Zaˬkaˬliˇ 9
9
Dawˬ peh jawˇ-eu tsawˇ jeuˬ deuˬ-ahˇ yaˇ kʼaˬ daˇ-eu
1Haˬdaˬlaˆ miˇ kʼahˬ-ahˇ maˬ ehˇ,
Daˬmaˬsehˇ meuˬ kʼoeˇ meuˬ maˬ ehˇ,
Sahˬpaˬ Miˬyehˇ kʼehˬ-eu jaˆ meh.
Iˇsaˬleˬlaˆ tsawˇ jeuˬ uˬ taꞈ,
Suˇliˆ meuˬ meuˬ ma kʼoeˇ meuˬ kʼawꞈ,
Sahˬpaˬ Miˬyehˇ-ahˇ taꞈ-eu meh.
2Haˬdaˬlaˆ-ahˇ miˇ kʼahˬ taꞈ-eu,
Haˬmaˆ meuˬ kʼoeˇ meuˬ ahˇ leˇ-ehˇ,
zaˬ siˬ tsawˇ gahˇ ahˇ dui dui-eu,
Duˇlu hawˇ-eu Siˇdoˬ meuˬ kʼawꞈ,
Sahˬpaˬ Miˬyehˇ-ahˇ taꞈ-eu meh.
3Duˇlu-euˬ taˆ gawˬ ziꞈ taˬ-awˇ,
pyuˇ hawˇ-eu shuiˇ pu cu cu kʼawꞈ,
4aˬ yawꞈ kʼaˇ jaˆ-eu jeˬ dawˬ tawˆ,
Sahˬpaˬ Miˬyehˇ yuˇ kʼoꞈ jiˇ-awˇ,
pyuˇ shuiˇ laˆ shaˆ-ahˇ tahˬ dzeh-awˇ,
meuˬ-ahˇ miˬ dzaˬ puiˆ byoˆ tehꞈ-a.
5Kʼoeˇ loˇ pyeuꞈ laˇ-euˬ gaˇ mawˇ ngeh,
Aˬshaˇgaˬloˇ meuˬ guˆ-iˇ-awˇ,
Gaˬzaˬ meuˬ shaˬ zahˬ naꞈ leˇ-awˇ,
Eˇkaˬloˬ meuˬ laˇ baˇ-iˇ-awˇ,
noeˬ tmˬ-euˬ jeˬ byoˆ jiˇ tehꞈ-a.
Gaˬzaˬ meuˬ sahˬ paˬ maˬ baw-ehˇ,
Aˬshaˇgaˬloˇ byoˆ-iˇ tehꞈ-a.
6Aˬshaˬdoˇ meuˬ tsawˇ keuˬ keuˬ-awˇ,
Piˇliˇtiˆ nui ma huiˬ-eu jeˬ,
aˇ saˬ saˬ ni ngaˇ zuiˆ nehˬ ma.
7Shiˬ maˬ dzeˇ-eu shaˬ jiˇ hawˇ-eu,
maˬ dzaˬ kʼmˬ-eu dzaˇ dawˬ tawˆ luꞈ,
aˬ yawꞈ maꞈ maˬ paˇ bi dzaˬ ma.
Kʼaˇ dehꞈ kʼaˇ dzeuˇ-iˇ-euˬ dawˬ tawˆ,
Yuˇdaˆ tsawˇ jeuˬ tiˬ jeuˬ loꞈ-ehˇ,
ngaˬ-euˬ tsawˇ haˬ bi pyeuꞈ laˇ ma.
Eˇkaˬloˬ tsawˇ haˬ kʼoeˇ deuˬ kʼawꞈ,
Yeˬbuˇ tsawˇ haˬ deuˬ-ahˇ duˇ ni,
ngaˬ-euˬ tsawˇ haˬ bi pyeuꞈ laˇ ma.
8Ngaˬ-euˬ miˇ kʼahˬ ngaˇ loꞈ piˇ-awˇ,
iˇ tsehˆ laˇ tsehˆ-eu maˬ bi jaˆ.
Ngaˇ haw tsoˆ-awˇ loꞈ-eu miˇ neh,
kʼehˬ dzaˬ kʼaˆ dzaˬ-eu tsawˇ haˬ deuˬ,
aˬ yawꞈ maꞈ-ahˇ maˬ toeˬ ciˆ-a.
Ziˇoˬ-euˬ sahˬ paˬ
9Ziˇoˬ tsawˇ haˬ laˬ kʼaˬ cehˇ-awˬ.
Yeˬluˇsaˬlehˬ meuˬ-euˬ tsawˇ haˬ,
laˬ kʼaˬ cehˇ-awˇ guˇ dui dui-awˬ.
Naw maꞈ-euˬ sahˬpaˬ oe luꞈ meh.
Aˬ yawꞈ baoˬ kʼahˬ sehˇ huiˬ-eu kʼawꞈ,
nui nahˬ nui yu ahˇ-eu laꞈ kʼoeˇ,
mahˬ tahˬ laˆ zaˬ-ahˇ dziˬ-eu meh.
10Sahˬpaˬ Miˬyehˇ ehˇ-eu,
“Iˇsaˬleˬlaˆ-euˬ guiˇ laˆ lawˬ,
Yeˬluˇsaˬlehˬ-euˬ guiˇ dziˬ mahˬ,
dawˬ tawˆ luꞈ ngaˇ yuˇ byoˆ jiˇ-awˇ,
Guiˇ deuˆ gaˇ geuꞈ-eu kaˆ myaˬ deuˬ,
dawˬ tawˆ luꞈ ngaˇ laˆ cawˆ jiˇ ma.
