2 Kauleethaus 10
10
Paulus Has Dlaws Nwg Teg Dlejnum
1Lug ntawm Khetos lub sab mogmuas hab sabzoo, kuv, kws yog Paulus, thov mej ua tuabzoo noog kuv tej lug. Thaus kuv nrug mej nyob kuv ua lub sab mogmuas, tabsis thaus kuv tsi nrug mej nyob lawm kuv ua tawv rua mej kawg le. 2Thaus kuv tuaj saib mej, kuv thov kuas mej tsi xob ua rua kuv tau ua tawv rua mej, ruaqhov kuv yeej muaj cuabkaav ua tawv tau rua cov tuabneeg kws thuam peb has tas peb coj le tuabneeg nplajteb coj.
3Peb yeej nyob huv nplajteb nuav tag, tabsis peb tsi tawmtsaam le nplajteb tawmtsaam. 4Tej cuabyeej kws peb siv lug tawmtsaam, tsi yog siv nplajteb tej cuabyeej tabsis yog siv Vaajtswv tej cuabyeej kws muaj fwjchim. Peb rhuav tej lug siscaav, 5peb rhuav txhua yaam tswvyim hab kev khaavtheeb kws thaiv tsi pub suavdlawg paub Vaajtswv; peb muab tau txhua tug tej kev xaav hab qha kuas puab txawj tig lug noog Khetos lug. 6Thaus peb pum tas mej nooglug lawm tag, peb maamle rautxim rua txhua yaam kws tsi nooglug.
7Mej tsuas yog saib tej kws nyob saabnrau nuav xwb. Yog leejtwg ruajsab has tas nwg yog Khetos tug lawm, kuas tug ntawd rov ua tuabzoo xaav txug nwg tugkheej, ruaqhov peb yog Khetos cov ib yaam nkaus le nwg hab. 8Txawm yog kuv khaav ntau zog txug qhov kws tug Tswv pub fwjchim rua peb, los kuv yeej tsi txaajmuag hlo le. Lub fwjchim ntawd yog lub kws tsaa kuas mej sawv, tsi yog yuav txu kuas mej qaug. 9Kuv tsi xaav kuas zoole kuv pheej sau ntawv tuaj hem kuas mej ntshai xwb. 10Yuav muaj qeeleej has tas, “Paulus tej ntaub ntawv mas nwg has nyaav hab tawv kawg le, tabsis thaus nwg tuaj txug kag peb lawm mas nwg ua tug nyuas tuag 'e, nwg tej lug tub tsi muaj kuab hlo le!” 11Tug kws has le ntawd, nwg yuavtsum totaub has tas tej lug kws peb sau thaus peb nyob dleb mej hab tej kws peb yuav ua thaus peb tuaj txug ntawm mej ntawd yeej tsi txawv qhovtwg le.
12Peb yuav tsi kaam suav peb tugkheej lossis muab peb pev rua cov tuabneeg kws puab khaav has tas puab zoo dlua lwmtug. Cov tuabneeg ntawd txhoojkum ruag! Puab tsim puab ib tug nrim lug ntsuag puab tugkheej, hab puab txavtxim rua puab lug ntawm puab tug nrim ntawd. 13Tabsis peb cov, peb tsi laam khaav dlhau kev dlhau cai; peb tsuas khaav txij tej dlejnum kws Vaajtswv muab rua peb ua xwb, suav txij tej kws peb tau ua paab mej ntawd huv tuabsi. 14Vim mej nyob rua huv tug nrim kws peb ua dlejnum, yogle ntawd, thaus peb tuaj saib mej hab qha Txuj Moo Zoo kws has txug Khetos zaaj rua mej, peb tsi tau ua dlhau tug nrim ntawd.
15Peb yeej tsi tau hlaa dlhau peb tug nrim kws yog muab lwmtug tegnum coj lug khaav. Peb casab has tas thaus mej txuj kev ntseeg lujhlub tuaj lawm, peb teg dlejnum yuav nthuav dlaav moog rua huv mej suavdlawg, 16sub peb txhaj yuav muaj peevxwm moog qha Txuj Moo Zoo rua lwmqhov kws dlhau ntawm mej nuav moog, kuas peb txhaj tsi khaav txug tej num kws lwmtug tub ua tav nyob rua huv puab dlaim teb lawm.
17Tabsis Vaajtswv Txujlug has tas, “Yog leejtwg xaav khaav, ca nwg muab tug Tswv lug khaav.” #Yelemi 9:24 18Ruaqhov tug kws nwg rov qhuas nwg tugkheej yeej tsi muaj leejtwg fwm nwg, tabsis tug kws tsimnyog fwm yog tug kws Vaajtswv qhuas.
Currently Selected:
2 Kauleethaus 10: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
