2 Kauleethaus 11

Paulus Hab Cov Timthawj Cuav

1Txawm yog kuv haslug zoole tug ruag mivntsiv los thov mej ua sabntev noog kuv tej lug. 2Kuv khib txug mej ib yaam le Vaajtswv khib; mej zoo ib yaam le tug nkaujxwb dlawbhuv kws kuv tub qhab ca rua ib tug txivneej lawm, tug ntawd yog Khetos. 3Tabsis kuv ntshai has tas naab tau dlaag-ntxag Evas lug ntawm lub tswvyim phem lecaag, mej lub sab yuav raug muab hloov kuas phem ua rua mej tsi muab sab npuab Khetos ib yaam le ntawd hab. #Chiv 3:1-13 4Vim mej cale txaussab yeem noog cov tuabneeg kws tuaj qha dlua ib tug Yexus kws txawv le tug peb qha; hab mej cale txais yuav ib tug ntsujplig hab txuj moo zoo kws txawv hlo le Vaajtswv tug Ntsujplig hab Txuj Moo Zoo kws mej tau nov peb qha rua mej lawm!

5Kuv xaav tas kuv yeej tsi yog tug kws qeg dlua cov kws mej suav has tas yog cov “timthawj qebsab” ntawd le. 6Txawm yog kuv tsi muaj peevxwm rua saab kev haslug pistsawg los kuv kuj muaj kev txawjntse hab. Peb tub ua txhua yaam txhua tsaav lug qha tej nuav meej kawg le rua mej huv tuabsi lawm.

7Kuv tsi suav nqe dlaabtsi le thaus kuv tuaj qha Txuj Moo Zoo kws has txug Vaajtswv zaaj rua mej; kuv txu fwjchim kuas mej yog cov tseemceeb, qhov ntawd yog kuv ua txhum lawm lov? 8Thaus kuv tseem ua dlejnum paab mej, yog lwm pawg ntseeg xaa nyaj tuaj yug kuv. Yog muab has lug tes cuag le kuv nyag puab le nyaj, kuas kuv txhaj paab tau mej.

9Lub sijhawm kws kuv nrug mej nyob, txawm kuv muaj kev tuncua, los kuv yeej tsi ua ib lub nraa rua leejtwg; ruaqhov cov kwvtij kws tuaj peg Makedaunias tuaj, puab tub nqaa txhua yaam kws kuv tuncua tuaj rua kuv lawm. Yaav taag lug, kuv yeej ceevfaaj tsi tau ua ib lub nraa rua mej, txawm yog yaav tomntej los kuv tseem yuav ceevfaaj tsi ua ntxiv hab. #Filipi 4:15-18 10Kuv paub tas Khetos tej lug tseeb nyob rua huv kuv lecaag, tej kws kuv khaav nuav yuav nrov-nchaa moog thoobplawg huv lub xeev Akhayas le ntawd, tsi muaj leejtwg yuav txwv tau. 11Vim lecaag kuv txhaj has le nuav? Vim yog kuv tsi hlub mej lov? Vaajtswv yeej paub tas kuv hlub mej!

12Tej kws nwgnuav kuv ua, kuv yeej tseem yuav ua ntxiv moog le, kuas puab cov kws has tas yog cov “timthawj qebsab” ntawd txhaj tsi muaj lug khaav has tas puab ua puab tegnum ib yaam le peb ua. 13Puab cov ntawd tsi yog timthawj tseeb, puab yog timthawj cuav. Puab ua num dlaag-ntxag lwmtug hab puab uatxuj ua zoole puab yog Khetos cov tseem timthawj. 14Tej ntawd tsi yog tej yaam kws suavdlawg yuav xaav tsi thoob! Txawm yog Xataas kag los nwg tub txa tau ua le ib tug timtswv ceebtsheej kws muaj fwjchim ci ntsaa-ab. 15Yogle ntawd, txawm nwg cov tubkhai yuav txa ua le cov tubkhai kws ncaajnceeg los yeej tsi nyuaj hlo le. Tabsis thaus kawg puab yeej yuav tau txais yaam kws tsimnyog rua tej kws puab tau ua lug lawm.