Naw maꞈ-ahˇ uˆ lahˇ-eu sahˬ paˬ,
miˇ kʼahˬ tsawˇ jeuˬ-ahˇ tsaˬ leˇ-awˇ,
laˆ shaˆ nyiˬ dzeˇ uˆ lahˇ gʼmˇ-awˇ,
Uˇpaˬlaˇ lawˇ baˬ-ahˇ neh naˇ,
mˬ dzeˇ miˇ dzeˇ dzoeˬ keuˆ tehꞈ-a.”
Miˬyehˇ-euˬ tsawˇ haˬ dehꞈ dzaˬ poˆ laˇ-eu
11Sahˬpaˬ Miˬyehˇ ehˇ-eu,
“Ngaˬ neh naw maꞈ-ahˇ dzaˬ taˬ-euˬ,
dawˬ ma saˇ jaˇ shiˬ baˬ da neh,
duˬ kʼahˬ naꞈ gaˇ bi paꞈ taˬ-euˬ,
naw maꞈ tsawˇ haˬ ngaˇ puiˇ pyehˬ ma.
12Aˬ cawˬ neh bi nyehꞈ lahˇ-euˬ kʼawꞈ,
noeˬ tmˬ kʼaˇ za laˇ-euˬ deuˬ-oˇ,
naw maꞈ-euˬ taˆ-ahˇ gʼoꞈ leˇ-awˬ.
Nyiˬ bymˇ bi dehꞈ dzaˬ laˇ ma lehˇ,
iˬ nah ngaˇ dawˬ tsehˆ ngehˬ-eu ma.
13Yuˇdaˆ miˇ kʼahˬ kaˆ poˆ geuꞈ-awˇ,
Iˇsaˬleˬlaˆ kaˆ myaˬ geuꞈ ma.
Ziˇoˬ tsawˇ haˬ mi cehˇ geuꞈ-awˇ,
Heˬlaˬshaˆ tsawˇ jeuˬ-ahˇ deuˆ ma.”
14Aˬ yawꞈ-euˬ tsawˇ haˬ deuˬ kʼoeˇ taˆ,
Sahˬpaˬ Miˬyehˇ doˆ le tehꞈ-a.
mˬ jeˬ tsawˬ tehˆ tehˆ-eu loꞈ-ehˇ,
aˬ yawꞈ kaˆ myaˬ beuˆ leꞈ tehꞈ-a.
Dawˬ tawˆ kʼoeˇ taˆ uˆ lahˇ luꞈ-eu,
Sahˬpaˬ Miˬyehˇ daˇ heh baw-awˇ,
laꞈ oˆ paw neh baw daˆ laꞈ-euˬ,
jaˬ lehˇ lehˇ ma dziˬ laꞈ tehꞈ-a.
15Baoˬ huiˬ-eu Sahˬpaˬ Miˬyehˇ-aˬ,
yawꞈ-euˬ tsawˇ haˬ-ahˇ haw piˇ-awˇ,
aˬ yawꞈ-euˬ tsawˇ haˬ kʼoeˇ deuˬ-aˬ,
muiˇ-eu deuˬ-ahˇ laˆ cawˆ tehꞈ-a.
Jiˇ baˬ yehꞈ-eu tsawˇ haˬ loꞈ-ehˇ,
guiˇ deuˆ luꞈ ngeh yawꞈ maꞈ guˇ-awˇ,
muiˇ-eu deuˬ-ahˇ shiˬ sehꞈ doˆ ngeh,
naˬ bo-ahˇ dahˬ-eu lawˇ-euˬ shiˬ,
lawˇ guiˇ kʼoeˇ taˆ shehˆ doˆ gʼeh ngeh,
yoeˇ kʼaˇ le gaˇ duˇ leˇ tehꞈ-a.
16Aˇ nah kʼoeˇ nah keuˆ le ngeh jawˇ,
yawˇ bo-eu gʼaˬ yawˇ yawˇ maꞈ-ahˇ,
haw piˇ-awˇ ka kʼoꞈ-eu loꞈ-ehˇ,
aˬ yawꞈ-euˬ tsawˇ haˬ kʼoeˇ deuˬ-ahˇ,
Sahˬpaˬ Miˬyehˇ ka kʼoꞈ tehꞈ-a.
shuiˇ uˬ kʼoˆ kʼoeˇ taˆ bya luꞈ-eu,
poeˬ-eu kʼaˬ lo sehˇ deuˬ loꞈ-ehˇ,
aˬ yawꞈ-euˬ miˇ kʼahˬ kʼoeˇ uˬ du,
aˬ yawꞈ maꞈ yaw shehꞈ bya tehꞈ-a.
17Aˬ yawꞈ-euˬ miˇ kʼahˬ kʼoeˇ kʼahˬ-aˬ,
aˇ naˆ haw muiˬ-eu miˇ kʼahˬ nga.
Dzaˬ la gʼo cehˇ aˬ gaꞈ dzaˇ uiˇ,
zaˬ guˬ aˬ lmˬ bi mehˇ tehꞈ-a.
Currently Selected:
Zaˬkaˬliˇ 9: AHK
Highlight
Share
Compare
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
