PODA SIAN RAJA SALOMO Bindu 19
Bindu 19
Hasortaon tu angka na pogos. Hapistaran mangajari anak 1-29.
1Tagonan do halak na pogos, na marpangalahohon hadaulatonna sian halak pardila getegete, hape na oto do ibana. #Poda 28:6 2Nang roha na so marparbinotoan, ndang denggan, jala manang ise na bojok marpangalaho, sai na mardosa do. 3Haotoon ni jolma sandiri mangago dalanna, hape dompak Jahowa do marmungutmungut rohana. #And 3:39 4Hamoraon do patorop aleale, alai anggo halak na parir, gari alealena tumadingkon ibana. #Poda 14:20 5Ndang tagamon lias sian uhum halak sitindangi pargapgap, jala ndang tagamon malua manang ise na mangkatahon gabus. #5Mus 19:16-21; Poda 19:9, 21:28 6Torop halak papujipuji halak na sangap, jala luhut halak maralealehon baoa pardengganbasa. 7Luhut hahaanggi ni na pogos mangkagigihon ibana, lam alealena ma tung so mandao sian ibana; manang ise na mangulasulas hata ndang marlaba. #Poda 19:4 8Manang ise na manuhor roha hapantason, mangkaholongi hosana, manang ise na mangaradoti parbinotoan, dapotan tua. 9Halak sitindangi pargapgap, ndang tagamon lias sian uhum, jala mago do halak na mangkatahon gapgap. #Poda 19:5 10Ndang tama sampe hadoharon tu halak na oto, lam anak somang ma tama gumomgom indukna. #Poda 30:22 11Roha habibiton ni jolma palambat ibana tarrimas, jala hamuliaonna do i umbolus hasalaan. 12Tudoshon pangorong ni babiat do piripiri ni raja, alai songon nambur tu duhutduhut do anggo habasaronna. #Poda 16:14-15, 20:2 13Mardapotdapot do jea dibahen * anak na oto tu amana, jala songon + panirisan ni udan nene do badabada ni ina. #* Poda 10:1; + Poda 27:15 14Jabu dohot sinamot do teanteanan sian ama, alai sian Jahowa do anggo pardihuta na pantas marroha. #Poda 18:22 15Halosohon mambahen tarnenep modom, jala roha na marlanggelangge, ingkon rapar do. #Poda 10:4, 20:13, 23:21 16Manang ise na marateatehon tona, mangaramoti hosana do, alai sai na mate do manang ise na neang marpangalaho. #Poda 3:21, 16:17; Luk 11:28 17Na pasali Jahowa do manang ise na mardenggan basa tu na pogos, jala Ibana mamaloshon denggan basana i tu ibana. #Ps 41:2-4; Poda 14:31; Mat 25:40; 2Kor 9:6 18Sai ajar ma anakmi, ai tarparbaga dope muba rohana; alai unang tubu roham naeng mambunu hosana. #Poda 13:24; Eps 6:4 19Halak parpiripiri bolon mambahen siaeonna; alai molo tung dipalua ho ibana sai lam tu tambana dope pangajaran. 20Sai tangihon ma hata sipaingot jala jangkon pangajaran, asa gabe pistar ho di hasusuda ni bohalmu. 21Pasimpar do sangkapsangkap di bagasan roha ni baoa, alai sangkap ni Jahowa do na marsihohot. #Job 23:13; Ps 33:11; Poda 16:9; Jer 10:23 22Pinangido ni roha ni jolma do habasaronna, jala tagonan do halak na pogos sian baoa pargapgap. 23Biar mida Jahowa parohon hangoluan, jala halak na sabam roha marsonangsonang do, ndang manginona jea tu ibana. #Poda 14:27 24Dipohul halak sigurbak ulu do nian indahanna, gari mambahen tu pamanganna ro losokna. #Poda 26:15 25Mangonai tangan ma ho tu halak pangelesi, asa anggiat marbisuk halak na oto, sai ajar ma halak na pantas marroha, asa tamba parbinotoannai. #Poda 21:11 26Manang ise na mangarupa amana, tung pola dipalaholaho inana, i ma halak sibahen haleaon dohot haurahon. 27Ale anaha, molo dipasadi ho tumangihon pangajaran, jadi lilu ma ho sian angka hata parbinotoan. #Jak 1:22 28Halak sitindangi parroha na jat palea uhum, jala pamangan ni halak parjahat mamolgak hageduhon. 29Naung pinadiri hian torutoru di halak pangarehe, jala lipatlipat tu tanggurung ni halak na oto. #Poda 26:3
Currently Selected:
PODA SIAN RAJA SALOMO Bindu 19: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.