suavdlawg ua ib lub sab, hab ib leeg tsi xob nrhav xaiv nrhav lug rua ib leeg. Vaajtswv tug kws muaj txuj kev hlub hab kev thaajyeeb yuav nrugnraim mej nyob.
12Mej ib leeg has nojqaab nyobzoo rua ib leeg hab ib leeg nwj ib leeg ntawm txuj kev dlawbhuv.
13Taagnrho cov ntseeg puavleej xaa kev nojqaab nyobzoo rua mej hab.
14Thov kuas tug Tswv Yexus Khetos txuj moovhlub, Vaajtswv txuj kev hlub, hab Vaaj Ntsujplig tug Dlawbhuv txuj kev phooj kev ywg nyob nrug mej txhua tug.
Currently Selected:
2 Kauleethaus 13: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