Paulus Raug Kev Txomnyem Vim Nwg Yog Ib Tug Timthawj

16Kuv rov has dlua has tas: mej xob xaav tas kuv yog ib tug tuabneeg ruag. Tabsis yog mej ho xaav le ntawd los, thov kuas mej txais yuav kuv taam le ib tug ruag, sub kuv txhaj zoo khaav mivntsiv txug kuv. 17Tej lug khaav kws kuv has nuav tsi yog tej kws tug Tswv kuas kuv has, tabsis kuv has le tug ruag has. 18Vim muaj tuabneeg coob-coob, nyag taug nyag khaav le tuabneeg nplajteb khaav, yogle ntawd kuv yuav khaav le puab hab. 19Mej cov kws ntse heev, mej txhaj ua sabntev noog tej tuabneeg ruag has! 20Mej uv taug ca rua luas yuam mej ua qhev, lossis ntxo mej, lossis cuab hlua tog mej kev, lossis ua saib tsi taug mej, lossis xuas tawgncuav rua mej ntsejmuag. 21Kuv txaajmuag leeg has tas peb tsi muajzug txaus ua taug le ntawd!

Tabsis yog lwmtug muaj cuabkaav khaav le nuav le u, kuv yuav has le kuv yog tuabneeg ruag, has tas kuv los yeej muaj cuabkaav khaav hab. 22Puab yog tuabneeg Henplais nua lov? Kuv los kuj yog hab. Puab yog tuabneeg Yixalayees nua lov? Kuv los kuj yog hab. Puab yog Anplahaas le caajceg nua lov? Kuv los kuj yog hab. 23Puab yog Khetos cov tubkhai nua lov? Yog kuv yuav has le ib tug tuabneeg vwm has, kuv tseem yog ib tug tubkhai kws zoo dlua puab! Kuv tseem ua num khwv dlua puab, kuv tseem raug kaw huv tsev lojcuj ntau dlua puab, kuv tseem raug luas nplawm ntau dlua puab, hab kuv tub yuavlaug tuag ntau zag dlua puab. #Tegnum 16:23

24Cov Yudais muab kuv nplawm tsib zag, ib zag twg yog pebcaug-cuaj nplawg; #2Kev 25:3 25kuv raug cov tuabneeg Loos nplawm peb zag hab raug muab pobzeb ntaus ib zag. Kuv ntsib qhov kws nkoj tawg taag peb zag, hab muaj ib zag kuv poob rua huv havtxwv tau ib nub ib mos. #Tegnum 16:22; Tegnum 14:19 26Kuv taug kev moog rua nuav rua u, kuv ntsib teebmeem lug ntawm dlej nyaab, lug ntawm tubsaab, lug ntawm kuv tsaav tuabneeg, lug ntawm Lwmtsaav Tuabneeg; ntsib teebmeem huv nroog, huv haavzoov haavtsuag, huv havtxwv, hab ntawm tej phoojywg cuav. #Tegnum 9:23; Tegnum 14:5 27Kuv tau ua dlejnum nyaav hab saab heev, ntau zag yeej yoo dlaabndlub, tshaib plaab, nqhes dlej, tiv no, hab labqaab. 28Tsi taag le ntawd xwb, kuv najnub najmo ntxhuvsab vim kuv txhawj txug txhua pawg ntseeg. 29Thaus ib tug tsaugmuas, los kuv nrug nwg tsaugmuas, thaus ib tug poob rua kev txhum, los mob kuv lub sab kawg nkaus.

30Yog kuv yuavtsum khaav xwb, tes kuv yuav khaav txug tej kws qha has tas kuv tsaugmuas npaum lecaag. 31Vaajtswv tug kws yog Yexus Khetos Leejtxiv, Nwg yog tug kws tsimnyog peb qhuas moog ibtxhis, Nwg yeej paub tas kuv tsi has dlaag. 32Thaus kuv nyob huv lub nroog Damaxakas, tug tswvxeev kws ua dlejnum rua Vaajntxwv Aletas tau khaiv tubrog moog zuv tej roojvaag tog nteg kuv. #Tegnum 9:23-25 33Tabsis muaj tuabneeg muab ib lub tawb ntim kuv hab muab kuv tso dlauv ntawm ib lub qhovrais lawv tug ntsaayeej moog rua saabnrau, kuv txhaj tsiv tawm tau ntawm tug tswvxeev txhais teg moog.

Currently Selected:

2 Kauleethaus 11: HNJ2022

Highlight

Copy