Zaˬkaˬliˇ 10
10
Sahˬpaˬ Miˬyehˇ ka kʼoꞈ-eu saˇ jaˇ
1Yeˇ gʼahˇ jiˇ taw uˬ yehˇ jaˆ ni,
Sahˬpaˬ Miˬyehˇ-ahˇ shaˇ geuꞈ-awˬ.
Jaˬ lehˇ lehˇ ma hawˇ-eu mˬ dmˇ,
Sahˬpaˬ Miˬyehˇ neh beh-euˬ meh.
Uˬ yehˇ aˬ yawꞈ neh bi yehˇ-awˇ,
tsawˇ haˬ-euˬ yaˇ yawˬ kawˬ na luꞈ,
nyoeˇ laˇ ni aˬ yawꞈ jahˇ-eu meh.
2Tahˬ pahˬ, shaˆ ma, nyiˇ paˬ deuˬ-ahˇ,
tsawˇ haˬ zaˬ jah-awˇ gʼoe-euˬ kʼawꞈ,
kʼaˇ ehˇ kʼaˇ jeˬ yaw lehˬ tehꞈ meh.
Yuꞈmaˆ dawˬ tsuiꞈ yuˇ doˆ-eu deuˬ,
jaˬ myawꞈ myawꞈ-euˬ loꞈ-ehˇ pyeuꞈ-awˇ,
tiˬ jeˬ-iˬ gaˇ dahˇ maˬ tsoeˬ-a.
Kʼoeˇ miˇ neh miˇ kʼahˬ zaˬ kʼoeˇ deuˬ,
byoˆ-iˇ-euˬ yawˇ yawˇ maꞈ loꞈ-ehˇ,
sheuˬ gʼeh nehˬ-eu gʼaˬ maˬ jawˇ ni,
cah cah-ehˇ shaˬ gaˇ duˇ-eu meh.
3Sahˬpaˬ Miˬyehˇ ehˇ-eu,
“Yawˇ bo-eu yaw sahˇ kʼoeˇ deuˬ-ahˇ,
ngaˇ nui ma pehˇ dui dui luꞈ-awˇ,
aˬ yawꞈ maꞈ-ahˇ ngaˇ kʼehˬ nehˬ ma.
Yuˇdaˆ tsawˇ haˬ ngaˬ-euˬ yawˇ ma.
4Aˬ yawꞈ maꞈ-ahˇ ngaˇ bo saˆ-awˇ,
guiˇ deuˆ-eu mahˬ bi pyeuꞈ laˇ ma.
Ngaˬ-euˬ tsawˇ haˬ-ahˇ uˆ lahˇ-eu,
dzoeˬ dzaˬ-eu sahˬpaˬ sahˬ ma deuˬ,
sheuˬ gʼeh-eu aˬ yuiꞈ aˬ tsu deuˬ,
yawꞈ maꞈ laꞈ kʼoeˇ bi doˆ laˇ ma.
5Gʼaˬ leˇ-euˬ yehˇ, muiˇ-eu deuˬ-ahˇ,
gaˇ ma-ahˇ nawˬ pahˬ-eu loꞈ-ehˇ,
Yuˇdaˆ tsawˇ haˬ gʼaˬ leˇ tehꞈ-a.
Sahˬpaˬ Miˬyehˇ jawˇ-eu miˇ neh,
aˬ yawꞈ maꞈ guiˇ deuˆ-eu kʼaˬ-awˇ,
mahˬ dziˬ-eu muiˇ-eu deuˬ-ahˇ kʼawꞈ,
aˬ yawꞈ maꞈ deuˆ gʼaˬ jiˇ tehꞈ-a.
6Yuˇdaˆ nymˇ jiˇ gʼaˬ bi kʼaˆ-awˇ,
Yoˇsehˆ nymˇ jiˇ ngaˇ ka kʼoꞈ ma.
Aˬ yawꞈ maꞈ-ahˇ gʼawˬ shaˬ gaˬ-awˇ,
iˇ kahˇ sheuˬ kʼoꞈ keuˆ jiˇ nehˬ ma.
Ngaˬ neh maˬ byehˇ dzeh-euˬ loꞈ-ehˇ,
aˬ yawꞈ maꞈ paˇ bi dehꞈ poˆ ma.
