2 Kauleethaus 12

Tej Kws Paulus Ua Ywgtoog Pum

1Txawm yog tej kws kuv khaav tsi muaj qaabhau los kuv yeej khaav moog ntxiv. Tabsis kuv yuav has txug tej kws peb tug Tswv qha rua kuv hab ua rua kuv ua ywgtoog pum. 2Kuv paub ib tug txivneej ntseeg Vaajtswv kws kaum-plaub xyoos dlhau lug, Vaajtswv tau coj nwg moog rua sau ntuj ceebtsheej tshooj thib peb. (Sov nwg moog hlo lub cev lossis ua ywgtoog pum xwb, kuv tsi paub, tsuas yog Vaajtswv txhaj paub xwb.) 3Kuv paub tas Vaajtswv tau coj tug txivneej ntawd moog rua sau qhov chaw kws tau zoo nyob kaajsab lug lawm (tabsis ua le kuv nyavnyuas has ntawd, sov nwg moog hlo lub cev lossis ua ywgtoog pum xwb, kuv tsi paub, tsuas yog Vaajtswv txhaj paub xwb), 4thaus nwg nyob sau, nwg nov tej kws tsi muaj leejtwg yuav muaj cuabkaav pav tau, tej kws txwv tsi pub tuabneeg qha tawm.

5Yogle ntawd, kuv yuav khaav txug tug txivneej nuav, tabsis kuv yuav tsi khaav txug kuv tugkheej; kuv tsuas khaav txug kuv txuj kev tsaugmuas xwb. 6Txawm yog kuv xaav khaav los kuv yeej tsi yog tuabneeg ruag, ruaqhov kuv tsuas has qhov tseeb xwb. Tabsis kuv yuav tsi khaav, sub txhaj yuav tsi muaj leejtwg qhuas kuv tshaaj le mej qhuas vim mej tau pum kuv ua lossis nov kuv haslug lawm.

7Tabsis Vaajtswv tsi xaav kuas kuv khaavtheeb vim qhov kws Nwg tau ua ntau yaam zoo rua kuv pum, Nwg txhaj muab ib tug xuavpaug lug chob kuv lub cev, qhov ntawd zoole Xataas ib tug tubkhai, lug tsimtxom kuv kuas kuv tsi xob khaav. 8Kuv tub thov tug Tswv peb zag kuas Nwg muab rhu tawm ntawm kuv moog. 9Tabsis Nwg teb tas, “Kuv txuj moovhlub yeej muaj txaus nkaus rua koj, ruaqhov txuj kev tsaugmuas nyob qhovtwg, Kuv lub fwjchim yuav muaj puvnpo nyob rua qhov ntawd.” Yogle ntawd, kuv yuav zoosab hlo khaav txug kuv txuj kev tsaugmuas, sub Khetos lub fwjchim txhaj yuav muaj nyob rua huv kuv. 10Vim kuv saib rua sau Khetos, kuv txhaj txaussab rua txuj kev tsaugmuas, txuj kev raug txobthuam, raug teebmeem, raug tsimtxom, hab muaj kev tuncua. Ruaqhov thaus kuv tsaugmuas, thaus ntawd kuv muajzug.

Paulus Txuj Kev Txhawjxeeb Txug Cov Kauleethaus

11Kuv ua le tug tuabneeg ruag ua, tabsis tub yog vim mej kuv txhaj ua le ntawd. Tub tsimnyog kws mej yuavtsum qhuas kuv. Txawm yog kuv tsi muajnqes dlaabtsi le los kuv yeej tsi qeg dlua mej cov “timthawj qebsab” ntawd. 12Kuv ua sabntev ua ntau yaam txujci tseemceeb kuas mej pum tseeb has tas kuv yog ib tug timthawj. 13Kuv puas tau saib mej qeg dlua lwm pawg ntseeg, tshwj qhov kws kuv tsi thov mej paab nyaj rua kuv? Yog kuv ua le ntawd txhum lawm los thov mej zaamtxim rua kuv!

14Zagnuav yog zag thib peb kws kuv npaaj txhij yuav tuaj saib mej, hab kuv yuav tsi thov txug mej ib yaam dlaabtsi le. Qhov kws kuv xaav tau yog mej, tsi yog mej tej nyajtxag. Ruaqhov tsi yog tej mivnyuas yuav txhawm rua namtxiv, tsuas muaj namtxiv txhajle yuav txhawm rua tej mivnyuas xwb. 15Kuv zoosab kws yuav siv txhua yaam kuv muaj hab siv kuv tug dlaag tug zug huv tuabsi paab mej. Yog kuv hlub mej ntau npaum le nuav, mej tseem yuav hlub kuv tsawg dlua nuav hab lov?

16Mej yeej pum tas kuv tsi yog ib lub nraa kws nyaav rua mej, tabsis muaj qeeleej has tas kuv yog tuabneeg muaj lub sabphem heev, kuv tuaj ntxag mej lug ntawm kuv tej lug dlaag. 17Kuv ntxag tau mej lecaag? Qhov kws kuv khaiv ib cov tuabneeg tuaj saib mej, qhov ntawd yog kuv ntxag mej nua lov? 18Kuv thov Titus tuaj saib mej hab khaiv peb ib tug kwvtij nrug nwg tuaj. Puas yog Titus dlaag-ntxag mej ib yaam dlaabtsi lug yuav lawm? Titus yeej tsi laam ua le ntawd! Wb yeej koom ib lub sab, taug ib txujkev, hab ua dlejnum zoo ib yaam nkaus.

19Tejzag mej yuav xaav tas, peb tsuas yog najnub has dlaws peb zaaj xwb. Tsi yog le ntawd! Peb tsuas has lawvle Khetos kuas peb has timntsej timmuag ntawm Vaajtswv xwb. Cov kwvtij kws peb hlub 'e, txhua yaam kws peb ua yeej yog peb ua paab mej kuas lujhlub xwb. 20Kuv ntshai nyobtsaam thaus kuv tuaj txug ntawm mej, kuv yuav pum mej txawv le qhov kws kuv lub sab xaav, hab mej los yuav pum kuv txawv le mej lub sab xaav. Kuv ntshai nyobtsaam kuv yuav pum txuj kev siscaav sistshe, siskhib, npautawg, sabhlub, sisthuam, taugxaiv, khaavtheeb hab tsim kev kubntxhuv. 21Kuv ntshai nyobtsaam lwm zag thaus kuv tuaj saib mej, Vaajtswv yuav ua rua kuv txaajmuag taabmeeg mej, hab kuv yuav quajntsuag rua coob leej kws yaav taag lug tau ua kev txhum hab puab tseem tsi tau tso tej kev phem kev qas, kev ntshaw luas tug, hab kev nkauj kev nraug kws puab najnub ua ntawd tseg.

Currently Selected:

2 Kauleethaus 12: HNJ2022

Highlight

Copy