Zaˬkaˬliˇ 11
11
Nui ma huiˬ-eu deuˬ coˬ-iˇ-euˬ
1Leˬbaˬnoˬ-oˇ, laˇ gʼoˆ pah-awˬ.
Nawˬ-euˬ shuˬ liˇ aˇ bawˇ kʼoeˇ deuˬ,
miˬ dzaˬ bi puiˆ sehꞈ-eu gʼaˇ duˬ,
nawˬ-euˬ laˇ gʼoˆ pah dzeh jiˇ-awˬ.
2Guˇ baˬ luˇ aˇ bawˇ deuˬ ngoeˇ-awˬ.
Shuˬ liˇ aˇ bawˇ coˬ jiˇ-euˬ meh.
Muiˬ-eu poeˬ-eu aˇ bawˇ kʼoeˇ deuˬ,
byoˆ-iˇ cawˆ-iˇ jiˇ shaw-euˬ meh.
Baˬshaˬ tsuiꞈ kaˆ aˇ bawˇ deuˬ-oˇ,
sahˬ kʼaˆ kʼaˆ ma teˬ byoˆ-euˬ gaˇ,
myaˆ biˇ doˆ-awˇ ngoeˇ dui dui-awˬ.
3Sahˬ paˬ sahˬ ma geuꞈ luꞈ-eu deuˬ,
yaw shehꞈ kʼahˬ sehˇ byoˆ jiˇ-euˬ gaˇ,
noeˬ shaˬ dui dui-awˇ ngoeˇ luꞈ meh.
Yawˇdaˬ gawˆ taw sahˬ kʼaˆ kʼahˬ jeˬ,
byoˆ laˇ-aˬ, jawˇ zaˇ shaˬ laˇ-awˇ,
aˇ laˬ jaˬ shiˇ deuˬ joeˬ luꞈ meh.
Yawˇ bo yaw sahˇ nyiˬ sahˇ
4Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Sehꞈ-eu gʼaˇ duˬ cu taˬ-eu yawˇ deuˬ-ahˇ bo-eu gʼaˬ geuꞈ haw sheˇ. 5Zeuˇ-eu tsawˇ haˬ deuˬ yawˇ kʼoeˇ deuˬ-ahˇ sehꞈ kʼawꞈ, yaˇ kʼaˬ daˇ gaˇ maˬ ya daˬ-a. Aˬ yawꞈ maꞈ shaˬ jiˇ sehꞈ ahˬ-awˇ, ‘Nga maꞈ smˇ muiˬ muiˬ laˇ-euˬ miˇ neh, Sahˬpaˬ Miˬyehˇ-ahˇ ja ceuˬ ma’ lehˇ ehˇ-eu meh. Yawˇ kʼoeˇ deuˬ-ahˇ bo-eu yaw sahˇ gʼaˬ kʼawꞈ, yawˇ kʼoeˇ deuˬ-ahˇ gʼawˬ shaˬ maˬ gaˬ-a. 6Miˇ tsaˬ zaˬ tiˬ gʼaˬ-ahˇ-iˬ ngaˇ gʼawˬ shaˬ maˬ paˇ gaˬ ma. Tsawˇ haˬ dawˬ tawˆ luꞈ, uˆ lahˇ-eu sahˬ paˬ sahˬ ma deuˬ-euˬ laꞈ-ahˇ ngaˇ a nehˬ ma. Sahˬpaˬ sahˬ ma kʼoeˇ deuˬ miˇ tsaˬ tahˬ kʼawˇ heu-ahˇ kʼaˇ kʼehˬ mawꞈ-eu kʼehˬ ngeh, tiˬ gʼaˬ-ahˇ-iˬ ngaˇ maˬ ka kʼoꞈ nehˬ.”
7Yawˇ gaꞈ-eu deuˬ neh sehꞈ-eu gʼaˇ duˬ zeuˇ taˬ-euˬ yawˇ deuˬ-ahˇ ngaˇ bo-euˬ ma. Daˇ cuiˇ nyiˬ cuiˇ ngaˇ tuˆ tehˬ taˬ-euˬ ma. Tiˬ cuiˇ-ahˇ “Gʼawˬ shaˬ gaˬ-eu jeˬ” lehˇ myahˇ-awˇ, biˬ cuiˇ-ahˇ “nui ma gm-eu jeˬ” lehˇ myahˇ-euˬ ma. Kʼoeˇ naˇ, yawˇ kʼoeˇ deuˬ-ahˇ ngaˇ bo-euˬ ma. 8Yawˇ bo-eu yaw sahˇ smˇ gʼaˬ nehˬ-ehˇ ngaˇ maˬ tsaˬ leˇ-ehˇ, ba la tiˬ siˬ laꞈ kʼoeˇ aˬ yawꞈ maꞈ-ahˇ ngaˇ byehˇ dzeh-euˬ ma. 9Kʼoeˇ naˇ, yawˇ yawˇ maꞈ-ahˇ heu loꞈ-ehˇ ehˇ nehˬ-euˬ ma. “Ngaˇ naw maꞈ-ahˇ maˬ paˇ bo ma. Shiˇ-eu deuˬ ehˬ-ehˇ shiˇ luꞈ-uˇ. Cawˆ-iˇ-eu deuˬ kʼawꞈ, ehˬ-ehˇ cawˆ-iˇ jiˇ luꞈ-uˇ. Maˬ shiˇ-ehˇ dzeˇ-eu deuˬ kʼawꞈ, tiˬ gʼaˬ tiˇ gʼaˬ shaˬ jiˇ dzaˬ luꞈ-uˇ.” 10Kʼoeˇ naˇ, Sahˬpaˬ Miˬyehˇ neh miˇ kʼahˬ tsawˇ jeuˬ dawˬ tawˆ luꞈ-ahˇ dzaˬ taˬ-euˬ dawˬ ma saˇ jaˇ bi cawˆ-iˇ-eu gʼaˇ duˬ, “Gʼawˬ shaˬ gaˬ-eu jeˬ” lehˇ kuˇ-eu daˇ cuiˇ kʼoeˇ ngaˇ ngawˬ kʼehꞈ-euˬ ma. 11Kʼoeˇ miˇ neh, dawˬ ma saˇ jaˇ kʼoeˇ hmˬ kʼoeˇ ngeh nah cawˆ-iˇ-euˬ meh. Yawˇ gaꞈ-eu tsawˇ haˬ kʼoeˇ deuˬ ngaˇ mˇ gaˇ haw tsoˆ taˬ-awˇ, ngaˬ neh mˇ-euˬ jeˬ laꞈ kʼoeˇ Sahˬpaˬ Miˬyehˇ dawˬ ngehˬ luꞈ-eu nga lehˇ haw siˬ-euˬ meh. 12“Naw maꞈ nui ma keuˆ naˇ, ngaˬ-ahˇ gʼaˬ gaˇ poeˬ biꞈ laꞈ-awˬ. Nui ma maˬ keuˆ naˇ, tiˬ jeˬ-iˬ maˬ ngeuˇ-aˇ” lehˇ, aˬ yawꞈ maꞈ-ahˇ ngaˇ ehˇ nehˬ-euˬ ma. Kʼoeˇ ngeh, ngaˬ-euˬ gʼaˬ gaˇ poeˬ pyuˇ maˇ byaˆ smˬ tseˇ byaˆ aˬ yawꞈ maꞈ biꞈ laꞈ-euˬ meh.
13“Pyuˇ kʼoeˇ deuˬ Uˬ duˬ tahˬ nymˇ nymˇ ma laꞈ kʼoeˇ pyuˇ jeˬ hmˬ duˬ-ahˇ dawˆ ahˇ-awˬ” lehˇ, Sahˬpaˬ Miˬyehˇ ngaˬ-ahˇ ehˇ-eu meh. Kʼoeˇ naˇ, ngaˬ-ahˇ geuˇ ni biꞈ laꞈ-euˬ gʼaˬ gaˇ poeˬ pyuˇ maˇ byaˆ kʼoeˇ smˬ tseˇ byaˆ yuˇ-awˇ, Uˬ duˬ tahˬ nymˇ nymˇ ma laꞈ kʼoeˇ pyuˇ jeˬ hmˬ duˬ-ahˇ dawˆ-euˬ ma. 14Kʼoeˇ naˇ, “Nui ma gm-eu jeˬ” lehˇ kuˇ-eu daˇ cuiˇ kʼoeˇ ngaˇ paˇ ngawˬ kʼehꞈ-awˇ Yuˇdaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ yaw kaˬ-ahˇ jaˆ luꞈ-eu, mehˇ nmˇ yaw kaˬ nui ma gm-eu jeˬ bi cawˆ-iˇ-euˬ ma.
15Kʼoeˇ naˇ, Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Gaˇ dahˇ maˬ tsoeˬ-eu yawˇ bo-eu yaw sahˇ tiˬ poˆ paˇ geuꞈ haw sheˇ. 16Yawˇ bo-eu yaw sahˇ tiˬ gʼaˬ-ahˇ kʼehˇ-awˇ, ngaˬ-euˬ yawˇ bi bo-eu lehˇ gʼeh-eu ma. Ehˇ kʼawꞈ shaˬ zahˬ naꞈ-eu yawˇ deuˬ-ahˇ ngehˬ maˬ gʼeh-ehˇ, byoˆ-iˇ-euˬ yawˇ maˬ poˆ kʼoꞈ-eu uˬ taꞈ, naˇ luꞈ-eu yawˇ-ahˇ maˬ laˆ taˬ ni, jawˇ saˇ doˆ-eu yawˇ deuˬ-ahˇ kʼawꞈ dzaˇ maˬ bi dzaˬ-aˇ. Tsuˇ dui dui-eu yawˇ deuˬ-ahˇ aˬ yawꞈ sehꞈ dzaˬ-awˇ, kuiˇ sehˬ toˆ paˆ dzeh tehꞈ-a.
17Yawˇ yawˇ maꞈ-ahˇ byehˇ dzeh taˬ-eu,
doeˇ dui dui-eu yawˇ bo-eu gʼaˬ,
shaˬ dui zahˬ dui ya dui tehꞈ-a.
Myaˆ nuiˆ aˇ maˇ paw nuiˆ hawˇ-eu,
aˬ laꞈ-ahˇ mi cehˇ deuˆ luꞈ-uˇ.
Aˬ laꞈ kʼoeˇ koˆ-iˇ buꞈ-iˇ-awˇ,
aˇ maˇ paw nuiˆ behꞈ tsehˆ luꞈ-uˇ.”
Currently Selected:
Zaˬkaˬliˇ 11: AHK
Highlight
Share
Compare
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