Sahˬpaˬ Miˬyehˇ pyeuꞈ-eu ngaˇ-aˬ,
aˬ yawꞈ maꞈ-euˬ Miˬyehˇ ngeuˇ ma.
Aˬ yawꞈ maꞈ neh shaˇ-euˬ shaˇ dawˬ,
maˬ byehˇ ni ngaˇ naˇ haˬ nehˬ ma.
7Iˇsaˬleˬlaˆ tsawˇ haˬ deuˬ-aˬ,
gʼaˬ kʼaˆ-eu yehˇ-ahˇ duˇ leˇ-awˇ,
aˬ gaꞈ dzaˇ uiˇ dawˇ-eu loꞈ-ehˇ,
laˬ kʼaˬ cehˇ-eu jeˬ oꞈ tehꞈ-a.
Aˬ yawꞈ maꞈ gʼaˬ leˇ-euˬ gaˇ kawˆ,
zaˬ deuˬ uˆ deuˬ maˬ ngehˇ leˇ-ehˇ,
Sahˬpaˬ Miˬyehˇ mˇ-euˬ gaˇ-ahˇ,
laˬ kʼaˬ cehˇ nui kʼahˇ shiˇ tehꞈ-a.
8“Ngaˬ-euˬ tsawˇ haˬ-ahˇ ngaˇ kuˇ-awˇ,
tiˬ gaˇ bi uiˬ bi bymˇ laˇ ma.
Aˬ yawꞈ maꞈ-ahˇ ngaˇ ka kʼoꞈ-awˇ,
aˇ hu loꞈ-ehˇ bi behˇ laˇ ma.
9Miˇ kʼahˬ doe ni aˬ yawꞈ maꞈ-ahˇ,
ngaˇ teh dzeh-awˇ bi jawˇ-euˬ kʼawꞈ,
gaˇ mahˇ kaˬ gaˇ jawˇ byoˆ luꞈ ngeh,
yawꞈ maꞈ ngaˬ-ahˇ noeˬ mawˇ tehꞈ-a.
Aˬ yawꞈ maꞈ maˬ byoˆ maˬ laˆ ni,
zaˬ deuˬ nehˬ-ehˇ tiˬ kawˆ loꞈ-ehˇ,
iˇ kahˇ-ahˇ gʼoꞈ doˆ laˇ tehꞈ-a.
10Iˇjiˇtuˆ miˇ kʼahˬ laꞈ kʼoeˇ neh,
Aˬshuˇliˆ miˇ kʼahˬ laꞈ kʼoeˇ neh,
aˬ yawꞈ maꞈ-ahˇ sheuˬ kʼoꞈ laꞈ-awˇ,
yawˬ ha miˇ kʼahˬ-ahˇ bi jawˇ ma.
Giˇlaˆ miˇ kʼahˬ laꞈ kʼoeˇ maˬ ehˇ,
Leˬbaˬnoˬ miˇ kʼahˬ-ahˇ maˬ ehˇ,
miˇ kʼahˬ jawˇ byah jiˇ gaˇ keuˆ ni,
aˬ yawꞈ maꞈ-ahˇ ngaˇ bi jawˇ ma.
11Shaˬ zahˬ laˆ shaˆ yawꞈ maꞈ tsehˆ ngeh,
Sahˬpaˬ Miˬyehˇ pyeuꞈ-eu ngaˇ gʼaˬ,
iˇ luˆ dzeh gaˇ daˇ cuiˇ zuiˆ-awˇ,
naꞈ-eu Niˬlaˇ lawˇ baˬ baˬ ma,
gui coˇ ni ya tsiˇ leˇ tehꞈ-a.
Aˬshuˇliˆ nui ma ga juˬ-awˇ,
Iˇjiˇtuˆ gʼaˬ baˬ-iˇ tehꞈ-a.
12Ngaˬ-euˬ tsawˇ jeuˬ gʼaˬ bi kʼaˆ ma.
Ngaˬ-euˬ dawˬ-ahˇ naˇ haˬ geuꞈ-awˇ,
ngaˬ-ahˇ uˬ duˬ tahˬ tehꞈ-a” lehˇ,
Sahˬpaˬ Miˬyehˇ ehˇ taˬ-euˬ meh.
Currently Selected:
Zaˬkaˬliˇ 10: AHK
Highlight
Share
Compare
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
